Sta vota voleramu ma vi parramu ‘e n’esimiu personaggiu d’a storia ‘e Catanzharu e d’a storia ‘e l’Italia…Salutamu ccu n’applausu ‘u professora Settembrini…. Settembrini:"Buonasera,buonasera a tutti…." Intervistatura:"Eccu ‘u professora e’ ddo ‘u Nord ,e precisamente ‘e Napuli, ma sapa parrara perfettamente ‘a lingua nostra…percio’ non avimu bisognu ‘e interpreti…Allora professora volimu parrara ‘nu pocu ‘e vui,ppe’ chiddi cchi ancora non vi canuscianu?" S:"Allora…ca mi chiamu Luigi Settembrini ‘u sapiti….vidimu…studiavi Legge e poi Littiri sempa a Napuli….Fhui puru ‘u fhundatura ‘e ‘ncuni societa’ segreti,pecchi’ ‘e chiddi tempi staciamu lavorando all’unita’ ‘e l’Italia…." I:"Si’ ma volimu dira chi c’entrati vui ccu Catanzharu?" S:"’E si’,si’…n’attimu ….ci stacia arrivando…Allora…’nto 1835 vincivi ‘u concorsu a cattadri ,e mi trasferivi alu Liceu ‘e Catanzharu….insegnavi Retorica alu Liceu….a propositu…c’e’ ancora stu Liceu a Catanzharu?…non e’ ca u jettastivu, comu fhacistivu ccu ‘u Teatru e ccu palazzu Serravalle?" I:"No,no e’ ancora ddha duva u dassastivu….sulu ca mo’ c’e’ na scola elementara….U Real Liceu cchi diciti vui non c’e’ cchiu,mo’ ccu ‘a Repubblica i cosi cangiaru …." S:"’A Repubblica?Ma non eramu d’accordu ca l’Italia avia ‘e essera ‘na monarchia?Cchi ‘nda fhacistivu dei Savoia?Non e’ ca vi pulizzastivu sulu pecchi su originari d’a Francia?" I:"No…no chissa e’ n’atra storia….ma parramu ancora ‘e vui…" S:"Ah…Allora, a Catanzharu cci stetti tantu tempu…fhundavi ,comu vi dissi ,na societa’ patriottica, studiavi l’origgina do ‘u noma d’a Citta’…e parravi puru ‘e Catanzharu ‘nte unu dei libbri cchi scrissi “Rimembranze”….Ah!Chiddu morzeddhu….u salatura….i frisulimiti…." I:"Ppe l’idei cchi aviavu fhustivu puru in galera!" S:"Certu,pero’ a prima vota mi ‘nda fhuijivi a Malta e a seconda vota cchi mi pizzicaru avia ‘e fhujira ‘nta i Stati Uniti,sulu ca preferivi ma vaiu in Irlanda." I:"E pecchi’?" S:"Ma vi para ca doppu tanti anni cchi passavi a Catanzharu,non m’imparavi ca aiu ‘e stara ala larga ‘e chiddi cchi hannu i coluri russu ‘e blu?" |