| Kovskrifenn 14 |
| Dy Yow 30/5/02: An lowarther, Dennis Cornish, neb a bresentyas towlenn der an bellwolok yn Kernow veu danvennys dhe bryson hedhyw rag diw vlydhen ha hanter. Kablus yw a omsettyans reythek war maw trethek bloedh y oes ha den a ugens bloedh. An lys a gavoes y vos angablus war tri charj erell. Ev a settyas dalghenn war an dhew hag i owth oberi dh'y lowarth yn Dewnans. An kas veu klywys dhe Lys Lagha an Gurun dhe Garesk. |
| Dy Gwener 31/5/02: Lies milyow a dus y'ga vannow Volkswagen a dheu dhe Dewynn Pleustri an bennseythun ma rag "Run to the Sun". An ralli VW ma yw onan an brassa hwarvosow blydhenyek rag an dre gans milvilyow a beunsow kemmerys gans negysyow y'n kyrghynn. Hevlyna, y fydh brassa drefenn bos an goel ow pesya bys yn dy Meurth. |
| Dy Sadorn 1/6/02: Yth esa truesi dewblek hedhyw wosa Kernow eth dhe Twickenham rag dew finel rugbi. An para 'seythow' a waynyas le y'n finel erbynn Pow Evrog mes a gollas 42 - 26. Ena, an para 'yn-dann ugensow' veu fedhys gans Hampshire 29 - 14. Y koedhvia gwell rag Kernow drefenn bos unn assay skorys gans Ian Hambly (Truru) ha Luke Collins (Rysrudh). Yth esa gwaytyans a dhri nebes piwasow tre wosa an para meur dhe fyllel yn y assayans kavoes le y'n finel. |
| Dy Yow 6/6/02: An Diskwedhyans Ryal Kernow a dhalleth hedhyw wosa blydhen gales rag an diwysygneth ammeth. Tiogyon re borthas kaletterow min ha karn gans meur anedha ow tos pur nes dhe'n amal y'ga negys. Dug Karlo a Gernow a wra dos yn unn skoedhya anedha. Kekeffrys ha henna, hevlyna yw y gynsa a-vel patron an Kowethas Kernow Ryal. Ev a gemmeras an lesh dhiworth an Vyghternes sowsnek an vlydhen ma. Kyns es mos dhe Bonsrys, ev a dhe Lyskerrys rag igeri mirji nowydh an dre. Ena yth a dhe Vosveneghi rag igeri an klavji nowydh ena. Klavji Bosveneghi a'n jeves kans kans gweli ha deg warn ugens. Ynwedh, yma asrann shyndyansow byghan neb a vydh igerys a-dro dhe'n klokk. Wosa henna, ev a dhe'n Diskwedhyans. Y fydh an pympes vysyt ragdho. Ev eth an kynsa prys 1970. Herwydh usadow yma meur dh'y weles dhe'n Dhiskwedhyansva. An kreslu a dhiskwa hanter kans blydhen war dhe lergh ha hanter kans blydhen derag dre dhevnydh a gopi an Tardis dhiworth an dowlenn bellwolok 'Doctor Who'. War an lynn y fydh skath-rosow neb a veu gwrys rag gweres evredhogyon yn unn byskessa. An diwettha dydh yw dy Sadorn. |
| Dy Meurth 11/6/02: Skol Budehaven yn Bud yw dasigerys gans an Dug a Gent hedhyw. Nans yw diw vlydhen ha hanter, tan euthek a wrug distrui an skol yn-tien. Dastrehevys veu orth kost a £5 milvil. Dy Lun 10/6/02: An argh mona rag anynkleudhya kollji Glasnedh res eth dhe'n poynt hanter-fordh. An fond re gavas £30 mil peuns rag palas remanansow an tyller ma dhe Bennrynn. Govenek yma dhe dhalleth an ober a-var mis Est. Dy Sul 9/6/02: Yma sorr dhiworth lies kenedhleger Kernewek awos bos baner Pow Sows ow nija yn lies sorn y'n eur ma awos an pelldroes. Krodhvolansow re beu dannvenys dhe'n gwerthji Intek Communications yn Hellys. Gwir yw leverel meur a dus ow nija an baner ma yn Kernow yn unn skoedhya an para Sowsnek, hag yma lies baner an Unyans ynwedh drefenn bos pennbloedh owrek an vyghternes Sowsnek. Baner Sen Piran re beu kudhys yn dann liv a rudh, gwynn ha glas. |
| Dy Sadorn 15/6/02: Le es unn seythun yw lemmyn kyns es dalleth Goel Yowann yn Pennsans. An goel ma a syns ynno donsyow prif, fer, dewisyansow mer-ges, tanweythyow ha keskerthow. Hevlyna, an poester yw gorrys war arbennikter an gonisogeth Kernewek. Dalleth a wra nos Wener 21ves mis Metheven, hag a bes bys y'n dy Sul 30ves mis Metheven. Yn mysk an re a yllir aga gweles yw Dalla, Treys Noeth ha dohajydh gans stus-uskis war Gernewek. Dy Meurth 11/6/02: Dy' Yow an 6ves mis-Metheven y teuth Charlys Dug Kernow dh'agan bro. Yn kynsa y teuth dhe Lyskerrys. Dr Ken George a bareusis skrifenn braster A2, ha'n geryow ma warnedhi: "Lyskerrys a dhynnergh penn-stat Kernow". Ev a omworras yn tyller may fia gwelys gans an Dug, ha'y wortos moy es our. Pan dheuth Charlys wor'tiwedh, y kerdhis war ewn war tu ha'n skrifenn, ha leverel: "I suppose that is Cornish" (My a dyb bos henna Kernewek). An Dr George a worthybis: "Yes, it means 'Liskeard welcomes Cornwall's head of state" (Ya, styr yw: Liskerrys a dhynnergh penn-stat Kernow). Orth hemma an Dug a bowesas, ha'n Dr George a besyas: "... for you, Sir, are our head of state in Cornwall, and not your esteemed mother" (rag dha vos, Syrra, agan penn-stat yn Kernow, mes nyns yw dha vamm a-vri). Ena an Dug a wovynnas: "Do you actually speak Cornish?" (a gewsydh Kernewek dhe-wir?) ha Ken a worthybis: "Yes, Sir, fluently." (kewsav, Syrra, yn freth). "I am very pleased to hear it" (lowen ov y glywes) yn-medh Charlys, ha mos dhe-ves. (gans Dr Ken George) |
| Dy Sul 16/6/02: Goel Porthpyra veu igerys de gans dewdhen a-vri. Richard Madeley ha Judy Finnegan a bresent diskwedhyans dohajydhweyth der Ganel Peswar, hag y'n termyn yw passys a wrug aga henwyn aswonnys a-hys Breten Veur gans an diskwedhyans der ITV henwys "This Morning". I a igoras an goel drefenn i dhe bywa nessa-chi a-hys an arvor dhe Dallann. Dy Sul 16/6/02: Dydh Murdoch o de dhe Rysrudh, byttegyns y hevelis bos droglamm awos ha'n gewer ha'n pelldroes. Kynth esa keskerdh sewenek y'n myttin, meur a dus a fystynnas dhe'ga chiow rag gweles an fit peldroes Pow Sows. Ena... pan worfennas an gwari, y hwrug glaw. Dy Dul 16/6/02: Towl dhe ynnia Kernowyon dhe dylli dre gartenn-smart rag gwasoniethow yw yn-dann wodros. Hwithrans re gavoes bos pur es terri geryow-dremenn ha kavoes derivadow. |
| Dy Meurth 25/6/02: Kan bopp re bia rekordys yn tiwyethek. Nyns yw Kembrek ha Sowsnek... mes Kernewek ha Kembrek. An ganores yw Gwenno Saunders dhiworth Kembra, mes hy thas yw Kernow a-vri, Tim Saunders. Hi a dhyska Kernewek dhiworto ha kewsel Kembrek gans hy mamm. An sidi yw dyllys gans 'Crai' ha gelwys 'Mor hud' (Mor hus). Yma govenek dhyn a weles moy dhiworth Gwenno kyns es pell. GOSLOW ORTH AN GAN OMMA. Dy Yow 20/6/02: "Omdowl Kernewek a verow a'y sav" yn-medh Bardh Meur Yowann Bolitho (gwel skeusenn). Nyns eus marnas bagas byghan a dus y'n dydhyow ma owth omdowla, mes dhe'n Kuntelyans Kemmyn Blydhenyek an Orsedh, lavarow a veu kewsys yn unn skoedhya. An keth kuntelyans a glywas bos 470 bardh lemmyn ha bos an hwarvos 'Dehwelans' sewen meur. Yn hwir, yma towl dhe bareusi 'Dehwelans 2' rag 2004. Kyns bardh meur, Jori Ansell, a leveris yn unn boesa bos res gorra an taves yn-dann Jartour Europek rag Yethow Nebes Kewsys. |
| Dy Sul 30/6/02: Skant ny allav y grysi, mes nans yw unn vlydhen lemmyn, my a dhallathas an wiasva ma. Lowen ov leverel bos hwans dhymm a besya rag dewdhek mis moy keffrys. Rag gul bri an hwarvos ma y fynnav settya challenj dhywgh. Skrifewgh erthygel rag Nowodhow Kernow ynter 300 ha 400 ger war destenn nowydh (kepar ha Senedh Kernow, Klavji Kernow West, etc). My a garsa dyllo dew skrif, ha'n re a dhewisav a wayn piwasow dell syw: 'Mammyk Ker' (sidi a lies ilewydh Kernewek) ha 'Tide' gans bagas gwerinek Kernewek nowydh henwys 'Eden'. Yma y'n sidi ma kan skrifys gans Richard Gendall henwys 'Armoriow'. Dannvonewgh erthyglow dhymm omma kyns 1a mis Hedra. Dy Yow 27/6/02: Nans yw pymp blydhen, bush bras a Gernowyon a gerdhas dhe Loundres yn unn govhe a Vyghal Yosef An Gof neb a ledyas rebellyans ena nans yw pymp kans blydhen ha pymp. Hedhyw, bagas a vet arta dhe dhelow An Gov yn Lannaghevrenn rag y govhe unnweyth moy. Rag diskwedhes agan bos Kernowyon ha nag on Sowson, tus yw gelwys dhe dhrehedhes gwyskys yn krys-t Brasil drefenn i dhe fedha Pow Sows y'n pelldroes. An hwarvos a dhalleth dhe hanter wosa seyth y'n gorthugher. |
| Dy Sul 7/7/02: Maw a vervis de wosa ev dhe goedha y'n dowr ogas dhe Treth an Logh, Aberfal. Yth esa ev yn skath gans y das, neb a lammas y'n avon dh'y selwel. Troaskel an klavji veu gelwys, mes an maw, 6 bloedh y oes, a'n jeva pystigow an penn hag a verwis wosa ev dhe dhrehedhes orth Klavji Trelysk yn Truru. An droglamm a hwarveu dhe gwarter dhe beder eur y'n dohajydh. Dy Yow 3/7/02: Komedi nowydh Dawn French a wra devnydh an taves Kernewek. An gevres yw settys yn Porthlogh yn Kernow ha'n hwedhel a dhiskwa bywnans a venyn gethreythek trigys a-wartha soedhva an post y'n dre. Byttegyns, ny vydh yn Sowsnek hebken. Yma rann hag ynni Rod Lyon (is-Bardh Meur), Pol Hodge ha Ben Craze. Ben o studhyer yn klas Kernewek Loundres nans yw deg blydhen ha lemmyn ev a gemmer ran veur y'n komedi. Yth esa Polin Prys a-dro rag fylmya keffrys a-vel kusul an yeth.Dell waytyn y hwelyn an dowlenn kyns es pell. Moy>> Herwydh Polin, an kynsa tra leverys gans Dawn dhedhi o "dydh da" hag yn Kernewek. Hi a leveris keffrys hi dhe vywa yn Kernow ha hi yowynk. Meur ras dhe Gytto Wilson rag an derivadow. Dy Mergher 2/7/02: Konsel Kernow re votyas skoedhya kynnik a senedh ranndirek, mes nyns yns ervirys yn kever selya honna war ranndir 'seyth-kontethek' . I a dhewisas hemma dhe guntellyans arbennik an seythun ma mes a boesas war an tybyans a gavoes kusul an werin ynwedh. Skoedhys veu 48 vot dhe 4. |