撰文 : CHAKRA
晨咁早0820機飛金邊，0550到機場集合…領隊係一名短髮豪氣女子!!(呵呵，不過唔係人地估的「肥婆」!) 咁早在機場，竟然都撞到人，不過都係騎呢人…包括正版巴士阿叔乜乜東，同埋人地兩個「同事」…一男一女、本無瓜葛、但天未光聚首赤立角機場間麥記的一個落角位!!??嗯…有d野!! 呀，講番豪華「臀」!! 坐左大約兩個半鐘頭飛機，終於見到柬埔寨國度喇!! 從高空望落柬埔寨，只係見到大片泥黃水同「綠」地交錯…就好似平時收feed睇到類似孟加拉水浸咁既畫面，實際到而家我都搞唔清楚當時到底係咪水浸?! 但根據往後幾日的經驗，當中應該有d係耕地，有d係真係大片水「乙水」… 總括而言…柬埔寨真係幾落後的一個國家…
落地了，柬埔寨天氣又熱又濕，對於我地兩個大汗包，唔駛點郁都全身出汗，期待的冷氣旅遊巴…oh no，開了冷氣也及不上我的小小大口仔電風扇呢!? 柬埔寨時間比香港慢一個小時，到達時只係當地早上大約10點鐘，首個行程就係金邊例遊：
施漢諾親王皇宮：係施漢諾辦公務、居住、同接待外賓的地方。(話時話，施漢諾個老婆，真係好鬼死似英女王!!)
金銀閣寺：由五千幾塊銀瓦片仿照吳哥窟的巴昂神廟建造(係咩?導遊有講咩?) 殿內收藏好多古蹟寶物，包括鑲鑽的金佛同17世紀的翠玉菩薩(真係綠色架!不過唔俾影，無得睇)
獨立紀念碑：紀念1953年法國結束在當地統治，施漢諾宣布獨立而建。碑上有一百條蛇(蛇係柬埔寨之吉祥物)(就係在呢塊碑前…我發現我地一位「特殊」的團友，並最後成為眾人的話題)
金塔山(Watphnom)：金邊的名字Phnom由此而來。柬埔寨係大片平原為主，本來就好少山，金塔山唔係真山，相傳係古時一位「邊婆婆」為了供奉四尊小佛，而集合大眾力量，由人手堆砌出一座金塔山。 首日行程就咁就完了，輕鬆得很。
順帶一提，柬埔寨人有午睡習慣，即中午回家午餐後，可以小睡片刻到三點多至再開工，所以我地都有得趁午睡時間回酒店沖個靚涼… 嗯…我地入住金邊的五星級Inter-Continental，正!!