<EnJoY LiFe 82> - Lotte World
行完個水族館，開始有啲攰，同埋超級眼瞓。
我地係個商場到行左陣，買左張靚靚聖誕卡，就入左去間餐廳仔到食野，
唔識睇 menu，求其叫左個芝士辛辣麵，同餃子湯，都幾好味 ~
食完野見仲有啲時間，去左 outlet 街行下，先再去樂天世界。
啲鋪頭賣的野都唔平呀，完全買唔落手，只係係街邊買左個朱古力棒棒食咋。
之後，我哋黎到樂天世界。呢個主題公園係室內，感覺其實有點奇怪，設施都唔係整得特別靚。
我地首先玩左個 Merry-Go-Round ~
之後，Mandy 好想玩海盜船，我同 Vilia 就陪佢去玩，其實排緊隊個陣已經超勁驚喇，
架海盜船真係拋得好高，我玩海洋公園個個都已經好驚架啦，呢個仲要高過海洋公園個個好多，
真係超級淆底呀！上到去好彩坐左中間個排，對面有個韓妹未開始就驚到喊左出黎喇，
不過我都好驚，全程都掩埋左對眼同埋用盡力尖叫，唔知點解 fing 左好多野都未停，
個心都跳埋出黎。唔知係咪唔夠訓加上太驚，玩完之後好唔舒服，有啲想嘔......
之後，淨係玩左個茶杯，連碰碰車都無玩到，等佢地排隊玩碰碰車個陣，
又好唔舒服，又好凍，真係頂唔順，send左個sms俾好朋友訴苦！
一天黑就即刻凍左好多，我地係樂天玩到八點左右就走人 lu。
之後，返番明洞食野，啱啱好趕得切食明洞水餃，個蒸水餃真係好好味呀！ ^_^
食完野，好多鋪頭都已經收左，周圍擺左好多攤擋，行左陣就返民宿 lu。
我地住六樓，要行樓梯上去，好彩老闆已經幫我地搬左啲行李上房。
間房都幾簡陋，不過個暖暖地板真係好正。今日實在好攰喇，
係佢地兩個落左去上網個陣，我已經訓著左 lu，連佢地番黎都唔知，哈哈！
That's my life! =D
VienneTTa 11-December-2008
-------------------------------------------------------------------------------