Karjalane lehüt

Karjalane bibliotečkane

Tädä lehüttä izännüiččöü

GeoCities

Šielä missä...

Šielä missä külä ennen
Polostaziin jago muada,
Šielä missä jogohine
Iččieh varoin telmi-ruado,
Missä ülen omua šuattih
Kaikki talohukšet pienet,
Missä kaikin eris ruattih -
Šielä kolhoza nüt lieni.

Missä üksinäne talo
Muada čebrai adrazella,
Ühtehistä pelduo ruatah
"Ravdazella hebozella".

Šielä missä mežat ennen
Kažvatettih luoštoheinie,
Kaikkie šuvrda plavnie müöten
Leibä kažvav nüt, kuin šeinä.

Šielä missä kevhä ijän
Muada vuograi kulakolda,
Muat nüt kaikki ruaduačetah
Udarnikoin brigadoilla.

Rugehešša

Troppua tallottuo müöt' aššut,
A kunne - ei niä šilmä.
Šie midiä, tovarissa ruis?
Jo kažvuan jätät milma!

En niä läbi koržiloin,
Šinne-go päin mänen?
Tuvlda evle, tüvni on
Pellolla i šiämellä.

Üöksüin kuingi. A vet tiälä
Hüppeliin mie ennen...
Tähkät vatkutetah piällä,
Milma tunnuššellen.

Mivh päin jüvin šilmäzet
Diivuijen kiirotetah.
Ruiskukat, ünnäh sinizet
Lehtüzie pirotetah.

Kaččokkua enämbi. Nin mi!
Mivn tüöndi komjačeika.
Nüt olen šefa teilä mie
I toin teih varoin žneikan.

Vet vaibuv šelgä čirpin vuoh
Tiän koržie lümmütellä.
Ka i tüöndi zavoda tiän luoh,
Mašina andua teilä.

Kažvakkua leivät vägövät,
A linnoissa kuin i teilä,
Kažvetah boiko i lujetah
Toizet pellot meilä.

I kažvamma müö rinnakkeh,
On ümbäri nin vällä,
On ihaššunda pellolla
I hengipaikan piällä.

Päiväne hieštü. Vihma liev.
Nävütäh pilven rannat.
Nin kuinbua tovarissa ruis,
Šie äijän leibiä annat?

R'uvhat

Külän taguana, Kamiška-jovuolla,
Missä ruis on i kukkazin duvhu,
Ildapuoleh ših šieliellä lovalla
Lapšet hüpätäh kizuamah r'uvhua.

Ollah veššelät piälöistä kandoih...
Ev ni ühellä igäviä läššä...
Pannah kruvgah i perretäh randah,
Moni figurua kizašša täššä.

On mih kizašša vägüzie panna.
Brihat! Väliämme valmis kuin ois!
Šeizov kirikkö. Künillä ando -
Kerdah kirikkö kruvgašta pois!

Nu i Pet'ka! Kuin hüviin plukkai!
Ei, šie eliäkkö hiitruičie šielä:
Lendi kruvgašta vain nellä štukkua,
Nu, a viiješ jäi papiksi vielä.

Midä pappi? I šillä voit andua...
Čilkua puvtilleh kükillä niškah!
Brihat! Nugua nüt butilka pangua -
Viinanke kruvgašta viškuan.

Lapšin nagranda küläh šuat kajuov.
Šielä mužikat poigie jo havkutah:
Omavällällizet! Niät mi on hajuo!
Pimieh šuat šielä r'uvhinke pavketah.

< Karjalane bibliotečkane

< Karjalazella lehüöllä (suomeksi / po-russki / in English)