لحظة وداع

وش حيلة اللي ما غفا جفنه النوم ... يومين ما شاف الحبايب بعينه

ساعة فراق ساقها شي مقسوم ... يوم القدر قاسي وفاقد حنينه

محتار لكن ما يبي يكثر اللوم ... منهو على فرقا حبيبه يعينه

وش حيلته من بعد ما صار محروم ... من غاليٍ حبه سكن به رهينه

كل ما تذكر صورته طاح منجوم ... واطلق على سود الليالي ونينه

وش له بدنيا كلها حزن وهموم ... موته ولا لحظة وداعٍ حزينه

صاح بظلام الليل يا صاحبي قوم ... بافتح لك اسرارٍ بقلبي دفينه

سهران بعدك ما غفا جفني النوم ... يومين ما جاني ولا شفت عينه