愛情篇

其實安安咁大個女都只係愛過兩個人，一個我同佢最終都冇拍過拖，因為．．．發覺同佢有啲地方始終唔夾。而另一個呢．．．我同佢拍咗拖一年多少少，有好開心嘅時候，但亦有好唔開心嘅時候。

回憶呢兩段感情，安安會覺得好甜，亦會覺得好痛。甜-當然係因為身邊有人愛錫自己、支持自己、體諒自己;痛-郤因為兩段情都令我受到傷害。

安安係一個自信心好低嘅人，所以佢哋對我嘅肯定同關懷簡直係安安自我定位嘅來源。但佢嘅猶疑不決、拖拖拉拉、拖泥帶水都令我好困惑，最終佢同我講唔一齊，曾經令我唔知點去面對，一味咁逃避。而佢決絕嘅分手，令我嘅自尊跌落地，佢嘅一腳踏兩船、移情別戀，毫不留情嘅漫罵...更令我迷失，令我再企唔返起身。

到今時今日，安安仍然可以話你知，對佢安安已經再無愛情，但郤有友情，如果有一日佢結婚，佢請我去觀禮的話我一定會去;而佢呢...安安對佢仲有感情嘅，但佢係我心目中又的確已經人格破產，所以點我都唔會同返去一齊。其實安安有時都覺得自己幾變態，當自己唔開心嘅時候，好明顯安安會好想佢陪自己，但又明知自己唔會再同佢一齊，咁即係點?玩過tum過嗲過就算?呢個又唔係安安一貫嘅做人處事方法噃。

你問安安而家對感情對男朋友嘅睇法，安安都好迷茫，安安其實都幾想拍拖，因為有人愛錫嘛，況且我啲朋友都話我係好嗲人果隻，係要搵人比我嗲。但另一方面，安安又會好怕再付出之後再受傷害。好矛盾呀~~不過我相信神會為我安排嘅...不過我相信我好難再輕易相信承諾，因為當感情要變嘅時候，任何承諾都只係空言，我又唔可以拿承諾去追討感情，十指緊扣又唔可以代表啲咩。既然一切都唔可靠，無謂去期望，因為期望越大失望便會越大。