Oold ni-js

Ha leu,

14 januari 2001 Wat is d'r allemoal gebuurt? Ie least ut op ut internit. Dusss.

Grandioze CD-presentatie

2 December was ut zowiet: de CD-presentatie! Geheel volgens Gedreagt Oe! traditie wörn de CD a 9 moand noar de opnames vri-j e-geem. En det zal'n uleu weet'n ok!

Speciaal vuur disse geleangheid had Hutten de ganze looze leug e-haald um ruumte te maak'n vuur een mega feest. N'n paar waangs as podium, 10 meter tap van Bonte Peerd, klede langs de muur'n, zeikgötte en zitpott'n op de varkenschure an e-slött'n, etkroam d'r in en ut fees kon begin'n.

As vuurprogramma had'n wi-j ut Open Diekerhooks Kampioenschap Kloemp'n. En umdet Diekerhookers nogal lui bint, was de kloempbane gen 20 meter mar 16 meter. Diekerhooks dus. Noa een woare ofvalrees, woerbi-j kloempers mekaar an de bene trökk'n, de kloomp'n verkeerd umme an ha'n, mekaar van de bane drukk'n en oondertussen ok nog onmeundig hard ging um zo snel meugelijk wier bi-j zien wachtende bierglas te kom, ging de hoofdpries noar een Sploder, te weten Martijn Toorneman. De pries bestun uut een beker en honderd gul'n, die an de bar kon wor'n ummezet in een reis kats van disse planeet.

Tied vuur een stuksken meziek. Gerrianne Meijerman, die kan d'r wat van. De deerne had de zwoare taak um ut volk noar ut podium te lok'n. Iederene weet a lange det ut an heur zing'n nit lig, want det kan ze better as de Zangeres Zonder Maan.

En toen was doar opeens die mistery guest die hoge in de nok van de looze oaver ut volk hen kek. Noh ja, kek... Hij had een zwarte balk vuur de oong zodette onherkenbaar was. Iederene mog roan wie die rare gast met die rode puntmutse en mijter was. Ut blek Sinterkloas te wean! En ut is pas ech fees, as Sinterkloas is gewees. Of zo. Noa een nummer e-speld te he'm, was ut Kloas ok e-lukt um hökkelend en vallend ut podium te bereik'n. Ok Eertjes Bets en Dieka wörn d'r bi-j e-haald, die beide wat ondersteuning neudig had'n um ut podium op te kom'n. Dieka umdette, lo'we ma zeng'n, de jongste deerne nit meer is, en Bets umdet, lo'we ma zeng'n, ut a late op de oamd was. Dusss. Ma preaken, det kon Bets nog wa! Bets en Dieka had'n de ere um as groot-oefenruumte-bezitter de eerste CD in ontvangst te nem'n van Kloas. Noe nog een CD-speller.

En natuurlijk wör'n de oamd wieter e-vuld met een daverend optreen en de halsgeater met völle bier.

3 December, de telefoon van Hutten geet. N'n nit nader bi-j naam te neum jong. "Heb ie misschien nog een portemonnee e-veun? Den lig waarschijnlijk achter de auto's of in ut lange grös." Ja, den was al e-veun. Effen later, telefoon. N'n nit nader bi-j naam te neum deerne. "Heb ie misschien nog een beehaatje e-veun? Den lig waarschijnlijk in ut lange grös of in de caravan achter de looze." "Wat vo moate zeg ie?" "(...)" De caravan ok mar effen n'n schoonmaakbuurte geem.

29 september 2000 Ie heb van die tie'n, dan heur ie niks meer van zo'n bende as Gedreagt Oe! Wat leu neumt det zommerstop, wi-j neumt ut luiheid.

Toch is d'r wal ut een en ander gebuurt. Zo hef Erik Wechstapel en Erik van Beeldman ut vuur mekaar e-kreeng det wi-j d'r twe-j groepies bi-j hebt. En ofgelopen zoaterdag heb wi-j zelfs n'n oamd e-speld met publiek d'r bi-j! In Lierderholthuus had'n de Buffels n'n Buffelfeest e-organiseerd. Wi-j heb mar n'n betje bespoard op oons veurwark, want met die gordientjes had'n wi-j nit alleene van ut optreen n'n vuurwark e-maakt, mar ok van de keet woer wi-j spöl'n. Dusss.

Enneh, ja, die CD, die kump d'r an.

6 april 2000 Ut geet duur! Gedreagt oe bi-j Jovink, want wi-j spölt doar. En dan heb ik ut natuurlijk oaver 14 april in Splo, of all pleeces. Dus kom vrog, want hoe minder nuchter, hoe meer vreugd.

26 februari 2000 Bin'nkort goat wi-j begin met ut ofmixen van de CD en dan kiek't wi-j wa wieter. Det was ut dan wier vuurlopig, ik goa noar ut land van de Foster.

21 februari 2000 Wi-j goat verhuuzen! Det wil zeng, ut adres van disse parchtige pagina. Vanof noe zal ut ni-js alleene te veen wean via http://come.to/gedreagtoe. Pas dus oene snelkoppeling effen an, want hier veen ie alleene nog mar oold ni-js. Ie zal't zeen det die pagina e-sponserd wordt, want wi-j heb al oonze schaarse ducaten hard neudig vuur oonze CD-opname, die nog heel effen op zich löt wachen.

5 februari 2000 Jaaaahhh, ut is zo wiet! Gedreagt Oe! zit in de studio! En nit zo mar, wi-j zit doar um n'n CD op te nem'n. Eenen dag heb wi-j d'r inmiddels op zit'n en volgende wekke mut de opnames kloar wean. Det det zo lange möt duur'n, det kump duurdet sommige leu d'r zo völle wille van hebt, det ze bepaalde nummers wa vief keer oaver wilt (möt) doan. Wi-j hebt ut zo noar oonze zinne, doar in de studio/varkenshok in Vor'n, wi-j kunt doar alles krieg'n van die kearl behalve ziene vrouwe. En des noe jammer.
De offiesjeele presentatie van de CD zal nog wa ongeveer dre-j moand op zich loaten wachen, want doarvuur geet Bieleman de CD eers a promoten in ut buutenlaand. En a-j dan toch oaver de grenze goat, dan mar geliek zo wiet meugelijk vot. Dan he-j al die aandere buutenlaan' ok meteen e-had.

Ie begriept det de CD van Gedreagt Oe! zeer gewilde schiefkes zalt wean. Dus as wi-j d'r a vaste ene vuur oe an de kante möt leng, dan zeg det mar effen in n'n meeltje. Wi-j weet nog nit precies wat ze möt goan kossen, mar wi-j had'n iets in gedachen van tussen de vief en viemdartig gul'n. Mar dan he-j ok wat. N'n oonderzetter, kasboomversiering en a-j d'r twee koopt, he-j n'n bril um de zonsverduustering te bekiek'n. En ie kunt um in de CD speller druk'n, dan krieg ie muziek! Heel apart.

5 januari 2000 Ehm, zundagmiddag 9 januari van vieve töt neenge bi-j de Stadskelder in Hoolt'n. Vertel ut oe dochters ok!

2 januari 2000 Gelukkig, ni-jjoar! Wi-j heb ut wier e-red. Den eersten januari heersen n'n woare griep edipemie, mar den was bi-j de meesten an 't ende van de middag a wier vot. Wat wi-j, det was wier n'n daverend fees, doar bi-j Bonte Peerd. Ene D.B. kwam an 't begin van de oamd met ut wieze advies: "Alloh, ie mut bier dreenk'n want ie mut zo nog spel'n!" Geliek hadde. Ut völ te korte optree'n ging wier mooi. Ut volk kwam steurig korter bi-j ut podium, dus det was n'n good teken. Of de muziek stun nit hard genog.

As 't good is mut wi-j trouwens zundagmiddag 9 januari a wier spel'n. Dit keer bi-j de Stadskelder in Hoolt'n. Nog heel effen oonder vuurbehoud, mar alles lik d'r op det det wa duurgeet. Dus zörg de-j d'r wier bi-j bint!

24 december 1999 Geet uleu det ok a zo de strotte uuthang, det millenniumgedoo? 't Lik wa det alles met ut millennium te maak'n hef. Zi-j verkoopt oe millenniumsjampanje, millenniumveurwark, millenniumoondergood, millenniumkarsbal'n, ja zelfs millenniumstoete. Alsof ie det tot ut volgende millennium wal'n bewaar'n. Vun ie noe ok det ut noe mar is of e-leupen mot wean met det millennium?
WI-J NIT!
Want oolejoarsoamd stoat wi-j bi-j Bonte Peerd. Op ut podium, wal te verstoan. Mar det is dan ok de leste keer. Disse eeuw.

En nem ut d'r nog effen van met de karsdaang!

26 augustus 1999 Ut blif nog effen stille, tenminsen as ut an Gedreagt Oe! lig. Wi-j heb n'n paar optreens mön ofsloan umdet wi-j zo onmeunig druk bint, det hool ie nit vuur meugelijk.

Mar oondertussen goat wi-j duur met oefen, want ie weet ok wa det det wa neurig is, onittah. Wi-j zit de leste tiet wa vol met de inspiratie vuur ni-je nummers. Woer die inspiratie vûdan kump, is nit helemoal duudelijk. Beeldman zeg van de eier, Bert dech uut de flesse, Holmer zeg dette stopt is met denk'n, Bieleman is altiet a zo wazig de-j d'r gen touw an vaste könt knup'n en Jos denkt det ut iets te maak'n hef met de earpel van Smaal'n Herman. Hoe dan ok, de nummers vleegt zo snel uut de instrument'n det oonze secretaresse Dieka gen kaans zut um ze in det tempo op bladmuziekpapier te zet'n. Zi-j vreug oons dan ok of wi-j nit iets langzamer kon' spöl'n. "Nee Dieka, det könt wi-j nit." Mar det gif niks want d'r is d'r toch genene van oons die muziek kan leazen. Wi-j bint van mening det det meer iets is vuur de doov'n in ut bejoar'ntehuus. "Ooh Dieks, mu-j is leazen. Det geet wa hard he?" "Joa Mina, miene brilgleaze sloat d'r van an." "Zet dan oen zunnebril ok op, det schelt zo völle..."

Ie heurt d'r nog wa meer van. As t' good is.

23 juli 1999 Zoaterdag bin ie d'r natuul'k wa bi-j in Hoolt'n, onittah. Wi-j stoat doar as darde bende op Schure-oamd. Vuur oons kump Blind en Skeeter Beeter, noa oons bint doar die leu van Cold Shit wier. En weas d'r bi-j want wi-j heb wat good te maak'n!

Les op die fuif bi-j Kuut war'n wi-j oons zelf nit. Wie wi-j dan wa war'n? Ahum. Helaas was gitaren Bert verhinderd duur een akeligheid wat gelukkig nog good is of e-loop'n.

Ut fees begun met Cold Shot. Doarnoa zal'n wi-j spel'n, mar mossen wi-j det noe wa doon of toch mar nit noe Bert d'r nit was? Lange twiefel'n, oondertussen Kroepollie op e-trommeld (de helfte was d'r a want d'r was wat te zoep'n, de rest zat elders an de flesse) um oons te vervang'n en toen toch mar beslött'n um ene in plaats van twe-j sets te spöl'n. Met Diederik Bronsvoort van Cold Shot / Kroepøllie as invaller. Ie begriept, det kan nit good goan. Oonder ut spöl'n now en dan effen zeng wat ut volgende akkoord was en zo heb wi-j oons d'r duurhen e-wosselt. Komplimenten vuur Diederik, want ut was gewoon klasse hoe hij nummers metspöl'n die hij nog nooit eerder had e-spöld met leu woer hij nog nooit eerder met had e-spöld. Of zeg det noe meer oaver Gedreagt Oe!? De konsentraatsie was ieder geval wa weg en dan wordt ut a gauw bagger. Gelukkig bint de meeste fens nog a doof en heurt ze doar niks van. Wat det betreft, oonze manager zal is wat vaker möt'n probeer'n bi-j de bejoardentehuuze.

Mar zoaterdag is d'r wier veurwark!

4 juni 1999 Tjongejonge, niks te verteln of zo? D'r gebuurt ok weinig onittah. Ja, det optreen bi-j Jovink in Loarne woer oonzen ooln drummer Jan definitief scheit hef of e-nom (awier!) en halverwege ut optreen van ut podium worn of e-sloane duur oonzen ni-jn drummer Gerwin. Hij had toen nog nit zo völle podiumervaring (alleene nog ma n'n paar keer podiumduken) dus wat was hij bange... En a helemoal toen ut volk begun te schreeuw'n um n'n drumsolo. Mar ja, toen mos hij wa, kats alleene. Toen hij mar eenmoal in de gange was, toen ging 't wa. Ut beest begun steurig hadder te houwn. Die jongs van Jovink stun ok neus ut podium um hem an te moedigen, mar noar verloop van tiet ging ut den drummer van eur toch stoomp te hard op zien drumtrommels met schoonmoodervel'n. En Gerwin ziene biernoarbin'nschoefgleuve worn steurig grötter, d'r kwam gen einde an.

Oh ja, den fuif in 't Hoolterbrook is nit in 't Hoolterbrook mar in Diekerhook bi-j Kuut in de schure, zo as ut d'r noe uut zut. En Koolt Snot kump ok.

16 maart 1999 Eindelijk is ut wier zo wiet. Uleu zal'n allemoal wa arg beni-jt wean noar de trommelkunde van oonze ni-je slagerij. Det war'n ok n'n paar organisators van grote mega-concerten, en zo heb wi-j n'n paar grote contracten kun'n ofsluut'n! Jammer vuur oons det op die grote contracten de bedragen nogal klein uutval'n, mar ja. Ie weet, as ze oons te velle uutbetaald, dan geet ut vuurwark nog hadder knappen as det wi-j kunt spel'n, en det kan nooit de bedoeling ween. Mar kiek dus mar gauw op de Scheurlieste.

20 februari 1999 Groot ni-js!

De meesten van uleu zal'n a wa lange weet'n det oonze drummer Jan Steegink d'r met op is e-hool'n. En woerumme dan? Nah, hij worn d'r n'n betje völ te druk met. Den jong mut völle tiet stekken in ziene boerderi-je. Völ te völle! Mangs vun'n hij grös inkoel'n nog belangrieker as oefen, dus dan wee-j wa hoevölle. Det was vuur oons n'n naar berich. Ut optreen bi-j de Wippert was dan ok zien laatste optreen, want hij hef zien drumsjek en de trommels an de wilgen e-hang. Gelukkig bint det nit zulke grote beume.

Mar hoe mut det noe wieter met Gedreagt Oe!? Met drummer is ut al nit te strak, dus zoonder drummer wordt ut helemoal n'n zooitje. Wi-j hebt d'r effen oaver noar e-dach. Beeldman wal wa plee-bekken, want misschie kunt de leu um dan wa verstoan. Jos had nog n'n digineandertalen drumkomjoeter op zoolder ling, misschie det wi-j doar wat met doon kon'n. Nah, wat wi-j d'r met kon'n was den digineandertalen drumkomjoeter tegelieke met det plee-bekken duur de WC hen trekken.

Want ut geval wil det Diekerhook nog meer drummers hef! En doar heb wi-j d'r ene van adopteert. Den jong (want det is ut) heet Gerwin Holmer, ie weet wa, doar bi-j de mölle. Wi-j hebt um nog nooit heur'n drum, det zal moandag vuur ut eerste gebuur'n, mar ziene buur'n hebt a duuzend keer an de telefoon e-hang det det gehouw is mos ophool'n, en det was vuur oons n'n good teken.

En nog meer ni-js.

W-j proat noe a wa meer as n'n half joar oaver n'n CD opnem'n. Wi-j heb beslött'n det wi-j det goat uutstel'n tut november van dit joar, zodet den Kloas of den Karskearl de oole leu de stoepen op ut lief kan jaang met die zoetzurige decemberliedjes van Gedreagt Oe!. En wieter verwache wi-j det wi-j oe binkort wier wat kunt vertel'n oaver optreens die d'r an zit te kom'n, dus hoal oons in de gaat'n!

9 januari 1999 Nah, hoe asse det vuur mekaar hef e-kreeng, ik weet ut nit, mar oonze Bert hef n'n jonge deerne weet'n te produceer'n! Bert en Fenny, gefulsiteerd heur, knap e-doane. Ofgelopen donderdag hef hij den kleinen Vera vuur ut eerste loaten schrikken (of zalle det a eerder hem e-doane...?) toen de deerne de oong lös dee. Die bint vuurlopig nog nit op mekaar uut e-kek'n dus van oefen en spöln zal vuurlopig wa nit völle kom.

2 januari 1999 Wi-j wilt oe allemoal ut allerbeste wensen vuur ut komde joar en wat d'r ok gebuurt in 1999... Gedreagt Oe!

Ut n-jjoar wier oaverleaft? Ut bier nit duur ut zelfde gat noar buut'n hen loat'n kom as woer ut noar binn ging? Det is dan al wier n'n good begin, onittah.

13 december 1998 Net wier n'n betje bi-j e-kom van det optreen in Diekerhook en dan mu-j wier noar Loarne um Gedreagt Oe! te zeen en heur'n. Ie komt d'r ok nooit van of. Mar good, ut is n'n twi-j'n kasdag en dan he-j geliek n'n mooi excuus um nit noar oene schoonleu te goan.

A-j noe nog nit weet woer as wi-j mut spel'n, dan bi-j vaste gen Wippert-veteraan. Mar wie is det noe nit. D'n tienden Kerstrock van de Wippert begint um veer uur 's-middaangs en is um tien uur 's-oams of e-leup'n. Ut programma zut d'r as volgt uut:
Skeeter Beeter, Vuur, Kilkenny Cats, GEDREAGT OE!, Curio.
Wi-j mut um acht uur begin'n, dus zorg d'r vuur de-j d'r ech uuterlijk zes uur bint. Dan he-j nog tiet um genog mood noar de schone te dreenk'n um voluut met oons met te blear'n. Tut 26 december bi-j de Wippert.

11 oktober 1998 20 November!
Zorg d'r vuur de-j d'r wier bi-j bunt, want dan geet ut wier gebuur'n. Gedreagt Oe! zal dan wier n'n poging doon um ut volk net zo gek te maak'n as det Jan van Derk wordt asse mar twe-j minuut'n tiet hef um n'n paar kloomp'n te koop'n bi-j Rieki van de bakker. As oe det genog zeg, dan weer ie ok de-j zeker mut kom kiek'n. As oe det niks zeg, dan mu-j eers mar is noar Rieki van de bakker.

21 september 1998 Det hef lange e-duurt, mar noe is d'r dan toch wier ni-js. En wat vor ni-js... Wi-j zal't vetjoar nog wier te zeen en te heur'n wea bi-j ut Boonte Peerd. En ie weet, det is oons alles, en de leaver heel wat weert. Woeneer det precies gebuur'n zal, is nog niet bekend. Zo gauw det bekend is, ku-j ut leazen in de Scheurlieste. Onittah.

En oondertussen bint wi-j nog steurig gangs um optreens te krieng buut'n Diekerhook. Misschien geet det nog luk'n in oktober, en aans zal't wa volngd joar wor'n.

25 juli 1998 Noe ut dan toch nog n'n betje zommer is e-wor'n, heb wi-j geliek ma beslöt'n um n'n zommerstop in te lassen. Ja, det doo-j ok nit in 'n harfs, onittah. En wieter... wi-j goat dan noe eindelijk serieus plan'n maak'n um vuur de gein n'n CeeDee op te nem'n! Zodet de leu dan de meugelijkheid kriegt um noar Gedreagt Oe! te luster'n zoonder ting die köppe an te mön kiek'n. Joa, wi-j hebt ut wa bes vuur met uleu. Woeneer det geet gebuur'n en hoe en noar wat voor subtropisch eiland as wi-j doarvuur ofreist en of d'r dan ok bier wot e-dreunk'n, det is allemoal nog niet bekend. Mar ie heurt d'r nog wa meer van.

1 juli 1998 Nah, det was mie wa wier n'n fees, doar in 'n Diekerhook. Met völle hoogtepunt'n en hier en doar n'n leegtepunt. Vuur ut spel'n eers n'n rondje met n'n minitrekker duur de tente um ut volk te waarschuw'n det wi-j d'r an komt. Gekleed in kunsmesbuultjes, ja zelfs Beeldman (det koss'n nog wa trek'n).

Ut absolute hoogtepunt was wa det AB, den gitaris, oonder ut speln an n'n touwtje hoge in de nok van de tente wön'n e-takeld. Mooi man, wat n'n uutzich in al die gevulde gebit'n! N'n nummer later kwam ok a ut leegtepunt; toen zak'n um de bokse of. "Det was de bokse van mie va..." Ut volk kon toen wa geliek zeen dette ut nog nit in de bokse hadde doane. Nee, mar toen was ut volk wa wakker (nit alleene de deerns).

Later wön'n de kunsmeszekke die an ut plafon hang nog lös e-trök'n en kwam d'r n'n lading papiersnippers noar beneen. Een zak wol toen nit lös, mar doar wus ut publiek later wa road met, a koss'n det nog wa wat meute. D'r moes d'r zelfs ene vuur twe-j meter boam ut publiek an n'n strotouwtje hang! Ja, a-j op ut podium stoat, zee-j ok wal is gekke dinge.

Wat ok wa mooi was, was det oonder ut nummer "Bi-j Aaldrik an 't schap" de belangriekste leu die doarin vuurkomt, precies dee'n wat meer as twe-j joar e-leene a op e-schreem was. Ie weet wa: "Doargins zit Henkie Hoefman, hij kik een betje stroef man, de jongs van Ulfman lingt doar". Nah, bi-j det leste kon'n wi-j zo n'n meter nøs ut podium wiezen. Doar lea den jong van Ulfman! En iederene weet wa det det nit was of e-sprök'n, want hij lea doa ok a wa vuur ut optreen.

Beeldman hef nog effen n'n variant op crowd-surfing uut e-veun: Druktevaar'n. Den zwoarsen van oons sprung in n'n rubber bootje boam op ut publiek! Gen woonder dette d'r de eerste keer duurhen zak'n. Noh ja, a-j mar veurwark könt loat'n zeen. Gen veurwark van Tip, want det braand en rookt wa hard, mar knappen dut ut nit.

En ie weet ut he, a-j nog gen T-shirt hebt...

22 juni 1998 A zenuwachtig vuur ut komde wiekend? Moandag en Dinsdag ok a vri-j e-vroang bi-j oen baas met ut excuus de-j ut ut bedrief nit kunt andoon um nog meer schade an te richen as de-j normaal a doot? En disse wekke ok a zo druk de-j hoaste vergett'n wa'n det d'r ok nog argens van die leu an ut voetbal'n bint? Nee, mar dan geet ut wa good met oe. Ut Diekerhooks fees kump d'r wier an.

14 juni 1998 Net wier n'n giganties geslaagd optreen achter de rugge. Ut personeelsfees van Jos zien wark, in Riessen nog wa! Met mekaar kreeng wi-j det volk van de toafel, in de beene, duur de kneene, uut de zaal, in de zaal en wier an de toafel. Ut ging d'r van.

Det was dan ut uutprobeer-optreen vuur oonze ni-je toer, de KUNSMESBUULTJES TOER: 75% Rok & Rol, 25% nat-uur-opwindende waarde. Den begint pas ech 27 juni op ut Diekerhookse fees, dus zorg de-j d'r wier bi-j bint. Ennnnnn, d'r komt wier
ni-je T-shirts!
A-j snel bint, ku-j nog kiezen uut verschil'nde moaten ok. Dus klik noe hier, hiernøs of hierboam (ja, ie kunt d'r nit umhen) en nit vergetten um oe naam, adres en telefoonnummer te vermel'n, hoevelle en wat vor moate. Zi-j kost mar twe-j tientjes en ie kunt ze ophaal'n bi-j ut Diekerhooks fees of bi-j ene van de bendeleen thuus. Dus a-j noe snel van oe loat heur'n, loop ie op ut Diekerhooks fees as een van de eersen met zo'n gigantisch ni-j T-shirt.

Wat Woodstock zo'n dattig joar e-leane was, det is Diekerhooks fees ieder joar. Dus wi-j maakt d'r wier n'n heel spektakel van, den 27 juni doar in de tente. En natuulk hewwe ok wier n'n heel'n bult ni-je nummers e-schreem en nit e-schreem mar gewoon in de kop e-stampt en e-leend en e-jat. A-j ma skik hebt, en det hewwe. N'n paar van de teksen van die ni-je nummers ku-j noe a veen op de Teksen pagina. As det gen primeur is... (Ahum, Aaldrik, die hang ie wal effen in 't cafe onitta.)

Is det noe moeilijk, zo'n nummer schriem? Noh, a-j ech nit meer wat weet, dan loa-j Bert Steunbarg mar wier n'n dag hen wark'n goan bi-j oonzen sponser, ie weet wa, Hut'n Henk en Ebbe, en dan he-j wa wier wat. Kiek, dette doarnoa zelf nit meer in stoat is um det nummer met te spel'n, det mu-j d'r mar vuur oaver he'm. Noh ja, hij dan.

Eindelijk heel good ni-js. De Groepies geeft zich bloot! As ut noe gen mooi weer wordt dan weer ik ut ok nit meer.

Ut steet nog nit in ut menuutje hier links van oe, mar d'r is noe n'n PRIESVROAGE! En wat voor ene... Det mu-j toch ech mar is effen probeer'n.

De leu vroagd oons wal is of wi-j a CD's hebt. JAAAA!!! Van Jovink, AC/DC, Normaal enzovedan. Mar van Gedreagt Oe! nog nit dus. Wi-j hebt now effen nit zo velle tiet um d'r ene op te nem, dus noe vroag ik oe: Bint d'r gen ielegale opnames? Dan wilt wi-j die wa verkoop'n. Mar ie kunt a wa luster'n op de Muziek-pagina, det wee-j onitta.