Sobiszowice ( Petersdorf ) a moja tanty Lyjna

Jako Klodnica plynie to wiycie . A kaj som Gliwice wiycie . A kaj som Sobiszowice tyz wiycie . Abo niy wiycie ? No Sobiszowice som na prawym brzegu Klodnicy , kej na lewym brzegu som "richtik Gliwice" .
O Sobiszowicach idzie snalysc juz cosik w papiorach ze 15.06.1276 roku . Nazwa Sobiszowice pochodzi od imiynia
Sobiech , kery je musiol zalozyc . Tego ale na zicher zodyn niy wiy . Zicher je to , co Graf Peter von Slawetaw , wlasciciel Sobiszowic przekazol je wedug aktu z 1276 roku swojymu "compater" Hermannowi na zalozynie osady na frankonskim prawie ( nach fraenkischen Recht) . Inaczyj idzie pedziec , co momy sam do czynienio ze lokatom Sobiszowic na prawie czynszowym . Dokumynt lokacyjny tyj wsi wymiynio tyz piyrszy roz nazwa Gliwic . Hermann prziszol najprawdopodobniej ze zachodu i zaprzijazniol sie ze Grafym Peter von Slawetaw , kerymu bol za ojca krzesnego do od niego synka . Compater znaczy na niymiecki Pate - krzesny - chrzestny . Hermann dostol tyz miyndzy inkszymi prawo jako Scholze (szolc- wojt). Graf Peter von Slawetaw i szolc Hermann som spomnione tyz w jeszcze jednym akcie ze 17.09.1297 roku . Wymiyniony tam Paszko (z niym. Paschko) to nasz Graf Peter von Slawetaw . Kole 1300 roku spomniane je w biskupich papiorach , kere spisane majom podatki majontkow , o Novo Sobyssowitz (Neu Petersdorf) .
5.11.1403 r. spomino Katharina (Katarzyna) Herzogin von Auschwitz und Herrin von Gleiwitz miyndzy inkszymi o wsi Petersdorf , keryj czynsc za 150 Marek , kupiol Paschko von Goczesdorf , jako dziedziczne dobro , od Johanna von Konar i od niego cery Kathariny Wynoschkin von Trynek . Te pol wsi , terozki Neu Petersdorf , ze patronatym kosciola , nazywano tyz Petersdorf Staedtisch . w 1447 roku godo sie o Petersdorf i o Sobiszowicze , czyli nowyj i staryj wsi . No ale tera bydzie cos od mojyj tanty Lyjny . Tanty Lyjna kero je z "Zakanalu" (tak my godali w Labyndach na dzielnica "Starych Labynd" , kero lezy za kanalym , tam kaj bol miyndzy inkszymi "Majontek" , "Kokotek" i "Pasieka" . Niy byda sam wszyskich ekow Labynd wymiyniol , ale Labyndzioki co mom na mysli) , godala mi , a od niyj mama (staro Krzonka) jyj , co stary kosciol we Sobiszowicach , wedug prawie tak starych jak on papiorow , postowili rycerze zakonu Tymplariuszy . Tymplariusze prziszli ku Sobiszowicom i wogole na Gorny Slonsk ze Morawow w 1232 roku . Po wyprawach krzizowych robiyli za takich chocby straznikow , kere pilnowali traktow handlowych . Jedyn z tych szlakow szol bez Toszek i Pyskowice , a stary kosciol we Sobiszowicach miol tako funkcja obronno do tych handlyrzy , kere prawie tamtyndy przejyzdzali . Te rycerze Tymplariusze som namalowane we nowym kosciele (14.05.1911) , tzw Petersdorfer Dom - Sobiszowicko Katedra . Stoi on ino "pora metrow" od starego oddalony . No to te Tymplariusze dali stowiac kosciol we Sobiszowicach jednymu majstrowi , pod warunkym , co kosciol bydzie wartko fertik . Tyn zas chciol zarobic fajne piyniondze i przistol na to . Wzion sie do roboty , ale som widziol , co tak wartko tego niy szafnie . Na ostatni dziyn zostalo mu jeszcze colko wieza stowiac . Pieroniol fest i zol mu bolo piyniyndzy . Ale tyz dziobol wywonchol okazjo juzas cosik nalonaczyc . Prziszol do majstra i godo , tak jak to dziobly w niydalekyj Polszcze godajom (pieronym -r- slychac) : "majsterr ja potrrafie to zrrobic , tylko po smierrci musisz mi twojom duszyczke oddac, rrr..." . Majster sie zgodziol , ino pod jednym warunkym , co do dwonostyj wieza bydzie stoc gotowo . A jak niy , to "po ptokach" ze duszom do dziobla . Dziobol se mysli , "toz mom cie duszyczko , rrr" i wzion sie do roboty . Kosciol bol prawie colki skonczony ino ostatnio cegla jeszcze zostala , kero mondry majster polol przodki swiynconom wodom . Spociol sie dziobol i zrobiol blank czerwony ze zlosci , a cegly i tak niy umiol chycic . Tak tyz dwonasto godzina prziszla . Wieza niy bola gotowo , a dziobol ze zlosci wzion i kopnol kamiyniym we kosciol , ino za dobrze niy trefiol , to tyz kosciol sie ostol , choc niy colkiym taki jaki miol byc . Kamiyn , kery tyn dziobol kopnol , sleciol we labyndzkim lesie i idzie jeszcze dzisiej obejrzec na nim slad nogi od dziobla . Majster zol dugo , szczynsliwie i bol szanowany , a ludzie dugo go spominali we colkich Sobiszowicach , Gliwicach a nawet we Starych Labyndach , skond je pol mojyj familii . Tego dziobla idzie jeszcze spotkac na colkim Gornym Slonsku . A poznocie go po tym , co dalyj kuleje od tego kopniyncia w kamiyn . To je wszysko zywo prowda . Co sie zas rozlazi o Tymplariuszy , to poszli furt , a od nich zakon rozwionzol papiyz Klemyns V za kara , co z dzioblym konszachty mieli .

Pyrsk ! Szwager

<<< Nazot <<<