2nd Comunicat del Conselh de la Lenga Occitana

Acamp del 3 de març de 2001, Besièrs

Lo Conselh de la Lenga Occitana tenguèt son amassada generala lo 3 de març de 2001 a Besièrs. A l'escasença d'aquela amassada, lo Conselh renovelèt son burèu e aculhiguèt de membres novèls. Lo Conselh acceptèt, per tant que la planguèsse, la demission, per rasons de constrenchas personalas, de son president, Xavièr Lamuela, que guidèt amb tant de prudéncia coma de competéncia los primièrs passes del CLO. Lo novèl president elegit, Patric Sauzet, espèra que lo Conselh sauprà perseguir l'òbra entemenada e se far un instrument collectiu de mai en mai eficaç, al servici del desvelopament de l'usatge social de l'occitan.
Lo Conselh desira informar lo public que contunha de trabalhar a definir de solucions consensualas subre los ponches fosques e problematics de la nòrma de la lenga. Lo trabalh del Conselh a per tòca de fixar la grafia de la lenga e definir d'un biais tant univòc coma se pòt l'occitan larg ("comun, referencial") e en general de las varietats referencialas de la lenga. Lo Conselh es convencut qu'una proposicion normativa deu èsser sintetica e aisidament disponibla. Per aquesta rason publicarà pas de documents normatius parcials. L'ensem de las solucions elaboradas pel Conselh figuraràn dins un Diccionari ortografic, publicat jos la responsabilitat tecnica e editoriala del GIDILÒC, mas que son contengut engatjarà tot lo Conselh de la lenga. Aital las causidas aprovadas seràn disponiblas dins un document unic e coerent. Aquel document aurà per primièira tòca d'aplicar en formas concretas los principis normatius alibertins admeses per totes, e pels ponches en discussion farà pas que fixar dins lo sens de la coeréncia rasonabla las practicas actualas sens cercar de ges de biais de las trebolar.
En particular, lo Conselh a ja trobat d'acòrdis suls ponches seguents que longtemps son estats un objècte de debats, de desacòrdis e mai de polemicas:
  1. la distribucion de l'e finala dicha de sosteniment (o "de sosten")
  2. l'ortografia del fonèma /s/, dins los cases ont (per trebolar pas de practicas socializadas) seguís pas una reparticion etimologica (que los principis ne son estats rigorosament explicitats per Xavièr Lamuela, president sortent del CLO, explicitacion adoptada puèi pel Conselh). Es aital lo cas de dimars, messorga, besson, fissar...
Aquestes resultats se pòdon consultar sul sit web seguent (mercé a la collaboracion de Gianni Vacca):

http://www.oocities.org/guilhem_nou/CLO0.html

Coma o a ja fach dempuèi sa creacion, lo Conselh renovèla sa proposicion de collaborar e de d'escambiar amb totes los actors e organismes que desiran promòure la lenga occitana.

Declaracion publica
LO CONSELH DE LA LENGA OCCITANA
ALS MILITANTS E USATGIÈRS D'AQUESTA LENGA

Aprèp quatre annadas d'existéncia e de trabalh, e al moment que renòva sa composicion, lo Conselh de la lenga ten a precisar çò que seguís tocant son foncionament e sas responsabilitats:

  1. Dins la manca d'una estructura, globalizaira sens cap de rèsta, capabla de donar un mandat indiscutible a d'elegits, lo Conselh foguèt recrutat sus la basa d'acòrdi entre las personas, especialistas de la normativizacion de la lenga sus basa dicha "occitana", qu'avián ja publicat d'estudis sus la question e que representavan qualques ponches de desacòrdi coma un voler de los superar. Aquel metòde, lo sol possible, aviá l'inconvenient de daissar defòra d'unes qu'a títol o un autre se podián pensar, a rason o a tòrt, de i jogar un ròtle. En considerant que l'examen de questions dificilas, linguisticament e sociolinguisticament, se pòt far son que dins d'assembladas rasonablament equilibradas e reduchas, lo Conselh a sempre tengut a metre en discussion los arguments pus divèrses que li èran someses...
  2. Aital s'acabava en principi un periòde ont la nòrma èra matèria de reflexions e decisions personalas e sovent divergentas, situacion que rend impossibla tota socializacion (en particular per un ensenhament generalizat) e oficializacion d'una lenga. Mas dins lo moment ont lo Conselh entamenava d'examens precises e amolonava de dossièrs detalhats e consequents, de personas contunhavan dins las practicas anterioras e reconogudas autament prejudicialas a l'entrepresa comuna, en anant fins a reculhir de signaturas per far pression exteriora sul Conselh. Lo Conselh se deu de denonciar aquela irresponsabilitat e aquela manca d'etica.
  3. Dins lo Conselh, las divergéncias principalas son ara regladas, aprèp èstre estadas assumidas, las reaccions fraccionàrias susmontadas. L'univocitat de decisions rasonablas (que la perfeccion ideala d'una nòrma es utopia e afar d'opinions) farà lèu l'objècte d'un Diccionari ortografic publicat sota la responsabilitat del GIDILÒC. Lo trabalh portarà desenant suls detalhs daissats fins ara sens solucion, en particular sul lexic de civilizacion contemporanèa.
  4. Una situacion particulara es la de Provença. Los tenents de la nòrma dicha mitralenca e los de la nòrma dicha occitana, en consideracion de l'interès comun, se i son entenduts sus una liura e pacifica competicion d'usatges, oficializada e dins lo respièch mutual. Aquò fa que mai irresponsabla la conducha d'un rodelet que contunha de menar guèrra publica a la nòrma occitana, al mesprètz de las realitats e de las tradicions provençalas, guèrra nociva a tota la comunitat d'òc, eles compreses. Lèva d'autra part tota legitimitat a de temptativas de complicar la situacion, en apondent de solucions bastardas a la concurréncia de dos sistèmas sociologicament e istoricament assetats.
Davant l'escasença d'un nòu millenari, compte tengut d'una situacion nòva, tant del costat d'un alargament de reconoissença publica coma d'una pèrda d' usatge eiretat, lo Conselh sona los militants de l'accion culturala d'òc a un esfòrç per traspassar los estadis anteriors de lor combat, e n'arribar enfin a una normalitat, que las autras lengas dins la meteissa situacion ne donan ara l'exemple.

ensenhador