2003 年 05 月 17日 【陰】
(上半場)
今朝一起身, 阿媽就問我Lunch 去尖沙咀食意大利菜好唔好, 我話你都痴線既, 天氣又熱, 又要搭車出去, 個仔都仲未考完試, 咁快食好野, 點得架~
最後求求其其食左 Lunch 就算~ 之後就去左行 Wellcome~ 買左 Cheese Cake, 仲有百力滋, Qoo 熱情果味~
Shop 完 Ping 之後番屋企溫書, 今日溫 RS , 真係會越溫越眼訓架, 夜晚訓唔著既, 可以試下拎份 RS Notes 出黎睇~
(下半場)
Kelvin~ 你話你自己係唔係白痴呀? 做咁多野, 倒轉頭來咪又係自己唔開心? 仲要打電話黎俾人話番轉頭... 一次又一次叫左自己唔好對佢咁好, 但係又一次又一次咁違反~ 專登搭成半個鐘, 九個字火車入黎陪妳溫 A.Maths, 都係為左佢,想佢成績好d , 連自己有得出去玩番一, 兩日先溫書都唔去~
今日佢考完啦, 威啦, 有得出去玩, 都諗住算啦, 無理由佢考完試都要陪我溫書咁不近人情架嗎~ 佢打電話俾我, 諗住佢考完試, 問下佢去左邊度玩, 玩得開唔開心, 哦~ 咁我溫書溫到悶悶地, 無人陪我傾計, 無人陪我玩, 咁見佢打電話黎, 咪問多兩句, 就話我煩~ OK 啦~ 無野講, 即時心都淡埋, 收線個時仲唔知已經發生左事, 仲嘻嘻哈哈咁, 真係後悔點解無即時 cup 佢線, 亦都後悔當初應承過佢既野, 亦都後悔點解俾佢咁Hurt, 心如刀割, 千刀萬刃之後都會同番佢一齊...
好辛苦... 考試壓力已經大, 雖然仲有兩科就考晒, 人地面前就扮到貌似輕鬆, 但係自己所承受既, 絕對唔會比人地諗既少, 未考完試, 我以經諗自己學業問題, 究竟轉校升中六好, 還是原校升中六好, 琴晚亦都有人問我將來打算做咩? 帶出一個問題係, 我中六要揀d 咩科讀, 呢個係好重要既問題~ 琴日朝早同 Patrick 講電話, 討論到一個問題, 亦都好值得我自己反思... 太多啦...