2003 年 06 月 01日 【晴】
今朝訓到成隻"死朱"咁, 訓極都唔願起身, 仲好似好眼訓咁, 但係 11:30 am 都始終要起身, 因為之後要出街, 所以要準備下~
唉~ 起無 Mood~ 今日好黑仔咁, 我搭地鐵過去長沙灣, 搵 Doris 俾d 野我 and 約左袁永係個度等喎, 咁係太子站轉車~ 咁我企左係開門個邊, 架車去到太子站, 我無反應喎, 完全唔記得係要轉車, 車上d 乘客落車, 過對面月台等車喎, 但係我都仲未知道喎, 根住我望出出面... 咦~ 太子, 咁我咪要轉車, 但係已經講梗" 請勿靠近車門..." 我就即時閃左出去, 好彩無閂到門, 咁好瘀喎, 咁咪無擰轉頭睇, 仲行得好快咁過左對面月台 lor~
過到去對面, 排隊喎, 有車黎, 咁我都好守秩序咁上車, 咁上到車我又企左開門個邊喎, 咁有個伯伯推車仔上車喎, 咁做下好人, 見佢推唔到上黎, 咪幫幫佢 lor~ 哈~ 嘩~ 真係~ d 人竟然鬧番我轉頭喎, 唔駛你幫啦, 得啦, 廢事轆到我隻腳喎~ 咁我預左幫你, 就會量力而為架啦~ d 人真係惡, 仲要車上d 乘客個個都望鬼住我喎... 好慘...
去到長沙灣, 我已經遲到... 咁咪唯有行快兩步 lor, 點知上電梯個時, 俾兩條八婆阻鬼住喎, 咁咪同佢講謝謝 lor~ 頂佢個肺呀, d 人痴線架, 我好聲好氣講, 佢竟然無d 禮貌鬧你喎~ 喂~ 而家你好趕時間咩? 咁我咪串佢 lor~ 唔趕都唔駛叫你謝謝啦~ 痴線~ d 人簡直不可理諭~
上到去見到袁永, 佢... 見到我, 竟然... 唯有俾我打啦~ 等左一陣, 先發現佘嘉俊喎, 見到佢, 講左幾句野, 佢就走左 lu~ 唉~ 佢, 都唔知係唔係有病架, 天時熱都著長袖裇衫, 仲要扮 Q 晒浪子咁唔著底衫, 仲要露左大半個上身出黎喎... 真係... 6, 70 年代咩~ 阿叔~
等左一陣, Doris 終於黎啦, 唉~ 又笑... 頂~ 乜真係剪得咁差咩? 我唔覺 lor~ 我覺得好涼爽~ 佢俾左張 Form 我, 我就同袁永走 lu~
我地第一站係鑽石山, 去到都差不多 3 點幾, 係荷理活行街, 諗住去 Puma Shop 啦, 點知無左喎... Shit~ 又白行一堂, 咁袁永話有d 肚餓, 咁咪陪佢去 KFC 食野 lor~ 食完之後, 我入左三聯書局, 我想買傲慢與偏見呢本書睇, 但係諗起屋企仲有本書等梗我, 所以都係留番下次~ 之後去左一樓唔記得咩名既鋪頭行, 哈哈~ 條友仔串我喎, 咁我咪表現我既威力, 一掌打落佢背脊 lor, 嘩~ 超響~ 勁~ 哈哈~ 佢就... 傷... 之後佢話要買 Puma 鞋, 咁我咪話葵芳有 lor, 但係我又要去旺角先喎, 咁我地咪走 lor~
離開左鑽石山, 我話我唔想搭地鐵, 咁咪去睇下仲有咩車去旺角 lor, 有專線 Van 仔出旺角喎, 上到車, $ 6 跟住袁永就問我, 搭地鐵幾錢, 我話 $2.4 定 $2.9... 佢就瞪大對眼望住我喎, 咁我咪話 lor ~ 咁你咪落車 lor~ 哈哈~ 佢話話 $ 6 ... 對我呢d 窮等人家黎講已經好多架啦... 哈哈~ 我無野講~
出到旺角, 我地上左新世紀行左陣, 上左 izzue 睇衫, 我睇岩左件, 但係都無諗住買, 之後就落左旺角百老匯個邊個間 U2 拎番條褲, 袁永就買左條短褲, $160 ~ 哈哈~ 我覺得 U2 有個 Sales 姐姐幾靚女喎, 好似一個藝人, 不過就醒唔起邊個喎~ 買完出黎, 袁永話 d Service 真係好, 跟住我又串佢, 仲好個d 你未見過姐~ 之後我就爆笑~
And then 我地上左潮特, 去搵佢對鞋喎, 但係都無斬獲~ 行完出黎, 我有d 肚餓, 就落左 KFC 食野, 今次到袁永陪坐~ 食飽 Tea, 又上左 izzue 另一間分店, 呢間分度有四隻色喎, 但係我想要個件又無我個碼喎, Shit~ 另一個色我又唔多鐘意喎, 咁咪走人 lor~ 五點幾, 我地行左陣波鞋街, 又上左旺電買 CD-R~ 之後就又搭地鐵去葵芳~
去到葵芳都差不多 6 點, 之前打左俾老婆, 但係佢出左街, 但係都 6 點, 咁咪無打番俾佢 lor~ 之後就繼續我地既行程, 去葵芳個間 Puma Shop~ 唔, 睇到有六隻色, 間中四隻都係出面無既, 見唔到既, 但係始終都係唔岩袁永, 我都有d 忟憎啦~ 都算啦~ 行左出去, 又入左間唔記得名既 shop , 又無佢想要個隻色喎, 之後我個電話響喎~ 咦~ 老婆打黎喎~ 好野, 可以同老婆傾電話, 唔駛對住佢條煩人, 出左間 shop, 我就繼續傾電話, 佢企左係度, 諗左一陣, 最後都係番返 Puma Shop 買左佢想要對鞋, 佢試鞋個時我都無乜理佢, 傾我既電話, 之後我見電話又無乜電咁, 咪收線 lor~ 俾下d 意見佢咁, 我又睇下衫, 我有斬獲, 佢都有, 佢買左一件 Polo T-shirt And 一對鞋, 我就普通一件 T-Shirt~ 兩個人買左 $ 500 幾蚊野, 但係我有 VIP Card 折左都係 $ 451 咁多姐~ 抵~ 不過佢就已經清袋, 我都係得番二百幾, 都仲諗梗買唔買到份禮物~ 死袁永就講啦喎, 我地由有錢佬, 變左乞兒~ 哈哈~ 我呢個 fd 就係咁, 勁幽默~ 但係唔識佢既人就以為佢好目獨喎, 但係其實佢轉數好快架~ 你講完一句, 佢就可以駁埋你下一句~ 哈哈~
買完野, 我地去最後一站, 尖沙咀~ 我想買禮物送俾老婆, 唔知點解, 不過好有興致~ 可能呢d 就係情趣掛~ 落到去 TST, 我記得個 store 係文化中心, 落到去, 睇左份野, 唔... 都係麻麻地靚, 都係無買到~ And Then 我地上左廣東道, 落左 Muji, 又買到野~ 買完我地行番出去, 經過戲院, 我問占基利個套衰鬼上帝幾時上畫, 佢話六月, 之後入左去睇, 睇清楚d 原來係6 月5 上畫, 行過少少, 有咒怨, 袁永話都唔恐怖既張 Poster, 我咪話太恐怖唔俾出街, 咩咩咩淫褻審裁處唔批喎, 佢諗左一陣, 係唔係淫褻及不雅物品審裁處呀, 我話係呀係呀~ 哈哈~ 我串佢喎, 你咪不雅 lor, 佢好快就駁左我, 咁你咪淫褻? 哈哈~ 無辦法~
之竹後我就提議去入去九龍公園, 反正出面都無野食~ 九龍公園d 燈光好暗, 我講笑咁講, 我一陣拖你埋草叢雞姦... 哈哈~ 入到去公園... Woo... 好多情侶, 又好多賓妹, 賓佬, 阿叉... 行完出黎, 袁永話去 Happy Together 食喎, 我地去左佐敦道間大家樂食野, 哈哈~ 兩個窮鬼無錢開飯咁滯... 佢又話啦喎~ YEAH~ I find you~ Everyone is Happy~ 哈哈... 同佢一齊玩就係咁多歡樂氣氛~
食飽飽, 我話想盡地一煲, 睇下買唔買到禮物, 我話落潮特, 之後我地又落左去~ 得左~ 臨走之前我仲夾左糖糖聽日食, 今次夾左 $ 14.6 勁準~ 同上次差不多~
最後我地各自歸家, 我借埋部 Mp3 機俾佢用~
我搭巴士番屋企, 平時係旺角既站上車都係 $5.4 , 但係今次就 $8.9 喎, 我最後一個上車, 我好醒目咁睇到前面幾個都用八達通, 扣左 $8.9 喎, 咁我上車個時就問司機, 司機呀~ 乜唔係 $5.4 咩? 個司機好似岩岩訓醒咁, 睇番個價錢牌... 哦~ 係喎~ $5.4 喎~ 我睇住佢轉左, 我先 Do 八達通... 但係我前面個兩個乘客就 on 居居咁 do 左 $8.9 都唔知, 聽到我咁講, 佢先問番個司機係唔係收多左錢, 最後係點我都唔知 lu~ 因為我已經上左樓上坐~ 呵呵~
PS. 今日無食過藥, 完全無頭痛過~