2003 年 07 月 18日 【晴】
因為琴日太早起身, 今日就訓番夠本~
今日 Lunch 係屋企食, 求其拎左兩個烏冬麵, 加d 湯粉煮熟就食得, 無計啦, 鬼叫我唔識煮野食咩~ 食飽飽, 無所事事就幫阿斌執下相咁啦, 哈哈, 玩下移花接木咁 lor~ 好正~
之後阿斌打電話黎, 我就換衫出門口, 今日著個套衫比較特別, 亦都有一段日子無著過啦, 就係校服, 不過好辛苦呀, 套校服痴鬼住個身, 又係咁流汗喎~ 最衰就係我要帶阿斌去 Trendyland 開倉喎, 咁我著住左套校服, 係好鬼死礙眼 lor~
陪阿斌買完野之後, 就番左學校畢業禮, 嘩~ 即係呢, 係超無聊 lor, 坐兩個鐘, 聽校監, 校長講野, 之後又頒下獎, 代表上台拎證書咁, 得個睇字, 仲要坐到屎忽都痛埋喎... 不過都好既, 聽到自己個大名(今年畢業生), 同埋拎埋張 Cert. ~ 如果唔係今次番黎真係一d 都唔值~
畢業禮完左, 我就即刻打電話俾 Doris, 之後就箭一般咁帶佢去拎相~ 之後就成大班同學去左食飯, 因為 Miss Cheung, 少仙姐今年要走啦, 出年唔會再係長天教書, 我地成班人去左西九龍 Pizza Hut 食, 食左 $ 9xx 不過當然係我地做學生既夾錢請 Miss 食啦~ 不過食野個時... 超難受, Miss 逐個咁問有無拍拖又問將來讀書既問題, 後者問題我就無野呀, 因為成張 Table, 應該成績最好就係我, 不過前者問題就超難受, Miss 問左咁多個, 個個都有女朋友, 再唔係就追緊既, 溝緊既, 唯獨是我, 仙姐問到同女朋友點, 唉~ 我只可以答散左啦, 仲要笑住口咁答, 最估唔到仙姐佢仲要追問點解喎, 唉~ 因為我唔想講咁多野俾其他人知, 唯有作野, 因了解而分開, 勁無奈, 亦都好難受~
佢地全晚都差不多講邊個邊個有女朋友呀, 又話係邊度邊度見過人地拍拖呀... How About me? 無人講我, 我亦都無講人, 因為好多時我都係屋企多, 但又唔可以唔出聲, 所以只可以跟人口水尾, 唉~ 呢一刻係覺得好 Lonely, 早知我就唔跟佢地同 Miss Farewell 啦~
食完野, 成班人大半去打波, 得番幾個人, 就送 Miss 去搭的士, 洪輝佢地仲 Cheap 到跟車... 目送 Miss 上左車, 就各自歸家, 歸家既路途唔算太遙遠, 但係步伐就好沉重, 要花上不少氣力才可以踏出一步又一步...
番到屋企, 一個人都無, 自己就去左沖涼, 沖左一個凍水涼, 好舒服, 但係依然好沉重~ 沖完涼出黎, 仲係一個人都無, 就睇電視, 加有d 擔心... 差不多 10:30 pm 先有人番黎... 之後就因為無乜心情, 語氣都唔係幾好咁...
最後 icq + 聽歌, 咁就過左一日...