2003 年 07 月 27日 【晴】
嘩~ 今朝早起身, 約左 Tiffany And 阿斌佢地去鑽石山, 睇中學升學及就業講座, 不過大部份都係講副學士, 展翅, 毅進個d , 我志不在此, 所以就算拎晒 Catalog , 我最後都係一次過放晒入垃圾桶~ 我地睇完展覽, 阿斌就去左 KFC 食早餐, 我同 Tiffany 就睇佢食, 我地三個都趁呢個機會傾下將來升學既事情~ 之後我地過左機鋪打左陣機, 又行左個圈, 我同 Tiffany 就食 Lunch, 今次到阿斌睇我地食~
食飽飽, 係荷理活行左陣街, 我地三個係一個店鋪入面買左三件衫, 因為 $ 135 每人一件都係 $ 45 , 仲要係同一個不知名既牌子, 不過係唔同款姐~ 買完衫, 我地就走人, 因為我同阿斌都要過海去大球場睇波, Tiffany 就應該要落鋪頭幫手~ 落到地鐵站, 我地諗梗應該向油麻地方向去銅鑼灣, 還是向調景嶺方向去銅鑼灣, 所以就同 Tiffany 猜包剪揼決定, 最後我贏左, 所以就向調景嶺方向去銅鑼灣~
過到銅鑼灣, 好多人, 我知我距離 Liverpool 不遠~ 好開心呀, 好雀躍~ 我地係銅鑼灣行上大球場, 好曬~ 好彩我有太陽帽, 我地行去大球場個時, 仲見到 Keyman, 就係有線電視體育台足球旁述員~ 我地去到大球場門口, What's a FuxK... 好多人塞住晒等入場喎, 又曬喎, 無辦法之下唯有等, 等左幾分鐘先入到場~
入到場, 行到自己既座位, 因為見到二伯同埋振東(堂細佬)坐左係度, 我一坐底就已經係咁俾二伯質問... 問我做乜咁遲, 又乜乜七七咁...
開波啦~ 嘩... 正呀... 過程唔講 lu~ 上半場 Liverpool 1:0, 下半場入多五球 Liverpool 6:0 , 香港隊食左六隻蛋~ 中場休息個時, Heidi 打電話黎, 之後完場, 我又打番俾 Heidi, 哈哈~ 打去梗係串佢無得現場睇波啦, 無計啦, 因為我叫左阿斌睇~ 不過原來我地坐個d 位, 要成 $ 4xx 一張架, 不過好彩係贈卷, 如果唔係真係對阿叔唔好意思啦~
睇完波, 同阿斌搭 112 番長沙灣, 因為今晚上阿爺屋企食飯, 我同阿斌係北河街落車, 因為要上去 Book 場聽日打羽毛球, Book 左聽日 1- 2 pm , 學生半價 $ 29.5 ~ 之後我地去左下面搵 Tiffany , 撞岩佢去買 Tea , 所以就可以傾到幾句...
同 Tiffany 講左 Bye Bye , 我同阿斌就上左西九龍行左個合鴿轉, 上左三聯書局, 係同一個位置, 聽左 Twins 既兒歌好多十次, 之後就走人~
今晚上左爺屋企食飯, 見到爺爺... 就係心都 up 埋, 講野都無晒氣... 唉~ 今晚食飯都算幾多人, 有我地一家啦, 大表姐一家, 仲有大表哥一家, 哈哈~ 大表哥個仔真係好曳曳... 成日都要落地玩喎, 好曳~
食飽飽, 番屋企, 無野做, 沖涼涼, 執執相, 又一天~