四月

2003 年 04 月30日　【陰】

嘩~ 琴晚訓覺發左個怪夢, 個夢好怪好怪~ 個夢係點開始我唔係太記得, 但係個夢係點夢生我仲記得~ 我記得夢中既地方係爺爺屋企, 夢中我同 ET 大戰, 真係講都無人信~ 我仲記得隻 ET 諗住走個時, 對眼發出激光, 想燒斷d 窗框, 但係唔知咩原故, 竟然射到走晒樣, 仲俾我笑, 番去學多兩年點用激光先啦~ 哈哈... 因為太白痴啦, 所以我都唔寫落去lu ~

今朝 9 am 就起左身, 今朝無番訓架, 之後開左收音機聽"風波裡的茶杯", 聽到 10 am 就開左電腦, 原便轉左過去 FM.96.9 聽"風騷快活人" 10:30am 仲留左個言俾老婆仔~ 聽到 12:00pm, 就熄收音機, 開電視一邊睇"美味情緣" 一邊食飯~

之後就一直溫中文, 溫到 5pm 就 On 左一陣 line, 同阿 Sa 媽傾左陣計, 又 Offline 又繼續溫書... 一直咪頭咪腦咁溫, 溫呀溫, 溫呀溫... 溫到 6:30 pm 先休息番陣, 睇新聞, 之後洗白白, 玩左陣電腦, 食晚飯, 睇帝女花~

真係好激氣, 個個昭仁公主好 Cheap, 害死"皇上身邊個個太監", 好 Cheap, 好賤呀~

睇完三線劇集, 又係時間溫書... 聽日 1/ 5 啦, 2/ 5 就要考英文 lu... 好驚... 聽日要去買文具... 工欲善其事, 必先利其器~

2003 年 04 月29日　【晴】

今朝 9 am 醒左一次, 之後 10 am 又醒多一次, 最後 11 am 先起身, 本來諗住今朝聽 English Syllabus A 既 listening , 聽下d Standard 係唔係真係咁低啦, 點知因為懶訓, 唔知醒無聽到喎~

今日開始溫中文... 遲到幾日先開始溫, 希望會追得番啦~ 晏晝個時, 溫書溫到好眼訓, 咁咪沖左杯濃茶飲 lor~ 唔知係唔係杯茶既關係呢, 6 點幾個時開始胃痛, 好辛苦~ 老豆 6:30 pm 個時買左野食番黎, 食左個包包~ 之後就去左洗白白, 諗住食完個包會無咁痛, 都仲係好痛~ 所以先食左粒胃藥~ 呢粒胃藥經過我研究過啦, 有 Magnesium Hydroxide, 即係 Anti-acid~ (中文: 抗酸劑) 哈哈哈~ 食胃藥最好呢就係唔駛成粒吞, 係咬碎左先食既 ( To increase it's surface area ), 絕對適合一d 唔識得食藥丸既人任~

食飽飽飯, 個胃都仲係有d 痛~ 夜晚見到老婆仔 online, 嘻嘻... 向佢撒下嬌, 話俾佢知我胃痛... 不過佢 on 左一陣 line 就走左 lu~

小仙姐叫我地如果 Writing 有問題既, 聽日番學問佢, 我就無問題啦~ 所以唔駛番~

今日成日都係溫左兩課中文咋~ 溫左我和我的唐山, 仲有漢字的結構~

明天再努力~

2003 年 04 月28日　【晴】

今朝一早就俾人嘈醒左, 細佬唔知醒, 阿媽就打鑼打鼓咁, 嘈到我都醒左, 搞到我要 9 點之後先可以番訓~ 訓到 11 點幾, 又電話響喎~ 我頂... 嘈鬼住晒... 係關錦聰打電話黎, 話還番d Bio Marking Scheme, 咪搞到我要起身 lor~

拎番d 野之後番返屋企, 見到老婆仔 online~ Hee... 同佢傾左一陣, 之後佢 offline , 打電話黎, 我地去街街~ 我地今日去大埔林村許願樹~

哎呀~ 好失敗呀我, 遲到成 15 分鐘, 約好左老婆仔 2:15 pm 係大埔墟 65K 巴士總站車頭等, 但係我... 唉~ 唔識路, 搞到我係條行人隧道兜黎兜去... 兜到人都暈, 後尾先... 唉~ 總之就好失敗啦~

之後搭左三, 四個字巴士, 落左車... 哈哈~ 死啦... 唔識路喎... 諗住向前行啦, 前面又無人問喎~ 咁咪擰番轉頭, 諗住對面有人等梗車, 問下啦~ 點知一擰轉頭姐, 就已經見到棵樹啦喎, 我咪開口講" 棵樹咪係度 lor", 笑到我同佢合唔到咀... 哈哈...

一過馬路就已經有人兜售生意啦, 好有生意頭腦, 我地寫好自己既願望, 跟住又係度問喎, 要唔要求姻緣呀? 求番個姻緣啦, 嘻嘻~ 我地... 仲駛求咩... 之後咪拜神, 拜完先掟~ 哈哈... 真係笑到我甩褲, 我左四次, 第四次先成功, 但係掟第二次已經跌爆左個橙, 要換橙~ d 橙汁爆到周地都係, 好彩我無d 人咁屎, 掟左... 都唔知幾多次... 又好笑喎~ 人地係向高掟, 佢就打橫掟, 掟到好似碌齡咁, 哈哈... 笑到我甩褲, 連上左車都係咁笑~

掟完之後, 我地行左入�h, 嘩~ 超熱... 見到橦"林村鄉公所" 即係智勇新警界其中一個外景鏡頭~ 臨走之前, 仲買左包維他奶, 佢就買左支脆皮雪條, 仲食到好... 滴到地下都係...

送佢番屋企, 陪佢去買文具, 話時話我都未買, 買完就陪佢番屋企~ 唉~ 真係俾妳激死, 番自己屋企搭咩車都唔記得既~ 咁咪行路 lor, 佢今日陪我等車, 等左一班車, 我陪多老婆仔一陣, 諗住話 21/5 佢接我, 點知諗住拎到鎖匙出黎個時, 搵極到搵唔到喎... 我就知死得啦... 又唔記得帶鎖匙, 好好失敗呀... 個時先 4:30 pm, 阿爸阿媽又返工未番喎, 細佬放左學例牌唔會早番屋企喎, 勁慘~ 咁咪叫老婆仔陪我 lor~ 之後去左... 最後成 6:30pm 先走~ 7:30pm 先番到屋企~ 有人好曳曳呀, 竟然破壞公物, 塗污牆壁~ 俾我影低左犯罪證據~ 嘻嘻~ 睇下妳仲敢唔敢恰我~

好過份呀, 今日同老婆仔一齊個時, 有條粉腸打電話黎喎, 第一次聽唔到電話響, 一接電話無人出線, 諗住係響到收左線, 隔左一分鐘, 又響, 今次接左電話, 無人出聲, "喂" 極到無反應, 真係想打~

搭火車番屋企個時, 好眼訓, 仲有d 頭痛添~

今晚 online 好靜呀~ 無乜人同我傾計~ 今晚早d 訓覺~ 聽朝早起身溫書書~ 老婆仔~ 妳要加油呀~ 我會陪妳一齊努力架啦~

我愛衰婆~ 亦都愛傻婆~ 最愛老婆仔~ 我應承妳唔會出去搞搞震啦~

2003 年 04 月27日　【晴】

今朝 11 點先起身, 11 點先落床~ 哈哈~ 訓得好好呀~

之後開電腦, 入 Mp3, 換走d 舊歌, 入番d 新歌~ 阿爸阿媽同細佬出街食野, 之後我就真正開始溫書, 溫左... 半個鐘就要換衫, 出門口仲問左阿媽沙田有無 KFC 添~ 但係之後都無去度 KFC 食, 因為係異常咁多人... 我都廢事排隊啦~ 又驚唔夠時間食喎~ 最後都係去老 Mac 食 8 號餐, 又係時間關係呢, 拿拿聲食完就走人~ And Then 仲去百佳買左支水~ 一出百佳無幾耐, 正想拎部電話出黎俾老婆仔之際, 電話就響啦, 呢d 咪就係心有靈犀~ 唔知點解覺得今日老婆仔好靚, 不過我無講到出口, 因為呢d 野留係個心度就已經足夠~

今日補兩堂 Chem, 兩堂都係 Video, 有d 悶... 早知買定野食開餐, 不過老婆仔佢又實會話我曳曳架啦~ 中間有一段時間 Break, 我地兩個梗係又一齊去�菮珙[啦, 佢個衰婆, 係咁支我喎, 跟住我後面係咁支我條腰喎, 過份, 去完�菮狴X黎, 對手濕漉漉又摸落我塊面度喎, 仲整到我成副眼鏡都係水呢~ 衰婆~

補完習, 同老婆仔行左過去西田, 去 City Chain 睇錶, 我睇到一隻 SEIKO 架, $ 20XX 咋~ 但係好似貴左d , 你知我幾大頭蝦架啦, 一陣整唔見左隻錶點算呀, 咁咪行過d 睇下 lor, 見到一隻 Adidas 既, 唔... 呢隻都 ok 既 $ 3XX 姐, 但係都係諗清楚d 先, 所以最後都無買到錶~

之後咪送佢番屋企 lor, 搭火車~ 嘩~ 少人到呢... 都唔駛爭都有位坐, 一坐落去... Woo... 張 Chair 凍到個 Pat Pat... 哈哈~

番到上水, 又同佢行北區公園, 今日突然間同佢玩左個遊戲, 其中一個合埋雙眼, 由對方帶路, 因為我想感受一下盲人個鐘痛苦, 原來係好驚架, 好驚自己會撞到野, 好驚自己會踩到d ... 原來睇唔到野, 一片黑暗都唔係咁好受架咋~

之後坐左成個鐘, 仲俾佢咬左一啖, 畫左隻錶, 6 時 10 秒... 哈哈~ 呢一秒屬於妳既~ 而家寫梗日記, 個牙齒印仲清晰可見架~ 不過今次係我俾佢咬既~ 所以我都唔會介意~ 之後呢......

送佢番到佢屋企留下, 我先番屋企, 番到屋企都差不多 8 點 lu~

今晚晚飯有阿媽煲既花生發菜雞腳湯~ 梗係正啦~

ps. 近期必聽之作~

*她間中吻下去便沉睡*
*她也許不只一個伴侶*
*我受氣不駁嘴 也被懷疑在騙她眼淚*

*他口中有夢想不去追*
*他最懂得努力吃喝後沉睡*
*橫蠻但卻恐懼 被閒話*

*我們欠登對*

*但眼見你責怪她的眼神*

*流露笑容　對不對*

*當真正願意愛一個人　沒法再愛更需要恨*
*要奮不顧身繼續遺憾　誰計較有沒有開過心*
*當不計代價愛一個人　大概我也免不了私心*
*痛苦使我興奮　連錯愛都吸引　亦顯得我神聖犧牲作陪襯*
*曾開了一半口　去問我受夠沒有　然後卻不信還可更難受*
*曾經我伸過手　卻又毫無力氣走　怎能夠　愛過了之後　令恨也不留*

*不愛她說下去亦無味*
*肯愛她不太需要道理*

*愛下去不怕死放任其實亦也因自卑*

*當真正願意愛一個人 沒法再愛更需要恨*
*要奮不顧身繼續遺憾　誰有錯　錯極也不扣分*
*當不計代價愛一個人　大概我也免不了私心*
*痛苦使我興奮　連錯愛都吸引　亦顯得我神聖犧牲作陪襯*

*曾開了一半口　卻又怕未算受夠　然後　期待著然後*

*誰知我鬆了手　縱是毫無力氣走　不用怕　再愛過之後*

*太多記憶太少淚要流*

愛一個人     李克勤, 陳慧琳合唱

2003 年 04 月26日　【晴】

嘻嘻~ 今朝既情況, 同琴日一模一樣, 又係 9 點落左床, 之後就會趴下 sofa 度, 又訓過, 一訓就訓到 11 點先肯起身~ 之後又睇左陣電視, 12 點就聽 芝 SEE 菇 BI FAMILY , 聽完, 又玩左陣電腦就開始溫書~

今日溫書溫得好辛苦~ 溫左兩個幾星期書, 係今日我先覺得有d 吃力, 有d 力不從心, 真係好想放棄, 沖涼個時, 沖凍水涼, 一個人係�菮�, 係度諗, 做咩要讀書讀得咁辛苦, 其實係為左咩呢? 權力, 我唔需要~ 金錢, 可有可無~ 點解讀書, 又一定要考試呢? 係唔係唔考試就代表一個人將來無成就? 諗左好耐, 諗到個人都有d 呆左, 突然間我反省過來, 我讀左五年中學, 都係睇呢一鋪, 我唔應該俾其他野阻礙我, 我應該衝破一切, 吃得苦中苦, 方為人上人, 我唔需要証明咩俾人睇, 我要做既, 只係要証明俾自己睇, 我得既, 咩難題都難我唔到... 唔~ 努力~

今日終於都溫左一次 Physics lu~ 不過聽日將要溫既, 將會係中文... 我最害怕既一科... 不過我都要克服佢, 時間所餘無多, 努力下去吧~ 只有這樣, 你才可以比別人跑得快, 跨得大步~

今晚睇"冷靜與熱情之間", 嘻~ 有陳慧琳, 仲有型男竹野內豐~ 我當然係捧陳慧琳場架啦~ 雖然套戲係悶d , d 節奏又比較慢, 但係都 ok 好睇喎~ 最正係去到意大利Florence 取景拍攝, d 風景超靚, 又夠浪漫喎~ 如果我將來有機會, 可以同佢去就好啦~ 哈哈... (發夢都無咁早)

聽日星期日, 又要補習, 好想快d 到聽日, 因為可以見到佢嗎~ 但係到左聽日, 又唔想過得咁快喎, 因為過埋聽日, 真係要到考完會考先可以見到佢啦~ 好慘~ 不過仲有唔夠一個月時間就考完會考啦, 到時點癲都得~

哎呀~ 話時話, 都仲未寫番封信俾個衰婆添, 自從上次我俾佢 Hurt 之後, 本來諗住封信都唔會俾佢架啦, 但係又唔可以撕爛佢, 始終件事係發生左, 撕爛佢, 記憶中依然有此一次既慘痛... 但係同佢好番之後, 一直都唔記得寫番封信俾佢, 唔~ 留番考完會考先寫啦~ 嘻嘻~ 老婆仔~ 我諗妳唔會介意架呵?

聽日要買錶錶... 帶幾多錢先夠呢? $1000? $2000? $2500? 帶幾多錢, 唔話你知~ 廢事俾你地老笠我~ 仲係要底褲唔要錢個種喎~ 哈哈哈哈~

2003 年 04 月25日　【晴】

今日好早落左床, 9 am 就落左床, 但係呢, 就訓番落張 sofa 度喎, 11 am 先起身, 時間岩岩好, 玩一陣電腦就有得睇美味天王, 不過今日死袁永打電話打得唔合時, 偏偏係要我睇電視個時打黎問 Chem 喎... 真係想 XYZ 佢架, 阻住晒喎~ 可惡~

食飽飯, 又係時間溫書... 今日仲係溫 Physics , 都係無咩進展, 停滯不前咁~ 要加把勁啦~

今日天氣好好~

溫到... 3:40pm, 電話響, 諗住今次又係袁永打黎問 Chem 啦, 咁接電話喎~ 哈~ 原來今次 Patrick 打電話黎喎~

"問事? "我問~

"無, 嗲陣得唔得? "

"得"

跟住咪同佢傾陣電話 lor, 傾下一個鐘, 傾下又一個鐘, 傾到 6 點, 我先話要出去補習, 要收線換衫~ 哈哈, 原來傾左成兩個幾鐘喎~ 你會問兩個男仔, 有咩好傾啦, 其實都好多野... 講下前晚個場波啦, 講下自己既"甜品"啦, 講下自己對自己件"甜品"咩感受啦, 又講左一d 學校發生過既事, 例如學校"殺 Sir" 個日點對 Patrick 呀, 又講下如果番入長天, 做 Head Prefect 個d 野咁呀... 仲有好多好多, 不過唔係咁記得 lu~ 哈哈~ Patrick 話我有 Leadership, Determination, Problems Solving 喎, 做 Head Pref. 應該唔係難事喎~ 仲有我同其他老師既關係都幾好喎, 應該有可能架~ 哈哈~ 呢d 野唔知咁多啦, 考完呢個會考先算啦, 係咪先~ 不過 Patrick 佢自己話想做 Eng. So. Chairman & 中文學會主席喎~ 哈哈~ Patrick 你得架~

傾完電話, 換衫出去補習, 唔知點解我今日拎左部相機喎~ 去到地鐵站, 喂~ 例牌要去地利店睇下架啦~ 最後我都買左本 Milk~ 今期有呢位做封面...
入面介紹一隻錶好靚呀~ 小飛俠 X Swatch~ $ 880 蚊咋, 全球限量 1000 隻喎~

補完習, 番到屋企成 10:30 lu~ 諗住老婆仔會 reply 我啦, 都係無, 咁即係聽日無街去~ 唯有留在家中, 溫書書 lu~ 食飽飯之後, 又係時間玩電腦, 無無聊聊咁影左幾幅相~ 有我鐘意既 Gloomy~ 上面個張開左閃光燈影, 下面個張就無既, 睇唔睇到有好大分別呢?

玩完相機就無聊下咁... 咁就又過一日 lu~

仲有 7 日就開考 lu~ 驚驚~

2003 年 04 月24日　【晴】

今朝 5 點先訓覺, 點解? 因為睇波 lor, 曼聯 對 皇馬, AC Milan Vs AJex ~ 兩場波都好好睇~ 睇完波, 臨訓覺前都留言俾老婆仔, 嘩~ 睇下我對妳個衰婆幾咁好呀, 訓覺前都幫妳灌水呀~

訓左 6 個鐘, 11 點鐘就起左身 lu~ 之後就睇電視, 食晏晝~ 食飽飽就溫書書, 溫 Physics 又做下 Exercises 咁... 之後又恰左差不多半個鐘, 先出去補習~

哎呀~ 今日補習又見到...... 走個時搭地鐵, 又同佢同一個 Compartment , 不過始終都係放棄左... 算啦~ 今日補 Compu 最後一堂, C.Y.Chow 話 Compu 四十幾分就 C 到架啦~ 原來咁易架咋~

返到屋企, 同阿sa 媽講今日補習既事, 補阿媽鬧喎... ><"

今晚無波睇, 寫完日記早d 訓覺~ 早抖~

2003 年 04 月23日　【晴】

琴晚好慘慘, 又訓得唔好啦~ 一訓得唔好就會諗野, 琴晚諗再會考之後去邊度玩, 同老婆仔玩啦, 一齊整甜品啦~ 又諗下會考完, 做暑期工搵到個d 錢要黎做咩好, 換電話啦, Upgrade 部電腦啦, 加 Ram, 加 Harddisk, 加 TV Card, 換 Sound Card, 都好大工程~ 又要買部 Hi-Fi 放係自己床頭, 咁夜晚無聊就可以聽下收音機, 又或者聽下 CD 都好嗎~

今朝要番學補英文, 因為琴晚訓得唔好既關係, 今朝好鬼知醒, 8 am 正就起左身, 擦牙洗面, 但係時間仲好早, 咁咪開電視睇下 lor~ 頂~ 部電視而家無事喎, 真係想打佢~ 睇下新聞啦, 嘩~ 今日最低溫度都有 25 度, 最高成 29 度~ 嘩~ 痴線咩, 咁熱, 邊可以咁架~ 哈哈~ 所以我今朝就淨係著左年背心底衫, 出面一件摺袖長袖�`衫, 衫都唔攝就番學 lu~

因為時間多, 今朝搭巴士番學, 搭到去深水埔, 元村街 Post Office, 嘩~ d 女人真係勤力, 咁早就開工~ 哈哈哈~ 去到個個巴士站, 見到肥輝上車, 佢見唔到我坐左係最後排喎, 咁我咪上前推一推佢個頭, 又坐埋佢隔離, 不過我推佢個頭既結果就係一早就俾佢強姦... 嗚嗚~ 好過份呀~

番到學到, 嘩~ 犀利啦, 裝左五個新洗手盆係校工亭後面喎, 一入學校姐, 坐係校工亭個個校工叔叔就指住後面, 要我地洗手, 仲要我地戴番個口罩喎, 大佬~ 咁我食梗麭包, 點戴呢? 洗完手, 捽捽十五秒 (一一如一, 一二如二.... 九九八十一, 背埋呢包岩岩好十五秒), 之後先慢條斯理番上去課室~

入到課室, 嘩~ 個個都戴晒口罩, Miss 仲著得好"勝緊"(性感), 出面著左一件 See Through, 裡面係無帶既 Tube Top~ Woo... 一條短裙... 流鼻血... 哈哈~ 因為d 人又未番齊, 又未夠人, 咪講下其他野 lor~ 哈哈~ 洪輝今朝串 Miss 串得好鬼過癮,

喂~ Miss 你件衫幾錢呀?

Thirty Dollars~

下~ 咁平~ 唔通少布d , 薄d , 真係會平d ~ ?

嘻嘻~ (仙姐一貫以來的笑聲)

你真係好乞人憎, 廢事同你講~

哈哈哈~ 笑鬼死人~ 我地呢個英文 Miss 就係咁, 低低 B B 咁... 真係無佢辦法~ 之後呢, 因為等多d 人番先開始做 Listening, 咁咪等 lor, 等等下, d 人開始唔耐煩喎, 咪同 Miss 講,

Miss 等到o個個鐘搭三啦~ (每間班房都有一個鐘)

咦~ o個個鐘都唔準既~

哈哈哈~ 我地又笑啦~ Miss 真係好低 B... 準唔準都無咩關係啦, 用黎睇時間之麻, 唔會行行下停左就得架啦~ 哎呀~ 笑鬼死~

唉~ 終於都等夠人啦, 咁咪開始做 Listening Test lor, 今日做 02 年 Paper III, 要憎就係做 Listening 架啦~ 又要 Drops Notes, 又要睇 Data Files 喎~ 煩~ 因為 02 年個份同之前個d 唔同, 好長篇... 聽聽下就無心機... 之後就開始趴低, 繼而訓覺... 一於少理~ 訓醒都未聽完, 真係好鬼死長... 咁咪同周圍個d 同學傾下計咁 lor, 妖~ 死 Pig Pig 又講衰野, 咩 Agnes b 出左一隻 Condom 喎, 之後又講咩味咩味... 痴線啦, 咩味咩味你都唔會放入口架啦~ 得個講字~ 超~

時間過得超慢, 好不容易先到 11:45 am, 終於都走得~ Yeah~ 之後就去左搵 Patrick, 唔見佢就過左去 Staff Room 搵周 Sir 啦, 係 Staff Room 度, 見到對面 Miss Kwok 上堂, 咁我諗 Patrick 一定係度啦~ 真係~ 不過佢仲未落得堂喎~ 咁我咪唔理佢, 同嘉維, 肥軒食 lor~ 我地去左綠野仙��食~ 今日食日式牛肉飯, 咦~ 幾好味既, 今次仲好多牛肉添~ 不過可惜太多汁汁啦... 搞到喧賓奪主咁~ 叫左杯"藍色天鳥", 原來呢杯野有段故, 話說當時有個胡佬飲過架~ 原來呢個胡佬, 就係我地學校名氣... 唔係, 應該係氣味最大個個胡佬啦~ 哈哈哈~

食飽飯, 醒起唔記得俾野關錦聰喎, 咁岩肥軒又要番學校, 咁咪三個人一齊番學校 lor~ 又要洗手~ 之後俾左野關錦聰之後, 就打道回府~ 下晝走堂唔番學, 鬼叫做 Listening 咁鬼死悶咩~

番到屋企, 成身濕晒... 好熱, 咪沖左個凍水涼咁 lor~ 之後就開始溫書... 又係個d 時間, 袁永又打黎問 Chem... 大佬~ 救命呀~ 之後溫左一書, 5pm 度我又 online , 又見到老婆仔~ 好開心~

妳呀, 肚痛就睇醫生啦, 痛左咁多日都唔睇, 妳自己身體成日都唔緊唔緊咁喎, 成日都要人擔心妳既~ 唔通妳肚痛好舒服啦喎~ 乖啦~ 睇醫生啦~ 之後又傾下星期六去大埔林村許願樹... 仲有講其他野, 不過呢d 野放係心度既, 唔需要寫出黎~

今日又因為 SARS 死左 6 個人啦, 真係希望今次既疫症快d 平息啦~ 累積到今日死左 105 人啦... 唉~

今晚有波睇, 曼聯 Vs 皇馬~ 不過 3 am 先做~ 好~ 今晚溫書溫到 3am 之後睇完波, 5 am 又溫書... 努力~

哎呀~ 隻錶無左電呀~ 算啦, 過兩日買過隻, 今次唔買跳字錶 lu... 買機械錶~ Heehee~

ps. 頭先睇左電腦雜誌, 加一個 120 Gb Hard Disk $ 980, 一條 512 Mb Ram $ 500, Sound Card $ 500, 5.1 聲道喇叭 $ 1000, 總數 $ 3000 ~ 努力~ 哈哈~

2003 年 04 月22日　【晴】

9am 起身, 今日又係同琴日一樣, 真係不得不打自己一下, 成日都係咁浪費晒d 時間既~ 明明都落左床啦, 都係仲要係張 Sofa 度訓喎~ 離譜~ 最搞笑係, 10 am 係 Sofa起過一次身次, 去左刷牙洗面, 之後又訓番落 Sofa 度, 又訓到 11:30 先真正起身~

跟住咪睇下電視咁 lor, 睇到咁上下時間就食飯, 食飽飯, 寫番琴日篇日記, Miss Cheung 又打電話黎喎, 通知我聽日要番學補課, 做 Past Paper Test~ 咁咪番 lor~

又 2pm 啦, 咁咪諗住溫書 lor, 但係個人其實已經有d 暈, 諗住死頂, 溫書重要, 點知溫唔到半個鐘, 就趴左張(木台)度訓覺, 之後又有d 不知名既茂利打電話嘈醒左, 收左線又見自己仲係好暈, 咁咪又係 Sofa 度訓覺, 一訓就訓到 5:15 pm 先起得到身, 唔知點解個人會咁暈, 唔知係唔係琴晚食左兩粒葯, 勁得滯, 個人頂唔順呢?

訓醒 5:15 pm, online 睇下啦, 見到老婆仔 online 喎, 咁咪同佢講左句早晨 lor~ 之後我咪話俾佢知我岩岩個 Situation 俾佢知, 好暈~ 佢都好關心我, 問下我點~ 傾左一陣, 佢就要番去溫書, 咁我都 offline, 諗住食d 野就開始溫書咁啦, 溫 Physics, 又係溫唔夠半個鐘就放棄左, 之後就諗本 Physics Exercises 出黎做下, 都當係溫書既~

溫下, 做下~ 又 7pm, 老豆又番黎啦, 諗住開電視睇下啦, 咦~ TVB... 畫面有兩條白線既, 禁過去 ATV, 又係咁既, Pearl... 又係... I-Cable... 無事喎~ 仲好清喎, 咪同老豆講 lor, 佢打電話去 Service Hotline, 要星期四下晝先上黎整... 下~ 大檸樂, 咁今晚, 聽晚咪無帝女花, 智勇新警界, 秦始皇睇... 唔制呀...

食飽飯, 食雪糕, Dreyer's 個隻Red Bean, 咦~ 好鬼死甜呀~ 下次唔好買啦, 我覺得最好食都係 Chlocolate Chips~ 最正~ Yeah~

今晚真係慘, 無電視睇, 咁咪諗住開電腦玩啦~ 因為我夜晚真係好難溫到書, 除非過左 12 點~ 又開收音機聽, 哎呀~ 執執下張書(木台), 差d 唔記得左, 今日老婆仔同我講要聽第五台, 會考專線添~ 諗住即刻開黎聽啦, 都差不多做完 lu~ ^^"

之後咪轉左過去 903, 等到 11 pm 聽吳君如... 呢一段等既時間好漫長, 咁咪又拎d Exercises 出黎做下咁 lor, 又搵番套校服出黎咁 lor~ 又 send 左個 SMS 俾老婆仔, 問下佢星期六去唔去大埔林村許願 lor~

聽朝要番學, 今晚早d 訓~

2003 年 04 月21日　【晴】

今朝又係同琴日一樣~ 本來諗住 9 點起身先做幾年 Past Paper 先既, 點知 9 點係起左身, 但係個魂魄未呢, 落左床, 出左廳, 就訓左落 Sofa 度~ 訓呀... 一訓又 11 點幾 lu~ 乜都無做過就又準備要出門口, 真係好鬼死失敢~

琴日問左何翠盈借左 Past Paper 答案, 今日又約番佢同一時間, 同一地點還番俾佢, 吸敢過琴日幾乎一支友食 Lunch 既經驗, 落去個時咪打左個電話俾律師 lor, 頂~ 條友仔話可能陪 fd 食喎, 唔理得咁多, 落到去先算啦~ 落到去喎~ 早到左成五, 六分鐘, 咁咪等下 lor, 鬼叫係我問人借野咩~ 等啦, 哈哈~ 鬼到彭輝喎, 佢竟然會係自修室行出黎喎, 仲有一個不知名既女仔陪住出黎, 唔通係彭輝既新目標? 同佢打左個招乎, 佢就行左去室內運動場個邊, 去小解~ 又係得我一個人等~ 彭輝去完 Toilet, 見到我仲係到, 問我做咩, 我咪話等人, 要還番d 野俾人 lor, 佢"哦"又一聲, 就繼續去, 去左食煙~ (最憎)

12:30 啦, 還番d 野俾何翠盈之後, 咪諗住等埋超人出黎啦, 先見到丁丁出左黎, 之後就見到超人, 佢仲同兩個人一齊出黎, 一個咪就係泉叔 lor, 另一個, 估到估唔到呢, 係冰姐喎~ 自從小學畢業, 都未見過佢, 哈哈~ 對我黎講無咩大影響既~ 咁我行過去佢地個邊, 超人就開口問冰姐認唔認得我喎, 咁我戴左口罩, 得上半塊面, 又戴左眼鏡, 五年無見過, 我諗都無咩理由認得我掛, 哈~ 又出奇地俾冰姐認到, 仲要響全朵, 一字不漏講晒我個名出黎喎, 超人就即時打完場, 讚冰姐好記性~ 哈~ 我個時就扮傻仔, 扮唔認得冰姐, 其實認唔認得都無咩所謂姐, 反正我又唔會溝佢架啦, 佢條件又好喎, 小學讀書已經好勁, 第一, 第一仲有第一, 而家又好似讀St. Mary喎~ 嘩~ 呢d 我真係高攀唔起~ 又唔係我鐘意個鐘 Type 喎~ 況且我而家同佢又無事, 一齊番, 呢d 我唔會亂諗, 我只要做既, 就係對佢好d , 可以令佢每一日都開開心心咁過~ 因為我曾經應承過自己, 如果要同佢一齊就要令佢開心~

傾左一陣, 冰姐就走, 之後泉叔都走, 之後見到貓仔出黎, 呀~ 好掛住貓仔呀~ 佢出黎個時唔認得我, 咁我咪主動叫佢, 我戴左口罩竟然唔認得我喎~ 不過真係好掛住班同學, 特別係貓仔, 肥玄佢地, 貓仔好幫得我手, 雖然佢只係總管, 向以貓總管之稱, 亦都係咁, 佢咩都會幫手~ 真係好正~

之後, 又得番我同超人, 條 PK, 竟然... 唔理我喎, 同另一班 fd 食, 過份~ 算, 我自己食~ 超~ 咁離開左圖書館範圍之後, 我咪拎部電話出黎, 打俾 Patrick, 將我所見所聞報告俾 Patrick 知 lor, 特別係冰姐呢... 呵~ 一邊傾一邊諗食咩, 行行下, 都係去左大家樂~ 頂, 又撞番個死超人, 可惡~ 佢地四個人, 哼~ 我自己一個人坐, 嘩~ 今親飯都算食得好趕頭趕命, 十五分鐘, 食左大半碟飯, 飲埋杯凍奶茶 ( 都係金園好飲d ), 就要郁身, 仲去左 7 仔買左支 Sprite Ice , 之後就急步行去搭車, 行到去青山道, 頂~ 有車, 梗係追車啦~ 九秒十既速度, 好彩追到~ 不過因為天氣熱, 加上Muscles 突然有d 咁激烈既 Contraction 既關係呢, 我 d Muscles undergo anaerobic respiration, 所以呢, 上到車, 我都喘左一陣氣, That's Oxygen Debt, is the amount of extra oxygen needed to remove all the lactic acid accumulated during heavy exercise~ 哈哈~ Biology 呢科, 我掂啦~

入到沙田, 仲好早, 老婆仔又未打電話黎, 咁呢d 時間咪行下街, 周圍兜下咁 lor~ 不過都係行左一陣, 老婆仔佢就打電話黎啦~ 太好~ 之後一齊上去交錢, 交完錢, 都仲好早仲有廿分鐘, 我咪同佢落番去, 行下街先咁啦, 去左行百佳, 我買糖糖食~ 買完時間岩岩好, 上番去補習~ 哈哈~ 上到去, 都差不多入得去, 咪等左陣, 本多唔應該我地入先架, 因為我地又無遲過其他人咁喎, 但係呢, 神推鬼X 之下, 我地做左龍頭, 入左去先喎~ 哈哈~ 好抵死~

今日補習無咁悶, 亦都唔係好似琴日個種氣氛~ 好地又傾下計, 佢寫係 Table, 我寫係 Notes 上面~ 佢話我今日曳曳呀, 又買糖食, 又有汽水飲, 仲有扔垃圾添喎~ 咁妳呢, 衰婆, 腳多多, 踢跌我樽汽水, 搞到要飲有汽薄荷糖水喎~ 咁今日補 Double Lesson, 兩堂都係 Live~ 中間有個 Break 個時, 一齊去�菮�, 妳 Kick 我呢, 點計先~ 下... 好彩~ 無俾妳 Kick 到, 如果唔係我要多個口罩都得啦, 做咩? 遮埋對眼 lor, 廢事俾人認得出啦~ 哈哈~ 好開心啦, 總之~ 因為我同佢已經無事啦~ Ye@H~

之後送佢番屋企, 係火車度, 佢攬番我啦~ ( 下刪百字, 內容三級), 之後我送佢番屋企, 我話我唔話行入有冷氣地方, 因為出出入入冷氣地方, 我成日都要除眼鏡, 好麻煩, 所以我地就改道行左公園, 係公園坐左一陣, 傾陣計, 開復活節禮物, 係 Kender 出奇蛋, 但係我唔食得 Kender 個d 朱古力架, 我食完會肚仔痛架, 所以呢, 淨係拎左個玩具出黎玩, "車車" 呀~ 佢個傻婆見到係玩具車, 開心到叫左出黎喎, 哈~ 之後咪係公園度玩下車車 lor~ 又傾下計咁 lor, 之後先送佢番屋企~

今日學左一樣野, Heat exchange~ 估下係咪黎? 哈哈~ 我學完, 就即刻應用番出黎~ 不過換來既, 就係番到屋企, 傷風黎料, 妖~ 鼻敏感真係好 Q 麻煩~ 好慘~

今晚終於有得睇帝女花, 智勇新警界( 成日都講左智勇新人類)~ 帝女花, 長平真係好慘~ 智勇新警界, 我都話大雄係做 Undercover 啦~ ( 唔係 UnderWEAR )

呢兩日都有得見老婆仔, 好開心~ 如果日日都係咁, 你話幾好呢~

2003 年 04 月20日　【晴】

今朝本來諗住 9am 起身, 先做兩份 Bio Past Paper 2, 但係後尾都係起唔到身, 始終都係訓覺大過一切, 無他既, 夜晚做番之麻~ 今晚又夜訓啦~

今日問何翠盈借左 Bio 93-02 paper 2 既答案, 係自修室出面等佢既時候見到 Karina, 唉~ 佢真係... 同人地分手都唔夠一個星期, 今日又見到佢係自修室出黎, 拖住另一個男仔, 真係快得離譜~ 最過份既, 係我企係佢地唔夠兩, 三米範圍內, 佢掛住同條仔傾計, 都唔見到有我呢個 fd , 仲要我著住橙色衫都留意唔到~ (界�})仔王, 真係非佢莫屬~ 又再一次証明左, 自修室乃是非之地也~

之後一支友去食老 Mac , 點知見到謝偉喎~ 佢又係一支友食, 咁我咪拉埋佢一齊食 lor, 無咁悶嗎~ 哈哈~收左好多料, 阿 Che@p 又散左...

哈~ 今日要補習呀~ 都有成兩個星期無補 K.Kwong Chem 啦~ 鬼叫 SARS 咩, 個 K.Kwong, 又去過淘大花園喎, 仲要去完番黎有少少咳, 搞到佢自己要自我隔離十天, 哈哈~ 白痴 lor, 哈哈~

今日補習, 有見到佢啦~ 今日... 其實今日去沙田補習個時, 有諗過架, 有諗過同佢講清楚分手架, 初時d 感覺真係麻麻地, 好似呢, 好似一對朋友咁, 真係唔係咁好受, 但係完補完走個時, 我又自己幫佢拎背囊, 佢又主動拖番我隻手, 我先覺得大家依然係相愛, 但係始終都唔可以去番個日之前既感覺~

之後就送佢番屋企, 嘩~ 架火車d 冷氣老蓮咁大, 想凍死我咩~ 就俾佢話我唔帶衫出街喎, 哈哈~ 真係笑~ 我男仔黎架嗎, 成日都準備定一件衫出街咩~ 送完佢番屋企, 我又要番屋企, 仲買左支 Sprite Ice, 都幾好飲喎~ 哈哈~

番到屋企做左兩年 Bio Paper 2~ 咁就過左一日啦~

聽日又有得補習 lu~ 又可以見到佢~

2003 年 04 月 19 日　【晴】

好開心呀~ 因為今日好好天, 好好太陽, 但係又唔會好焗, 有d 風, 好清涼, 令人心廣神怡, d 風吹埋黎個種感覺, 好似將我所有既煩惱都隨之帶走, 特別係近排所發生既事情, 真係令我好傷神, 好傷心...

今日同阿媽去左睇試場, 探探路先~ 先去左瑪利諾神父教會... 之後去左天主教伍華中學, 最遠都去呢度... 淨係搭車, 車來車往, 遊車河~ 不過有d 都要行幾步路既~ 之後又搭車番屋企, 阿媽就去整頭髮~

番到屋企又溫書... 中間袁永又問 Chem~

哈~ 阿媽電左髮, 好似郭可盈, 哈哈~

今晚做心連心抗炎... 咦~ TVB 無男主持咩, 搵故楓做主持... 講野又... 唉~ 好差~

2003 年 04 月 18 日　【晴】

今日成日都係屋企溫書, 今日溫 Biology Book 3 ...

溫書個時, 每溫到開始專心個時, 總係有d 魔鬼架喎, 電話響啦, 去�菮珧�, 總係好難避免架喎~ 衰仔細佬d 同學成日都打電黎, 次次都係我接電話, 但係佢總係出左街, 正一衰仔, 真係好想 XYZ 佢d 同學唔好每隔一個鐘頭就打一次電話架~ 之後又有袁永打電話問 Chem... 問親都要半個鐘先收到線~ 好彩佢唔係好多問題姐~

今晚補習, 仆街, 以為今日唔駛交學費, 又唔肯定今日駛唔駛番, 去到地鐵站個時咪打個電話俾肥雞 lor~ 噢~ 我的天~ 原來要交學費喎~ 死~ 我唔肯定有無帶錢... 咪拿拿臨搵個銀包出黎睇 lor~ 好彩都有六舊水~ 哈哈~ 原來今晚又要上 Double Lessons~ 搞到今晚無飯食, 最後只好番屋企煮~

2003 年 04 月 17 日　【晴】

今朝訓到 11:30am~ 好早~ 一起身又見到阿 Sa 媽喎~ 又同佢傾左一陣, 佢好驚會考, 驚溫唔切書, 其實有咩好驚喎, 我而家既進度慢得離譜呀, 算溫晒d chem, 溫梗 Bio, 唉~ Anyway, 阿仔我會支持你架~

差不多 12:45 pm就出左門口, 因為我要食飯, 又要搭車, 都要番一段時間, 去到公園, 仲未夠鐘, 亦都未見佢, 我就行左一個圈, 又去左洗手間, 番黎都仲未見到佢, 我就搵左個陰涼既地方坐, 痴線架, 今日好見死熱, 又晒喎~ 等既同時我又拎左份 Compu 出黎做, 因為今晚要補習嗎~ 做左一陣, 佢黎啦~ 見到佢, 佢見到我, 佢坐左係我隔離, 佢俾左份野我, 係份中文 mockPaper, 仲有一d 英文既 Vocab~ 之後係一陣既寧靜... 大家都無出聲~ 感覺好怪~ 最終我都開口, 我問佢有無後悔, 我問佢... (飛)~ 最後我都原諒左佢, 捉住佢隻手, 但係個種感覺好怪怪, 唔... 點解呢, 好似係初初相識咁, 好似已經無左個種感覺... 之後就係公園坐左一陣, 坐到成三點幾, 之後就走啦~ 期間佢媽咪打左幾個電話俾佢, 妳媽咪咁緊張妳, 不如妳番去啦, 妳番去既話, 妳媽咪又唔駛成日打電話黎問妳係邊, 妳又唔駛成日俾屋企人話喎~ 算啦, 呢個 Moment 唔想諗咁多, 我只係想考好d 個會考佢, 我唔可以衰俾人地架~ !!!!! 特別係學校某d 人~

哎呀~ 去到上水火車站差不多都 4:15pm, d 時間兩頭唔到岸咁喎~ 番屋企既話, 坐得一個鐘, 書又會溫唔到就要出門口去補習, 唔番屋企, 又唔知去邊好, 都成兩個鐘架, 又無帶書喎, 如果唔係都可以去自修室溫陣書呀~ 但係最後都決定左番屋企, 番屋企阿 Sa 媽又問我地兩個點, 我咪略略講左 lor, 之後, 我又問左其他野, 突然間好想改英文名, 因為覺得而家呢個太 common, 簽名又唔順手喎~ 我又問左蘭姨, 又問左 Doris, 都有好多不同既意見既~

同阿Sa媽傾計... 唔... 阿媽, 我明白架... 阿爸唔理你, 仲有個仔會支持你架~ 加油~

6:40pm, 出門口補習, 今日發生左d 野... 唔... 出去個時係地鐵啦, 補習上堂個時啦, 仲有走個時係地鐵度 (飛), 今日補習補得好鬼死開心, 肥黎今晚有d 失常, 哈哈~ 飛女姐~ 拍左 12 日拖, 初戀, 初吻, 哈哈~ 好想笑~ 哈哈~ 仲為左一條百力滋既事... 哎呀~ 笑到我漂眼水啦~ 仲有失驚無神, "喂"一聲俾 C.Y.Chau 串... 唔寫啦, 好好笑~

哼~ 譚銘言先生, 唔好以為你自己好x 把閉呀~ 你有咩料, 我心裡有數, 你自己唔知既, 自己痾篤尿照照你個 x 樣先啦~ 問你食唔食百力滋, OK~ 食唔食都一聲, "橋"埋對手, 扮x 晒樣, 你唔食咪唔食 lor~ 家陣好恨請你食呀~ 唔食就算, 況且初初不嬲都唔係我錯 (Ref. to 14/2) , 之所以話你小氣, 話你小家, 話你卸膊就真係無錯, 個時仲講自己改左, 唔會小家, 仲話番我轉頭, 哈哈~ 好笑~ 今日咩情況, 唔知邊個小家 lor~

番到屋企成 10 點幾, 因為今日補 Double lesson~ 番到去, 痴痴線線咁, 平日都無咩日會搵我, 今日鬼死咁多人喎, 仲要食梗飯既同時喎~ 點應咁多個喎~ 問功課既有啦, 有 Biology, 有F.4 Maths 啦, 又有問電腦野喎, 仲有d 問埋d 無厘頭既野, 仲有阿 May 添~ ICQ 度見到阿媽, 我同佢講左今日地鐵發生過既野, Cher~ 俾佢半盤冷水咁淋落黎喎~ And Then, 又打番電話俾嘉明 ( Netfd, 女仔), 唉~ 佢真係好鬼低 B, 哈哈~ 佢個 ICQ 神神地, 咪幫下佢 lor, 又教下佢d Maths... 唔得掂~ 收左線無幾耐, 電話又響, 和舅父打電話, 又問電腦野, 喂~ 乜我而家做左電腦技術支援部咩~

And Then 又同 Tiffany 講左d 野啦, 關於今日既, 之後又問左佢改名既野~ 好鬼多意見... 花多眼亂, 但係我依然覺得 Cyrus 呢個名幾好喎~ 唔理咁多, 慢慢諗~ 哈哈~

聽日阿媽去 BBQ, 我唔去, 留係屋企溫書, 但係我已經約左阿媽, 星期日陪我去睇下d 試場點去架啦, 預下d 時間呀嗎~ ^^

PS. 阿Sa媽, 唔好 Law 我得唔得呀?

PS2. We Shall overcome~ 呢幾日成日聽到~

2003 年 04 月 16 日　【晴】

琴晚好早訓覺, 今朝好早起身, 因為今朝 10am 要過去中環見工~ 琴晚 11:30pm 就訓左, 臨訓之前我又 Send 左個 SMS 俾佢, 我琴晚諗左一陣之後, 算啦~ 我入去搵佢 lor, 其實已經退左一大步啦~

琴晚初時訓得好好, 訓到大約 2:30am 度唔知點解醒左, 之後就訓唔著啦~ 之後個腦就好多好多野諗喎, 諗下今朝見工, 會問d 咩, 我又應該答d 咩呢? 見完工, 入去搵佢既話, 我又應該點同佢講呢? 之後又浮玩好多好多種 Chemical... ( 搞咩呀? ), 又浮現好多 Chemical Equation... Haber Process, Contact Process... ( 痴架咩? ), 呢d 真係叫做溫書溫上腦呀~ 哈哈~ 搞到我成晚都訓得唔係咁好... 所以我今朝都好知醒~

今朝見工, 9:10 am 就出門口, 搭地鐵去中環, 之後行去大會堂個邊, 去到樓下, 見到有d Applicants 喎, 見到佢地... 死啦~ 唔記得左帶準考証正本, 淨係帶左副本添, 點算... 唔理, 上左去先算~ 嘩~ 上到去都有成4, 50 人啦~ 仲好鬼多都係女仔添, 有d 仲幾鬼靚女, 幾純下架~ 真係好彩既話識番一兩個都幾好, 雖然而家我地既關係唔知會係點, 我揀左既係俾佢番返黎我身邊, 但係我應承過佢, 唔可以識其他女仔, 所以我係而家咁既情況下, 都係無做到~ 唔~

9:45am 去到, 登記左之後, 坐左十幾分鐘度就去入左去 in 啦~ 唔知算唔算不幸, 我個組七個人, 6 都係女仔, 得我, 同另 1 個係男仔, 嘩~ 入到去三個都係小姐黎既, 一個係 Ms Kwok, 一個係 Ms Yung, 仲有一個係 Ms Leung~ (又會咁都記得既~ ), 入到佢 Ms kwok 佢先開口, 因為佢係今次 interview 既 Chairlady~ 佢先 intreduce 左今次既目的, 又介紹左佢自己同佢左右邊既兩位~ 就開始問問題啦~ 第一題用英文問, "Why do u want to apply this job?" 哈哈, 我收過料, 所以我諗定呢題點答~ 但係我聽到其他人答, "Because I like reading Book" 我心諗, Oh~ Shit~ 有咩關係呀, 同你見呢份工, 唔通叫你番黎睇書咩? 又有兩個答" Because I am the Librarian in school" 哈哈~ 你學校個d , 同公共圖書館個d , 差好遠喎... 咁都答得出口? 哈哈~ 聽得最多人答呢個答案" I want to have more experience" 哈哈~ 我見咁多人都答, 無咩新意, 到我個時我答左d 特別d 既答案" I want to improve my communication Skills, and be more skillful" 哈哈~ 呢句夠新意掛, 不過答個時真係好鬼緊張, 個心扑扑扑扑咁跳, 我諗隔住件衫都會見到 lor~

問完呢條, 到問一條中文啦~ 呢題完全無收到料, 我諗係即場出掛~ Ms Yung 問, "有一個 Case, 有人係圖書館內使用手提電話, 如果你做到呢份工作, 你會點做? ", 好明顯係應用題啦~ 今次既答案其實同大家既差不多, 因為方法都係得呢幾個姐~

in 完都係得 10:15, 半個鐘都唔使~ 之後on 居居咁去天星碼頭搭船過尖咀, 明明下層船入口近d , 我都係要行過去遠d 既上層船入口 lor~ 仲貴d 添~ 搭船過左去尖咀, 係維港度拎左部相機出黎, 本來想影下風景架, 不過d 景唔靚, 又陰陰沈沈咁, 最後都收埋部相機~ 落左船, 10:30am 行左上去廣東道, D 名店都未開, Louis Vuitton, Gucci... 都未開, 之後我落左 Muji, 又未開, 妖~ 最後係 Citysuper Pit>in 買左兩盒百力滋, 一盒 Blueberry Yogurt, 另一盒係綠茶味~ 兩隻都未食過, 哈~ 唔知俾阿 Sa 媽見到, 會點呢? (手禁)住我黎搶掛? 唔知呢~

之後我行左上九龍公園, 我都唔知做咩... 行完出番nb彌敦道, 行到去佐敦, 油麻地, 之後就等巴士番屋企~ 本來諗住你會打俾我, 同我講今日出唔出, 既然你無, 我都唔會入黎, 你既機會, 又係你自己白白斷送... 哈哈~ 係呀~ 頭先行n彌敦道個時, 見到一d 野~ 哈哈~ 見到一個女仔既背面, 唔... 條褲係超低腰 lor, 係可以見到股"啦"架~ 我覺得d 人著衫可以著成咁, 真係好大膽~ 非禮勿視, 我唔小心望左一眼, 就回眼過黎, 繼續行我既路~

番到屋企, 食左 Lunch, 三點幾, 佢打電話黎, 佢話左我今日見工點, 我簡略答左佢, 之後我問佢今日做咩唔出得去, 佢話屋企人唔俾, 之後我問佢聽日出唔出得, 佢話可以既, 於是我約左佢聽日兩點係北區公園見~ 之後無咩講就收左線~

番到黎屋企, 一開 icq 就見到阿 Sa 媽喎, 佢問左我見工添~ 我就一五一十咁話左俾阿 Sa 媽知, 其實係叫佢睇我日記姐~ 不過有d 地方就再 Details D 咁解~ 之後又有 Chloe 啦, 又同 Yandy, Karina 講, Patrick 仲打電話問我點添, 當然係講得哈哈大笑啦~

今晚阿 Sa 媽陪我癲, 哈哈~ 我講俾佢知係上水搭綠 Van 去屯門好快, 好正~ 佢就話遲d 一定要我陪佢搭喎, 仲有去海園咩洋公園玩添~

2003 年 04 月 15 日　【陰】

今日佢打左電話俾我, 唉~ 唔知點解明明自己有野同佢講, 都講唔出口既~ 本來琴日 send 左 msg 俾佢, 想約佢聽日十二點去中環皇后碼頭等, 但係後來又諗佢咁傻氣, 又唔識路, 去到中環係唔係過份左少少, 遠左少少呢? 後尾問左阿 Sa 媽之後, 改左去尖咀鐘樓等, 已經算退左一步架啦~ 咁我聽日係中環大會堂見工, 咁叫佢係皇后碼頭等都好正常姐~ OK~ Fine~ 佢唔識我咪就下佢 lor, 過去尖咀鐘樓, 唔係唔識去掛? 真係已經讓左佢, 唔同叫我入去上水搵佢 lor? 咁做好似做到我做錯咁, 好似係我山長水遠入去向佢道歉咁... OK~ 佢今日打左電話黎, 同我講唔出得, 我唔係為難你, 唔係話逼你一定要出黎, 但係我俾左機會你, 你都唔好好珍惜, 算啦~ 遲d 再算~ 反正星期日都有機會見到佢~ 不過我唔想拖咁耐, 而且我覺得有d 野應該面對面, 親口面, 親口答, 效果會好d~

呢幾日愛上聽收音機, 朝早 10am- 1 pm 就聽 FM 94.8 , 風騷快活人, 有時講d 野真係好鬼好笑架~ 笑到架架聲~ 之後 1pm - 3pm 就聽 一時貪玩, 因為近排有講關於會考既野~ 3 pm -5 pm 就轉去 903 , 聽 903 idclub 森美小儀山寨王, 又係好鬼好死, 不過有時講d 野都好鬼無聊, 好似今日咁, 原來係擦字膠生日喎~ 之後 5pm-7 pm 就可聽可唔聽, 呢段時間有少爺占聽 lor~ 聽住收音機溫書, 都 OK 得架~ 哈哈~

今日我開始溫 Bio lu~

2003 年 04 月 14 日　【陰】

今日我認真咁溫書溫左大半日, 日頭仲無開 ICQ ( 除左問阿 Sir 野之外), 係夜晚先有 online~

今日我做左半個決定... (飛), 夜晚我同阿 Sa 媽傾傾下之下 + Tiffany 既 Opinions, 我做埋另一半既決定~ 希望我今次無做左決定啦~

2003 年 04 月 13 日　【晴】

今日心情其實已經無琴日咁差架啦~ 今朝訓到成 11:45 am 先起身, 因為我怕, 我覺得訓係張床, 一個人係最舒服既, 無奈係一定要起身, 阿媽叫左我幾聲先肯落床, 因為差不多 12 點啦, 要食 Lunch 啦~ 今日落左去青山道食 Lunch , 去左金園~ 個度d 奶茶好鬼好飲架真係, 我嗌左個黑椒干炒牛意, 好正呀~ 好好味~ 加埋杯奶茶, 仲正~

之後呀媽帶細佬去剪頭髮, 之後呀媽就入屯門, 我就番屋企溫書, 今日做左幾份 cHem Past Paper... 唉~ 今日... 早知就入屯門啦~ 今日又發生左一d 野, 我又唔想多花半點筆墨去記下來, 所以我會跳左呢 Part~

今晚無飯食, 得我同細佬兩個食, 所以我就洗左我細佬去買老 Mac 外賣俾我食~ 食飽之後, 禁過去有線, 岩岩做梗 Y2K 前的暑假, 喂~ 都幾好睇喎~ 不過又有d 眼怨~ 之後同阿 Sa 媽, 仲有佢兩個 fd 玩 Net Big 2... 三個女仔打我一個男仔... 實死~ 講真有d 唔好意思架, 頭10 鋪我都未贏過, 鋪鋪都輸幾隻咁... 之後, 我幾鋪都拎到靚牌, 又唔係話可以一出十三炒個d 既~ 一鋪有 6 對Pair + 一隻 Dee, 仲要d Pair 都唔細下架~ 我既策略當然係先出 Dee, 仲行 Pair, 竟然可以炒到兩家喎~ 之後一鋪兩手, 一對 Pair, 一條 Dee, 唔駛講呢d 情況又贏架啦~ 就咁, 由八十幾蚊, 一贏贏到一百四十幾蚊, 真係唔好意思~

之後就同阿 Sa 媽吹下水咁, 佢就陪我癲, 仲有 Tiffany 係度 Chat, 同 Tiffany 係ICQ 傾到成 2:30am, 真係唔好意思, 煩左佢咁耐~ 講左我而家個 Sitution 俾佢知, 佢都有 Feed Back , 俾左d 意見我, 不過我而家都仲未拿定主意, 兩條路無回頭, 兩條路都應該, 兩條路都唔應該, 今次真係兩難啦~ 唉~ 唯有今晚自己好好諗清楚啦~ 我唔想傷左妳呀... 唔寫啦~ 呢 Part 我又飛左佢... 聽日要溫埋d CHem 佢, 仲有最後三課咋~ 溫完又做埋d Past Paper 我諗 Chem 我都大致上搞掂, 然之後要溫既呢, 就係 Bio...

努力呀~ HKCEE 之麻~ 我得架~

2003 年 04 月 12 日　【晴】

落左幾日雨, 今日終於放晴啦~ 本來是令人充滿希望... 但係今日我的心又再傷了, 經過星期三一疫之後, 本來呢幾日已經慢慢康復, 但係奈何今日我的心又再一次遭逢打擊, 這一次打擊比之前所有的加起來還要深, 還要痛... 今日的事情我不想多花半點筆墨去記下來, 我怕我日後看見這一篇時, 我會吃不消今次的打擊~

距離會考還有十數天, 加油呀~

2003 年 04 月 11 日　【陰】

琴晚好陰功呀, 成晚都訓得唔好, 訓唔著喎, 數綿羊都訓唔著, 就眼光光望住個天花板, 諗下呢樣又諗下個樣, 天馬行空, 有時仲諗到會笑埋出黎添~ 好鬼死白痴~ 今朝好鬼早就醒左, 聽到隔離房呀爸個鬧鐘響, 以為係自己個個, 就落左床, 但係睇下個鐘, 原來都未夠鐘, 就知唔係我個個響梗, 又番番上張床到繼續吽... 吽到差不多八點, 已經再吽唔到, 就自己落床, 都唔駛靠鬧鐘就起左身, 所以今朝我大把時間, 仲開左陣電腦, 上左 Newsgroup 出左幾個 Post 添~

跟住我就做左傻仔, 真係傻仔番左學~ 琴晚 Miss Cheung 叫我番去, 其實我今朝都諗梗番唔番去好架啦~ 番去好似好無為咁喎~ 但係又無理由唔番, 唔同班同學講架嗎~ 咁咪番左去 lor, 仲早到左五分鐘番到去, 仲買左本 Milk 睇, 有何韻詩做封面添~ 番到去學校, 一個人都未番, 但係見 Miss Poon and Miss Lai 班已經陸續咁入梗課室, 比起 Miss Cheeung 班, 我地班實在有點兒懶惰~ 睇左五分鐘 Milk 都未見有人番黎, 門又鎖左, 無得坐係入面慢慢睇, 睇下又幾分鐘, 見到有人番黎啦~ 係 Fish 喎~ 原來琴晚肥玄同佢講左 Miss 病左, 今日唔番, 但係佢唔信, 所以今日照番, 仲好, 有人陪下我, 無咁悶~ 傾下計, 吹下水... 又過左多五, 六分鐘, 9:10am 都係得我同 Fish, 岩岩呢個時候, 肥蕉番黎 lu, 通知左肥蕉之後, 佢就走左 lu, 又係番我同 Fish, 又過多五分鐘, 蘿柚番黎 lu, 我同佢地講左 miss 點點點之後, 我地三個等到 9:30am, 我決定走~ 之後係學校逗留左一陣, 蘿柚同 fish 係學校溫書, 我就決定番屋企~ 番屋企個時覺得好鬼死白痴, 都唔知今朝番黎學校做乜架, 得過十個人都唔夠喎, 原來佢地好多都知道 Miss 今日病左唔番學, 唉~ 早知今朝就唔做好人啦~ 白白痴痴咁...

番到屋企食飽飯之後, 本來想溫書... 但係溫左半個鐘, 我覺得有d 頭痛... 諗住訓陣覺休息下... 一訓就訓左成四個半鐘 lu, 成5:30pm 點啦~ 之後就開左 ICQ , send 左個 SMS 俾老婆仔, 之後老婆仔又 on 左陣 Line, 傾左一陣, 我又出左去補習 lu, 今日補 Double Lesson, 由 7:10pm 補到 10:15 pm 先走得, 番到屋企成 10:30pm, 無得睇帝女花~ 好鬼死好睇架嗎, 長平公主咁慘, 昭仁公主咁死賤格, 無得睇... 好慘~ 又無得睇智勇新警界~ 雖然首片, 片頭曲真係好難聽, 都唔知佢唱咩, 歌詞難頂, 真係想每次唱片頭曲都熄左把聲, 但係套劇, 都算幾好睇, 特別係迎璋, 馬 Sir 仲有瓦仔, 呢三個既關係~ 淨係睇左半集秦始皇~ 好好睇, 有睇既一定覺得好睇, 好有派頭架~ 好睇過智勇新警界~ 睇完秦始皇, 成十一點 lu ~ 之後同呀媽 Chat 左一陣, 11:30 pm 先沖涼~ 沖完涼, 頭未乾, 又同呀媽 Chat 左陣, 又寫下日記咁... 寫到成 差不多兩點先寫完, 咁岩個頭又乾得八八九九, 就去左訓覺 lu~ 今晚好眼訓呀~ 可能頭先我食左兩粒葯丸既關係掛, 有鼻敏感真係好慘~

2003 年 04 月 10 日　【陰】

今朝好早出左街, 十點九度就出街, 落左去長沙灣, 上左 Doris 屋企食 Cheese Cake, 其實我係想叫 Doris 教我整, 咁我學識左就可以整俾老婆仔食啦~ 但係話就話算比較容易整, 其實對我呢個唔多入廚房既男仔黎講, 絕對係一件難事, 仲要睇火睇時間添~ 呢d 簡直係可以拎左我大半條命, 甚至可以講一句, 比讀書溫習仲難~ 但係為左 Tum 老婆仔開心, 為難下自己都要架啦, 只要老婆仔開心既, 又有咩所謂喎~

食完 Cheese Cake, 學過下師之後就番左屋企溫書, 今日算係比較專心溫書既一日啦, 雖然間中都有玩下電腦, 但係今日無訓過晏晝覺, 幾乖仔呀~ 溫書溫到 6 點, 開始有d 溫唔入腦, 時間岩岩好, 係時候換衫出去補習~ 今晚補習都算好多驚喜, 首先就係因為 SARA 既影響而停課既關係, 所以下一堂要上 Double Lesson, 補兩堂 compu , 聽兩堂 C.Y. Chau 棟篤笑, 都唔係咁好受架~ 無計啦, 停課~ SARA 真係麻煩~ 其次, 第二個驚喜, 認真d 講都唔算驚喜架, 總之係一d 好意外既事情~ 大約8 點度, 仲補梗習, 電話係度震喎, 當然係聽電話啦, 但係呢個電話無來電顯示, 所以我唔知邊個打黎~

我: 喂~

對方: 喂~ 你係唔係 Kelvin 呀?

我聽得出係一把女仔聲, 一把好高音既女仔聲, 但係我唔知係邊個~

我答: 係呀~

我又問: 你係邊個呀?

對方答: 我係 Miss Cheung 呀~ (把聲開始轉弱~ )

我都仲未知邊個...

我又問: 張少仙? (直呼老師名字, 很無禮貌呀~ )

對方咳左幾聲, 之後對方開聲啦

對方: 係呀~

我聽到都有d 意外, 做咩事會打電話俾我呢? 佢又點解會有我電話號碼既? 唔通 ICQ 睇到?

我問: Miss, 打俾我做咩事呀?

Miss Cheung 答: Kelvin 呀, 我病左呀~ ( 小鳥依人的語調~ )

我心諗你病左關我鬼事咩...

Miss Cheung 繼續講: 我病左呀, 睇左醫生啦, 醫生話係感冒喎, 應該無咩事, 但係我咳得好犀利呀... 咳咳咳...

咳左成十幾秒, 條氣順番,

又繼續講: 醫生話應該唔係 SARS (非典型肺炎), 但係廢事啦, 我聽日番唔到學架啦~ (YEAH~), 你可唔可以聽日番去幫我同其他同學講呀~

我心諗, 即係搵我黎搞, 但係又無理由抬 Miss 手(月爭)架喎, 之後就應承左~

我答: OK, 無問題啦~ (講左成分幾鐘, 呀 Sir 都望梗過黎啦~ )

Miss Cheung 又繼續講: 你聽日番去同d 同學講呢, 下星期個兩堂都唔駛番架啦, 即係三堂補課都取消晒, 唔駛番黎, 我驚會傳染到俾班衰仔~

我答: OK 呀, 無問題~

Miss Cheung 又咳左成十幾秒, 之後又繼續講: 如果呢, 班同學仔要交文呢, 叫佢地 Send 去我個ｉｃｑ度或者e-mail 啦~

都唔係人黎架, 病左都仲掛住叫我地做功課~

Miss Cheung: 如果佢地無我 ICQ, E-mail 呢, 你聽日番去抄俾佢地啦, 知嗎~

我答: 得~ 無問題~

Miss Cheung: 記得喎~

我答: 得~ 我會架啦~ (又過左分幾鐘~ 呀 Sir 已經衰衰格格咁望住我~ 頂~ )

Miss Cheung: 唔該晒你呀~

我: 唔駛~

Miss Cheung: Thank you~ ByeBye~ (已經無咩氣咁~ )

我: ByeBye~

講左成四分鐘... 真係慘~ 俾人點左做傻仔...

2003 年 04 月 09 日　【雨】

今日番學呀... 成兩個幾星期未番過學, 平時訓到日上三竿, 無十一點都唔知醒, 今朝番學, 早起身, 又離奇地俾我一起就起到身, 仲夠時間俾我去 m 記食個早餐添~

唉~ 今朝番學就已經好大打擊, 係 Hall 派中, 英, 數, RS 卷, 第一科派中文卷一作文... 總算唔差, 衰衰地都叫合格, 係甲部第二 Part 看圖寫作衰左d , 離左題~ 第二份派中文卷二讀本... 郭 sir 報告番今次全級既成績, A 班 二十幾個肥~ B 班好d 少一兩個, 但係都仲有廿幾個肥~ C 班 26 個肥, 多過 B 班, 無 A 班咁多~ D 班, 諗住好好多, 十幾個肥啦, 點知同我地班差不多, 廿幾個肥, 但係平均分最高~ 到派卷, 先派左d Pass 既先, 諗住我今次溫書溫左咁耐, 16 個 Pass 會有我份掛, 睇住兩個班長派下少一份派下少一份, 派到最後個份諗住佢向我呢邊行過黎, 應該會係我... 點知... 原來唔係我架... 個一刻真係有d 失望... 之後郭 Sir 鬧左全級收唔到卷個d 幾句, 就派番d 卷同答案, 收到自己份卷, 勁無心機, 差幾分... 差幾分... 唉... 無晒心情, 成個人落晒型... 溫左咁耐, 一晚溫到 2:30 , 一晚溫到 5:30 中間都唔知沖左幾多杯茶, 頂眼訓溫得咁辛苦, 但係都唔合格...

第三份卷派英文卷一 Writing, 死左... 今次真係自己問題, 三個題目都唔岩我作, 無咩心機作, 求其作完夠字數就算數, 又唔留意下d gramma, 自己拎黎, 抵死有餘~ 之後派卷二 GE, 又係一d 大意問題... 卷三 Listening, 遲到個日個份, 唔係太過差~ 滿意程度~

之後派 RS, 哈... 無乜溫過書都有 36/ 100 分, 其實都算係咁啦~ 無咩祈望~

Maths... 唔肥佬我已經滿意, 真係對 Maths 無咩興趣架喎~ 不過最唔抵既係我明明寫左個 5 字, 但係寫得差, 寫到似個 3 字... 咁就無左一分, 好唔抵...

食完 Lunch 番黎, 派 Phy, Chem, Bio... 三份卷既 Paper 1 都好深, 好低分, 但係 Paper 2 就幾淡, 都幾好既...

最後派埋 Compu , MC 我好高分 42/ 50, 但係份 Long question, 哈哈 19.5/ 100 , 真係吹脹~

放左學, 去左剪頭髮, 而家好清涼, 或者係一個新開始掛~ 番屋企開信箱, 收到圖書館寄信黎, 下星期三 interview 喎~ 哈~ 如果得既話咁我個暑假就唔駛悶 lu~

番到屋企, 仲係為左中文作事唔開心, 見到老婆仔 send SMS, online 安慰我, 我都放低左少少, 見到佢仲損手爛腳過我, 我個少少又算得d 咩, 最後都係我安慰番老婆仔~ 本來都無咩事架啦~ 呀 Sa 媽又無端端問我點喎, 係都要人勾起番d 傷心事... 好煩~

哈哈~ 原來呀 Sa 媽唔識食葯丸架, 笑死我啦... 要咬碎佢先食喎, d 膠囊葯丸又係, 係咬開先食喎, 仲話唔苦添喎, 簡直笑死我呀~ 哈哈~ 咁大個人, 仔 (我) 都有埋都唔識得食葯丸喎, 哈哈...

2003 年 04 月 08 日　【雨】

唉~ 今日成日都落雨, 好無 Mood, 望著出面, 雨水拍打著窗戶, 有一種令人很哀傷的感覺, 聽日就番學啦, 番去拎試卷, 都唔知點算好, 雖然今次 Mock 自己咩成績都估到, 但係唔多唔少都唔想肥佬, 特別係中文添, 花左好多時間, 成個 Mock 最花得多時間, 最俾心機, 最用心溫書既就係中文, 卷一作文, 自己覺得作得唔差, 又無離題, "記一次搬家的經過和感受" 雖然吹水多過抹咀, 但係都唔太差呀, 卷二讀本, 花得最多時間就係呢份卷, 雖然我份 chem 死左, 得個 E, 我都唔係咁失望, 但係如果中文真係死左, 我真係會好 Down 好灰心架, 唉~

今日同老婆仔係 icq 傾左一陣, 好掛住佢呀... 要到下星期先見到佢~ 落雨啦, 又更加令我更加唔開心... 聽日... 唉~ 聽天由命啦...

2003 年 04 月 06 日　【陰】

今日訓到成十一點幾~ 今日無咩做過, 淨係睇左兩套 VCD, Eminem 做主角既 8 Mile, 同埋觸目驚森, 兩套都幾好睇, 各有特色~

2003 年 04 月 05 日　【陰】

好掛住老婆仔呀... 聽日又無得見, 要到 14/ 4 先有機會見咋... 唔制呀... 快d 老完會考就好啦~ 咁就可以日日出去玩都唔駛俾人鬧, 又可以同老婆仔一齊整甜品, 去行城門水霸...

2003 年 04 月 04 日　【陰】

今日現代打電話黎, 又停課啦, 星期日又無得見老婆仔啦... 唉~ 好掛住老婆仔呀...

2003 年 04 月 03 日　【雨】

今日又去多次官塘, 帶呀仔睇多次醫生, 個 LCD 壞左喎, 好彩可以既日換, 既日出院, 今日有羅柚陪我, 其實係我棍左佢先至岩, 佢問我借 Notes, 我就偏偏遲遲都唔俾佢, 等我去完官塘, 再番番去屋企個邊地鐵站先俾佢... 哈哈~ 係唔係好衰仔呢~

2003 年 04 月 02 日　【雨】

今日出左街, 去左官塘接呀仔出院, 成兩個星期啦, 呀仔先出到院, 但係呀仔好似仲有d 小毛病喎, 聽日又要帶呀仔睇多次醫生添~ 今日買左禮物俾老婆仔呀, 但係都唔知幾時先可以見到老婆仔 lu......

2003 年 04 月 01 日　【陰】

今日同琴日一樣... 又係無所事事, 無乜溫過書, 又過一日~