☆☆小羊羊牧場☆☆

三月

2003 年 03 月 31 日　【晴】

今日... 又係無所事事, 無乜溫過書, 又過一日, 又過一個月... 真係快...

2003 年 03 月 30 日　【晴】

今日成日都無出過街, 呀爸叫我去飲茶都唔去, 因為我塊面甩皮甩得好犀利, 唔想俾人見到, 唯有留係屋企, 溫書咁啦...連 Lunch 都要係屋企食埋, 好彩屋企有一隻糯米雞... 頂下肚先啦唯有... 成日都溫書, 老婆仔打電話黎, 見我溫書, 都唔同我傾, 仲要我溫書... 今晚呀爸下煮, 星期日呀麻, 今晚呀爸煮左辣酒煮花螺, 都幾好食, 夠辣~

2003 年 03 月 29 日　【晴】

今朝去左踢波~ 好耐無踢過波, 對腳好似打左石膏咁硬~ 亦都做左好多次敢家仔... 但係最後我都有入波, 算彌補左我所犯既過失~

今日著左老婆仔送俾我既波"物"踢波~ 哈~ 今日踢波有好多次黃金機會, 有兩次係食硬既都可以失機~ 一次係 Ken Wong 傳直線, 點知我訓埋落地都掂唔到個波, 如果唔係, 只要篤一篤就入架啦~ 第二次, 我都唔記得邊個傳波俾我啦, 咁岩又係真線, 而且面對龍門, 直波個時個龍門已經出左黎, 想接架啦, 我就快腳一 Cup, 過左龍門, 面對空龍, 但係點知就推大力左d , 個波碌快左, 搞到好易食既, 最後都要訓, 又係撞柱出界, 好唔抵~ 如果入埋, 成個攻勢都好靚架~ 踢完波, 變得好可愛, 塊面同個鼻都紅卜卜, 但係換來既就係呢幾日會甩皮...

踢完波, 番左屋企沖涼, 食飽飯, 3:30pm 約左袁永出去 MK 行街, 平日好多人, 人山人海既旺角, 今日無左一半人... 真係好恐佈...

2003 年 03 月 28 日　【晴】

今日接老婆仔放學, 本應初時都好開心, 因為可以見到老婆仔, 今朝都已經有d 開心到早起身... 但係見到面, 覺得老婆仔好似有d 唔開心, 好似有d 野咁... 又唔知點好... 唔... 好似幫唔到佢咁... 有時真係覺得自己好傻咁, 為左一個人而唔開心, 都唔知為乜, 但係自己又再諗深一層, 其實我出世咁耐都未試過咁, 咁係唔係即係代表愛一個人就要同佢分擔喜怒哀樂呢?

下星期二先可以接番呀仔... 聽日去踢波~

聽日開始我要溫書啦... 比原定計劃提早兩日開始, 因為係屋企無野做實在太悶, 太浪費時間啦...

2003 年 03 月 26 日　【晴】

今日勁無聊~ 成日都無所事事~ 正一白痴~

2003 年 03 月 25 日　【晴】

今日考完試啦~ 最後個份 CS 卷~ MC 淺到合埋眼都識得做呀, 而且大部份都係 C.Y.Chau 俾我地做既 MC 度做過, 半個鐘都唔駛就做完啦~ 不過份 Long Question 就麻麻地識, 會考個份卷都唔會有咁深啦~

今日考完試, 同袁永上左 Patrick 屋企打機~ 好耐都無打過機啦~

2003 年 03 月 24 日　【晴】

今日份中文好淺~ 希望今次會合格啦, 希望我幾日既努力無白費過啦~

2003 年 03 月 23 日　【晴】

今日好開心~ 因為有得見老婆仔就會好開心~ 今日發生過既事, 我一生人都會記得~ 亦都代表左我個心只會有妳既存在, 唔會再有得二個~

今日好多時間都溫書, 琴晚溫到 2:30 am 啦, 今朝 9: 30 起身溫書溫書 12: 30pm, 之後出左去補習, 食埋晚飯成 9:30 pm 先開始溫書, 一溫書溫到第二日 5:30 am, 中間訓左一個鐘覺咁多...

2003 年 03 月 22 日　【晴】

今日溫書溫到成 2:30 am 先訓~ 因為中文, 我唔想再肥佬啦~ 中四, 中五所有老試都無一次合格...

2003 年 03 月 21 日　【晴】

今日係我番左五年中學以來第一次, 亦都係番學讀書 14 年黎第一次自己唔知醒遲到, 好慘... 就快唔駛番學都仲要遲到, 仲要今朝考 Listening, 搞到要趕番去考, 好彩番到去都仲未開考, 早會仲未完咋~

2003 年 03 月 19 日　【陰】

今日考 Physics, 乜都唔識, 又炒一科...

2003 年 03 月 17 日　【晴】

今朝, 一早就出左街, 去左官塘帶呀仔去睇醫生, 哎呀~ 呀仔要做器官移植呀, 無咁快出得院, 要 10 日度呀~ 哈哈... 主診醫生話呀仔出世未夠一年, 出世紙墨水都未乾, 唔收診金呀~ 哈哈哈...

2003 年 03 月 16 日　【晴】

今日星期日, 又可以見到老婆仔啦~

嘩~ 今日有人超瘀呀, 又白痴喎, 做咩事? 自己問下佢啦~ 哈哈哈... (嘩~ 我搵到啦, 白色架~ )

今日終於見番呀仔啦, 呀仔(Digtial Camara)病左呀, 奄奄一息呀... 無 Pulse, 無呼吸, 要帶呀仔去睇醫星呀...

2003 年 03 月 14 日　【晴】

今朝番左學校考 Oral... 超慘, 俾 Miss Lai 考我... 搞到超緊張呀...

2003 年 03 月 13 日　【晴】

今日份 Chem, Paper I 失手, 好多Careless Mistakes, 溫書又溫唔熟, 唉~ 不寄以厚望~ Paper II, 太淺啦, 大半個鐘仲做完晒, 仲有大把時間 Check 卷, Check 完卷仲有成 15 分鐘玩擦膠... HAHAHA...

聽日 Oral, 唔駛溫書, 下星期三先要考試... 有幾日時間溫書, 今日點都要抖抖~

2003 年 03 月 12 日　【晴】

今日考完 Maths, Paper I 都算 OK 既, 不過 Paper II 就... 慘... 重...

聽日考 Chem 呀, 我唔可以掉以輕心架, 放左學, 食飽飯, 下晝 3 點, 溫書溫到夜晚 1:30 am , 仲要 00:15 am 沖左杯咖啡都係無咩用, 但係都叫溫過一次書, 聽日係點... 聽天由命啦~

2003 年 03 月 10 日　【陰】

今日科 Bio... 炒左... Paper I 超深, Paper II ( mc), 開始個d 好易, 但係越做越深, 做到都唔多夠時間... 唉~

今日考完科 Bio, 聽日 Oral, 好似考晒 Mock 咁, 成個人都鬆晒, 但係今日先至係第一日咋~

2003 年 03 月 09 日　【陰】

今日星期日, 又代表要去補習, 更加代表我又可以見到老婆仔lu~ 今朝有史以來, 第一次星期日會咁早起身, 8am 仲要係自願起身個隻喎, 哈哈, 咁早起身都係要為左溫書, 由朝早溫到夜晚 3:30 am , 亦都係有史以來溫書溫到最夜既一次, 因為Biology 呢科實在太多野要溫, 要記啦~

今日補習, 又同老婆仔坐, 不過都唔知係我失暈還是老婆仔失暈, 我話我係美心酒樓門口等佢, 佢竟然上左去7 樓等喎, 雖然都係美心酒樓姐... 都唔駛咁呀麻? ~ hahaha... 補完習, 我地去左溫書... 其實都唔點溫過書, 傾計多... 最後都送左老婆仔番企~ 又係好開心既一日~

2003 年 03 月 08 日　【陰】

今晚呀媽同呀爸過左澳門玩, 細佬就成日都唔係屋企, 得番我一個人, 我今日成都好乖仔, 成日都係屋企溫書, 溫 Biology, 不過都同老婆仔傾左一陣電話既, 今晚自己一個人食飯, 食飽飯, 番屋企, 沖埋涼, 又溫書, 連平時星期六有波踢都無睇, 連電視都無開過, 一直溫書溫到 11pm 就上床訓覺 lu~

2003 年 03 月 07 日　【陰】

今日... Last Day... 好開心, 又好唔捨得... 係長天讀左五年書, 開心既, 唔開心既事都發生過, 由唔識既到認識, 由認識既發展為死黨, 都有好多好多個... 但係呢一切, 可能會成為過去... 好唔捨得... 一班好同學, 死黨, 一班老師, 校工, 甚至係學校既設施, 一草一木, 廿五圈長跑, 都好唔捨得... 但係歲月不留人... 要黎既始終都要黎, 走既始終都要走... 真係好希望時間可以停頓下來...

今日 Lunch Time 大食會, 嘩~ 大家都玩得好癲, 又多野食喎, 有琴日 Order 既 Pizza 啦, 仲有呀 sir 去美心買既西餅同朱古力蛋糕啦, 仲有 28 支 2 公升汽水, 好勁~ d 食物就好快食晒, 但係d 汽水就淨得太多啦, 最後, 我地成班玩啤牌, 抽大細, 又猜包剪揼, 輸左要吹喇叭飲半支, 哈哈~ 呀sir 仲同我地玩埋一份, 佢仲係第一個輸, 第一個飲添~

放學我地成個 Form 5 都係操場圍圈唱歌~ 好好玩~ 又影左好多相, 同老師合照, 又同d 同學合照, 氣氛好好... 但係真係好唔捨得, 馬翃得一個喊左出黎, 差d 俾佢"野" 埋我都喊埋一份呀~

2003 年 03 月 06 日　【陰】

聽日 Last Day, Lunch 開大食會, 放左學, 同肥玄, Chris, 利是封, 三個去左西九龍, 我地四個男仔, 唔係去行街, 去 Pizza Hit 落 Order, 哈哈... 我地全班 42 人加埋呀 Sir , 43 個男仔, 我地總共叫左 11 個大批, 10 客飯和意粉, 仲有二隻雞~ Order 左成 $ 1700 ~ 勁~

HAHA... 今日過去西九龍個時, 肥玄超瘀, 諗住用把縮骨遮打利是封個頭, 點知一揮之下, 打唔到利是封之餘, 仲要斷左, 哈哈哈... 我同 Chris 都已經哈哈大笑... 隔離等梗過馬路個班德貞姐姐都陰陰咀笑~ 超瘀呀~

2003 年 03 月 05 日　【陰】

今日星期三, 有得開班會, 開過幾次班會, 覺得今次最好, 班同學又靜啦, 好合作, 肯聽下我講野啦, 佢地又有反應, 會俾番意見我, 最犀利你開班會開到放左學, 打左鐘成三個字, 都無嘈喎~ 不過今次班會, 亦都係最後一次班會 lu...

2003 年 03 月 04 日　【雨】

今日超嬲呀~ 唔好惹我~ 好想搵人出氣呀~

以後我有咩都唔會同我老豆講架啦, 淨係識得人淋冷水, 淨係識得想當年, 咁鐘意想當年, 坐時光機番你個個年代啦~ 咁鐘意叫我番大陸, 咩坐京九鐵路番北京, 番大陸感受下大陸同胞既生活, 食蕉啦你, 大陸... 無必要我死都唔會番上, 深圳都唔會, 感受, 咩年代呀~ 嘮嘮叨叨, 麻q 煩~ 驚死我做到暑期工, 好似會亂買野, 搵一蚊洗十蚊咁, 呢d 係你諗既, 我不嬲理財都好好, 你放心~ 火滾~

2003 年 03 月 02 日　【晴】

今日星期日~ 今朝好早就要左身, 8:30 am, 唔知點解會咁早起身, 本來諗住起身溫書, 但係又見咁早, 都係番上張床度, 就算訓唔著都攤係張度, 時間係咁過, 訓左係張床度成 9:30am 先落床, 刷牙洗面就開始溫書, 一早起身就狂煲中文... 煲到飲茶都唔去, 因為飲茶實在係太浪費時間, 溫到下書 1 點先出門口去補習, 好開心, 因為又可以見到老婆仔~ 但係時間預得太吻, 加上坐巴士過獅子山隧道個時, 我坐個架巴士又俾前面個架慢到死既私家車頂住, 搞到無時間食 Lunch... 所以補完習先食, 唉~ 無奈, 去 Delifrance 食, 竟然俾 Bio Yip 見到喎, 仲要俾佢見到我同老婆仔拖手仔個下死喎, 仲我要初時唔知, 搵到位, 我出去買野食, 聽到有人 Shu 我喎, 一擰轉面就見到 Miss Yip, 嘩~ 嚇死我, 佢問我係度做咩, 我話補習, 佢又問我係邊度補, 我答係現代補, 佢又問我點解唔同d 同學一齊補, 我即時諗唔到點答, 心諗佢咁問得即係俾 Miss Yip 見到晒啦, 我當時只可以無奈咁答 er... , 打蛇隨棍上, 佢就已經笑笑口咁同我講話俾你媽咪知... 我知 Miss 唔會咁做, 但係為左自己好落台, 就同佢講, 唔好呀~ 之後我就同 miss 講我要買野食, 咁就行開左啦... 我一邊食, 一邊都有望住 Miss 個邊, 好驚 miss 走個時會行過黎我呢邊, 好彩最後都無, 但係覺得好爆, 俾 Miss Shu 我先知道... 唉~ 千年道行一招喪~

食飽飽, 同老婆仔去左沙田圖書館, 陪佢搵資料, 睇左幾本Art, Painting 既書... 完全係最勁 lor, 畫到好真, 好似相片咁~ 勁~

之後就送同婆仔番屋企, 老婆仔好擔心升唔到中六, 驚到喊, 係我第一次見到老婆仔係我面前喊, 好失措, 唔知可以點tum 番佢, 最後都因為要落車佢先無喊~ 之後同老婆仔行北區公園, 老婆仔成個細路女咁, 見到個水池好多魚, 好多龜就好雀躍, 傻婆~ 之後又散下步啦, 又坐下, 行下...... 傾下計咁 lor~ 老婆仔講左d 野, 搞到我個心甜晒~

最後成6:30 pm 我先番屋企~ 今日成日都好開心~