Veiga de Valcarce quere voltar a Galicia (publicado en Vieiros o 24-Agosto-2000)

Ao parecer a alcaldesa socialista do concello berciano de Veiga de Valcarce, María Luisa González Santín, expresou onte a súa intención de iniciar o expediente administrativo para promover a segregación do seu municipio da provincia de León e anexionarse á de Lugo. ¿As razóns? As poucas atencións que recibe da Junta de Castela e León e da Deputación. Segundo a mandataria, moitos dos servicios que reciben os veciños de Veiga de Valcarce proceden da localidade lucense de Pedrafita do Cebreiro, coa que se celebran anualmente actos de confraternización. Lembramos que a comarca do Bierzo pertenceu oficialmente a Galicia dende a época dos romanos, durante os reinos suevos e nos séculos seguintes, e non foi ata a Baixa Idade Media que deixou de pertencer á casa de Lemos en favor do Marqués de Astorga. Logo este territorio continúa a ser referido como galego polos propios gobernantes hispanos e a figurar nalgúns mapas como parte de Galicia. O debate sobre división territorial aberto no Estado no século XIX coñeceu a proposta de incorporación definitiva do Bierzo a Galicia (proposta de 1821), mais acabou por ficar xebrada en 1833, na partición de Javier de Burgos.