ياللي نسيتي اسمي
وشكلي أو رسمي
وحروف كلام انكتب
خلاَّكي تبتسمي
وبقيتي زي زمان
عدى عليا وخان
كله قسى وجحود
والظلم ليه موجود
أصلي أنا موعود
بالهجر والنسيان
بتقول عينيه حرام
تبعت عتب وملام
وكلام كتير مكتوب
عن قسوة الأيام
ياللي انتي ناسياني
وعينيكي جافياني
إن كان دا يرضى الناس
ح ارضى بحرماني
دلوقتي راح اسيبك
يمكن هوى يجيبك
تلاقيني مستني
وأجني أنا طيبك
وآديني مستني
على أمل مني
اغزل في توب الفرح
فرحان ومتهني
ح انسى واقول اوهام
دي الغيبة لها ايام
أو حلم في منامي
ح أصحي من الأحلام
والقاكي قدامي
تتغني بغرامي