على ذاك الطريق اللي يسمونه غرام احباب

وطت رجلي على دربه ولا ادري وش نوى فيني

تبعته لآخر دروبه الين أن القمر قد غاب

تعب قلبي ولا تعبت مسافات توديني

لقيت الليلة الجردا هدب. ظل وسما واعشاب

بعد ذاك الظلام اللي يتوهني عناويني

صدفتك معجبة فيني ويا ليت الغرام اعجاب

وتراك انتي الهنوف اللي هقيتك تستحقيني

عطيتك عشق من قلبي وسلمت لغلاك ارقاب

 وغيرك يحترق قلبه ولا يقدر يحاكيني

أنا قبلك صدفت عيون لكن ويش جاب لجاب؟

ترى كل العيون اللي لقتني ما تكفيني

رماني حظي العاثر عليك وجيت لك طلاب

ولا انتي اللي عشقتيني  ولا انت اللي عتقتيني

تعالي وارحمي ذاك الخفوق المولع المرتاب

 مهب لاجلي عشان الله يجازيك ويجازيني

وشيليني على متنك خفوق باري منصاب

ومن فوق الغرام العذب شيليني وحطيني

والى منك هقيتني شجاع وما يطيق يهاب

 أنا لك بالهوى والله مثل ما انتي هقيتيني

أنا ما امشي ورا غيرك  ولو انه يطق الباب

 وترى عيب علي اطعن ولو كثرت سكاكيني

زهود ما يطيق الدم لا داين ولا طلاب

 شجاع وعارف نفسي واضن انك تعرفيني

غيور ما عرفت أضحـك مع الغدر فبرود اعصاب

 أبيع عيوني الثنتين قبل انك تخونيني

وان اشتد الغرام أترك خفوقي بين ناب وناب

 لفرقا تكسر ضلوعي ولا عشق يوطيني

أنا رجل ولي غيرة وإذا شفت الهوى كذاب

 تثور بقلبي الفزعة ولا تهدا شياطيني

سؤالك لو يزعزع بي كياني ما قبلت اعتاب

أجي لك وأسألك نفس السؤال اللي سألتيني

عن العشق القديم ابواب تقفيها كثير أبواب

 بعد ذاك الحبيب اللي خدعني وانخدع فيني

أبي عشق تحسب له كل نظرات العيون حساب

وابي قلب على قلبي وابي دين على ديني

وابي نظرة عطا توفي ولا تخلف بدون اسباب

 وابي منك قبل لا انتي تصديني توديني

وأبي درب على العذال صعب متعب غلاب

 وابي نفس الطريق الصعب يبعدهم ويدنيني

ترى لو للقلوب عيون ولدموع العيون اهداب

 حشا ما تنزل الدمعة لغيرك لو تركتيني

أنا اول من عرف قدرك وانا توي صغير وشاب

وابي منك ما دام عرفتيني تحبيني

ما دام اني لقيتك في طريق اسمه غرام احباب

 دخيل الله وبعد الله دخيلك لا تخليني

ما دام ان كل من يحيى على  وجه التراب تراب

عسى تنساني الدنيا ما دام انتي  ذكرتيني