أنا ما أخطيت في حقك ولكن الكلام عتاب

 اعاتب والعتب كلمة تفسرها معانيها

اعاتب واحسب بهرجي الا مني  حكيت حساب

 وكلمة يستحي منها لساني يبتدى فيها

واذا انت من العتب تزعل علينا وابتصك الباب

 ترى ما نيب  قاصدها ولاني فيك ناويها

ولا ودي على الفرقا وقلبي داخلي مرتاب

  اشوف أن الهوى خدعة واشوف القلب راضيها

واشوف أن الهوى فرقا مواليف وعناد احباب

 واشوف ان الجفا خطوة ولاني قادر اخطيها

وقلبي لو عشق يخلص ولو طالت عليه رقاب

 وتشهد له دروب الحب حاضرها وماضيها

عشقنا والهوى حسـرة ، مشينا والأمـل كذاب

 بدينا نابني منهـا قليل من بلاويهـا

عرفت الحب من عمري صغير بالغرام وشاب

 وقلبي للحبيب اكبر من الدنيا وما فيها

صحيح أني نويت ابعد ولكـن الهـوى غـلاب

 وهي رحلة بديت بها ولا ادري كيف بنهيها

تحريتك شروق الشمس وشفتك للشروق غياب

 ولا اظنك تبيع العشره اللي كنت شاريها

بقي لي بالهوى نظرة وتغريبة ودمـع اهداب

 وقصة بترك لسانك على العذال يرويها

واناجي باقي حروفي والف للفراق كتاب

 قصايد تملي اوراقي ارددها واغنيها

واذا مرتني الذكرى وجرحي بالحشا ما طاب

 بتبعدني وتدنيني وببعدها وابدنيها

وانا عيب علي اشكي من الدنيا بدون اسباب

 مدامي ماخذ منها يجي يوم واعطيها