站長日記
|
|
||||||||||||||||||||||||||||||||||||||||||||||||||||||||||||||||||||||||||||
P.S. 我今日唔覺意打阿添...仲好似好大力呀,有聲架...好內疚呀...事源佢搞我塊面嘛,咁實際上我又好唔中意人地搞我塊面(因為前排o係學校d同學成日搞我,好討厭!),咁我咪本能反應地打返佢囉,但係不知者不罪嘛,仲要俾我打到拍拍聲..阿添..Sorry 呀...
今日冇街去,所以o係屋企等待蜘蛛既來臨...真係悶到呀媽都唔認得.......幸好晏晝大家姐話要去九龍寨城公園影相(實際上o個度真係冇乜好影),跟住去又一城食晚餐....噢噢,咁就一日..
夜晚返屋企confirm 返睇日去BBQ班人...真係頗少人,都唔知燒唔燒得成..
今日去完教會,跟住成班團契人去半月灣燒野食&游水(不過我都唔知原來仲會游水,因為我都係尋晚聽二家姐講先知今日去半月灣,佢又特登唔話我知游水...搞到我短褲都冇帶...)我聽到去半月灣之後勁開心&勁想去!因為早排諗住5月1日係去半月灣,我未去過,好想去.我諗半月灣風景應該幾好(我想去半月灣仲有一個原因---個名靚)但之後改左去大尾篤.諗住同半月灣緣慳一面,但係點知今日有得去!!半月灣其實幾細,同埋我地去到既時候已經好多人,所以冇我想像中咁廣闊,但係d水好清,見到底,如果想去游水就正!d爐就唔多,同埋離海比較遠,望唔到個海黎燒野食,有d失望!但係都玩得幾開心,我地o係度估故仔,又玩何家何家何家猜(哈,都係cencus 熱門遊戲,係我提議o係度玩既..)同埋今日我心情幾好,因為我今日周圍俾我本Log Book 人睇,受到多方讚賞,所以特別高興!所以今日真係唔錯!!
p.s. 原來文俊係AYP Gold Award Holder,真係有眼不識泰山!!原來我識d咁威仔既人架,哈!!佢睇我本Log Book仲睇得好專業,好似導師架!!好威仔呀!^o^
P.S.中既P.S. 咁半月灣o係西貢架嘛,我撘車既時候,望返西貢周圍既山,覺得...好熟悉,好懷念,諗返11月行山既時候好興奮,行兩日一夜既時候好唔想行,到行三日兩夜既時候開始行得開心d,到而家乜都行完,真係快...
尋晚做到12點就訓左,冇偈啦,我覺得尋晚太倦喇,倦係做唔好野架嘛,寧願今日先做...但係實際上係好'蚊'水架!今朝o係屋企做到標哂汗!仲要Printer Print print 下冇墨,要落街買...嗚,樓下d鋪頭貴到死..成59蚊呀!又變得好窮喇..and then d花絮都係學完琴o係琴行做架jar(我學完琴先去張明添嘛).不過幾驚奇既就係,原來得莫依係做好先去,我去到既時候我d其他組員仲緊,真係...遲到既人仲早交過早到既人..
講返Pass 唔pass啦,就咁,以我既才幹,實力,同我所花既心機,時間,有乜理由唔Pass?!(嘻,馬後炮),不過講真,差唔多做完本Log Book O個陣,我覺得應該會 pass....所以實際上,我唔係真係好開心...反而,有dd失落..我開始慣行山,開始覺得有少少開心,但係就玩完喇...如果唔玩Gold ,就以後唔會行喇,又唔會再有幾會見到班導師,有dd唔捨得添,...交完Log 之後,我同莫依去荷里活行左陣,不過梗係唔係志在行啦,其實想傾下偈,睇下對方d Log Book.哈,一去到荷里活就觸景傷情...突然間覺得F.4真係難忘既一年...實在太多難忘既事喇,玩Debate 作哂12篇文,(而家諗返,真係玩得好搏命,如果俾著而家既我,可能冇咁好心機作哂佢...真係老喇),跟住就係做兩個Club 既Committee,初次接觸&體會學校既運作,又做Prefect,體險下忠義兩難全,仲參加兩個網頁設計比賽,雖然一定唔得,但係都係一個新嘗試,數到最難忘梗係Cencus同行山啦,Cencus 令我識到一班黎自唔同學校既朋友,行山令我嘗試到少少所謂'捱苦'既滋味...哈,仲唔係觸景傷情?!諗到咁多野,好似就死咁...不過,而家都唔係總結F.4 生涯既時候,仲有兩個月嘛,到時再回顧多次啦!
P.S. o係幾個月前,我諗既4月28日應該係:我地Pass 既同學坐哂o係Hall 度,然後總導師訓勉我地,同埋指出我地o係今次Course 表現既優點同缺點...但係原來都唔係既...淨係o係班房,導師睇學員既Log Book... 唔好玩...P.S. 中既P.S. 仲有呀,我呢幾日仲諗住Miss 睇Log Book會將幾本擺埋一齊比較,但係好彩冇!!如果唔係死硬,有出入時就大劑!錯o個個實俾Miss 鬧....今次真好彩!
今日Winky 話我知,原來莫依真係病架!!佢有d發冷,但係摸佢個頭又有d興..我知道之後非常愕然,跟住Lunch 去探佢,佢o個陣應該已經冇乜事,小息o個陣娜娜俾左d數我,叫我叫莫依收,咁我咁好人,咪同佢講幫佢收...哈,佢真係好過癮,例牌既表情動作語氣:面露愕然之情,隻手捧面然後話:嘩,你真係幫我收,珠珠好好人呀....見到佢就好笑~娜娜仲俾左佢本Log Book 我睇(佢玩Progressive Silver 架,農曆新年o個排行完Assessment),莫依既反應又係我預期之內:'嘩,咁薄既!!嘩,娜娜就正啦!' 咁不過講真,真係好鬼薄,得o個三十零頁,真係超羡慕!
今日放學同骷髏黃玩電腦,本來我諗住4點夠鐘就拿拿聲走人返屋企做Log Book(因為尋晚做到12點就想訓,哈,尋日仲諗住今日可以釘到本野...真係cheap.)但係正想走人既時候俾阿雀截住左,佢話有人要借營,但係冇人set 既營借俾人,咁我咪同佢用最原始既方法--紮起個營,睇下齊唔齊,搞到5點先走人...
哈,阿莫依竟然學我o個招,佢今日返左3堂跟住扮肚痛走人,嘩,收版權架,不過佢阿媽邊有個阿媽咁好人丫,會簽請假信...佢要去睇醫生囉醫生紙,o..too bad,咁唔知佢做左幾多呢...
我今日都算係幾早返屋企lu,今日去旺角囉營棍俾Jennie,跟住就返屋企喇...但唔好玩既...返屋企要打電話,我想搵求救資料同交通資料...但係唔知1083搞乜...有得提供電話咪順便分埋類囉...搞到人家打電話打左成粒半鐘,仲出動埋黃頁...(我都係今日先知黃頁都幾有用...)troublesome,頭都痛埋(講真架!)...今日加油搞掂埋d濕碎野! 聽日釘左佢!Yeah!
尋晚既情況同前晚一樣,又俾爸爸趕去訓...爭好多呀!仲要訓覺,幾時先做得哂喎...好衰架...
好,講下今日有乜搞作,今日放學去黃大仙傾Purpose,真麻煩...又唔係真係傾左好多野,但係又要搞好耐,差唔多七點先鬆人...想死...跟住,做左d財政又唔同喎...又要改,C.P.2至C.P.3條路我又錯喎...又要改,麻煩...錯咪錯囉..點解我會發現到...?!troublesome...今日唔捱夜喇...好d訓把啦,今日淨係改返d野...其他聽日先做...
尋晚十二點幾,做得興起之際,就俾爸爸趕去訓覺...成日都係咁架,有乜緊要野要做,佢硬係唔俾我做...明玩野!!尋晚路描做到第三日架喇...衰人...
好啦,講下今日做左d乜,今日放學同謝斯培講好去捧AVA Club場,睇臥虎藏龍,我都o係407睇緊,佢見到我都唔入黎...原來外面有波睇,係F.4 對校隊,真係幾鬼正,但係就打得幾燥咁囉...但係Patrick 搞乜呢,冇想像中好波喎,但係譚俊裕打得幾過癮,人不可以貌相...
不過返到屋企又有點後悔...實在係有點倦...尋晚又唔係訓得好/多,實在應該早點兒返屋企...zzzZZZ才對架嘛...Never mind la,都係o個句,繼續努力! Yeah!
今日終於有Maths II 卷派,我竟然同朱智康同分,都唔知係佢差左定我好彩執到...哈哈,都算係咁啦,我咁耐冇聽書,都有咁既分數,求其事但收貨啦!!!(但係我考試會勤力架!)
尋日真係太早尋喇!!十二點前就尋左喇,太差喇,緊急關頭,唔得咁架!!今日要繼續努力!做完路描,Yeah...
今日除左朝早落街食早餐同晏晝陪媽咪去又一城食lunch 兼睇書外,就全天候o係屋企做Log Book..但係今日既進度又慢,可能因為已經冇乜心情做既關係啦...d route chart 真係麻鬼煩架,計到成隻即咁...咁搞法,幾時先做完架,真係唔知道星期三趕唔趕得徹起貨...
嘩嘩嘩,大件事喇!仲有一個禮拜,我地就要交Log book 喇!!!
有見及此,我地今日就約左出黎傾log book,(其實主要原因係因為今日星期六...)但係,唔知係唔係因為我一點要學琴而佢地就我既關係,佢地竟然約左9點o係黃大仙地鐵站等...嘩,就黎早過返學喇,晨早流流邊諗到野架(不過對我而言,冇一刻係有利於諗野..),癲架,我覺得最精神既應該係jenny & lucy 囉...強啦!!
傾完就去學琴,冇乜得意野,淨係知道眼訓到阿媽都唔認得,於是就返屋企訓覺,Yeah,一訓訓到六點呀(即係訓左四粒鐘)實在太高興,太興奮喇,心情愉快,不過跟住又唔愉快喇,因為跟住就做log book,一做就做到2點半...哎,唔記得報時,光彩標準報時器,現在既時間係淩晨2點30分......唔講...訓...zzzZZZ
我認為自己完全有理有相信自已係一個超級犯賤,冇野囉野黎做既人!!!
話說尋日日記我o係度冤自己有排冇得抖,但係今日我去圖書館,阿Miss 蔡搵我玩學校家教會既網頁設計比賽,我竟然應承佢喎!!!點解會咁架?!我會死架!!我完全認為自己呢個乜都玩既性格十分麻煩!嘩!仲得了既?! Oh,My God, My Jesus Christ!唔制呀...
算啦,講返今日有乜得意野,今日放學o係computer Room 陪黃Sir 玩電腦,(我咁講啦,其實係教佢用電腦...)跟住玩到4點零,就去505執equipment,d野真係超級亂耶!我地一執就執左三粒鐘,真係好誇,o個時我問軒少幾點,佢話撘十,我咪以為係五點撘十囉,點知之後一句,佢竟然話係六點耶!!!!嚇鬼死我呀呀呀!!!我咁大個女都未試過六點十仲o係學校架架架!!!真係好鬼倦!而家八點半,食完飯仲要練琴呀,想死呀呀呀!!!
嘩,我尋日就話搞完log book & 遊戲日,F.4既事務就完啦,但係今日先醒起中文都未Present!又要搞一兩個禮拜...o...too bad!幾時先有只單單專注溫書,唔駛做其他野既時間?
好啦,講返今日有乜得意野啦,今日Lunch Guidance 開會,嘻嘻,都係我乖!全場得我個公民教育組有貨交!威威耶! and then...放學去學琴囉,好倦...但係我諗之後都唔駛再掉堂lu,Yeah!
唉,唔講d無聊野,好鬼搞笑,話說謝斯培尋晚剪頭髮,跟住佢位'專業'既髮型師就話佢d'劉海'成日都跌落黎,於是就幫佢電電d頭髮,哈,我今朝返學見到佢,係威呀!!超有古典美!!我相信見到佢既人都會十分讚嘆,而今日應該有大把人問候佢d頭髮耶!!
嘩,唔得喇,要快d做Log Book 先得喇!!!今日放學問莫依抄返d路既周圍特徵,同佢傾返d路線,發覺我開始乜都唔記得哂,咁點做路描?!但係又冇心機做喎!!成日都提唔起勁!!!好煩呀!!
輔導組又要搞遊戲日,本來諗住行完Assessment,F.4既事務都完哂架喇嘛,但係上個禮拜四Chair 話開會,先知開學Plan 一年Activities既時候有人提議要搞遊戲日...勁掃興啦!!!咁今日Lunch 咪搵返公民教育組班人黎傾,唉,個個都唔鬼理既,幸好有江曉林同孔慧敏jar!唔係的話,個counter 都唔知點搞!!
P.S.近排媽咪成日都上網,仲買左個cam 返黎,但係又唔識裝,so troublesome,人家又冇得上網喇...o...too bad!
我覺得自己實在太衰喇,謝斯培同江曉林前日同尋日生日,我竟然未買禮物!!!太差喇!
不過我之後又覺得自己超勁好喎,冇偈啦,之後我返到屋企,換返衫就出去九龍城廣場買禮物喇,六點出去,揀到七點半先歸家,算係咁啦!其實點解要揀咁耐呢?最主要既原因係有人既taste 超貴...我又冇乜米喎!但係唔緊要!我終於都買到禮物,Yeah! 生日快樂呀兩位!
P.S.尋晚開機聽左睡王子,突然好懷念cencus o個時唱k既情景!好掛住佢地呀!
今日對腳竟然冇乜事,但係條頸就頗痛,曬親啊!我自己睇唔到,但係媽咪話我條頸好紅,而對手都係一樣,曬到有d痛,仲曬到成個錶印出哂黎添呀! but never mind la,小事!
而最大件事係今日爭d冇街去,其實我今日勁想同cencus D 人出去睇戲,但係冇偈啦,唔出得夜街架嘛,咁就冇得去lu...謝斯培又同屋企人去中大...冼雅琳要睇VCD...莫依要做功課...江曉林同Janice 佢地行街...真冇癮!
本來諗住o係屋企結蜘蛛網,虛渡唯一既復活節假(聽日就要返學喇,都唔知咩學校黎架,人地學校放完cencus,個復活節假依然悠長,有d仲離譜到放到23號架!!!嗚嗚!),幸好Winky 三點打黎話想食肯德基jar,於是我同佢去左又一城,睇住佢食野...and then 行下逛下,行到5點幾歸家. 唔,quite good ,總算冇困o係屋企發霉!
P.S. 尋日既日記講漏d野,話說我地o係西貢'山卡啦'地方見到有民居,而我地訪問過,佢話o個度有三四個人住,之後我o係度諗,究竟佢有冇做到cencus 呢?佢地都係香港居民黎架喎...咁?唔,邊個答到我?
Yeah,第三日喇,歸家喇,我的家庭真可愛,健康快樂笑常在~~~
今朝起身對腳依然超痛,但係根據尋日同今日既經驗,真係行行下就唔多覺,唔錯唔錯,quite good !
基本上今日條路就超短,但係因為今次Assessment既特色之一係'鑊鑊新鮮鑊鑊甘'既關係,今日第三日都有山要上,D contour line仲頗密添.跟住上到去梗係做下Map reading 啦,今次好彩d,佢問既我都答到,但係莫依,姍& Lucy就冇咁好彩喇...搞左成粒鐘,Miss 都發哂脾氣...見到佢地三個都覺得慘...o...too bad...
but never mind 喇,好戲直頭係在後頭啦,話說爐仔石去獅地o個條路係我帶架,都唔知邊個編...咁益我,我地要轉既彎又多,但係地圖上冇既小路又多,見到d彎都唔知轉好定唔轉好,d teamates 又強喎,硬係意見唔多一致,但係又抵死到話'我既意見就係咁,你話事啦',咁即係點?!不過講真,我最唔贊成行錯路既時候返轉頭,尤其是o係知道自己o係邊,&知道一路行都會行到既時候,因為我覺得行返轉頭更加容易迷路架...不過講咩都冇用,事關結果我真係衰左,累到大家要上多幾條contour...唔好意思呀!
上到山就俾Miss 帶去做高山求救 & 繩結.Yeah,往後既路就高興囉,上小小跟住落山,Yeah,返屋企lu,心情興奮!
但話雖我地行完Assessment,但係我都唔知自己簽唔簽到簿,一來我地成日行錯路,二來個miss 要求又高...o...都預左要行clinic ga la!
低能架,今朝起身對腳竟然痛喎,不嬲第二日都未開始痛架,都係因為o個個408啦..o..too bad...
but nevermind la,miss竟然起水泡喎,d導師不嬲體能都砰砰聲架嘛,更加冇乜可能會起水泡,扭親,擦傷 or something like that! so Miss 起水泡對我黎講實在太太太出奇喇,仲要起水泡起到著唔到鞋,要著拖鞋喎,跟住佢同我地一齊行到去公路,o係CP9 見到其他導師,就拉大隊撘四號車走左lu,之後o係CP11至CP12之間既教堂先Join返我地...不過佢走左仲好,佢既存在實在太有壓迫感喇,一行錯路就會俾佢丙,恐怖!
但係結果今日真係又行錯路,我地今次好慘地行過左Check Point,跟住要行返轉頭,又行返返黎,Miss 就好悠閒咁坐o係度睇住我地走&等我地返黎...
不過最恐怖唔係行錯路,而係之後做Map reading,我地一答錯問題佢就超級勁'燘',我地又超級勁驚,驚就導致諗唔到野,繼續唔識答,所以勁驚Map reading,都唔明點解佢可以出到d咁深既題目架,而家諗返,以前黃sir,李sir,何sir出o個d真係超級勁淺...就係因為個Map reading,我地今日成八點先到Campsite...o...too bad...
P.S. arm arm 都講過,我地行錯路,其實我見到其他人都行錯路,但係因為佢地既阿sir 十分寬容,所以佢地依然高興,我見到真係羡慕到死! 於是繼而變得超down,行錯完路之後,我地做Map reading,終於有得抖,適逢呢個時候,阿余sir 雪中送炭,請我地朱古力,我當堂感動到喊!!!真係呀,都唔明點解升上F.4後,咁鬼易受感動!
今日係Assessment 既第一日,變態架,一開始就上408,行到阿媽都唔認得,但係好奇特地,個Miss 竟然鼓勵人家喎,a little bit 感動,但另一方面又令我唔知應該點睇佢好,事關佢被'譽'為全AYP最惡o個個,而我初頭覺得佢係做野好認真,不苟言笑o個種人...o...never mind la!
不如講下d路啦,d check point都唔知係乜水plan架,竟然可以好巧妙地令人易行錯路&迷路,我地由CP1 to CP2錯左次,跟住o係CP2 to CP3想落公路又落唔到...成日俾Miss鬧...o...too bad!
P.S.我地沿路經過既西灣同大灣,聞說係全港最靚既沙灘之一,如果o個度唔係冇燒烤爐,用黎做5月1日既場地都幾好...
P.S.中既P.S.唔知點解今日既時間過得快左,以前行到死死下都係過左冇耐...quite good.
話說今日有easter service,有好多獎頒,最衰啦,都唔係頒俾我,不過依然高興,冇偈啦,winky 上台囉獎!!佢地手球季軍,超戥佢高興!!and then 藍社囉全場總冠軍,翁淑菲實在太強喇!竟然可以搞起唔多掂既藍社!好勁呀好勁呀!
唔講咁多喇,要訓喇,抖足精神,聽日行山!加油呀,一定要簽到簿!! Yeah!
話說尋日幫CK手,搞到鬼咁倦,又因為前晚溫書溫到3點幾既關係,結果尋日一返到屋企就大覺訓,而且仲估唔到咁強地訓到今朝六點.仲唔死?!我有大把野未識喎!!冇偈...係咁依溫左一粒鐘就考天才,強!!結果呢...今日份卷唔太難既,但係就最尾o個兩題唔多識咁啦...
不過Nevermind 啦,都最後一日喇,心情輕鬆愉快,但係謝斯培佢地仲未測完驗,冇癮...
後日就行assessment 喇,今日要執好野,睇下有冇漏,troublesome!
今日測A.Maths,尋晚溫書溫到成三點幾,但係測驗都係唔識既,唔溫好過...仲要搞到遲到添!唔抵!!都係要乖乖地聽書...但係對住Tommy Yu ....
算啦,唔講A.Maths,話說尋日我地測Bio,Bio 丁竟然以神速改起我地份卷,今日有得派!~實在太厲害喇!不過我諗除左Bio 丁效率高之外,我地d卷空哂相信都係另一個有卷派既原因!咁成績就...ok啦,我唔滿意囉...我對Bio期望好高架嘛!!
跟住放學去左Computer room幫手,話說今日梁志聲老師開班教其他先生PowerPoint,CK就仗義搵同學幫手,上次CK教word o個次鬼咁多學生幫手,而家就得兩個F.4,冇偈啦,聽日測Phy,搵鬼理佢麼?!結果CK搵多幾個F.5,d F.5對CK 真係好,都Last Day 完仲返黎!
不過今堂真係教左好耐,由3點半教到6點,真係好倦,冇偈既,梁志聲做完之後d先生都唔記得架!又係要學生一路講佢地先識搞,於是我認為其實梁志聲唔係教先生,係教我地d學生架!!
其實教佢地好開心架!!佢地好似細佬仔咁架,當佢地識用既時候要好開心架,但係唔識用既時候又好down 咁喎,哈~
P.S. 梁志聲一教完,CK 就即刻趕我同曾家明走,叫我地溫書,計我話CK加返十零廿分俾我地最實際!
嘩,今日測Bio,變態架!份卷咁長,得o個一堂測,都傻架!成七版紙,仲係得o個版半MC!真係連我d咁高速既人都做剩兩題6分題呀!嗚!(唔好話呀,連文江兄都做唔哂呀!)
不過never mind 啦,我唔識時個個都唔識架啦,算啦! 咁講下今日派o個兩份卷啦! 話說阿Miss 嫌我地Bio 打擊唔夠大,就諗住派埋份中文卷,我就覺得自己o個份唔錯啦,都冇乜溫過,但唔低分,非常好彩.and then 仲派埋數學,冇偈啦,冇聽書咁耐,係差d 架喇....
唔...今日真係冇乜得意野,不過係放學好狼狽jei~話說我同謝斯培用一把遮,哈,已經唔多夠架喇,跟住出到門口仲有兩個人叫我地遮埋佢...基本上同冇遮都冇乜分別,跟住阿謝斯培話要返學囉返個電話,o個兩位同學又走去投靠其他人,令我諗起parasites...
今日如常返教會,之後去剪頭髮,我都有成半年冇剪頭髮喇,其實我咁耐冇剪頭髮既主要原因係懶,其次就係,好唔中意人地搞我d頭髮,在我而言,剪頭髮有種任人擺佈既feel.而且如果有時間的話,做下其他仲好啦,例如做下功課,溫下書,睇下書,etc,
都好過剪頭髮!
不過今日終於的起心肝喇,因為d頭髮咁長其實好麻煩的啊!
跟住同兩個家姐去左又一城逛下,行街事小,聽大家姐講笑話先過癮,都係今日先知原來香港仲有d好古雅好古老兼好似古董既人架!
今日測電腦,我尋日竟然有溫書喎~~!!!仲有12點溫到2點,雖然係一路玩icq 一路溫,但係都係今次test week 溫得最多既一科!!!好強呀!!但係so far,都唔係識哂!在我而言,簡真係溫唔溫都差唔多(其實我覺得電腦呢科既努力同成果係最唔成正比架,真係次次都係咁,雖然呢科都算係幾好讀既一科...)
好啦,講返放學有乜搞,話說Tommy 仔話要借equipement la,咁我咪搵娜娜囉,o係佢arm arm 上完堂既班房搵唔到,咁咪落canteen 等佢囉,等左好耐唔見人,咁我咪逐層搵佢,跟住先知原來佢已經o係黑房,阿Tommy 仔仲已經借左野,真係激死...
冇偈,無無聊聊,咪返歸囉,點知原來冇帶鎖匙,搞到要去圖書館坐成粒鐘,等媽咪返屋企...今日果真黑仔.
P.S. 今日F.5 last day 喇,時間過得真係快! 下年就到我地喇!我仲記得F.1 o個時同d F.5既同學傾偈,我話我都驚會考,佢地會話,有排啦,有排都未到我...但係...而家爭一年jar,好快!唔知下年既心情會係點呢? 又會唔會喊呢? 定係一d唔捨得都冇呢? 真係估唔到...不過可以肯定既係,到時一定個個帶哂相機,閃光燈周圍閃~
今日係清明節,咁我地就如常去拜山啦.但係就見到dd好出奇既野----就係有人一個人黎拜山!!!
真係唔好話...講真,雖然話清明節係用黎拜山,悼念祖先,抒解懷念之情,但係就我所見,多數人都係用黎o係山上開Party 架jar,即係呢,帶哂燒肉,o係個墓碑前面嘻嘻哈哈,邊講邊食,好似野餐咁,直頭當正清明節係一年一度既全家聚舊日!!
但係今日實在太堅喇,o個個人黎度,擺低花,鞠個躬,又環顧四周,企左好耐,鞠多個鞠,然後就走喇,一副沉默的樣子,真係拜山架!!好威呀!不過可能係我拜得山少o者,所以先未見過真正拜山既人...唔緊要啦....
今日真係幾正斗! 話說尋晚返到屋企就訓,一訓就訓到2點,跟住就自己醒左喇,然後就睇ERS,睇下訓下,(冇偈啦,本書悶到阿媽都唔認得)到七點就arm arm 好睇完本書,幾好幾好...^o^~返到學校就趁人測中史既時候做埋個report,幾好幾好~^o^仲要P.E. 同英文堂都free 堂(因為落雨既關係,P.E.----free 堂,因為Oral 既關係,英文----free 堂),幾好幾好~^o^~事關落雨,Lunch又唔駛on duty,幾好幾好~^o^~總括而言,今日o係學校真係幾好!哈,連上數學堂我都冇訓覺呀!仲抄哂Notes添呀!!!^o^~
不過放左學仲好,有人請飲野,哈~~時關今日約左阿添出黎囉相,咁佢又自告奮勇咁話請我飲野喎,我梗係唔應該推辭啦,right?^o^,於是乎我地就o係又一城坐左成粒鐘,嘻嘻~不過話時話,佢都唔出聲既,全場得我講野,搞到我好似好嘈咁...人家不嬲好文靜架嘛>.<~~~講笑講笑,總之多謝添哥啦!!^o^
P.S.訓得夠真係太幸福喇,成日鬼打咁精神,真係想晚晚都咁好訓!
P.S. 中既P.S. 今日仲要多謝朱仔o係放學時借出靚靚snoopy 遮,如果唔係我就變落湯雞架喇!!多謝總統大人!!真係抵我陪你遲交Book report 架!^o^
早晨呀!光彩標準報時器,現在係2時56分.o係人人都熟睡之際,我arm arm先起身! ^o^ '晨早起床,清新開朗~~', 究竟點解會而家先起身呢?就要由今朝(定係昨天早上呢?)講起...
話說我尋日好多野做(好似英文Book report,同AYP plan book),咁於是我想通頂做哂所有野,但係可惜,事與願違,我俾阿媽趕上床喎.....(真係呀,邊有阿媽叫自己個女唔好做功課架...)正因為我係乖乖女既源故,咁我咪去訓囉,但係因為掛心d 功課既關係,咁所以尋晚就訓得異常唔好喇..
今朝又要晨早流流起身打埋個 Purpose,諗起都眼訓...仲要打完先記得原來今日朝早要 on duty & test chem...搞到要飛的返學(肉赤....),唉.....冇偈...咁個 Chem test 呢,基本上就淺到冇人有...不過基於我淨係溫左兩個字(飛的既時候溫既)既關係,咁如果俾我合格我都要答謝神恩(個口號係----神龍教教主仙福永享,壽與天齊,神龍寶訓,時刻在心... ^o^)..
不過玩完個Chem test 之後,都仲有排煩,就係個 route chart...冇偈啦...我唯有犧牲我既lunch time....嗚嗚....so troublesome........
跟住放學就去左黃大仙o個邊交Plan Book,請讀者留意,我而家都仲未食lunch ga...個Miss 又 Check 得鬼咁慢喎,(好聽d就仔細啦..)累到人家趕唔徹join 阿媽食tea...(佢就tea 啦,我就lunch...>.<)
讀者可能會問,點解唔買下野食呢?問得好!雖然交Plan Book 既地點係大家樂,但係我銀包得o個四十幾蚊,稍後仲要囉相...如果食左d 錢,咁就冇相睇架喇...嗚嗚,好慘架,隔離檯D 人食得津津有味,而我...嗚嗚....
搞到六點半,(即係話個Miss 睇左成粒半鐘!)Miss 終於放人喇!!我囉於相之後就狂奔返屋企,煮完個靚麵之後就走去ZZZzzz...(當然係食埋個靚麵先啦)
咁就訓到家下喇,(中間都要起身食埋個晚飯,不過之後又訓返)實在太正斗喇!!好耐冇訓得咁舒服喇!!高興高興!!!
p.s.我今日又對Tommy Yu 唔住喇----除左Lunch 外,我仲用埋Maths 堂黎做Plan Book,阿Tommy Yu見我做得咁興起,就諗住cool down 下我,(即係叫我唔好做)咁於是我咪唔做囉,走左去ZZZzzz...嘻,我真係曳...
P.S. 中既 P.S. 其實我約左阿添聽日放學去又一城既Food Court 囉相,但係約黎約去就係冇約時間,阿添又強喎,佢唔問架喎...咁即係點?
今日真係好好好眼訓呀!搞到做乜都冇哂衝勁...好似放學同莫依做Plan Book 既時候,我勁想做d走....
但係眼訓還眼訓喎,仲有成籮功課同Plan Book D瑣事要做,今晚都唔知幾點有得訓...
咁今日大致上都冇乜特別野講,咁不如講下Choir啦,事關今日Lunch Time 都要返Choir 嘛.不過基本上我而家都已經唔多想返Choir架喇,我諗大概都係因為上次Apple 轉述Miss Chan 既o個番話...其實好Hurt 架,同Apple 傾偈o個時我都仲可以扮冇野,但係收左線我已經開始喊,仲係喊左成粒鐘o個隻..邊有d Miss 咁講野架,連最基本既人格都冇,仲成日同人講要有表演者既風度,但係佢連人格都冇,咁點會有風度喎,不知所謂,好憎好憎好憎好憎Miss Chan!我而家真係唔係好想返Choir喇,我點可以對住Miss Chan 扮冇野喎...仲有個Apple...算啦...
p.s.哈,我對阿Tommy Yu 越黎越差喇,我而前都未試過o係堂上面訓覺既,但而家...嘻嘻,Tommy ,唔好意思呀! ^o^
好野!終於到星期日喇!!!可以見cencus d人喇!!!
不過當然啦,朝早梗係要返下崇拜先啦!!今日終於見到李得恩喇,我地好耐冇見喇!!!仲有呀,今日阿偉銘兄送左個鎖匙扣俾我,話係去完日本既手信.好感動呀!!如果比著我,有排排都未送到俾d學生啦!!個鎖匙扣都幾靚架!!好開心呀!!
好喇,講返晏晝先,我地結果去左敘福樓食,(不過係唔係叫敘福樓呢?定係幸福樓呢?冇偈啦,我都唔去越秀飲茶既......)真係好鬼開心呀,又可以一大班人圍埋一齊嘻嘻哈哈喇!!不過好衰唔衰,今日好鬼死肚痛,如果唔係我會更加開心,更加高興架!但係都唔緊要,我地下個禮拜日都仲有得見!到時唔肚痛就得啦,right?
不過我地今次真係好快散呀,兩粒鐘就散喇,好冇癮,咁於是阿仙& Fanny 咪上我屋企囉,哈,真幸福,可以聽到Fanny 既美妙琴音!
(近排Update Diary 勤力左,唔知係唔係因為覺得會有人睇呢? ^o^)
好強呀,阿添o係十點左右就scan 哂d相,仲擺埋上網,效率超高呀!果然真人不露相哦!!!(講真,scan得幾唔錯喎!)