站長日記

2001年5月
日	一	二	三	四	五	六
		1	2	3	4	5
6	7	8	9	10	11	12
13	14	15	16	17	18	19
20	21	22	23	24	25	26
27	28	29	30	31

圖示
		好開心
		頗開心
		若有所思
		無無聊聊
		不開心
		很不開心

2001年5月31日
今日我地對賽官,結果贏左,但係我覺得好唔開心,我覺得個個都睇少賽官既人......雖然賽官o係牛津道既名聲唔好...但係我都覺得賽官會有好學生架!點解要覺得賽官一定輸喎...人地都有努力過,有努力過就有贏既機會架嘛!而且我相信賽官一定俾左好多心機.... 經過今日debate ,我發覺賽官有好學生,而要o係唔係咁好既學校做好學生一定更難,又因此顯出好學生既出淤泥而不染,反觀我地學校,學生自以為是,歧視賽官既學生,但係成績其實又唔係好,令我覺得o係我地學校讀但驕傲既人比係o係賽官讀但勤力,有上進心既人更差!

2001年5月30日
呢兩日都用左大部份時間整網頁,我發覺我真係越黎越唔中意強迫自己對住部電腦...超憎...好驚自己既近視會越黎越深呀! >.<.......... 不過眼見個網頁開始有d野睇,又超有滿足感喎,噢,真矛盾

2001年5月29日
今日基本上唔多唔少有d後悔尋日玩左成日,乜都冇做過,事關星期四要debate,星期五要交網頁,非常時期仲去玩,真曳~ >_* 今日就開始傾debate,不過講真,我唔擔心我地會輸,因為一黎辯題對我方有利,二黎有Ringo&冰姐兩位強人坐陣,三黎我覺得對手弱,我反而擔心我地贏得唔漂亮...(死,好串...),不過我今日真係完全明白點解綠社debate 會贏,冰姐好勤力,又真係諗野,我作為白社人真係輸得心服口服... and then 今日我地又睇左黃笏南對賽官,都幾...嘻,唔好講lu

2001年5月28日
今日太正喇~話說前排我,娜娜同雄爺輪流一,三,五教骷髏黃玩powerpoint,或者應該話協助佢做bit(Basic IT)既功課,家下整好左,佢請我地去食飯~不過我指'正'既事當然唔係同骷髏黃食飯啦,而係之後我同娜娜去唱k,之後娜娜個fd仲黎埋添~同娜娜一齊好正架,娜娜係所謂'成熟中帶點童真'既人黎架.而我會當佢係一個玩得既姐姐,正!

2001年5月27日
今日開始將尋日既構思數碼化(哈,係唔係講得好pro 呢~簡單黎講就係開始整網頁囉~^o^)不過d tag 真係幾麻煩,我都係今日先覺得HTML 複雜!但係又硬頸,唔中意用software 喎,係要淨用wordpad 黎寫...連我自己都有d頂唔順自己 !^o^ 結果今日整左一兩粒鐘已經 @.@ ...連版面都未做哂~

2001年5月26日
今日連團契都冇返,留o係屋企構思個死人家教會網~哈,諗左幾粒鐘,終於決定唔分frame,用table作為個網既架構.連畫都畫埋呀~唔錯唔錯...講真,我都係第一次整d所謂既official 網,希望可以整得好好睇睇啦!

2001年5月25日
今日返學覺得超煩,話說我地學校今年搞左個課外活動獎勵計劃,咁呢,無論參加校外/校內比賽,又或者o係校內做職員都會計分,但係要d分數有效就要搵有關既先生簽名,或者交有關既cert,非常麻煩!份form 星期一派,今日交,本來有足夠時間簽,但係因為我冇返兩日學,所以今日要'摶命'搵人簽......so troublesome!

2001年5月24日
今日依然冇返學,好大原因係因為尋晚咳左成晚,連家姐都冇覺好訓...於是我諗,如果返左學就實嘈死哂班同學...基於良心問題,我立定決心唔返...不過可惜姊姊唔明白我...唉..算喇~ 不過今日冇尋日咁精彩,因為我開始苦惱家教會個網頁..我今日睇過唔少政府機構既網頁,但係個個都超樣衰...結果搞左成日,我一d idea都冇!點樣可以整一個又pro又靚又impressive 既網呢?!嘩,苦惱!

2001年5月23日
哈哈,今日終於冇返喇! Yeah!其實呢,我原全認為我係一個超級極度乖既學生囉,就連請假都睇有咩堂先!^o^ 不過今日返而唔係好咳~到左晏晝,終於做左連我想做左幾個禮拜既事----游水!太開心喇,炎炎夏日,浸o係涼浸浸既泳池裏!開心死呀!

2001年5月22日
結果今日都係返左學,因為今日星期二,Phy,Chem,Bio都有堂,咁冇偈啦,唔返唔得,真係咳到想死,咳傷喉嚨唔緊要呀,傳播細菌事大嘛! 放學去睇F.3 interclass Quiz,好正常地,D science對黎講就好簡單,但係d中西史我完全唔識,哈,果真係理科人! (不過識唔識都唔關我事啦~)結果謝斯培果班a班囉第二,算係咁啦!

2001年5月21日
今日又到我短講喇,我今日講左爸爸既'業務'同'生平',先生話o係短講裏面可以見到我尊重爸爸喎,哈,我都唔知原來我可以隱惡揚善得咁徹底~唔...咁我覺得爸爸不嬲都值得敬佩,唔...但係另一方面可能佢既性格同屋企人唔arm,咁關係又唔係咁好...唔知lu... 今日女籃A對C,基本上除左c班外,全世界都想A班贏,不過天意弄人...a班輸一分,超勁唔抵啦!冇天理! P.S. 今日咳到阿媽都唔認得,我懷疑我聽日會唔會返學...

2001年5月20日
今日返完教會去鯨魚間鋪頭整投石車,可能因為接近完工既關係,我都冇乜衝勁整,(I mean 可以慢慢黎嘛)於是沉迷玩貓,鯨魚對貓真係好過對人架!差啦!

2001年5月19日
今日一朝早去油麻地某間小學參加wizq 個複賽,我完全認為o係o個度讀既學生幾慘囉,附近就係垃圾站,臭到阿媽都唔認得!不過電腦室d 電腦幾正,有成三十幾部,d位又擺得幾靚,好過我地個學校多多聲. 講返個比賽啦,er...有d傷心啦,實入唔到決賽,嗚,突然間覺得自己識得唔夠人多,常識又唔夠豐富,嗚... nvm啦,玩完就算啦.跟住就去學琴,嘻,學完琴有家姐接,hoho!and then 食下lunch ,返下教會,開開心心又一day.

2001年5月18日
個遊戲日玩完今日就冇lu,不過今日落雨,所以個場冷清左好多!不過黎玩既人依然係咁熱衷&興起,唔錯唔錯!^o^ 搞完黎個遊戲日,黎緊就要整家教會個網頁,加油呀!

2001年5月17日
今日終於到左遊戲日既大日子Lu!真不錯,反應幾好!個個都好熱衷,答問題又答得好認真咁,爭住上榜,真係幾過癮,話哂以前都未擺過D類似既Couter,呢個經驗都幾得意丫!!^o^ 今日放學本來係女籃A對C,但係落得O個幾滴雨就話唔打,CHER!

2001年5月16日
聽日就係遊戲日lu,今日同maggie & daisy 整個board,Maggie 果然係整board 既人才呀下,簡直全權負責個borad,我地都變左assistant.個board 真係a little bit troublesome..搞到六點幾先走得,返屋企仲要set 問題! 今日鄧永強通知我話網上問答比賽我入左複賽,呢個我知左,不過原來要星期六去油麻地唔知邊間小學參加,鬼咁麻煩,人家星期六要AYP 執野嘛! 執野開心過對住部腦架! cher,麻煩!

2001年5月14日
今日真係開心死,話說前排我參加SCMP 既網頁設計比賽,今日出result,我連final 都入唔到,不過就入到semi-final 已經好好架啦,成200隊對手,得少過100隊入到semi-final,哈,都算係咁啦!!^o^ 放學同江曉林傾counter D 野....唉,星期四,五又lunch 又要搞d廢廢遊戲日,真麻煩,咁就冇左成個禮拜喇...o...too bad!

2001年5月13日
今日係母親節,我地一朝早返教會,跟住去泰農食Lunch.不過that's all for mother's day lu...我又要同麥瑞琪&尹寶玲去車化間鋪頭做投石車.哈,我咁大個女都未抖過木,所以今日基本上同實際上都係睇車化整,有d恍然大悟既感覺,哦~原來木係咁抖既. 返屋企上網,好彩最後朱智康都out 左top16,非常好,呼!

2001年5月11日
今日又冇返教會lu,真曳! 成曰o係屋企睇書,上網,上上下網突然醒覺,如果玩問答比賽上左Top 16要玩複賽架喎,咁但係朱智康上唔到網架喎,咁佢點玩,驚驚,希望佢快d俾人掟走!

2001年5月11日
今日都算係成個禮拜中最有生氣既一日喇,因為今日有Comp,真係唔好話法,Comp 真係我至愛~哈,仲有得玩flash 添,直頭係show time la!

2001年5月10日
原來請日假對'返學熱情冷卻症'都冇乜幫助,今日依然係唔多願返學,真cheap... 今日係班際女子籃球比賽既大日子,梗捧場啦,,但係可惜...d C班真係前所未有,史無前例咁矛,尤真係某人,佢D'cool'勁同騎膞馬真係無得頂...

2001年5月9日
因為自覺好耐冇請假既關係(下學期未請過假呀!唔可以咁架!),今日終於請番次假... 不過講真留o係屋企都冇乜野做,淨係上下網,睇下ERS,都真係幾悶...唉,老喇...

2001年5月7日
今日放學搵娜娜囉鎖匙&俾log book佢睇,不過佢部骷髏黃玩電腦...等了好久先走人,嘻,跟住勁正,同佢去左九龍城地庫坐.到差唔多七點先走. 其實係估唔到佢真係咁當我係fd 囉,如果我遲d做lower,我都未必會對d F.4咁好!佢仲肯同我講自己野喎,娜娜果然係個好人呀下!!

2001年5月6日
今日二家姐返大陸,我又因此冇返教會,超級勁衰女...於是成日玩wizq,即係學界網上問答比賽,唔係講笑,真係幾好玩,d程式又強,版面又靚,正!!

2001年5月5日
因為Physics 卷而唔開心既心情漫延到今日....今日成日做乜都唔多有Mood,連教會都冇返,好衰女... 不過都係因為冇返教會,所以先聽到莫依電話,Miss 約左我地七點o係尖沙咀Park Lane 對面既麥當奴等,鬼咁liu lung,搞到人家撘過站,嗚,結果同Miss 緣慳一面,不過算啦,囉返本Record Book,實在高興,哈,搞左咁耐,又驚左咁耐,終於簽到喇!!呢科係我第一樣簽到既科目,Yeah!

2001年5月4日
好傷心呀...今日派左Physic卷...好傷心呀...好低分呀...冇理由架嘛...Physics係我強項黎架嘛...搞到成日好冇心機,連派Compu卷成績唔錯都冇心機...

2001年5月3日
我今日開始後悔放假淨係掛住玩,放五日玩四日,哈,功課都未做,今朝五點幾起身作文,真折墜~不過講真,我覺得自己真係老喇...玩幾日就已經倦到死,今日成日矇下矇下咁.前排做Log Book 又硬係挨唔過十二點,真Cheap!!可能真係好似德貞姨姨咁講,我以前成日挨夜,玩殘左...>.< 今日終於派A.Maths卷,唔制呀!!!唔合格呀!!!有括號喇(註:如果唔合格,成績表上會括住個分),超Cheap 精呀!唔通我真係要搵朱仔補習麼?!

2001年5月2日
今日朝早成班4D去打籃球,但係都唔高興既...事關聞說林攸翎同Patrick 嗌交,心情唔靚,阿謝斯靈又病左,天氣又熱,又曬,所以成班人都冇Mood 打波,超冇癮... 不過唔緊要,事關之後我同大家姐去唱k,得o個兩個人,唔駛爭咪!Yeah!而且好平添呀,因為今日唔係紅假,兩個55蚊jar!!仲要唔摧房,唱到唔唱o個隻添呀!

2001年5月1日
今日果真燒唔到野食,事關得7個人去,所以轉移陣地去九龍城前衛唱k...又因此可以Call 埋拗柴既Cynthia出黎...唱完k諗住去又一城Join 埋fanny,阿明同阿添去睇戲,點知都係睇唔成,諗住去荷里活睇下有冇戲睇,但係結果食完野d人就散哂喇...嘻,跟住同阿明,Kelly,Chris 去左做我認為係全日最有意義既野,就係返龍蟠苑,鳳德村同日修影相喇!哈,好彩個看更姐姐認得我,肯同我影相jar! 其實我返去影相除左想懷緬下過去(哈!老喇!)之外,仲想囉黎整個網頁,咁就算第時我地唔再Friend ,都仲有個網睇下丫...不過我諗冇咁快面世,因為我想整得好好睇睇嘛...仲要諗下有乜野內容!講起呢,我仲想將我本Log Book 擺上網,不過又係有排,因為我要諗下點樣將本又長又悶既Log Book 變得吸引少少... 其實真係好唔捨得Cencus 班人架,但係而家已經唔能夠再有Cencus o個排既感情喇,畢竟而家個個都咁忙,都唔得閒理其他野啦!令我諗起以前升中學同升中四既情形...o個陣時幾唔捨得,到頭來都係要各走行路...我諗起首詩.. 水調歌頭蘇軾明月幾時有把酒問青天不知天上宮闕今夕是何年我欲乘風歸去唯恐瓊樓玉宇高處不勝寒起舞弄清影何似在人間轉朱閣　低綺戶　照無眠不應有恨何事長向別時圓人有悲歡離合月有陰晴圓缺此事古難全但願人長久千里共嬋娟