學識丹田運氣　謝絕煎炸食物

要數大家見得最多，曝光率最高的DJ，丘凱敏(Anna)一定榜上有名，正因為大家見得多，令人錯覺在DJ界已有很長日子，其實Anna正式做DJ只是四年時間。

「當年由加拿大返香港就入港台跟陳海琪，跟住再去新城，可能係經歷o左好多o野，個人成熟o左，令到人o地以為我做o左好耐咁。」Anna說海琪教曉她很多，從控制直播室氣氛到如何運聲。「以前我把聲得一個聲調，後來放膽去試，而家把聲可以做到不同的效果，老、中、青三代的聲線我都可以扮得到；以家連續講十一個鐘都無問題，呢o的就係經驗累積的成果。」

Anna的護聲之道是開咪前不吃煎炸食物和奶類製品，因為這兩樣食物都會影響聲線。講到做DJ的難忘事，Anna說是第一次開咪，當時的情景還記憶猶新。「九四年六月二十日我第一次開咪做黃昏節目《空中小姐》，還記得第一首歌是播梁朝偉的《一生一心》，因為呢首歌有飛機聲可配合節目名，當時有o的緊張，而家講起都可感受到那種騰雞感覺。」

樣貌出眾成功一半

經歷新城多次的人事變動，Anna說，現在的工作氣氛好開心，大家都為了公司而作出努力。「而家做DJ唔再可以保持神秘感，因為人o地唔知你係邊個，就唔會聽你做節目，加上現在睇媒體的人少o左，如果你有知名度，自然會佔優。」

Anna說DJ的必備條件跟上一代已不同，上一代要受過專業訓練，現在只要樣貌出眾便是成功的一半。「電台捧偶像式的DJ，紅的機會較大，其實這只是適應不同年代的改變，電台工作都要配合社會步伐，為了生存自然要投其所好。」 Anna說有外表、 有小小學歷、腦筋轉得快、有古靈精怪的創意，就是新一代DJ的最佳入職條件了。

資料來源：成報