心理有問題

今日兩件事, 請大家睇睇.

1.
今日去黑角頭燈塔位小釣一番,
雖無魚獲,
卻俾我見到另類收獲,
大開 "眼界".

釣完魚後正想離開,
竟見石罅一角,
有 o的咁 o既野.

推論一:
有走獸住 o係度,
帶 o的 "收獲" 入 o黎食,
食完剩番哂 o的骨, 魚頭, 尾 o係度.

推論二:
有飛禽住 o係度,
帶 o的 "收獲" 入 o黎食,
食完剩番哂 o的骨, 魚頭, 尾 o係度.

推論三:
有釣人曾經 o係度,
帶 o的 "魚餌" 入 o黎釣魚,
拆哂 o的魚肉釣魚, 留 o的骨, 魚頭, 尾 o係度.

我原本想清理佢 o地,
但為唔想變本加勵, 鼓勵依 o的惡行,
我決定留佢 o係度,
有機會下次俾個物主睇番佢 o的 "傑作".

依 o的野, 常見常有,
上個月, 有人釣完魚, 將成斤(係成斤)蝦連膠袋,
棄於藍灣半島右面石磯, 發哂臭,
慘不忍睹.

2.

要經去黑角頭釣魚, 先要經過一個小公園,
今日釣完魚經過時,
又見到:

近月, 此公園突然變 o左私家(即並非皇家)特種部隊訓練基地,
隊員有大有細, 細至約十歲, 大至約四十歲,
竟當此俾細路仔玩 o既公園係靶場,
長火短火咩都出齊, 而且不斷傳出射出子彈 o既聲音.

依 o的軍事迷/槍迷, 完全不理會其他人,
有冇人行過都射, 而且一睇就知槍法其差,
每逢經過如見以上情形, 請急急走過唔好望, 射到眼唔係講笑.
如感有生命危險請即時求救, 嚴重者應報警.

以上兩種人, 屬心理有問題/有病,
但在香港不難找到.
如果你係同上述人事有些少相似, 勸你快快改過自新.