回答一些DOC2000(Ver.2)新仔既提問…
退役
一隻馬由20戰開始電腦就一直問你退唔退役到62戰，第63戰就一定要你退役。
當你選退役後你就可以用呢張咭去溝種或落代，如果你想回轉，就不要退役，你就要跑到63戰。到63戰那時，佢就什麼無得比你選，那時你只可以按”OK”去退役。
假退役(我地稱為叮馬)
平時你要退役，你只選”退役”按”OK”去退役，在退役畫面會有一首背景音樂，張咭退出來之後只可配種，不可以用來再跑(除非你翻生)。但如果你選”退役”，一齊按”OK”及”打鞭”(或者係”拉鞭”)，如果你成功的話，佢會叮一聲，在退役畫面就不會有背景音樂，張咭退出來之後你就發覺佢可以用黎再跑，反而不可以配種。呢個方法通常用在63戰馬身上，因為你就可以唔使翻生再跑。
回轉馬
一隻馬最多比你跑63場，回轉馬係張一隻63戰馬翻生，再跑再退役，再翻生多一次，隻馬就會由0戰再開始跑。當然你想回隻馬係由0戰再開始的話，你就一定要隻馬跑63次第一、63次第二、63次第三、又或者63次第4(第四至第十二名都得)，咁樣先至可以回隻馬出來係0戰0勝！
飲生中/黑生中(超級特殊食物)
當你能夠在13戰X勝或之前贏皐月/打比/菊花是旦一隻杯，你就可以在14戰X勝操完壁飲生中，如果你能夠在13戰X勝之前贏齊皐月、打比及菊花三隻杯，你就可以在14戰X勝操完壁飲黑生中。
你要記住：只有14戰X勝操完壁(操什麼都得)先可以出現生中/黑生中，過左呢個戰數就算你操幾多課完壁佢都唔會再出現！所以你一定要知道怎樣去抄廢咭！
拉咭
首先要準備一條膠帶，條膠帶唔好太厚(最好用膠紙).！
首先張一條大長60CM膠紙打直對摺，留少少黏貼位，用果黏貼位貼住張咭既尾部，那樣我們就可以由咭機裹面拉翻張咭出來。
其實有四種情況下我們要拉咭：
第1種情況要拉咭： 抄咭/抄廢咭
如果你要在14戰X勝操完壁飲生中/黑生中，萬一不能操完壁，你就有需要保持隻馬在14戰X勝，那時你可以在跑完之後答完問題，到8秒時拉張咭出來，之後入張廢咭落去，那樣你拉出來那張咭就仍然係14戰X勝，而那張廢咭就會係15戰X勝，之後你可以繼續入咭，再試操過！
又或者你想張隻好馬抄比自己友，你亦都可以用呢個方法去抄張咭比你老友，不過你老友果隻馬就會大一戰！
又或者你做隻全勝馬時失手輸左呢場事，你就要用呢個方法去抄落張廢咭。
你可能會問：我無廢咭怎樣辦？
你要知道，一張咭係可以儲兩隻馬，張咭有兩面，底係(灰色)磁帶，面前頭(印有你隻馬既馬名及父母名稱)可以有一隻馬，下面印有公仔部份都可以儲一隻馬，你就可以當果度係廢咭咁用羅！
第2種情況要拉咭：MAX馬
你如果有隻馬想永遠保持呢個戰數(如MAX馬)，你可以用上面個方法去抄落張廢咭度，但係用上面方法會比較浪費時間！
你就可以用呢個拉咭方法：
首先你隻馬一定要過廿戰(如20戰X勝、30戰X勝等等)，你就可以只係拉翻呢張咭出來，記住不要再入任何既咭入去，當跑完之後你選退役(不要入任何既咭)，部機之後就會響，有得佢響，直致隻馬出完個退役畫面之後，部機就會回復原狀！
呢個方法都可以用在大戰數既全勝馬，因為隻馬到左55戰55勝之後就比較難贏，贏味照SAVE羅。如果輸左，只係張隻馬拉出來，之後選退役味快一些羅！
第3種情況要拉咭：退役
你要知道當你隻馬退役之後就可以配種，我就建議大家留一隻19戰做底，當20戰時你選退役，當張咭係部機一停，你就即刻拉張咭出來，入番另一張咭入去，那樣你就可用呢張去配種羅，萬一唔見左張咭，你就可以再入番隻19戰落去跑多一場，又拉多張去配羅。
我通常都會用盡每一張咭既！
例如我有對馬要退役，我就會開張咭比佢退役，頭就係牡，尾係牝，咁做就可以帶少好多咭！而那些19戰馬我就開本簿，儲起佢放埋一邊，我只係帶一張咭就可以配種，萬一唔見左都可以有個後備！
第4種情況要拉咭：配種
每一對馬只可以配5至6次左右，如果你想保持佢永遠都係無配過。
你就要跟住呢個方法去做：
首先按START掣配種，跟住你就入隻已退役既牡馬入去，當你一見到隻牡馬出現在螢幕上，你就立即拉咭，入張廢咭入去。之後到牝都係，當你一見到隻牝馬在出現在螢幕上，你就立即拉咭，入張廢咭入去。
那樣你對馬就無配過，而廢咭係當配左一次！
你亦都可以用呢種方法抄對馬比朋友去配種，不過你老友個張就會係己配一次，你原本個對就永遠無配個羅！
翻生
首先入隻馬跑1場，當隻馬在選操練畫面出現的時候就拉出隻馬放埋一邊。跟住你要在那場跑什麼名次都得，跑完之後你就見隻馬下車。跟住佢就會顯示條問題要你答，你千萬唔好答住，跟住你就入一隻你想翻生既馬入部機度(記住你跑個場果隻唔好放埋入去)，之後你就是旦答果條問題(唔好退役)，再跑多一場(按START)。佢那時就會響機，叫人幫你CHECK左部機。跟住你會發現張咭會彈出黎，你抽起佢，咁樣你會發現你跑上一場既馬會變成你正話入果隻馬，操練後，羅番正話你跑上一場既馬出來，好似平時抄廢咭咁，入番上一場既馬入部機度，答問題/退役，再抽出張咭，入番張馬咭入去！
首先你要知道當你將隻馬退役之後，你可以將佢配種(我地稱為”吉野”)，但牡馬只能配五次，而牝馬就有6,7次左右，當你入隻馬去配種的時候，佢會顯示你隻牡/牝馬既戰績20戰X勝，在20戰X勝下面有一行寫什麼”立派父/母馬”，但如果你不停”吉”住佢，到5,6次之後，佢就會寫什麼 ”年” / ”衰退父/母馬”，當有”衰退父/母馬”出現既時候，即表示你生出來既馬唔係好野(但有人試用隻衰退馬吉左隻大獎馬出來)。
咁如果你想將隻”衰退父/母馬”變回”立派父/母馬”，你就要張呢隻馬翻生，再退役，用呢隻馬去配種就會寫21戰X勝(因為你翻生要跑多一場)，在21戰X勝下面就回再出現什麼”立派父/母馬”。
點解有回轉馬？
因為呢隻遊戲有個大Bug（你當係千年蟲），只要你個戰數同埋戰績（第一、第二、第三、第四）一齊係大過64既話，部機就會張佢變成0。
例子：
如果你隻馬在63戰裹面有40個第一，20個第二，2個第三，1個第四既話。
你一係就補贏個23場，又或者跑多43次第二，又或者跑多61次第三，又或者跑多62次第四至第十二名。
只要你既戰數同埋戰績係一樣的話，佢就會幫你變成0！
係呢個情況下，你如果真係補贏個23場，回隻馬出來就變成23戰0勝(0勝，20個第二，2個第三，1個第四)。
或者你跑多43次第二，隻馬就會變成43戰40勝(40勝，0個第二，2個第三，1個第四)。
又或者你跑多61次第三，隻馬就會變成61戰40勝(40勝，20個第二，0個第三，1個第四)。
如果你跑多62次第四，隻馬就會變成62戰40勝(40勝，20個第二，2個第三，0個第四)。
在我眼中，回隻馬最好係0戰0勝，理由係當你63戰退役時候，再回出來，電腦會當你係一隻新馬，那些評語通常同你上一次退役時所顯示出來既評語不同，無論上一次佢話你係速度好、體力好又或者係切味好，好多時回出來在0戰0勝時佢都話你隻馬係體力大器馬(我亦見過其他評語)。我覺得咁做比較容易MAX(你可以唔同意)，而且亦都比較便宜些及快一些再回。起碼你唔使叮多幾次又或翻生隻馬幾次先回到！
屈參
同翻生差不多，不過呢個方法一定要在G1場次先做到！
首先入隻能夠跑G1既馬去跑G1，當隻馬在選操練畫面出現的時候就拉出隻馬放埋一邊。跟住你要在那場G1跑第一名，跑完之後你就見隻馬下車。跟住佢就會顯示條問題要你答，你千萬唔好答住，跟住你就入一隻你想屈參既馬(我叫仔馬)入部機度(記住你跑G1果隻唔好放埋入去)。之後你就是旦答果條問題(唔好退役)，再跑多一場(按START)，佢那時就會響機。叫人幫你CHECK左部機，跟住你會發現張咭會彈出黎，你抽起佢，咁樣你會發現你跑果場G1既馬會變成你正話入果隻馬，操練後味會出現細團子、大團子又或者係條大參(睇你隻仔馬贏左幾多隻杯)，如果你隻仔馬已贏超過3隻杯或者係一隻杯都無既話，佢比條細參你。最後你羅番正話跑G1既馬出來，好似平時抄廢咭咁，入番跑G1果隻馬入部機度，答完問題，再抽出張咭，入番張仔馬咭入去。
中獎馬
一隻0戰0勝馬(未回)既裹能力高唔高係由電腦隨機比你既，如果你想知隻馬既裹能力高唔高，你就要去對一對電腦！我本人對馬一定要係京都1400M(草地)如果個場京都1400M在2R既話，我就用0戰0勝馬去對馬，如果個場京都1400M在4R/5R既話，我就用1戰X勝馬去對，有好多人會睇下係高分馬定低分馬。如果係高分馬，0戰去對2R既京都1400M，1戰去對4R/5R既京都1400M。如果係低分馬，1戰去對2R既京都1400M，2戰去對4R/5R既京都1400M。不過我覺得如果你隻係勁既話0戰去對2R既京都1400M，都唔係太大問題。
在京都1400M，有隻電腦馬佢一定要出現先得，果隻電腦馬叫”スギノハヤカゼ”。
在臨跑前佢會出現馬名表，只要在你隻馬既馬名隔離頭三個位是旦一個位有”◎”出現，你隻馬就中獎，如果你隻馬係好勁可以在頭三個位出現三個”◎”既話，呢隻未係超級勁馬(我本人都未見過三個雙圈既勁馬)，如果你頭三個位出現“◎○◎”、”○○◎”、”▲○◎”、“◎○○”都算係一隻中獎馬，不過中唔中獎你都可能走去回馬架啦，除非你係自家要落代！
對馬既時候有三樣野要注意：
- 你隻馬唔可以食完壁食物(果盤/沙糖)或特殊食物(細人參、大蕉、小蕉)，但我個人覺得食果盤都唔係太大問題，食沙糖就真係唔好。
- 最好就只係得你一隻去對中獎馬，因為費時有太大差距，不過以現在大家都做回轉馬既情況下而要做到呢點都幾困難。
- 最多對三次就夠，0戰去對2R、1戰去對4/5R、2戰(如果你係低分馬) 去對4/5R，唔使對完一次又一次，因為中就中，唔中你對一萬次都係唔中。
只要隻馬總分有成58分或以上就係高分馬：
如 ：◎○╳○◎◎（無聲玲鹿）、○○○○○◎、△◎◎○△◎、○○◎○○○、○○◎△△○(有人叫佢做火箭差)、◎◎◎△△○、◎◎○△○○、○◎◎○△○(鬼脚)
而隻馬係57分或以下就係低分馬：
如 ：△△○○○◎(三角嘜)、◎△△△○○(三T)、△○○○○◎(197)、○○△△○○(地之子)
回轉馬既做法
全勝回轉：
你隻馬要在63戰裹面場場跑第一，絕對不能輸其中一場，當跑完第62戰，隻馬下車，此時畫面右上角會顯示你隻馬63戰63勝，平時佢會顯示條問題問你，但今次佢就會什麼都沒有。
如果你間機舖無人可以幫你開機去”CHECK”既話：
你那時只可以按”OK”+”打鞭”掣一齊去按，如成功，你退役時就沒有背景音樂，當退役完畢後，你只要再入呢張咭，你就發現隻馬會係63戰63勝，再跑一場，呢場都係要跑第一，當跑完呢場，隻馬下車，此時畫面右上角仍然顯示你隻馬63戰63勝，今次佢仍然都係無彈條問題問你。
你仍然都係按”OK”+”打鞭”掣一齊去按，如成功，你退役時就沒有背景音樂，當退役完畢後，你只要再入呢張咭，你就發現隻馬會係0戰0勝！
此時你就可以搵定一張新咭，操練後，你就可以選擇今世係全勝定全敗，無論你想再全勝定再全敗，當隻馬落車，此時畫面右上角仍然顯示你隻馬1戰X勝，今次佢會彈條問題問你，你就答那條問題，當倒數到8秒時候，你拉番張咭出來，入張新咭落去。咁你張新咭就會係1戰X勝，而你正話果隻馬就永遠係0戰0勝！呢隻0戰0勝可以留底，萬一呢張新咭有什麼事發生，你可以再入番呢隻0戰0勝既馬再抄多一次落其他咭度！
因為無人可以幫你，所以每一次都要成功，我會建議你每次要按”OK”+”打鞭”掣一齊去按之前拉定張咭，千萬不要入任何咭入落部機，如果你可以在退役時無背景音樂，先至放回張咭入部機，如果唔成功，有得佢響到尾，當退役完畢佢就自然回復正常。因為無人可以幫你，你就一定要假退役(叮馬)，我就建議你做全敗，因為全勝又要叮係比較困難！
如果你間機舖有人可以幫你開機去”CHECK”既話：
你那時只可以按”OK”+”打鞭”掣一齊去按，成功唔成功都好，如成功，你就好似上面既方法再叮過，因為有人幫你開機去”CHECK”既話，你就唔使拉定張咭出來，你就可以由得張咭在部機度，萬一不成功，張咭就會變成配種馬，你就要幫隻馬翻生。
方法係你要入另一隻馬落部機到跑一場，呢隻馬幾多戰幾多勝都無問題，當隻馬在選操練畫面出現的時候就拉出隻馬放埋一邊。跟住你要在那場跑什麼名次都得，跑完之後你就見隻馬下車。跟住佢就會顯示條問題要你答，你千萬唔好答住，跟住你就入翻正話不成功既馬(記住你跑個場果隻唔好放埋入去)，之後你就是旦答果條問題(唔好退役)，再跑多一場(按START)。佢那時就會響機，叫人幫你CHECK左部機。跟住你會發現張咭會彈出黎，你抽起佢，咁樣你會發現你跑上一場既馬會變成你正話入果隻馬(63戰果隻)，隻馬右上角會顯示63戰63勝，操練後，記住呢場都係一定要跑第一，當隻馬落車，此時畫面右上角仍然顯示你隻馬63戰63勝，今次佢仍然都係無彈條問題問你，你此時要羅番正話你跑上一場既馬出來，入落部機度，你再可以按”OK”+”打鞭”掣一齊去按，當張咭比部機一拉入去，佢就會停一停，你就即刻拉番張咭出來，入翻正話隻63戰63勝入去，當退役完畢後，佢就會彈番張咭出來！
當你做拉咭入咭既時候，你要留意下佢有無背景音樂，如果無，你就可以再入番隻63戰63勝入去，你就會發現佢會係0戰0勝！
如果有背景音樂，你又要再重申入另一隻馬入去跑一場，呢隻馬幾多戰幾多勝都無問題，當隻馬在選操練畫面出現的時候就拉出隻馬放埋一邊。跟住你要在那場跑什麼名次都得，跑完之後你就見隻馬下車。跟住佢就會顯示條問題要你答，你千萬唔好答住，跟住你就入翻正話不成功既馬(記住你跑個場果隻唔好放埋入去)，之後你就是旦答果條問題(唔好退役)，再跑多一場(按START)。佢那時就會響機，叫人幫你CHECK左部機。跟住你會發現張咭會彈出黎，你抽起佢，咁樣你會發現你跑上一場既馬會變成你正話入果隻馬(63戰果隻)，隻馬右上角會顯示0戰0勝。
此時你就可以搵定一張新咭，操練後，你就可以選擇今世係全勝定全敗，無論你想再全勝定再全敗，當隻馬落車，此時畫面右上角仍然顯示你隻馬1戰X勝，今次佢會彈條問題問你，你此時要羅番正話你跑上一場既馬出來，入落部機度，你就答那條問題，當倒數到8秒時候，你拉番張咭出來，入張新咭落去。咁你張新咭就會係1戰X勝，而你正話退役果張可以留底，萬一呢張新咭有什麼事發生，你再可以番生張63戰63勝那張咭！
全敗回轉：
回全敗同全勝都係一樣，只不過你隻馬要在63戰裹面場場跑第四至第十二，絕對不能贏其中一場。至於到63戰時，佢同全勝既做法都係一樣，要叮馬或者翻生隻馬先可能變回0戰0勝。
又勝又敗回轉：
呢種回轉我唔係好贊成，因為你要補贏/敗隻馬幾場先可以回番佢去低戰數，至於個方法都係一樣，我用番我上面個例子：
63戰裹面有40個第一，20個第二，2個第三，1個第四既話。
你就要贏及叮成23場你先可以變成23戰0勝(0勝，20個第二，2個第三，1個第四)。
如果你係63戰裹面有62個第一，0個第二，0個第三，1個第四既話都好些。
你只要(叮/番生)贏多一場可以變成1戰0勝(0勝，0個第二，0個第三，1個第四)。
你要記住當隻馬既戰數係63，無論你幾多勝幾多敗，佢都一定要你退役，你勁既每次都可以成功令佢退役時無背景就無問題，如果唔係你要番生成幾十次(例子一)至得，無謂呀！
對MAX 馬：
你可以不停用上面既方法回轉一隻馬，但回到幾時先停呢？
當每跑一場，你隻馬既裡能力會加(無論贏敗)，加到頂我地就叫佢MAX左。而回轉既目的係想令到隻馬既裡能力加到頂，例如你隻馬回左5次，即是話你隻馬已經跑左315(63*5)場，究竟隻馬跑左315場到頂未呢？
如果你想知既話，最好係每一次隻回轉馬在20戰時，你就要搵一些已MAX左既馬去對一對，因為你係唔知隻馬MAX左未，有些馬回一次就MAX，有些回成十次都未MAX，所以你一定要每回一次你都要去對下隻馬MAX左未。而只要你隻馬係在內檔1番九個雙圈而那隻MAX馬在外檔2番，咁你隻馬味MAX左羅！又係果句：如果隻馬未MAX，你對十萬次都未MAX，所以只係對一次就夠。
但對MAX馬之前你要留意：
- 你隻馬及MAX馬要在20戰至29戰內，但可以唔同戰數。例如你隻係29戰而隻MAX馬係27戰，又或者你隻馬20戰而隻MAX馬係27戰。
- 你隻退役時係速度(スピード)，當隻馬跑完之後你就拉咭，選退役(不要入任何既咭)，部機之後就會響，有得佢響，在最後畫面既右手面，佢會顯示你隻馬既型態(有些圈圈三角交叉符號)，在型態上面佢會顯示你隻馬是邊一種大器，スピード(速度)，スタミナ(體力)，切れ味(切味)，如果你隻馬係MAX，佢就一定係スピード(速度)！
- 你要知道隻已MAX既馬既能源係什麼，如果佢係2,3,5行能源爆，而1,4,6行欠一格能源就爆，咁你隻馬就都要係2,3,5行能源爆，而1,4,6行欠一格能源就爆去對，最好對馬時只得你兩隻。
- 記住對MAX馬唔使理牡牝、跑邊一場及呢兩隻馬既分數及他們退役時所出既圈數，只要你隻馬係在內檔1番九個雙圈而那隻MAX馬在外檔2番，咁你隻馬味MAX左羅！
- 我通常要隻牡在27戰要MAX，而牝就24戰。我個人覺得千期唔好隻MAX馬KEEP係25戰！
自家種
你個人覺得想做對屬於自己既種，因為呢類種係果些由日本引入既種係無，我地就叫呢類種做自家種。做自家種有幾個方法去做：
第一種做法：
你可以在是旦配隻CPU馬，最好係一隻牝馬，跟住到廿戰就退役，之後你可以用呢隻馬再去搵同一隻CPU牡馬去配一對(一牡一牝)出來，呢對就係你既自家種馬。
CPU馬有些只係識跑草地(良地)而有些只係識跑泥地(不良)，所以你就一定要自己小心選擇。
本人亦有自家種都可以同大家分享下：
第一代：
牡：メイセイオペラ(CPU) ○○△△△◎ 去配
牝：スプリングギャル(CPU) ○◎△△△○ = 自家種A(牝) ○○△△△◎
第二代：
牡：メイセイオペラ(CPU) ○○△△△◎
自家種A(牝) ○○△△△◎ = 自家種B(牝) ○○△△△◎
第三代：
牡：メイセイオペラ(CPU) ○○△△△◎
自家種B(牝) ○○△△△◎ = 自家種C(牝) ○○△△△◎
第四代：
牡：メイセイオペラ(CPU) ○○△△△◎
自家種C(牝) ○○△△△◎
＝自家種D(牡) ○○△△△◎
同埋
自家種E(牝) ○○△△△◎
第五代：
自家種D(牡) ○○△△△◎
自家種E(牝) ○○△△△◎ = 自家種F(牡) ○○△△△◎
第六代：
自家種F(牡) ○○△△△◎
自家種E(牝) ○○△△△◎ = 自家種G(牝) ○○△△△◎
我呢對自家種馬只係識跑草地既良地及泥地既良地賽事，只要個草地係重或者係不良及泥地係重或者係不良就已經唔識跑，有可能隻スプリングギャル(CPU)只係識跑良地而導致有這樣效果。
最重要係你想要什麼圈數，只要你個人覺得呢個圈數係好既話，你就可以落代。
我仲可以比個日本所做既自家泥地種比大家參考下：
http://www.geocities.co.jp/HeartLand-Namiki/7899/doc/dirt.html
第二種做法：
你可以用現時日本去配一對出來既種，例如用197去配三角嘜，不過你記住最好係同一性既種馬去配會好些，即係話泥地日本種配回泥地日本種，如果唔係可能出來既自家種只係跑草地(良地)而唔識跑泥地(不良)。