有問有答...
為左令大家知多ｄ關於阿倫，網主特登去問阿倫一ｄ關於佢對自己、南華同球迷的問題，雖然問題唔多，但係我都希望大家唔好介意，在不久的將來我會盡量改善，請大家比多少少時間我！
問：細個時候的理想？
答：無呀，踢波囉，淨係唸住踢波呀！
問：咁你對自己有咩評價或者期望呀？
答：評價就無乜呀，期望咪可以keep住個狀態，可以踢多幾年囉，仲有咪望可以幫南華會嬴多ｄ獎項咁囉。
問：咁你覺得有無邊方面需要改善下咁呢？
答：都咁老啦，點改呀，希望可以keep住狀態，踢好每一場波囉。
問：咁你覺得在你的職業生涯裡面，有邊一件事你係覺得最開心呢？
答：嬴波囉，唔...搵到錢囉！
問：咁唔開心呢？
答：輸波囉，仲有表現得唔好呀，同埋前幾年有一、兩個月落左流浪踢囉，係最唔開心的！
問：你對南華會有咩睇法呀？
答：南華會係香港最大的球會啦，好有規模，佢有自己的大廈，宿舍同球場，各方面的設施都好好，我唸好多球員都會想效力南華囉，咁我自己梗係希望可以留在南華踢多幾年啦！
問：你覺得球迷對你的支持有咩感覺？
答：咁梗係開心啦，有ｄ仲支持左我咁多年，無論係支持我定係支持南華都好，有人支持自己都好開心同滿足架！
問：咁你有無咩說話想同支持你的球迷講呀？
答：多謝囉，都唔知講乜呀，其實好難話有咩報答果ｄ野囉，總之好多謝佢地對我的支持同關心啦！
問：咁你對將來有咩期望呀？
答：無乜呀，希望個球市好返ｄ啦，可以踢多幾年同埋唔好再減人工囉。
問：對於有球迷幫你做網頁，你有咩睇法？
答：咁做球員，有人支持自己已經好開心，對於有球迷肯幫我做網頁就更加開心啦，希望個網頁可以做耐ｄ啦，長做長做咁囉！
網主：好多謝阿倫肯抽時間幫我答左咁多野，如果大家有咩想問阿倫，可以話我知，我會盡量問下阿倫，等大家對阿倫認識多ｄ啦！
|
有問有答
|
