歐偉倫，香港足球圈無人不識。

除了他是香港近年最出色華人前鋒外，

當然還有他愛蒲夜店，蒲到差點飯碗不保，

以及公然拒絕由利沙雲執教的港隊出戰世界盃外圍賽等等。

球市不振　難抒雄心壯志

歐偉倫：一兩年後掛靴

歐偉倫說，看到球市無止境地下沉，實在很心淡，再沒有甚麼好留戀，但為生計惟有續在球圈打滾，相信踢多一兩季便收山，另闖新天地。

但他無悔選擇以球員作為職業，因為足球是他的興趣，過程中帶給他無限歡樂；「最衰踢波唔可能踢一世，如果得，我一定踢下去。」歐偉倫說。

事業篇　　「踢得好也減薪」

問：球市不景，球會再次減薪，你有否感到心灰意冷？

歐：坦白講，踢波只為錢，踢得曳減薪，我無話可說，但踢得好，又減，好灰。上季博到盡為球隊爭取成績，但咁又點，都係要減薪，你說我今季應該以乜野心態踢好。

問：你覺得香港足球搞到如此田地，哪方面要負上責任？

歐：香港足球有好多問題，體院解散足球部是其中一個因素。而電視台不停直播歐洲各地高水平聯賽；而本地波水平不高，踢來踢去都係果幾隊，球迷自然冇興趣再比錢睇。球員之間競爭又唔大，我落場踢有時都覺得冇癮。

生活篇　　蒲夜店與球會交惡

問：過去有傳聞，話你經常通宵去蒲去玩，這是否屬實？

歐：後生仔邊個唔玩，初加盟南華因為住宿舍，冇人管住，好自由，夜晚經常去蒲，故影響到練波的表現。當年南華疑因我的紀律問題唔同我續約；到最後又留番我，實在好多謝南華同Peter比機會，而我的表現亦冇令球會失望。講真，經過呢次事件，我完全將去蒲去玩與練波同比賽分開，加埋有女朋友管住，清楚知道邊個時候至可以玩。

前途篇　　收山後想開酒吧

問：很多教練都說，以你的質素絕對可以衝出亞洲，但你就久了點上進心，是否同意？

歐：我在九六至九七果年球季膺足球先生後，教練黃文偉曾經同我講過是時候出外落班。其實我都想出外搵食，起碼搵到錢，但香港球員就係冇乜呢方面的渠道，就算想冇專人安排。

問：你就快三十一歲，話會踢多幾年，之後有甚麼打算？

歐：球市咁差，都好心淡，最多踢多一兩年就會退出球圈；而我對教波完全冇興趣，所以唔會留在球圈。反而有興趣做生意，想試下同朋友開酒吧，睇下有冇好的出路同前景。

如奪神射手更完美

歐偉倫在球壇十多年差不多所有主要獎項都得過，卻偏偏欠了一個射手獎。

「近兩屆有記者問我還有甚麼目標。我當然想獲神射手獎，為本地球員爭口氣，但我從來不會好主動去爭這個獎。」歐偉倫說。

爭神射手不強求

「在香港球圈，神射手獎只是一個可有可無的榮譽，完全沒有實質獎勵。通常前鋒比較獨食，但我就覺得最緊要幫球隊贏到波，所以冇十足把握，寧願傳球比位置更佳的隊友。」他又表示：「講真，我都希望在球員生涯尾聲做番次神射手，咁樣會更加完美；但我絕對唔會強求，球市又唔好，所效力球隊實力唔算強，加上唔知重有冇咁好鬥心，想爭神射手會有一定難度。」