「今次返南華會真係有好大壓力，以前就話因為南華會球迷特別多，未夠成熟所以不懂如何處理，但在球圈經過一段日子後，真係從未試過好似今季咁大壓力。早兩個月真係有諗過退出球圈，因為自己效力南華咁耐，始終對球會好有感情，突然遭棄用當然打擊好大，好彩呢段日子有好多身邊的朋友及家人，尤其仲有一班球迷支持我，令我覺得原來自己真係有咁多人支持!

我今次返上南華會一定要打爭氣波，不單止為自己，仲要代表支持我的球迷、老闆、朋友及家人等，我希望自己的表現會有個交代，相信亦因為呢個原因，我所受的壓力會一場比一場多，一場比一場大。」

「呢兩個月真係有好多事發生，亦令我真真正正體會到很多事情，尤其我真係切身的感受到，球迷的支持原來真係好重要；如果無球迷支持，我真係可能無今日。」

以前細路仔踢波真係無諗過自己會有球迷，慢慢開始知道南華會原來有好多人支持，自己身為一份子當然好高興；但係早前當我對報章表示有諗過退出球圈時，真係有好多球迷寫信或者上網E-mail比我，叫我無論如何都要堅持繼續踢波，就算我離開南華會佢地都一樣會支持我，我總共收到幾百封信，全部由頭到尾我都有睇過，我自己都真係睇到眼濕濕，睇得愈多感觸愈大，發覺到原來自己多年的付出無白費，亦知道自己在球圈多年最大的收穫原來就係呢班球迷。

正如明星無FANS就無知名度，我可以話如果無球迷就無我歐偉倫。」

「我可以再效力南華其實真係好巧合，當我決定繼續踢波但仍未落班時，愉園及流浪兩支球隊都搵過我，若其他人揀可能會選擇愉園，因為始終都算係大球會，實力亦較流浪高，但我當時決定加盟流浪，點知流浪的贊助商竟然話要退出，我自己即時覺得好無癮，心諗雖然無得踢南華，都唔係咁化學掛，莫非自己真係咁黑？偏偏呢個時候南華會知道呢個境況，便再約我商談合作事宜，雙方一拍即合，終於促成今次再返南華會。如果我當日選擇愉園，因為愉園甚少會出現財政問題，所以今次真可謂時來運到，整定我會再效力南華。

開鑼戰結果：愉園勝南華二比零

拍照時，攝影師要求阿倫到門框附近擺出各種「甫士」。