Edison與Bobo同台卻互不理睬。
陳文媛陳冠希同台演出冇交流
　
　　前晚港台第二台在高山劇場搞了個「萬勝萬勝萬聖節」活動，歌手陳文媛、鄭希怡、EO2及港台DJ一齊扮鬼扮怪演出，而BoBo（陳文媛）的緋聞男友陳冠希（Edison）是特別嘉賓，所以整晚兩人都被擺上枱玩。不過Edison多次把視線望向BoBo，但她卻一直避開冇望佢。

　　前晚歌手與DJ都化了個嚇人的妝演出，鄭希怡扮成貞子，EO2的鬼扮相更是經過特技化妝，在完騷前，Edison被邀請站在台中間，而BoBo卻遠遠的企喺他左邊，只見Edison不時將視線望向她，但BoBo就只顧同梁奕倫玩，完全冇望Edison。當大會叫Edison挑選邊個化妝化得最特別時，蘭子即答口話揀BoBo，令二人頗為尷尬。雖然兩人企埋一齊，但卻一直保持距離，大家冇望對方，亦冇傾偈，十分生疏。

鄭希怡變身貞子
　　由於Edison早已聲明不做訪問，故節目完即刻走人。BoBo對點解同Edison冇眼神交流，同台又唔傾偈？她說：「你哋最鍾意睇人哋啲視線㗎啦，成日咁講，我都嬲呀。（喺後台有冇同Edison傾偈？）冇喎，冇見到佢，做嘢嘛，唔係為傾偈。你哋話乜就乜，我都唔知依家去到乜嘢階段。（咁到乜嘢階段吖？）唔知。（介唔介意影合照？）冇乜需要啦，之前都成日影。（你哋好似生疏咗？）唔覺喎，或者係人哋刻意避開。（係咪指Edison？）我冇講過，我冇留意其他人。」

EO2化鬼妝辛苦
　　EO2四位成員化個誇張的鬼妝花上兩小時，化得好辛苦，EO2因接拍了一部講飛虎隊的戲，四子要入營三日接受訓練，冇得過萬聖節。

　　被封「龍嫂」的Yumiko鄭希怡則否認因怕被人做新聞而避與成龍同場合出現。問她找男友是否要似成龍？她說擇偶要合眼緣、有Feel，年齡不是問題，但一定唔揀結咗婚的，因她不想做第三者，破壞別人家庭。

感謝成報提供新聞*