Shall we talk
生日
過往三年既生日都有一班好朋友在身邊陪伴，真係覺得自己好幸福。唔係因為收到好多份禮物，或者可以去狂歡一番…而係有人重視我、重視我既生日，為我既生日而打點，多謝你地呀！
緣份
英文從來都沒有「緣份」這個字，所以總覺得它是屬於中國人的。能夠在人海之中相遇，絕對係因為有緣，點解這個世界咁大，個個都唔遇到，偏偏認識你呢？點解唔生於其他的家，偏偏走來做你的子女呢？
人生
今日唔知聽日事，聽日唔知後日事，甚至乎幾分鐘後會點樣你都唔會知…自己有幾多歲命有邊個可以肯定，所以要珍惜、享受人生囉！好好把握每一天，就當每天都是自己最後一天，要開心快樂。
開心
做一個悲觀的人辛苦，但其實做一個樂觀的人仲辛苦。悲觀的人處於唔開心狀態係應該的，但樂觀的人就需要在唔開心狀態之下尋找開心既路，即使多麼不快樂，都要笑。
工作
每天就好像錄影帶般同一時間起床、搭車、返工、放工、食飯、睡覺加上行同一條路，真的覺得很厭倦、枯燥，但我地又可以點做呢？不過又諗下係這個時勢仍然有份工楂手已經好好彩，唔好厭三厭四啦！
信件
我不太喜歡寫信，但好喜歡收信，所以中學時代成日被朋友鬧我點解唔回信，比十封我，都唔回佢一封…不過現在長大了卻喜歡上寫信比朋友，雖然打個電話乜都可以講哂，始終寫信可以將唔敢講出口的說話表達出來。
日記
由中二開始我就有寫日記的習慣，至今已經儲了七本咁多，以前我呢只係寫低值得記住的日子，但係依家就慣左日日都會寫。好多時番看日記，會記得好多事，會記番以前有幾幼稚，會記番以前有幾純真。
暗戀
直至現在這一刻我的暗戀對象只有一個，由中二開始的。畢業至今四年多，曾經在街上遇見了三次，每次見到佢，都會讚嘆自己眼光高，竟然會鍾意過咁完美既人。但其實佢根本唔係真係咁好，只不過係我自己將他美化了吧！
留念
成日都比媽咪鬧儲埋哂垃圾，因為我又真係幾離譜既，可以將小六係沙灘執到的貝殼、小四美勞堂用剩的彩沙、小學至中學的手冊、小中學的校服、年幼時用的頸巾、中學時代老師要寫的週記同作文簿…..一直留到現在這一刻，咁人地係唔係唔捨得掉嘛，我甚至乎諗住當係家傳之寶遺留到下一代、下下一代、下下下一代架。
欺騙
我從來都不介意別人說謊，即使周遭既人都叫我唔好信，只要唔係我親手拆穿謊言都可以當係真，咁係因為我信任人，寧願一世當謊言係真話，都不希望自己失望。不過如果你當我係朋友，係絕對唔應該欺騙我的。
親情、友情、愛情、金錢、名利，你會點樣排次序？我根本諗都唔洗諗，1係親情、2係友情、3係愛情、4係金錢、5係名利。家人係我心目中永遠都係非常重要的。
永遠當我笑到好開心，只有你一個會走來問我「是否唔開心？」；當我覺得很委屈，只有你一個會一直企係我個邊；當我毫不講理，只有你一個會任我亂來。多謝你，你永遠都係我好朋友，你應該知道我講既係你。
曾經係我17歲剛出來社會工作的時候，有個好知己好朋友用一個謊言問我借$2000，這個數目對於當時年幼的我是一個唔細既數目，但係毫不考慮就借比佢，結果因為這$2000我失去了出雙入對情同姊妹既好朋友，不過覺得$2000可以買到一個人格好抵。假若回到那一天，我依然係會借錢比佢架！
睇怕我都係做唔成淑女架喇，因為我只鍾情有咁平得咁平既平低鞋。成日覺得即使幾肥既女人只要穿上高根上、抖零掙的時候，對小腿都會變得極度纖瘦，而且當堂增添幾分既女人味，所以我好羨慕架。但偏偏我就只喜歡著平低鞋，算啦！
記得想當初你同我會手撓手去花園街；又會一齊買車仔麵去公園食，跟住仲會被公園的保安員驅趕；還有會話人地咁既樣，點解有個靚仔男友咁天無眼。即使已有一段長時間沒見面，但係我心目中無人好似你咁同我充滿默契。
曾經有一年中學暑假參加了一個宿營活動，那一晚一大班同學在渡假屋出面望星星，當時個天既星星多到你唔信，仲要好似係有線連住，妨如一個一個星座。好後悔沒有好好享受那個時光，今時今日才驚覺當晚係幾咁靚架。
由細到大都嗲媽味養番隻狗仔，不過到今時今日我屋企仍然係一隻寵物都冇既，有時見到人地拖住狗仔散步好羨慕，而且狗仔咁得意，的確好想擁有番一隻。可惜，媽咪答我「一係養你，一係養狗，你自己選擇啦」，唉！
有冇一個減肥方法，係唔需要節食、運動，但又可以最快速度減十幾磅架？有既話，通知我一聲啦，小女子陳Gigi等待各方好友的喜訊啊！
好想儲夠錢考車牌，跟住買架淺藍色的mini cooper，然後楂住架車四圍去。當自己唔開心既時候，可以遊車河放鬆一下心情；當想燒烤時，可以載住朋友、屋企人去BBQ，咁就真係好Perfect。
小學同中學的某一段期間，我都曾經返過一段時間教會，可惜無論點樣做，都係投唔到咁架，又不能專心一致去睇聖經，當弟兄們講緊主耶穌既時候，我又會想睡覺。所以我唔係唔想跟你返呀，問題係你要比D時間我。
我都同千嬅影過相架，印象中既千嬅真人一點都唔高大，好似同我差唔到高咋嘛！不過，佢個頭都幾大喎，同我差唔多啦，但我出哂名係「大頭妹」，可想而知佢都有番咁上下。