泰國遊(1)之機場落難

聖誕假期去左泰國（曼谷＋華欣）共八日，純粹諗住去下陽光海灘，所以個旅程無乜特別可記，不過都有ｄ濕碎野講下．

12月24日 第一天

雖然淨係返半日工, 搭6:10pm機, 不過由於我乜野都未執, 加上手腳慢, 所以都好遲下先去到機場.  去到搵左兩轉都唔見air lanka個counter, 唯有問下出面櫃台既地勤, 點知佢話air lanka飛bangkok班機既counter已經closed.  下???  Closed?  乜唔係起飛前40min先close counter架咩?  點解.......... 咁準時既???

我問地勤姐姐點算好, 原來先我一步都仲有一個客late show, 於是佢打電話去番air lanka度, 問收唔收我地兩個喎.  :(   等左一輪, 佢好似趕鴨仔咁指我地去對面一個counter check in, 跟住就有另一個職員負責全程「護送」我地上機, 即係由個counter到immigration再到閘口, 確保你中間唔會走左去第度, 連去洗手間都唔駛旨意.

問題來了.  我大安旨意去到機場先提款, 點知搞到比人挾上機, 好彩我個fd 遲我一個鐘先飛.  於是我一面比人趕鴨仔, 一面用mobile打比我個fd: 「喂你一陣帶多幾千蚊過去丫.」 佢連一句: 「乜你無帶咩?」都未講完, 我個電話已經嘟--嘟--嘟-- 咁響左三聲.......... 佢竟然響呢個時候無電???  唔係下化???

無辦法, 只能寄望我個fd醒目啦.  我第一次搭air lanka, 可能我鄉里, 第一次見架飛機有forward camera同downward camera, 你可以響個位部電視果度, 睇到架機起飛同降落果陣外面既環境, 好有現場感.  :)

好彩身上都仲有500港紙, 去到bangkok機場之後換到泰銖, 好順利咁搭機場巴士出到市區兼搵到間酒店, 跟住就好鬼悠閒咁連涼都沖埋等我個fd.  但係時間一分一秒咁過去, 佢遲我一個鐘飛, 點解等左成兩個鐘都未見人既???