泰國遊(6)之最終回

最後一日, 由華欣返香港, 原本諗住搭長途巴士返bangkok之後, 再打的去機場. 汲取左去程趕飛機既教訓, 今次時間都預得幾充足, 就算塞車都應該萬無一失.  就係衰在預得夠鬆, 搞到差d又出事. :p

班機飛1:20 pm, 我既目標係12:30 pm之前去到機場.  由華欣搭巴士返bangkok車程非常暢順, 車程約3小時20分鐘, 未夠11:00 am就到達bangkok既southern station.  我見時間咁早, 就懶係慳家咁, 打算坐airport bus算數, 於是週圍問人點搭.  可能果度唔算係遊客區, d人唔係好識英文, 我問左幾個人, 輾轉比人點左去兩條街外既一個mini bus station. 

去到之後, 先發覺原來真係比人點, 果度既職員話我應該搭305號巴士喎, 佢好好人, 見我”烚下烚下”咁樣, 就親自帶我去個巴士站果度, 將我交比個站長.  等到架巴士到站之後, 個站長又將我交左比車上面既售票姐姐.  我上左巴士之後, 循例問下售票姐姐, 架巴士係咪去airport咁啦, 點知佢竟然say no, 跟住講左一輪泰文.  我比左個好迷茫既表情佢睇, 於是佢就好慢咁再講多一次…….不過都係泰文 (天呀~~~ 你講多十次我都唔識聽架啦!).

之但係咁, 佢成段泰文之中, 都有一句英文既, 就係”number 10”喇.  我見佢又無踢我落車, 於是”推斷”佢既意思係叫我響某處轉10號巴士, 所以我就坐低左, 佢亦好安樂咁向我收車錢.  沿途我見到既, 係一d好宏偉既建築物同埋郊外地方, 完全唔係我之前見過既bangkok……. 不過事到如今, 唯有坐到佢叫我落車至算喇.

過左大約半個鐘, 售票姐姐終於有表示.  我落到車就搵10號巴士啦, 司機又係唔多識英文, 聽到我講airport就先搖頭然後又點頭 (死未?), 然後我又指著個手錶問佢what time, 佢就響番我個錶到比劃, 應該係指12:30 pm.  我選擇左信佢, 於是又乖乖地坐定定等嗌落車.

架巴士唔係行highway, 亦唔見有其他遊客搭.  一路好彩無塞車, 落車之後先發現架巴士其實係停機場對面既一個火車站, 過條行人天橋先到機場.  不過總算一切順利, 12:15 pm就去到機場, 等我仲有時間換番d泰銖先check in. :)

特別鳴謝同表揚所有幫手提供路線既人, 尤其是巴士員工, 非常helpful, 令我只係用左30bahts就由bangkok既southern station去到機場, haha!

仲有多謝你地收睇個遊記呀.  ^_^