| 陳冠希（Edison）與余文樂爆粗事件鬧出多個版本，身邊的人紛紛作回應，昨日陳文媛（BoBo）出席《慈善星輝仁濟夜》記者會時，力撐緋聞男友Edison出道至今工作態度漸趨成熟，並非火爆的人，她說：「我當晚唔在場，所以唔可以講咁多嘢，不過我認為件事唔係真。（有冇聽過Edison講粗口？）唔記得，相信每個人都講過粗口。（有冇打電話搵Edison？）冇，我相信件事好困擾佢。」有傳兩人因爭女不和，BoBo笑言爭女只是十五歲以下小朋友行為，他們是成年人不會這樣做，傳聞對他們不公平。至於指鍾欣桐夜訪Edison，BoBo認為將太多報道混為一談太混亂，其實樂壇應該和平些，偶像們要作好榜樣。
Stephy唔知易角
昨日有報道指電影公司因余文樂人氣盛，臨時將《百分百感覺2003》Jerry一角由Edison改為余文樂擔演，而Cherrie一角由Cookies成員Stephy飾演。問到Stephy是否由余文樂飾演Jerry？她說：「未收劇本，公司話重搵緊男主角，相信同呢件事無關。（你想同邊個合作？）之前同Edison合作過，我覺得兩個都適合個角色。」她坦言不怕與余文樂合作而傳緋聞，認為只是宣傳手法。
王傑叫忍一忍
王傑不覺得兩人是會打交及是臭脾氣的人，他說：「後生仔應該收斂吓啲火，兩個都係有前途偶像，要忍一忍。Edison平時唔出聲，係有時百厭吓，阿樂就成日笑嘻嘻，希望後生仔冇事。（要唔要擺和頭酒？）唔使咁誇張，大家見面開心搭膊頭咪得，不過唔好搭膊頭再有誤會。」提及鄭堯強（又名鄭堯檉）去世一事，王傑頗為感觸，他透露與Gordon相識十六年，有一份深厚情義結，他說：「我唔當佢係高層，當佢係哥哥，我有乜開唔開心都會同佢傾。」前日公司通知Gordon去世時，感到非常愕然，他說：「前晚（大前晚）探望Gordon，佢重叫我坐喺牀邊捉住我隻手，當時相信佢好快出院。其實太突然，同時間羅文大哥同Gordon都走咗，最近我忙緊國語碟，不過一定會抽時間送Gordon最後一程。」
|
