早前一個人氣飲品廣告中，出現了三顆矚目的新星。事隔三年，女主角已在圈中闖出名堂、發光發亮，近日更因牽涉入王鋒戀而屢成頭條人物，她的名字是張柏芝；相比之下，兩名男主角至今仍寂寂無聞，據知一個已脫離娛圈另謀發展，至於另一名則仍在圈中默默耕耘，靜待發圍機會，他的名字叫黃宗澤。

渴望演電視劇
可幸Bosco(黃之洋名)並不介意，對前途充滿憧憬，他大方地說:「其實公司畀咗好多機會我，入行冇幾耐已經做<歡樂今宵>啦!雖然唔係做主角，不過嗰次係一個好好嘅訓練機會，因為個節目係Live嘅，加上同一大班前輩例如汪阿姐、肥姐同鵬哥等等同台演出，真係考我急才之餘更操我膽量!」
作為一個新人，除渴求演出機會外，始終希望有一個屬於自己的角色，讓觀眾留下一個印象，而電視劇集就是其一「入屋」的途徑。Bosco亦坦言這一點，他開懷地說:「繼早前喺<烈火雄心2>擔當一角後，六月中我會開拍另一套時裝劇，到時可以有個屬於自己嘅角色喇!」說時更摩拳擦掌，一副躊躇滿志的樣子。

嘗試唱歌拍戲
除了恨拍劇集之外，Bosco希望能作多方面嘗試，例如唱歌拍戲等等，都是他的理想範疇，他認真地說:「我嘅目標得三個字:【古天樂】!佢實在太有型喇!加上佢工作態度又好，又肯照顧新人。我記得同佢拍<創世紀>嗰時，佢勉勵我要Keep好自己，並要預咗捱苦，千萬唔好諗住可以一步登天!」Bosco已銘記該段說話，並已作為推動他努力向前的動力。
提起偶像古天樂，Bosco恍如一個小Fans般滔滔不絕，並說:「古仔以前都好白淨架!係曬黑之後先成功轉型!(你曬到咁黑，係咪想扮佢?)唔係，只係我好鐘意陽光與海灘，加上早排去咗泰國先搞成咁者!況且古仔表面上比較Cool，而我就較為陽光，總之希望有佢嘅成就啦!」為達到自己的理想，Bosco已跟楊千嬅的歌唱老師學唱歌，為求增值之餘，也希望為未來的事業打好基礎。

Bosco曬得一身古銅色皮膚，希望能像偶像古天樂一樣走紅。

黃宗澤(中)曾與張柏芝合作拍飲品廣告。

Bosco每次出海，除會進行花式滑浪外，總不忘駕駛快艇享受海風。