近日見親黃宗澤(Bosco)，一有空就會壓腳，細問之下先知佢原來要練好腿功做黃飛鴻 !
由黃偉聲監製，以少年黃飛鴻經歷作故事背景既新劇將於十月中開拍，該劇共有廿五集，除Bosco飾演「少年黃飛鴻」外，佢既一班徒弟亦相當年青，包括陳鍵鋒飾演「梁寬」、李家聲飾演「豬肉榮」、訓練班新晉演員陳堃飾演十五、六歲既「牙擦蘇」，就連黃飛鴻既死對頭「簡堅」都會年青化，由馬國明飾演，至於飛鴻既冤家情人就會由李彩樺飾演。
咦!咁「十三姨」呢?原來今次由楊婉儀飾演既「十三姨」，將會愛上飛鴻父親「黃麒英」(姜大衛飾)，同譚小環扣成三角關係。
劇情講述飛鴻隨父返回佛山遇上的種種經歷，除咗先後收咗梁寬、豬肉榮同牙擦蘇做徒弟外，就連一直跟佢作對，專收保護費同過橋費既小惡霸馬國明最後亦受飛鴻感化，改邪歸正，拜佢為師。
大家可能會覺得好奇怪，豬肉榮唔係好肥既咩?點解會搵中等身材既家聲做呢?原來劇情講述豬肉榮因為自覺太肥追唔到女子，於是決定要瘦身，所以先會有瘦版豬肉榮出現，不過，為咗配合前段肥版豬肉榮嘅需要，家聲正積極增肥，到時再配合造型，肯定可以俾到觀眾耳目一新嘅新形象。
早前，監製專程前往廣東南海睇景，計劃明年一月初前往當地取景拍攝，點解選擇南海?皆因當地係黃飛鴻故鄉及成長之地，為了搜集更多資料，監製先後到過當地黃飛鴻博物館及故居參觀，並打算請來黃飛鴻武術隊隊員拍攝一啲大場面添!
