TVB週刊   Issue.330
黃宗澤自認行為老餅
近日在熒光幕頻頻見到黃宗澤 (Bosco)，繼<戀愛自由式>的搞鬼王後，他在<英雄、刀、少年>作另一轉變，改演文質彬彬但又幾打得之人譚嗣同，第一次拍打戲的他，理應驚驚青青，但他一點也不怕，一些危險動作亦親身演出，何以有如此大的膽量?廿多歲的他照計嗜好應該不離游水打波，但他有一些自言是「老餅」的嗜好。就讓這一位非一般的後生仔來一次剖白。

最怕自己唔識打
Bosco第一次拍攝的武打戲，正是<英雄、刀、少年>，從手無揮刀劍之力開始，他就非常認真學武，「我不似同劇的吳卓羲有舞蹈根底，一切從唔識開始，最初有點擔心，擔心自己打得唔好，所以努力去學去練。打打吓又覺得幾好玩，再加上自己百厭，後來有一場跳樓戲，監製話要用替身，但我堅持唔用，要自己真身上陣，最後順利完成拍攝，諗番果次都幾難忘。」除了武戲，文戲亦有一場難忘場面，「我要拍一場喊戲，我堅持用真眼淚，我足足喊咗六次，喊到眼乾，雖然喊得辛苦，但我覺得演得幾滿意。」
第一次拍打戲外，Bosco還有一個第一次，就是與劉松仁合作，與松哥做對手戲，Bosco緊張到不得了，「松哥是老戲骨與前輩，第一次就要與他演一場交代二人關係緊張的戲，排戲時我緊張到手心冒汗，但其實他很友善，會與我們這班後生仔一齊討論劇本，從他身上偷到不少師。」
從冒起的新秀來說，Bosco屬幸運一族，他主演的兩套劇集相繼推出，他自言非常開心，「開心的是因為所演出的劇集得到人欣賞，而我屋企人晚晚喺電視機見到我之餘，更幫我錄低晒D劇等我放工後可以睇番。」

想與好友搞生意
談完工作，說說嗜好，以為答案會是打籃球、唱K，雖然這些都是Bosco常與朋友一齊消遣的活動，但他自言有兩樣成年行為:「我夠膽死去半島酒店coffee shop或者lounge叫一杯飲品靜靜地坐喺度睇劇本，睇不同國籍的人行過，很享受果份寧靜，唔似其他年青人咁鐘意熱鬧也鐘意四圍玩。就算唔喺酒店坐，我都會喺屋企睇VCD。」
成年行為不只一樣，他連睇報紙的口味亦有所改變，「我以前會睇港聞、副刊同娛樂版，現在睇港聞版習慣不變，而娛樂只會看一看，反而有留意地產版，因為我很想買或租樓與屋企人一齊搬家，不過最理想當然係買一間大屋俾家人，自己住一間細屋，方便朋友聚會!」
除了想自置物業讓朋友們有多一處地方聚腳外，他也希望與一班好朋友搞搞生意，「我與朋友聚會不離打籃球、飲野或者去其中一個朋友度打麻雀，始終唔係好方便，如果我地可以開一間coffee shop或者清吧，可以隨時隨地有私人聚會，唔怕人打擾。」

緋聞絕緣體
在探班時，發現Bosco等埋位時會與一眾合作演員玩玩遊戲，踢毽，與男仔玩成一遍就沒有緋聞傳出，但與女仔們玩得太熟就隨時會有緋聞，他可有防範緋聞秘方?「我同個個女仔都咁friend，唔通個個都傳咩，而且大家只不過傾計講笑，根本無咩可以傳，係緋聞絕緣體，不過如果真係要傳我都無辦法，惟有講清者自清，如果太離譜或者屈我，我先會澄清!」
刻下他正趕拍<足秤老婆八両夫>，未來又要拍打戲，旨因他要演<少年黃飛鴻>(暫名)，為迎接未來日日打嘅場口，他已開始勤練拉筋，要上位非要勤力不可呢!


第一次學武，Bosco自言全力以赴


與松哥拍對手戲，Bosco緊張到手心冒汗。