新劇宣傳灑鹽花 黃宗澤郭藹明演夫婦有壓力
無線新劇《足秤老婆八両夫》下周一推出，郭藹明（Amy）、黃宗澤、麥長青、姚樂怡、許紹雄及楊家洛等劇中演員昨日進行宣傳活動。大會先安排一名小朋友踢轎門，然後黃宗澤便背著Amy出場。期間，一班演員大玩玩新人遊戲，令現場充滿鹽花又搞笑。＜採訪、攝影＞慧芳
先被玩的是黃宗澤及Amy，被黃宗澤抱著的Amy要餵這個劇中老公食湯丸，但其他人則在旁騷擾。另一個遊戲是女藝員身上綁上絲巾，男藝員需要用口解開，其中姚樂怡與許紹雄安排成一組，女方竟開玩笑叫許紹雄不要用脷解開，許紹雄卻笑說：「我慣左！」充滿三級意識。
首次擔正演出的黃宗澤坦言有壓力，會否擔心收視？他說：「唔擔心，順其自然，希望呢類戲觀眾鍾意。（呢套劇好似《戇夫成龍》，會唔會希望有《戇夫》咁好成績？）當然希望。我希望呢套劇有卅幾點收視。（如果有點慶祝？）還神囉！（通常女藝員著泳裝，你會唔會著T-Back？）我好抗拒着T-Back，最多著勁低腰露幼底褲邊。」
見青雲似小Fans
黃宗澤承認與好戲之人Amy合作初時很驚，不敢跟Amy傾偈，相處過後才知道對方經常嘻嘻哈哈。Amy老公劉青雲有沒有來探班？黃宗澤即興奮地說：「我好鍾意青雲，我見過佢兩次，一次係黎探班、一次係慶功。第一次見佢果陣我只敢坐埋一邊偷偷望佢，好彩果日拍我同Amy分開既戲，當時氣氛好傷感，唔係拍咀戲，我拍咁多劇都未試過獻出熒幕初吻！第二次見青雲，我好似小Fans咁唔敢同佢傾偈，我靜靜雞同麥包（麥長青）講想同青雲合照，麥包就幫我達成願望，青雲真係好好人。（Amy知唔知你鍾意佢老公？）應該知卦？」
Amy自認係新人
《足》劇的宣傳片，三位主角中以Amy佔最大；對此，Amy說：「冇睇過，但唔可以咁講，佢地個個都有經驗，我反而係新人，因為當時我第一次入廣播城。（有冇擔心收視？）冇呀，收視唔係自己控制到，順其自然啦，但都希望觀眾鍾意套劇。（幾時再拍劇？）傾緊。（老公探你班喎？）係呀，帶佢入黎睇下囉！」何時計劃造人？Amy坦言一直有計劃，更曾因而減少工作，可惜青雲今年太忙，不可以體力透支，待他減少工作時才算。
|
黃宗澤揹住新抱仔郭藹明。 |
|