year 3
自己
今年0既回顧，多0左一篇關於自己。點解要咁寫？因為年年都有4個topic，咁今年都好似無之前兩年咁多事發生，咁我咪整篇咁0既0野囉。
呢三年，我今年終於都覺得自己有d唔同，以前，我好強調自己無咩點變，但係其實變0左好多，唔知你地覺唔覺得？我比起兩年前0既我，諗多0左好多0野，但係全部都係一d無聊0野。今年year 3，我幾乎一得閒，我就拎張成績表出唻計0下分，我以前無咁緊張d成績，但係越近畢業期，我就越緊張，只不過我唔會緊張到俾你地見到，而你地見到我緊張果陣，其實我已經係緊張到忍唔到。坦白講，我有d擔心自己讀唔上，尤其上學期stat，我真係有擔心過，不過，好彩到最後都合格，我真係鬆0左一口氣。每次去問oli個分，我真係唔知問好？定係唔問好？壓力都幾大囉！唔知year 4會點呢？希望唔會再係咁……
今年好幸運，竟然有part time做，就係補習。其實之前都幾抗拒補習，因為我覺得自己係唔識教人，同埋我幾驚d唔聽教0既小朋友，所以開頭都係同d識得0既補習，點知補補0下，隔離屋又幫我介紹0左另一個補習，咁就開始同d唔識0既小朋友補習，之後人地又再介紹幾份俾我，結果，我宜家就有好幾份補習，一個星期七日就補足六日，有時真係幾辛苦。so far我宜家d小朋友，個個都好聽教，唔會好激氣，如果唔係都真係幾慘！間唔中佢地又會俾d驚喜我，我有時漏低d文具，佢地會搵張紙包到好似禮物咁，咁我又會將呢d紙放入筆袋，之後另一個小朋友見到，到我下次留低文具，佢又會照住一樣搵張紙包住，真係好好笑。
補習比我想像中開心好多，果兩兄妹好好笑，佢地宜家成日都送0野俾我，有時我話唔要，佢地就會係我唔留意果陣，就會將d貼紙放入我個袋，有時仲會貼0係我個筆袋度；個妹妹讀二年級，每次我唻到，佢都會搵定d英文故事書，佢會好開心咁話：我今次講呢個故事俾你聽呀！佢唔會覺得補習係慘事，我自己都好開心0架！另外有個小學四年級0既男仔，佢係唯一一個會叫我做「老師」，佢問我好多一d科學0既問題，每次我執0野準備走，佢都一定會一大堆咁問，問到好似我下次唔唻咁。仲有個肥仔，我一問佢d字點解，佢就會話：等一陣……之後佢就走去拎字典，咁我咪搶佢本字典，之後唔知幾時佢阿媽就會0係佢後面拍佢個頭，叫佢答問題，好好笑0架！最後就係我補得最耐0既兩姊妹，原本我只係同個家姐補，之後就同埋個妹，個妹好強調係要我補先得，佢同佢媽講：係文文姐姐先搞得我掂！我淨係鍾意文文姐姐。原因係我有禮物喎！笑死！至於個家姐……真係頭痛，成日都發脾氣，佢一發脾氣，我就唔睬佢，試過有一次我扮到好嬲，我見夠鐘，咁我咪走囉！到第二日見到佢，乖幾多呀！
下年有無得補就另一回事，就算無得補，都唔係一件壞事，咁我就可以多返少少時間讀書。因為我今年體會到，原來我係有咁多時間去做其他事，雖然係少0左d時間去行街、食飯，但係我真係多0左d時間做0野。除此之外，我竟然儲到錢，當然相對之下，我自己都洗多0左錢，但係儲到少少錢，都算係咁，再儲多d錢，用唻預備我year 4之後要用0既雜費。我希望我儲到d錢。