賽事精華    (08/04/2004)  V.S 耀祥隊

                  廿七軍今仗有如天安門事件翻版一樣,不過今次死既並唔係民運份子,而係一班羽臭未乾既小伙子。虐兒既感覺,一D都唔好受,神呀!原諒我們吧!

                  當廿七軍踏入深水步運動場,即被那綠草如茵既草地吸引住,再望一望對手,更加被佢地既年齡嚇一跳,因為我地隨時做到佢地老豆。

                  當球證當點齊兩隊球員之後便正式開始上半場賽事,黑衫黑褲右攻左既係有主場之利既廿七軍,而黑白衫白褲左攻右既係耀祥隊。廿七軍首先開波,幾分鐘之後廿七軍已經佔有大部份既控球權,而中場負責校炮既阿威今場亦不負眾望,幾個致命傳送交俾廿七軍神射手富仔,而富仔就好似表演賽一樣上半場連中三元。反觀耀祥隊攻勢只係隔靴搔癢,未能威脅廿七軍既一班後防球員同埋守門員阿勇。

                  下半場廿七軍領隊兼球員毛仔連同三名廿七軍隊員退下火線,換入一班新力軍,當中包括大家久違既碧咸,呀!打錯左,係阿咸,咸魚先啱,同埋有地旋陀螺之稱既豬妖。真係爛船都有三斤釘,睇呀咸踢波真係有D施丹既影子,慢條斯理,但又處變不驚,同豬妖比較就半約若兩人,單睇豬妖係半場時間裡面既越位次數就知道佢有幾衝動啦(你地估下有幾多次吖?答案稍後揭曉)。

                  經過一輪調動之後廿七軍仍然處於上鋒,攻勢一浪接一浪,其後富仔再把握一個射門機會造成四比零之優勢。之後阿咸眼見富仔個人連入四球,絕不能讓其獨領風騷,多翻施射都被對方守門員撲出,反而有一球豬妖藉住阿咸射門守門員甩手執雞射入取得聯賽杯個人首個入球,更將比數拉開至五比零。不過阿咸似乎死唔憤氣,竟然推入大禁區後施以左腳勁射,終於被佢取得士哥。

                  最後廿七軍以六比零輕取耀祥隊全取三分,取得六比零咁驕傲既成績當然有賴前鋒既功勞,但係能夠零失球亦不能不讚一班優秀既後防球員同埋一個穩健既守門員。不過廿七軍唔好驕傲呀!你地仲有漫長既賽事需要進行,下一仗更加係一仗硬仗添。廿七軍,努力呀!

                  究竟豬妖越位左幾多球? 答案係估計唔倒,總之我見個旁證舉旗都舉到手軟啦,而場邊D隊員更大叫乜越位仲犀利過恩沙基架!