賽事精華    (03/05/2004)  V.S 恆豐隊

                    聯賽杯賽事至今已經進行到第五場,今仗既對手係聯賽榜內三戰三敗既恆豐隊,原本各隊員正諗住呢劑仲唔索硬之際,點不知係臨開賽前一日白毛竟然係網頁留言板度留言話呢班波啱啱同龍系隊打和,而波友會亦係有運先至執到佢地三粒,恆豐隊絕唔係善男信女,叫大家要認真應付。

                    上半場開波,原先諗住主場打高一班既廿七軍竟然陷於苦戰,攻勢了無僅有。唯獨是一球由白毛係左邊中場壓入底線,再於出界前大腳吊一個有三樓高既傳中波入大禁區,富仔用盡九牛二虎既氣力衝前一射,可惜遠離目標。反觀呢班恆豐隊,個個體力充沛而腳法方面雖然未至於話好近,但絕唔係九流之輩。上半場大部份控球時間都落於佢地腳下,亦有不少射門,好彩廿七軍班後防都唔係紙紮黎,而阿勇都不負所托力保不失。不過到臨完場十分鐘左右,大吉著錯鞋上陣終於累事(條友仔竟然著左對13粒釘去踢人造草喎,你話係咪俾佢吹漲),對手係左邊大腳傳中,大吉諗住轉身大腳清,點不知跣低左,跟住個前鋒就好輕易咁射入阿勇既十指關。上半場最後以一比零完場。

                     中場休息之後,廿七軍一氣換左幾個隊員,而整條中場線幾乎面目全非,更有煥然一新既感覺。注入新力軍之後廿七軍經已站穩陣腳全力反撲,尤其白粉仔阿春更有超水準既表現,處理幾個中場罰球轟入對方要害(大家唔好諗歪,唔係真係果個要害),直接了當。其中扳平既一球就係白粉仔轟入細禁區,對方解圍既時候落左去富仔度,富仔一射射左落個後衛隻手度,但係個球證無吹度,於是白粉仔就衝上前大腳一射,呢次個後衛真係驚得濟handball喎,球證直指十二碼,大家都係度諗緊呢次由邊個操刀之際,富仔叫信心十足既白粉仔主射。嘩!好緊張呀!大家都屏息靜氣望住白粉仔走埋十二碼點度。射嘞,皮球直飛入左邊龍門,廿七軍追平一比一。賽事轉眼間緊張起黎,對方亦同時加強攻勢,不過幾分鐘,恆豐隊係左邊逼到一個角球,開出近柱外十碼左右,大吉於是衝前頭槌一頂解圍,但亦都同廿七軍另一個球員撞左落對手個前鋒度,個球證吹雞話話兩個夾一個判十二碼,結果廿七軍再次落後。賽事去到廿幾分鐘左右,豬妖係左邊推入大禁區仲扭過埋個後衛,點知條友撬跌豬妖,球證又吹十二碼,白粉仔再次操刀不負眾望廿七軍再次扳平。而場邊既廿七軍後備球員更加大叫’廿七期’三次,氣勢一時無兩。之後攻勢有如排山倒海,阿Dick斬角球落點恰到好處富仔近門一頂反勝三比二。跟住阿春處理罰球中場斬入禁區, 後防頭槌頂出,富仔拉弓用左腳戈利一射,彭一聲應聲入網射成四比二。咇 !完場,廿七軍全部廿三個隊員開心到互相擁吻,仲有女球迷走出球場裸跑添。(咁就誇張左少少)

                                                                                出席球員