賽事精華    (04/06/2004)  V.S 波友會

                    唔怕生壞命,最怕改壞命名。廿七軍個名雖然改得好英,但點都唔夠波友會個名改得咁到。波友會,係好波o既老友就可以參加o既會,怪唔得佢地有成五十個球員登記啦。話唔定下一屆連巴治奧、李健和或者少志強都可能係佢地D隊友o黎。

                   今仗廿七軍主場係九龍仔仿真草場迎戰波友會,每個隊員都想藉呢場波一報上仗之仇,點不知寶強病倒未能上陣,而阿春又出戰連連表現疲態,最關鍵就係缺乏後備球員支援,種種因素都令廿七軍再一次陣亡於對手之下。

                   上半場開賽初段,廿七軍與對手打成均勢,你一拳我一腳,好不精彩。直至十五分鐘左右,廿七軍球員係右邊開出角球,波友會後防頭槌頂出,廿七軍卡路士阿東後上右腳戈利一射,射破波友會守門員十指關先領先一比零。可惜領先優勢維持唔到上半場,俾波友會兩隻快馬前鋒一笠一射反勝廿七軍二比一完上半場。

                   換邊之後展開下半場比賽,波友會恃體能同腳法o既優勢力壓廿七軍,而廿七軍明顯體力下降處於劣勢,但仍能守住比數無被拉開。廿分鐘左右,阿Dick右邊開出角球,富仔跳起近門一頂追成二比二平手,廿七軍士氣又一次高昂起o黎。不過幸運之神無眷顧廿七軍,係臨完場前十分鐘,波友會開角球前柱球員跣後,點不知竟然笠左入網。最終廿七軍再一次飲恨於波友會腳下三比二完場。                                                                          

                                                                                出席球員