賽事精華    (19/07/2004)  V.S 吧之友                                                     

               等o左足足半個月,饑餓o既廿七軍已急不及待穿上綠色球衣替有份效力龍城隊o既阿Dick披甲踢一場熱身賽。正如狼虎年華o既廿七軍隊員,個個饑不摘食,任何位置,任何時間都不理,只要有波踢,個個不摘手段並且顯出混身解數,當中有所謂定點足球員o既光仔,竟然助攻助守;有穩如泰山o既阿偉,都竟然有零碎o既爆炸力,簡直令在場o既廿七軍刮目相看。而全場入球當中最具睇頭都睇怕莫過於由廿七軍組成o既夢幻組合喇;寶強先沿右路推進,見身在左邊細禁區o既阿偉空晒,就一個遠傳,落點恰到好處,阿偉跳高一頂,全場即時起哄,入喇!不過係頂o左落有朗尼身型之稱o既大吉度,一控一射,好不精彩。但係條忍樣偉仲o係度'頭岳岳'搵緊波,後尾知道入o左就話個二傳造得點靚點靚,真係俾佢吹度'啤'一聲。

              完o左熱身賽之後正式與吧之友開戰,上次有份踢過o既廿七軍都應該知道,呢班吧之友完全唔係吧之友,簡直係'巴之閉'至真,又有氣又有力,成個小路寶咁,我好相信佢地好有可能已經改造過,唔係行血行氧,全部係行酒精o既。

              上半場開波,廿七軍一於好少理採取主動,有好幾球機會落在鈞仔腳下,可惜佢疏於操練未能把握  。直至大約十五分鐘左右,由角球專家阿Dick開出右邊角球,寶強近門一頂入網,廿七軍領先一比零,場邊fan隨即送上幾個人浪。之後廿七軍食住個勢加強攻力,再由阿Dick開出右邊角球,由於落點準確落於人群之中,令對手後防混亂中擺個老烏,廿七軍贏二比零(不過阿King話因為佢力壓對手先至會擺老烏喎)。呢班'巴之閉'俾廿七軍剎個措手不及,一時招架不來。如夢初醒o既'巴之閉'見廿七軍來勢洶洶,亦不甘示弱全面反擊,但有好幾個射門都被久休復出o既盧志破解,無奈最後都被主隊施以遠射追近二比一完第一節。

              第二節呢班吧之友全面搶攻,一時間廿七軍兵荒馬亂,軍心盡失。轉眼間已陷入慌亂狀態,有隊員因體力透支在場內大叫救命換人,另外天雨地滑關係更令守門員盧志屢次判斷錯誤而頻頻失球,最後廿七軍以五比二完成第二節。

             第三節開波,寶強同阿king施以純熟o既腳下功夫,三兩o下短傳就已經推進入對方大禁區內,可惜阿king最後一腳攞離腳唔能夠追近比數,但已經換來對方一句:嘩!足球小將o個兩個孖生兄弟o黎o左呀!跟住落o黎唔使講啦,廿七軍再一次以七比二比數全軍覆沒葬身於地獄球場,但係賽後檢討o既時候,每個隊員都覺得雖然再一次落敗於吧之閉腳下,但以今場各隊員o既表現,已經可以對廿七軍球會有所交代。                                        

                                                                                出席球員