|
|
賽事精華 (02/09/2004) V.S 恆豐隊
今場波領隊使出絕世秘技令球隊打出水凖來從而取得聯賽寶貴的三分，令在奪取聯賽奬牌方面從現曙光，究竟球隊的管理層造o左咩o野手腳，施予乜東東之秘技呢?????? 答案只得兩個字............就係..........老點！而老點呢兩個字有什麼巴閉、利害呢？下文就會為大家解說； 九日二日下午四點多，一班被老點的廿七軍球員已齊集於旺角差館等候乘坐專車前往元朗球場作賽，而其他隊員們亦分別乘搭火車、遊輪及直升機從四方趕往，當各球員'膠膠'興興乘車前往場館作賽的途中，隊員從車上收到衛星直播系統報導賽事正確開始係1930時，而非早前通知的1800時，當時各球員都知道被老點亦裝作鎮定，未有太大反應，只有 一、兩個在細語批評。只因.............。 時間多出不少，領隊便帶領各隊員到元朗最頂級食府......B..仔..涼..粉..打杯水整個High Tea先。當到了這高上食府後，球員亦急不及待地Order味鎮全球o既...腸粉！同..魚旦！仲有芒果汁，但最為識食o既莫過於新進食家~~春春，他所Order o既菜式係.........炸芝士腸，食家即係食家，好o野 ! 如此等西方特式美食都識得品賞真是了不起。當班粉腸食完腸粉，食家含完芝士腸之後球隊就去球場做熱身。 去到球場球員都開始做起熱身來，此時大約1830時，距離開波仲有成粒鐘，其後加上球証o既遲到，球員足足做了成句鐘熱身，各人均身水身汗體溫都提升好幾度，真係名副其實的熱身，有些一兩個體質較削的球員更有抽根現像出現。而被老點的同期由於熱哂身副偈'慶' 哂，充滿動力，狀態達至巔峰。所以話老點佢地早些到場做定熱身係Work o既。 今場對手係恒豐隊亦唔係善男信女，而~入波怪~又話傷傷地，所以在排陣上就安排一對A級o既前鋒阿King同白毛出去殺敵，正當我白毛拉緊鞋帶攞著個足球，以堅毅o既眼神望著個波高呼"射爆你"o既時候，技術總監魯富就話：白毛！你响前面打多o的防守頂住先，等我下半場我出o黎"射爆佢"！試問一個頂級o既前鋒怎能接受呢 ? 但對於萬能又百變 o既白毛就無問題，一個以打前鋒為名踢後衛為實o既球員真係問你死未！ 當球証到齊及人名點齊後，球賽似箭在弦，一觸即發。當雞聲一響，球賽正式開始，隊員由於熱o左身滾晒，所以一開始就標來標去渾身是勁！上半場大家都好努力雙方互有攻守，球來球往，此起彼落，加上由出色o既369大飯店把守住龍口，而佢亦係神探一名，你話邊有咁易俾賊仔入到屋吖！所以我們守到最後合力穩守0比0完上半場。入球機器在半場緊急維修後在下半場入替實行射爆佢。雖然大家表現都好好，但對方亦有料到，用較剪腳鉗制部入球機器，再加上對方守門員亦好~~近呀，準確o既出迎亦救了不少險球，所以攻極都攻唔入。最後臨完場十五分鐘，領隊唯有使出秘密武器 ~~ O仔 ~~入替校長作右中場，秘密武器即係秘密武器，出場只需十秒就將對手KO。第一腳掂波就從右路放一個43度半o既弧形直線波俾魯富，無論力度、球速同埋突破對手越位o既時間都恰到好處，簡直係完美，最絕o既就連波o既著地點同柔軟度都為接應o既隊員想埋，難怪富仔入波之後第一時間衝向O仔到狂叫~~~好舒服呀！最後這次完美的合作及各球員的努力，令球隊再以1:0勝出恆豐隊，取得聯賽寶貴的三分。 打雜毛 錄
出席球員
|