千禧年開始, 我亦希望自己有一個新開始, 我作出一個重大決定, 我決定辭工, 離開一切舊生活&工作... 我要去歐洲旅行個半月...
今次將會係我首次離開屋企咁耐...
行程將會如下 :
瑞士(3日) - 法國(7日) - 德國(7日) - 捷克(5日) - 奧地利(3日) - 意大利(7日)
第一站 - 瑞士
總括黎講, 瑞士 = 悶!!, 但最開心既係可以上到雪山睇雪, 當時既心情真係難以形容呀! 但我亦因為一時唔識應當地既天氣而病左... 慘!!
第二站 - 法國 (馬賽, 尼斯, 巴黎)
係馬賽, 友人比人偷左野, 一到法國就要去警局!! 係尼斯, 撞正一年一度既"尼斯嘉年華", 好熱鬧!! 最後同另一友人於巴黎集合, 一行4人同遊巴黎, 而我係呢程我係各個博物館欣賞到各大名家既作品, 心情興奮得難以形容!!
而最難忘的可算係我地係巴黎鐵塔下野餐, 食完之後大家凍到手腳冰冷要去餐廳飲野取暖, 幾搞笑!!
第三站 - 德國 (慕尼克, 洛頓堡, 海德堡, 不來梅, 柏林, 不知名小鎮)
係慕尼克一出火車站, 就比我地見到一個感人既情景... 落雪呀! 我同友人簡直開心到癲左! 係呢度我地有一大收穫, 買到D又平又靚既涼鞋, 於是乎我地既包包又增加左不少重量喇!
之後我地帶住非常滿足既包包去洛頓堡, 初初以為個度只係一個普通既小鎮, 點知一去到... 嘩嘩嘩!! 勁靚呀, 好有中古既味道呀, D街好似卡通片咁呀!! 於是我地就滿心歡喜咁住左一夜喇! 而且仲食左全程第一隻雞蛋兩份分添!!
下一個地方就係海德堡, 傳說中既"大學之城", 我地係個度欣賞左一個非常"醉人"既黃昏景, 一個字"靚"!! 當晚返到我地所住既青年旅舍, 抬頭一望... 滿天閃爍星星... 兩個字"勁靚"!!
跟住去左格林童話小鎮"不來梅", 個度有好多有關"格林童話"既銅像, 好特別架!而個間青年旅舍既浴室係冇間格架, 好似去沙灘沖涼一樣, 一沖一驚心呀...
德國既最後一站就係首都 - 柏林, 講真可能真係唔夠時間去幔幔欣賞呢個城市啦... 所以對呢個城市既印象一般, 但總算到此一遊! 但下一次如果有機會我都會再去多一次呢個城市, 不過會花多少少時間...
終於都要離開我地好喜歡既德國喇, 心情當然有少許失落啦, 係離開德國個日係要搭超早火車落捷克, 所以當晚我地要去一個不知名既小鎮留宿一晚, 當時大家既德國火車證只剩番一日, 而坐呢程由柏林去呢個小鎮就剛剛好用完, 大家都覺得我地安排既行程非常完美, 但係意外始終係意外, 我地竟然落錯車!!! 當時大家好傍偟, 好彩好快我地就轉左去搭番一架正確既車, 但同行既朋友竟然唔見左張火車證, 危機再現... 如果呢程有人查票, 佢就會比人罰錢, 好運之神再次眷顧我地, 個程冇人查票, 逃過一劫! 第二個考驗再次出現, 我地要摸黑找hostel, 朋友有散光, 入夜睇唔清, 於是我地再次發揮分工合作既精神, 佢睇地圖我睇路牌, 又搞掂!
回顧番德國呢程真係有好多回憶, 慕尼黑既美味香腸, "女童院"youth hostel, 新天鵝堡, 洛頓堡賣bear bear熊 + x'mas裝飾品既鋪頭, 海德堡既巴士到站計時器, 同柏林既收錢教堂... 呢一點一滴都會一一記係我心上!!
第四站 - 捷克 (布拉格)
其實今次既行程係唔應該去捷克, 因為唔順路, 但係我地2個都極希望欣賞一下呢個傳說中就"最浪漫城市", 所以就算唔順路我地都要去! 果然, 布拉格係一個好靚既城市, 我地係個度留左足足5日!!
當地既靚景有"魔鬼教堂", "查理斯橋", "聖維特教堂"... 好靚好靚!! 我地去左睇布拉格馳名既木偶戲, 有一日又去左卡諾佛山谷既溫泉區, 個度D泉眼不停咁有溫泉水流出比大家飲用, 我地以"人一世物一世"既道理試左呢D溫泉水, 味道...好咸同有D鐵銹味, 即係怪囉!!
係呢度我亦幫我朋友慶祝佢既牛一, 食左一餐西式健康齋!!
第五站 - 奧地利 (薩以斯堡, 維也納)
薩以斯堡乃"仙樂飄飄處處聞"拍攝之地也! 最難忘既係參觀左"鹽礦", 玩鹽礦滑梯同坐鹽礦船好得意!
維也納我只記得我欣賞左我最心愛既畫家 - 克林姆既名作, 太令人感動喇!! 同買左好多奧地利駐名既貝多芬朱古力!!
第六站 - 意大利 (威尼斯, 米蘭, 佛羅倫斯, 羅馬)
終於終於都到左最後一個國家, 頭一站...威尼斯, 唔知係唔係比D旅遊書嚇親, 點諗極都諗唔明, 點起個火車站點起?? 於是大家心情異常緊張, 呢程火車係我唯一一程訓唔著...
原來威尼斯真係好靚, 傳說中既水鄉果然與別不同, 而我地係呢度亦經歷左一D與別不同既對代!! 係我地住就旅館係好大, 兩個人住四人房, 但D被鋪係"清潔"到難以形容, 而且浴室冇門同熱水, 要熱水呢... 得!! 比$$$啦!! 基於深深不忿既關係, 誓死唔比$$$, 於是大家共享一個精采既凍水浴喇! 我地係威尼斯發揮我地既小宇宙, 先坐船去聖馬可廣場, 之後一路用我地自己雙腳行行行, 買買買... 人生一大樂也!! 係個度亦品嘗左美味既意大利pizza添.
因行程緊密, 我地只可以留係威尼斯一日, 行程緊密... 行程緊密... 去米蘭, 以為米蘭係時裝夭堂啦, 點知... 有$就係天堂, 冇$就係... 悶!! 好彩仲有食左餐好既意大利快餐! 亦係個晚太夜搵地方住, 搞到搵左好耐都搵唔到, 幸運之神又再次眷顧我地, 有一對好心既夫婦送我地去乍, 多謝晒!!
留左大拿拿一日之後, 繼續繼續... 去佛羅倫斯<翡冷翠>,
[[ 下回再續 ]]