07_2003

＊＊ＲＩＣＥ　ＤＩＡＲＹ＊＊

2003年7月
SUN	MON	TUE	WED	THU	FRI	SAT
-	-	01	02	03	04	05
06	07	08	09	10	11	12
13	14	15	16	17	18	19
20	21	22	23	24	25	26
27	28	29	30	31	-	-

07月31日(四)低頭

　　雖然尋日放左日假，但因為買既書太重，搞到今日手臂有Ｄ痛，放假等於冇放，根本冇抖過。

　　精品店呢兩日派贈卷，搞到今日人流立即多左（我心諗：乜唔係糧尾咩Ｄ人？），贈卷永遠對客人係有效既，今次又唔知要人洗多幾多錢。搞到我地做多好多野，除左多人買野之外，仲要係張贈卷上面寫低張單號碼、收銀機號同收入銀碼等等既野，還要另開張白紙寫多次，話要統計有幾多人用喎，血都嘔埋。但有野做好過冇野做，寧願忙好過對住黑口黑面既上司。

　　食晏時，Bensier話糖糖針對佢成日淨係話佢一個（連同佢唔熟既阿May都話聽到佢成日比人話），想掉落舖頭做，後來見到佢同Helen傾，Helen入左去辦公室問，應該是不成事，然後突然Bensier就打咭除制服唔做，無程程咁又冇左個同事。我都幾想唔做，公司對我地又差，壓力又大（依家乜都話要Meet quota），但又要睇錢份上，人無錢，不得不低頭。換購部阿妹話做埋呢幾日唔做喎，要去歐洲旅行，恨到我地牙癢癢。

07月30日(三)白痴高層

　　今年豬展無啦啦分左上下場，個概念是分流，等人唔使咁逼，點知唔知邊個白痴又唔諗好Ｄ，搞到下晝入場既人就一窩風咁係三點逼入會場，而上晝既人又可以唔使走，仍然留係個場度，結果，人比上年還要多，比上年還要逼，睇到買到既野就更加少。

　　如是者，我地就係三點開始等，等到成四點先入到去，仲要睇唔到Ｄ乜野，淨係買左自己預左要買個Ｄ野先，本來年年都會有其他意外收獲，但今年就睇唔到乜咁滯，人又多又逼，唔買漏野算好彩。總之就好唔盡興啦買得，第一次去書展買得咁多怨言架。到底邊個做高層做到咁白痴架？不如佢試下排一次隊丫，包保佢下年唔敢再搞呢Ｄ多餘野。

　　雖然怨言多多，但今年豬展是洗錢洗多最多既一年，主要花在捧古生場，包括他的《還珠3》小說和漫畫繪本，最貴也是這幾本，不過為左古生，冇緊要既。最開心係志雄應承幫我排簽名，我仲話要寫：「Dearest Carol」，哈，唔知佢會唔會叫古生寫。一直逛／逼到八點，會場收工為止，大家都逛得好唔盡興，好憎個白痴高層，好彩張飛係志雄班返黎唔使錢，如果唔係仲嬲。

　　然後信步走出會場，諗住食壽司，但眼見人很多，要等位，最後走左去隔離間日本餐廳食晚飯。個度主打食拉麵同壽司，拉麵配料令我諗起花月，確實係幾似（其實可以間間日本拉麵都似）。然後佢地可以選擇既湯底又係同花月好似，豬骨湯底要加$4都一樣，連老闆個樣同阿Dee都有幾分相似（？），搞到我差Ｄ想問佢地有冇關係。

　　成個定食整體唔錯，份量足，價錢又合理，同姥姥食左個二人餐每人都是六十幾，剛剛好飽，最後仲有綠茶雪糕做甜品，好正。但係佢地既麵底同湯底冇花月咁好味，好掛住花月既拉麵忝，呢間都可以頂住擋，下次會再去，仲會介紹朋友去。

　　會長話將會同朋友去澳門，即刻搭佢買兩盒紫菜肉鬆鳳凰卷，美味既夏季，我愛。

07月29日(二)

　　今日個場好靜，開工以來未試過好似今日咁靜，或者好似阿芝之前講既原因：Ｄ人糧尾。咁希望到月頭Ｄ客返黎啦，唔使我地對住黑口黑面既上司，貨都可以散多Ｄ，時間也可以快過Ｄ，唔好好似今日咁望極隻錶都唔郁。

　　繼星期日晚飯時間撞到T-9後，今日余太同阿Bell竟然黎買野。見到佢地都幾意外，余太同阿Bell係親戚一早就知，但就唔知原來係咁親熱，咁熟絡既親戚。余太問我有冇員工價，我話冇。其實呢間野咁對我地，又點會有員工價丫，求其唔買到次貨已經好好。

　　美華同阿珠晏晝上黎面試，我之前都唔知佢地會黎，係出面撞到佢地兩個傻婆搵廁所，傾唔到幾句就有OfficeＤ同事入黎，即刻走，唔知佢地見成點呢。

　　明天終於可以放假，特丁放呢日就係為左去豬展，唔知Ｄ野抵唔抵呢。志雄話佢班到四張飛，咁我地加埋都只係要多買一張，可以慳返入場費，都好。

　　明天要大出血，所以夜晚同琪出街都冇乜買野（兼睇唔岩），逛到差唔多12點先返到屋企，腳好累，由開始工作個日起，腳從來都未好好休息過，真係慘。

07月28日(一)冇蝕底

　　糖糖今朝一早就同玫瑰吵大獲，搞到玫瑰即刻辭工唔做。某程度上，我地有少少覺得玫瑰係同我地班做細既出左啖氣，因為公司實在對我不怎麼好。現在連外賣也不淮我地叫，要我地自己帶野返去食，但又冇微波爐提供，我地只好帶杯麵（熱水就有）或者麵包返去食，咁就死啦，邊夠營養架？！今日阿芝都冇帶野食，諗住叫外賣，佢又話唔比要執正黎做，好在我今朝買了兩個杯麵同半打野飲可以賣比佢。

　　Helen同糖糖今日落Order話每人每日要賣到五十塊鏡二十個針線盒同十把遮，激到阿飛係咁講粗口，我地都覺得邊有可能賣到架，Ｄ客唔肯要就唔肯架啦，唔通夾硬質佢要？佢唔要唔關我地事喎，我地做收銀架咋，唔係做Sales，又唔係賺你佣，收一次錢得個幾分鐘時間，又要我地賣呢樣賣個樣，我自問唔得囉，求其同你問一問客人要唔要已經好好。

　　朝早返工搭車時，有個男仔同我戚眉，我奇怪皺眉，懷疑佢係對我戚眉，佢就用口型問：唔認得我？我搖頭，開始信佢係同我講野，佢見我唔認得佢，都冇行過黎。然後成程車我就係度諗到底佢係邊個，諗到到站，終於比我諗到，佢係日日出出入入都有打招呼既實Ｑ哥哥，即刻走埋去叫返佢話認得佢。佢唔著制服個樣真係好唔同，後生好多，但其實佢都只不過是廿一歲，問佢考牌難唔難，佢話唔難，我即刻諗，不如我都考返個牌啦，又冇蝕底既。

　　夜晚收到小南的電話，她說正和朋友搞緊拍一套短片，說有個角色幾適合我，問我有冇時間去拍，我都覺得會幾好玩，橫豎未試過，但係就唔到時間，最後都答應唔到佢，好想玩好想玩。

07月27日(日)顧客

　　會長和姥姥兩個今日無程程話得閒上黎逛下，但係一直都冇時間講野，直到我三點幾放晏時才有機會傾一陣，放完食晏（十幾分鐘到）我要回去工作她們都要走了。

　　今日星期天，個場早收（七點收，平日八點），所以約了琪食飯，點知唔知邊個一直到七點半都仲放人入黎買野，搞到所有人走晒得返我同May兩個（收銀部），一路做一路怨：到底你地班茂利識唔識睇鐘架，人地寫住收七點，好心你就睇住時間入黎啦，人地都要收工架。怨言滿腦飛，卻不能罵出口，真谷氣。只好黑口黑面對住佢地，算係發洩。

　　做過這一行才知這行的辛苦，麻煩的客人原來真的有許多，即刻問自己有沒有曾經做過麻煩的客人。發覺原來自己買野都算幾爽快，有些客人麻煩到好微細既野都會睇會不滿，真的把自己當上賓。例如買一套杯（四隻），佢地可以續隻睇，睇埋個金邊，睇足四盒，然後揀四隻佢覺得最好的，咁都得架喎？！佢地唔會唔好意思，冇諗過咁會阻住後面要比錢既人，冇諗過佢咁樣會造成別人既不便，真係好麻煩。

　　我明白顧客永遠都想買到最好既野，但係咁微細既野就無需要捉得咁緊啦，越做越怕遇到呢Ｄ客人。我地最鍾意見到Ｄ爽快既客，買就買，唔買就唔買，咁就最好。琪都話佢遇過一個睇一件衫睇足一個鐘既客，佢拎住一件衫左拼右拼拼足成個鐘，使唔使呀？救命。

　　不過有時也會遇到好的客人，好似今日咁就遇到個好搞笑既男人，佢個樣好惡，仲有紋身，但講野就好得意，引到我同Dorthory係咁少，對佢既服務都好Ｄ。佢身邊有個大肚婆，估計是太太的東西，男人對佢言聽計從，佢話要乜就乜，個情況令我諗起一物治一物，好搞笑。

　　八點終於都放到工，即刻出去搵琪，佢未放工，我先去小金象門口等緊佢放工，點知等等下見到T-9，原來佢都係個度食飯，佢問我做乜，我話約左朋友食飯，然後佢話近排猩左個貓比我地，叫我去睇。

　　後來等到琪放工，見小金象多人，冇入到去，去左一間叫新萬寶的素食館食，琪話個度有$58自助餐，任點任食。意外地好食喎，還以為呢Ｄ餐館食自助餐唔凍就奇，點知佢即叫即煮個喎，仲可以叫佢比少Ｄ份量，可以叫多Ｄ其他唔同既野食，琪真的好介紹，下次都要介紹朋友去食。

07月25日(五)又做同事？

　　原本想收工後出街逛逛，後來卻因太晏作罷。等星期日放早些少才去吧，還約埋琪一起吃飯。

　　放食晏時，公司Office那邊正在招聘，在門口竟然碰見Alex在填Form，大家都很意外，他同上次在旺角碰見他的裝束差不多：黑衫牛仔褲。他說我：咁快搵到工拿？答：係呀。我即刻諗，如果佢見得成，我地咪又做同事囉？！不過大家應該不會在同一個場做事，因為公司在尖咀還有另一個場要人，我想新人都會過那邊吧。今日都來了許多新人學野，說要過尖咀個場喎，唔知個邊好唔好做呢？有冇另一個Helen、糖糖或者Yuki呢？

　　起床時心情不錯，穿了新買的粉紅色衫返工，又塗了些眼影，個個都問，今日咁靚去街呀？好開心～

　　古生暫定九月出新碟，好野好野～～～繼豬展出漫畫後又一鉅獻～還有新的派台作：《任天堂流淚》，大家一定要聽。

07月24日(四)還是要返工

　　本來還在希望起床時已經掛上八號風球，怎知還是失望，八號風球已經落下，換上三號，工，還是要返。

　　返到去，原來今日都幾多人放假，收銀只得一半人在，但不要緊，因為今日都冇乜人黎，可能因為落雨，又可能因為個場開耐左，總之冇開頭幾日咁多人，做到我地嫌人客少，真係犯賤。但後來六點後，平日呢個時間會冇乜人，但唔知點解今日反而多左，一直忙到八點幾九點收場，發生咩事呀？

　　唔知做乜，今天覺得特別累，但工作量又冇平日咁多，天氣的問題吧（姓賴）。

　　Helen今日放假，糖糖又唔多管我地，所以今日覺得特別靜，比人睇住既機會唔多，好似好Free咁。但係我仍然好小心，因為怕再有唔夠數既情況出現，邊度再有$2100填呀？所以今日Ｄ單都寫得計得好清楚。

07月23日(三)投其所好

　　是日放假，卻不巧遇上打風，但仍然無損唱Ｋ的心情，難得有假放，恨左幾耐先有呀。

　　出了尖咀，本來約埋統籌，後來佢遲起身，所以唱完之後先到，志雄終於都送得出把扇，想想買返黎個時都已經是上年暑假的事。然後大伙去了老麥坐，均被統籌一句「投其所好」引得發笑，好一句投其所好，冇錯係岩，的而且確可以追到女仔。志雄都即刻學到野，活學活用，我地今日又有得著了。

　　之然再上書局看了一陣書，姥姥和統籌先後離開，會長志雄和我再逛街（其實是我想買衫），但走了兩間都沒看中心水的。其中I.T.話有Sale，入到去，我同會長都有個疑問：佢真係折左架拿？價錢大多貴得嚇人，但款式卻很普通，都唔值這個價，貝貝都話過佢只係賣個名，其實邊間名牌唔係賣個名者？無可否認某Ｄ牌子既質料真係好Ｄ，但也有很多都只是賣個名罷了。我們只可以說是它們Marketing的功夫真的做得很好。

　　後來在第二間買左件衫，是粉紅色的，記憶中好像冇乜買過全粉紅色的衣服，覺得好少女，感覺怪怪的，但個款我幾鍾意，會長覺得粉紅色都ＯＫ，所以就買左，總算有收獲。

　　夜晚近十一點，天文台掛八號風球，明天大概不用上班，真好，連放兩日，希望佢唔好咁快落啦，起碼過左晏畫先落，咁就好喇，如果唔係我都要返工架。

07月22日(二)放假

　　今日一返工，阿芝就話會計黎過，話我地收銀機Ｄ數唔岩，個個都有多有少，我仲爭成$2197，幾驚呀，但查單又查唔到（我查唔到），驚左成日，差Ｄ見到客人都笑唔出。好在放工時問Helen同阿Mike，佢地話應該查得返既，咁都安落Ｄ。

　　然後Helen問我累唔累，話聽日放我假，我話其實唔累，但佢都話可以放比我，咁所以放工即刻打比姥姥約聽日唱Ｋ，好耐冇抖過喇，好開心～～～

　　做做下野，忽然見到以前中學既師兄同朋友買野，佢識細妹，所以佢就知道我，我又知道佢。後來佢唔知朋友定家姐就問我認唔認得佢，我話認得，佢臨走個時話我瘦左好多，唔認得我，哈哈，係咪真架？真係瘦？哈哈。

07月21日(一)排簽名

　　開始習慣這樣的生活，雖然仍然很累，但已經沒有之前咁辛苦，咁唔習慣。問Helen幾時有假放，佢話依家開始編更表，即刻同佢講想放30號，因為想去豬展，我諗佢會比卦，佢話星期六日一定唔會放比我地，咁我又唔係星期六日放。

　　夜晚看雜誌，見到古生真的會在豬展出書，書名叫《KUBI彩色繪本》，這是他的第一本親筆創作漫畫，描述外星小孩KUBI意外降落地球，和好心的爺爺相遇，在爺爺細心的教導下，漸漸學會地球語言並且和地球人打成一片的溫馨故事。好古生的一本書（事實上係佢畫嘛），故事內容好童話，好似細路仔卡通，但我都會買本黎支持下，佢仲要有分精裝特別版同普及版，個價錢都差幾遠下，差不多成一倍，所以要睇真下邊本靚Ｄ先買。

　　即刻打比志雄求佢幫我去排簽名，因為古生將會係2/8（六）去豬展簽名，求左好耐，佢都唔肯。打埋比姥姥，諗住佢會幫我落咀頭，點知佢竟然係幫志雄唔係幫我。到最後佢先話30/7（三）去視察下環境先算，因為今年豬展簽名唔會係場內搞。都好，仲有機會求佢，呢幾日要勤力Ｄ打電話－－比志雄。

07月20日(日)瘦左？

　　今日放工的時間比昨晚還要早，真係出奇，我想，以後個時間會比較穩定，因為現在的工作都開始熟習，到收工時手腳就會比較快。原來佢計返工時間係計搭正12／6，它們中間例如15分鐘公司是不會計，所以我們若早些打咭例如8:40分咁，佢就只係會計到8:30，好奸呀公司，因此我們現在都睇住時間做野，搭正先做，搭正先走，未夠鐘都磨到夠先走，唔蝕比佢。

　　放工前係公司買左個磅，之前覺得好靚，但都冇時間去睇，趁今日有時間即刻去睇埋，仲有其他同事都有買野，但係又係好衰地我地係冇員工價呢樣野。返到屋企磅下，大駭，一直以為自己有100磅（因為好耐冇磅過，最近一次－－應該有半年以上，係有呢個數架），但原來依家連90磅都冇，都話做野會令人瘦架啦。

　　因為放早，十點多就致電姥姥會長志雄傾電話，直傾到十二點半。其實聽日係返早，但係好耐冇聽佢地把聲，好掛住佢地，所以傾到自己眼訓先肯收線。依家暫定大概在30號會去豬展，我知道《還珠３》出了小說，都幾貴，成$93一本（共三本），但都會買，另外還有其他書要買，到時實大出血。

07月19日(六)早收工

　　今日唔知做乜咁好，「竟然」係四點有時間食飯，更加好既係「竟然」係九點鐘放工，早收工，係幾咁叫人開心既一件事。但係糖糖　（Supervisor）話黎緊就要叫客買Counter上面換購價既產品了，咁就死啦，我都唔識點Sale呢Ｄ產品既，所以通常淨係客人走到埋黎，循例問下佢地有冇興趣買就算，佢地望下，通常個結果都係話唔買。依家佢話要我地賣多Ｄ，咁就弊家伙喇。

　　公司的是非開始多，上司和上司之間的，同事與同事之間的。這些都在所難免，有人就會有是非，依家抱住個心態：唔關我事，聽完就算。

　　看了車太賢的《向左愛向右愛》，假如個時我唔係因為開工開得太累好想訓，我諗我會幾感動，看到後來，我的眼已經在半開半合。劇情一向好韓片式，慘慘慘，兩個女主角都因病死左。

　　另外，如果看得不留心的話，會好易會混亂，因為片子是用插敍式表達，有時會回到過去，有時又會在「現在」懷念過去，假如不是細妹提醒，我想我也會看得很混亂。

　　片子還有許多細微細眼位是關連的，要細心看才會看到，所以片子的連貫性都頗強，但唯一缺點是一開始，人地唔知佢係插敍時會比較亂。

07月18日(五)做收銀

　　再下一城，今日的午飯時間是六點三，差不多是某些人的晚餐時間。整整下，我估我可以Cut左午飯個餐，以後只是吃早晚餐就夠了，嘩，仲食得少過我話減肥個時喎（仲冇晒食零食的機會），加埋全日無休的體力勞動，今次仲唔瘦？（但我剛剛話想減夠咋喎...）我終於明白點解做Sales既女仔通常都咁瘦了。

　　第一日全日都做收銀，出錯得唔算多（我覺得^V^！），同埋好彩今日的人龍冇尋日咁多，但其他小事例如寫手單個Ｄ其他人都識，不過我就未知係乜野一回事。

　　昨晚放工前做散貨，有個同事忽然話因間比個電話我，叫我打給他，有少少愕然，因為都冇乜同佢講過野，以為佢講笑，點知後尾真係抄個電話比我。我冇打，因為唔太熟唔敢。到今日見到佢，都唔係好敢同佢講野（但其實本身都冇乜兩句），有Ｄ尷尬，可能只係我諗多左野，但唔應該有既誤會，還是唔好比佢有會比較好。

07月17日(四)我想放假

　　起床的時候，腳的肌肉超痛的說，可恨平日冇乜做運動，導致今日的苦果。嗚呼哀哉！

　　原以為昨天吃飯的時間已經是最遲，怎料今天再下一城，吃飯的時間係五點半，幸好整天都忙個不停，所以也沒有感到好餓，呢個都算不幸中既大幸。吃飯時打給姥姥談了幾句，即刻訴苦，好橙好橙。

　　今日朝早收銀個度太多人，所以我就出左去幫手做Promoter，點知一做就做左全日，所以全日都冇掂過個收銀機，明天就話要我地收銀員快手Ｄ喎，咁死啦，我實唔得喇，真係弊家伙。出左去幫手賣遮同毛巾，原來真係好多人會趁開倉買野，所以也不怕沒生意做，只怕做唔切，但咁都好，寧願做唔切好過冇生意。Ｄ遮個人黎講都覺得好靚，但就貴左Ｄ，因為平日都係用開四五十蚊把，依家要比多一倍價錢買我唔係成日用既野，我又覺得唔係好抵。另外見到個場都幾多無謂野買（精品店喎，想有幾實用呀？），可能是個人不太喜歡看精品，所以都不太喜歡，我想，做過這兩個月（捱到的話），可能有一排我不會想看見這些卡通人物，見到都似發惡夢。

　　吃飯的時間遲，放工的時間更遲！今天放工時間是十一點八，到底我仲要捱這麼的鐘數到幾時？幾時先可以正正常常地返八個鐘呀？好懷念HKCL呀！會長都話個份直頭係優差啦！放左工，又係未食晚飯，可能因為遲食晏，所以都唔覺餓，晚餐到最後都沒有吃，咁落去真係幾唔健康，好驚會發胃病。

　　放工致電會長，同佢傾開吃飯的問題，佢叫我帶飯壼仲好，我都覺得係，起碼唔使食個Ｄ貴夾唔好食既飯，等我得閒去買個先。但，我幾時先得閒呀？今日先係正式返工既第二日咋。

07月16日(三)開工

　　朝早十一點返工，不錯的時間，夠晏！可以訓耐Ｄ，但明天應該不會返咁晏，因為明天是特賣場開始做生意的日子。

　　由返工開始已經望緊時間，睇下幾時有晏食，點知左等右等，主管們都吃完返回來了，我們仍未放飯，後來主管們終於有良心地放飯了，但原來是叫外賣，可以選擇的飯盒種類仲要好少，話方便一次過叫喎，所以就算間茶餐廳有幾百種野食都好，我地都有得睇，冇得食。等埋外賣，到我地食得，已經是４點，個飯盒唔好食得黎又貴，放飯時間仲要得半個鐘，不禁在心裡嘆一句：好刻薄呀！

　　今日有Ｄ返左HKCL既感覺，因為係個度識到個叫阿陸既女仔，佢把聲同氣質同賢姐真係好鬼似，有幾次差Ｄ想叫佢做賢姐忝呀。做做下野，要介紙皮箱喎，仲唔係返左HKCL？嘩，好令人懷念呀！Ｄ紙皮箱對我黎講，係幾咁熟悉，大家簡直是老朋友，熟到不能再熟。

　　整天，就除了放飯個半個鐘有得坐之外，其餘時間都是企企企同行行行，連飲水既機會都冇，好累好累。返工等放工，等呀等，一直等，初初以為八點到走得（佢話一日返八個鐘到），點知個場未執好，直到十點九，終於都話可以放我地走，就咁，今日除左執野抹野之外，關於收銀既訓練就冇，連點收咭都冇教（話聽日教喎），我地係做收銀個喎。

　　十點九，還未吃晚飯（平時呢個鐘數，我仲唔係食緊宵夜？），花花佢地完左飯局去左飲野，出埋去食野。個人都仲算精神，但肉體就好累，尤其係腳，好在只係兩個月，睇錢份上，我忍你！但其實計計下，佢日日都係咁我好蝕個喎，錢都花在吃午飯吃晚飯個度多，還有車錢，實賺的真的不多。

　　公司今日派左張員工須知，其中一點：不能聯群一起談天，及不能聯群出外或去洗手間。哈哈，咁又係呀，咁多女仔係度，實有Ｄ咁既野。今日仲要加埋做Promoter個班，都有十幾人架（好似有男仔，但好少）﹝－－拿拿拿，呢點同HKCL又好相似喇！就係人多！﹞，都係個句啦，唔好咁多是非就得喇。

　　收到貝貝的信仔，佢話四個入面最叫人擔心個個係我（？），話因為我冇乜捱過，好易會比現實社會既殘酷打擊喎。起初我唔係咁同意，因為覺得我打過咁多份工（雖然日子都唔長），見識一定不會比她們少。但諗諗下，又覺得佢其實都講得岩喎！雖然做左咁多份工，但Ｄ同事老闆都係好好人既，同事仲多數係差唔多年紀。除左觀塘個份，但個份因為做得唔開心，做左三個月都唔做啦，就係呢份『唔開心』又覺得屋企又唔係等我養，所以唔做，所以氣其實都唔受得多。

　　所以貝貝都講得幾岩，捱世界，我真係未試過，咁依家，又算唔算捱緊呀？（我個人覺得應該用個捱字囉）

07月15日(二)Training喇

　　去精品店Training，前後不過用了個多鐘頭，都是教我們用收銀機，還算易用，只是未熟習而己，我想我還可以應付的，但仍然很擔心我會找錯錢，到最後要自己填數，到夜晚看到雜誌的星座也說我今期要小心錢銀野，嘩，睇完仲驚。

　　個度大概十個女仔到，全部都話做收銀既，自己年紀不算最大也不算最少，大家都差不多，應該做到朋友卦。但總覺得咁大班女仔在一起，一定會有小圈子呀是非呀什麼的出現，遲下加埋另外做售貨員的一班，那裡就更多人了，其實大家都簽了合約會做兩個月左右，希望別惹太多是非出來才好。

　　那個特賣場地方好大，現在還未收執好，說明天我們也會幫手執野。遲一點尖咀也可能會開多個特賣場，所以或會掉人過去，我是沒所謂啦，反正尖咀和荔枝角也相差不遠，而且去尖咀也一樣方便，也好便利行街忝。

　　回到家，什麼工作情形都沒有說，反正說了也沒有誰想聽，冇人話已經偷笑，對佢地，依家我真的不想再說什麼。

　　完了才十二點，即刻打比猩猩匯合佢地，去唱Ｋ！但唱得不久，因為我之前才推了他說不去，他們不知道我又去到，所以早了去唱，Ｋ房只比到一點九（但搭八就Cut了），非常地不夠喉，下次再唱過。

　　然後猩猩同我陪阿四買鞋送比男友，怎知連阿四自己都不確定男友的尺碼，要好核突咁打去問，真失敗，要玩驚喜也不做定資料搜集，激到我同猩猩差點吐血。

　　後來確定尺碼後，發覺男友仔的腳太少，那款球鞋要訂才有，在舖頭訂時個Sales哥哥講野好得意，同阿四都覺得佢好搞笑。臨尾阿四問佢點解張單度冇計八折（個款鞋有八折喎），個Sales哥哥即刻補返，仲話：我地係大舖頭，唔會呃人架！

07月14日(一)投入

　　看過Audrey Tautou柯德莉塔圖的《He loves me, He loves me not...天使愛過界》，劇情好驚喜，意想不到，一向有個感覺是法國片比較悶，但這套完全不悶，女主角還很美麗（仲好似張柏芝），用十塊的價錢買套好片子，抵到爛。（不想知劇情請不要看下段，否則看時沒有驚喜，後果自負！）

　　劇情說女主角Angelique愛上男主角Loic，可是Loic早有了有身孕的太太。後來Loic被控襲擊病人，Angelique竟然將病人殺死，怎料這間接造成Loic和太太和好，最後Angelique開煤氣自殺。在她自殺快要斷氣的時候，劇情由女主角觀點轉變成男主角觀點重頭開始。此時，觀眾才發覺原來Angelique和Loic從來未做過情侶，可以說是不相識的，一切都是Angelique的妄想－－她有精神病，以為Loic和她相識相愛。劇情其實一開始就沒說明他們是相識的，只是觀眾的一廂情願，而且也被Angelique的美貌給騙了，沒想到她有精神病。

　　曾經寫過一個類似的故事，女主角因為愛上一個人，失戀，繼而得了精神病。我相信有這樣的事：愛可以令人瘋狂。可是並不贊成一個人太投入他的戀愛，太過投入，許多時候都會令眼光變得狹窄，不是一件好事。

　　中午兩點多收到精品店的電話，叫我明天去Training（話想叫我做收銀喎）然後後天返工，終於都定下來，有工返了，卻仍有個隱憂，就是有學返的時候不知怎樣和它說轉兼職，有點不好意思，但為了有書讀，硬著頭皮也要做一次衰人。

　　同媽咪說有工返的事，她一聽是做Sales即刻唔係咁鍾意，仲話人工低。其實以售貨員來說，這個人工算OK，但佢就顯得唔係咁滿意，我有Ｄ唔開心，覺得：你想點呀？搵唔到工個時，你話我唔做野，到依家搵到工喇，你又唔滿意。到底，我做乜野先可以令你滿意呀？點解佢可以咁既，之前細佬做老麥又係咁，做個時，又想佢唔做，到佢辭工唔做喇，又鬧佢唔做，依家佢想做返，又鬧佢做乜返去。你咁樣，我地好難做個喎！我地做乜你都反對，連想繼續讀書都唔鍾意，點解你冇樣支持下既？琪都好無奈咁話：Ｄ阿媽係咁架喇。

　　做乜你既行為逼到我好似Ｄ邊青咁者？成日掛係口唇邊，話阿媽阿爸唔了解佢。其實佢地有冇諗過，有時我話Ｄ野過你知，你唔需要好大力去支持鼓勵，但起碼比個微笑，唔好乜都話唔好先丫，好hurt架。

07月13日(日)學國語

　　是日沒有做過什麼事，乾是坐在家裡看書看電視，還重溫了絲帶台夜晚重播的《流冰花園》，其實看電視學國語真的不錯，好像聽歌一樣，而且在電視劇集裡學還有字幕又近現實，用的字眼都是常用的，最最緊要是不用錢嘛，經濟又實惠，岩晒我。

　　錯過了老朋友實果子的生日，今天補猩SMS給她，想不到她會回覆電話，和她談了一會，都是談談近況什麼的，原來大家都在找工作（我個份還未定呀，都唔知人地係咪叫做請左我），果真搵食艱難呀。

07月12日(六)焱夏冷氣電影

　　中午看了張家輝的《賭俠2003之人定勝天》，明知係垃圾片，大家笑一餐就算。喜歡上一集張家輝飾演－－逄賭必輸的「地獄黑仔王」，今集的憨直青年－－逄賭必鸁「羅四兩」也好可愛，但整體來說還是上集比較搞笑，而且有馮德倫，好有型。

　　今集陣容都可以，奸角是杜德偉，加埋李燦森做配角，但要李惠敏做杜的母親就牽強些少，女配角陳見飛的演技有待改進，不知是否因為緋聞纏身關係，楊恭如亦然，記得她做《洪興十三妹》時做得不錯架，今次失手了。

　　晚上接住落看了Cameron Diaz金美倫戴雅絲的《There's something about Mary情迷索瑪莉》，典型美國笑片，幾搞笑，整體不過不失，但睇睇下會覺得個男主角做乜黑得咁緊要？全套戲入面既男角又都總會愛上索瑪莉，使唔使咁誇張？（不過我都覺得佢好正）。

　　發覺黎緊的日子，電視會播許多好片子，真好～（我有時間看的話）

07月11日(五)有工返？

　　原本約好和會長姥姥小寶志雄唱Ｋ，怎料朝早臨時收到精品店電話，叫我去2nd in.，有得2nd in.即係話我好有機會啦，雖然佢都幾趕，要我下晝就去，但都立刻答應，以免重覆上次飲恨的事（事緣有人傻更更推了2nd in.的邀約，幸好佢打返黎）。

　　然後推了他們的約會，中午就趕了過去。見到Interviewer，又叫我講返之前工作情況，我想佢都係求其睇下求職者個樣同談吐，沒有甩皮甩骨者就可以，所以講完晒就走得，多餘的一句都冇，淨係話下個星期應該會收到電話話幾時返工。我奇怪，咁我係咪即係有工返？即刻諗，但係我九月有學返的話，咪要蹺起佢囉？死啦，唔知到時可唔可以轉兼職返工呢？我都需要兼職個喎，如果唔係到時邊有錢返學呀？

　　見完只係兩點半，出了尖咀等佢地唱完Ｋ匯合，一路行一路覺得，個人踏實左，因為已經交左申請表（讀HD的申請表），依家又算有工返（算嗎？），個心安落左，冇先幾日咁彷徨，終於可以真心笑得出，開始覺得黑氣正在遠離我，嘻，請祝我Luck。

　　原本約了花花貝貝阿兔同Ada慶花花生日，點知花花外婆忽然入醫院，飯可以遲點吃，正事比較重要，故臨時取消飯局，下星期再續。

07月10日(四)一些睇法

　　一起床就聽到不好的消息，被喻為大災難的巴士意外發生了，看到電視的畫面令我眼眶有點熱，從來，死亡都是件讓人愉快不了的事。

　　自己不是常常搭巴士的人，對巴士也沒特別好感，因為巴士有陣陣油味令我作悶想吐，而且會暈車，所以免得過就免。但很多朋友都很喜歡搭巴士，貪有得坐又唔會好似地鐵咁逼。

　　不過其實生死呢家野，我又信係整定喎，該死唔使病嘛。整定你幾時死，就一定冇走雞，整定你未夠時辰，理得你做乜都死唔去架啦。係生死呢方面，我都幾信命，話我宿命論又好，迷信又好，只要依家覺得自己活得無悔就已經好好（娘到死！）－－但又幾多個人會活得無悔丫，我尋日買對鞋，今日已經後悔啦，無悔喎，講就易，其實計我話有得開心咪笑盡Ｄ囉，開心過都叫好。

　　終於一嘗心願，看到嚷了許久卻沒看到的同性戀小說，小說裡的同性戀是對男的。講真，我絕對認為同性戀是個人選擇，只要你唔影響到人，理得你係乜戀，街頭夠多異性戀的行為比同性戀更不如，個Ｄ先叫人歧視。

　　講返小說，它給我的感覺蠻變態，因為除了是同性戀外，還加埋孌童，有夠嘔心的說，我想我會愛看普通的愛情小說比較多。不過小說裡面和同性戀漫畫一樣，都睇同性戀為一件普通不過的事，起初看漫畫還覺得有點奇怪，會有這樣的世界嗎？但看過小說才知道，原來大部分小說＋漫畫都會有這樣的設定，假如現實世界都是這樣，咪幾好。

07月09日(三)面試記

　　和統籌會長一齊去見工，會長同我都認同這是一個奇怪的組合，我和會長一齊並不出奇，奇就奇在加埋統籌而唔見志雄，都幾搞笑。去到就不斷在等，等派form，等見，點半去到，到三點多才走得。不外是自外介紹，講下強項等題目，但考國語同英文都係第一次。

　　會長再次發揮佢既吹水神功，又淡定，我真的佩服不已。

　　大概九到十人到一齊見，續個自我介紹之後以為走得，點知個interviewer話不如大家講下國語。講國語（國語讀出）？我即刻諗起平時同姥姥會長講笑用既爛鬼核突國語，點要人聽呀？佢比左個題目：不如講下娛樂丫，就講下對雙生兒同祖兒等的睇法。原來自己也不是最差的一個（不過都唔好），說了兩句，見到interviewer有寫低邊個有講野，冇寫邊個講得多，講得好，咁都好Ｄ。

　　然後又話講下英文，佢又比個題目，大概話點為知一個好的Customer Service（呢個情竟好似考緊英文Oral）。會長就用左Bus.的Marketing講：搵what the customer need。咁我當然就接住落，話要有個好的Marketing Plan，其實放下了英文許久（考試後就沒碰過），所有文法都錯晒，但是但啦，肯講已經好好，因為真係有人唔肯出聲。

　　終於講完走得，個interviewer做總結，就話我地冇人有講到自己強項係乜。原來呢樣野真係幾緊要，僱主最想聽既就係呢樣野，我諗下次再有機會面試，之前真係要諗下點講。總括黎講，今次面試我做得唔好，尤其自我介紹個度，完全冇組織，求其講，又詞不達意，我諗佢請我既機會都幾微，但今次都學到野，總算有收獲。

　　見完，冇地方去，一齊去左批發中心行街，因為統籌係度，同會長都冇乜睇衫，怕佢會悶。佢忽然話想唱Ｋ，即刻打去問價錢，好耐未試過呢個時間去唱Ｋ，原來都幾貴（以平日我地唱開午餐Ｋ的價錢黎講），所以我同會長都唔肯。後來走左出旺角再行街（點解我地淨係可以行街？），佢又再提，不如去唱Ｋ，好搞笑，會長話：好貴喎。答：哦。約佢第日唱，佢又話冇左個mood，真係比佢激死。

　　後來佢係六點半到走左，我同會長就行去第二度繼續行（賴死唔返屋企既無聊人），點知行行下，Alex拍一拍會長，久違了的亞歷士，自N年前燒野食後都沒見過，我同會長都好驚訝會見到佢。同他說了幾句，會長就趁機看他的碌，他穿了「波鞋」，第一次見！但其他地方就...不說了。但就因為他說起，我才知道IVE的HD原來有得問政府借錢，唔，我讀書的機會又大ＤＤ了。呢一年，第一次想感謝政府有此德政。

07月08日(二)改碌

　　出了HKCL，已經差不多兩個多禮拜沒有查過貓，今日出開去就查下，因為過了七天，所以一些垃圾貓就給自動掉了，這個設備有好有唔好，掉左Ｄ垃圾貓係好，但就怕會掉埋Ｄ有用既貓而自己唔知，所以都有些少擔心。以為會係個度逗留一陣，點知後來齊人（咪又係姥姥會長同志雄幾個），個個都借書，睇多兩睇，竟然係個度留左三個鐘。

　　志雄今日戴左副新眼鏡出黎，一見到佢，淨係覺得好奇怪。個副係無框眼鏡，鏡片黃色，戴落志雄度唔係咁襯佢，同會長姥姥問佢係佢自己揀定點，佢話係小麟揀既。好明顯，擺明就係小麟跣佢！我地即刻叫佢返屋企打小麟啦，成日咁跣佢。搞到志雄後來話要配過副新既，同埋返屋企開片。鹿死誰手直到我睡覺還未知道，不過我地聽日實會打聽下。

　　因為決定唔買電話住，所以買條褲安慰下自己先，其實仲想買衫，但最後都忍手，唔好意思要佢地等咁耐。比我地乙水到某人係隔離「5厘米」買左兩件衫，改改佢個「碌」，終於都聽到佢話肯染髮（而我想染就死都冇機會），趁得閒改下「碌」咪好囉。

　　然後去左飲野，問起志雄想要什麼生日禮物（其實還有許久才到），佢都未諗到，我同會長就係咁亂講，一時會長話送「玉蒲團」小說（跟返上兩年「金瓶梅」個勢咁去喎），一時我又話送佢老公／婆＋阿咪既寫真集，激到佢淨係識講「唔要呀」。

　　夜晚睇雜誌同招職搵工，見到運動店又請人，叫埋會長一齊去見下，後來諗起統籌曾幾何時都話要搵工，就打埋比佢，結果聽日就係齊齊去搵工日。請我就好了，有兼職做，唔知媽咪會唔會比我繼續讀呢？

07月07日(一)見步行步

　　閒來沒事在家玩Photo Impress，原來頂好玩，整了三張相，其中一張是煩生的，另外兩張是上次一天遊影的照片，純粹實驗，所以整得唔靚，唔打算放係日記（但就會腥比朋友睇，因為煩生個張整得好搞笑）。

　　媽咪夜晚放工返黎，問起細佬今日有冇返學（細佬呢排讀緊個課程）。趁住佢叫開人讀書，就同佢講想讀高級文憑，問佢會唔會供我。佢唔係好想，淨係講左句你想讀又唔比心機讀書，冇比正式答覆我，但我估到答案。

　　呢個反應令我好失望，聽完之後好唔開心，除左因為佢唔比我讀既機會好大之外，仲覺得只係我努力個陣佢見唔到，同埋我又覺得，點解細佬唔想讀，你又咁想佢讀；我想讀，你又唔比我讀，咁樣好唔公平。好唔開心，但其實我知道我已經賺左預科呢兩年，細妹細佬都冇，所以唔可以咁樣計較，但係我真係想繼續讀書。唉，冇錢真的什麼都不成事。

　　事後再想想，還是決定報左先算，到時學校唔收我的話，什麼也不用說了，收我的話，再問多次囉，佢真係唔想先唔讀，唯有見步行步。

07月06日(日)乜都係錢

　　咳醒左，又勁流鼻水，真係慘。

　　到深水土步換了老鼠過後，就到旺腳匯合細妹細佬，細妹話送波鞋比細佬，最後買左波鞋、愛迪達恤衫、袋各一。而我，就乜都冇買，正在行衰運的人，還是別買什麼才好，事後一定會有唔好既結果。但就痴左一餐飯，同係一杯柚子蜜，間舖頭話佢可以止咳化痰，所以就試下，但係杯野係凍既，我認真地懷疑佢得唔得。睇住佢地兩個係咁洗錢，當下有個感覺：同有錢既人出街真係好，尤其係呢個要慳得就慳既時候，買乜都有人比錢。

　　看到想出的電話要成二千九，都幾貴，比得起這個價錢，出部可以影埋相既都仲得，我使乜出你？依個時勢，花花都叫我留返個錢好Ｄ，等搵到野做先出部鍾意既，我都覺得有道理，或者我應該暫時打消出新電話呢個念頭。

　　統籌致電問眾人成績，說了他們的成績，最終要講自己的，有點不好意思，成績差到咁。夜晚再致電給他問理工讀副學士和HD的資料，因為花花說non-jupas的HD即使一個AS也可以讀，但就好似得兼讀，要花的時間要多一倍，我覺得我不能兼顧，所以不會考慮，而且那麼貴，怎能要家裡負擔，自己也會不好意思。我想，未來多數都是出來做事了。但到夜D，同姥姥會長同志雄傾起電話，志雄講起IVE，原來IVE讀HD同我依家學費差唔多，諗諗下，其實都可以考慮，尤其假如我入到兩年制的HD，就好大機會屋企可以負擔。阿兔話：「以前唔知自己咁想讀書」，係真架，我都有同姥姥佢地講：我好想有書讀。

07月05日(六)黑開

　　心情仍然不怎樣好，睡到一點多，花花同貝貝致電來嘈醒，她們在煩惱選什麼課程，有得煩惱選科，真好。

　　好想讀書，好想，卻不能了。

　　一個人真會胡思亂想，在想著想著，又哭了，覺得前路茫茫，還未想好自己的目標，又要出來做事，但，我做得Ｄ乜呀？話自己係中五好定中七好？或者又應該問：我想做Ｄ乜呀？唉。

　　黑開有條路，同細妹去買Mouse，竟然都會買到條短線既，得76cm長，真係激死，要我聽日去換，大熱天時，敏感又發（去Ｋ個一杯累事），真係慘。

　　又傷風又咳，好辛苦。把聲仲沙晒好難聽，即刻落街買左樽念慈菴，好似好左Ｄ，但就唔知係咪心理作用。唔知幾時撞瘀左隻腳，有成4cmＸ4cm咁大，呢排，我真的黑得可以。

07月03&04日放榜了

　　取消了中午同花花阿兔貝貝唱Ｋ，卻沒想到之後更慘烈。

　　和姥姥會長小寶四個晚餐去吃意大利蕃茄暴肥，在地鐵站等會長來到，佢令各位都嚇親，突然換了新髮型，剪短了又染了，嚇到我地都嘩左一聲，佢就係咁笑，話就係想睇我地呢個樣，所以事前乜都唔講。我地都覺得佢呢個新髮型好睇，我尤其喜歡她的挑染。暴肥時間得個半小時，吃得不多，共吃了一個薄餅一個飯三個意粉八件蛋糕，計返正價還要便宜，下次決定去吃的話，就散叫，不再吃那裡的暴肥了，秉成我一貫宗旨：蝕本生意我唔會做。

　　吃完飯就去了九龍灣同花花她們，還有阿斌看《新紮師妹２》，同小說的劇情不同，但有些對白劇情都跟返，比小說和第一集更好笑，但略嫌吳彥祖唔夠戲份，不過勝在全場氣氛很好，好多時也笑到一齊拍手掌，入戲院睇戲最好就係有呢樣野。特別欣賞戲後放映的NG片，尤其肥波（胡楓飾）話啞七（陳萬雷飾）「講乜七」那一段，全段笑到拍爛手掌。看完大家都好開心，都覺得呢集好笑過第一集，但細妹就鍾意第一集多Ｄ。

　　看過戲，花花同貝貝先走，話唔同我地玩通頂，返屋企抖下。然後阿兔阿斌同我到油麻地唱Ｋ，幸好沒有準時到達，都沒有人準時，但其實約佢地就預左。是晚唱Ｋ一共九人，嘈到拆天，後來他們玩幸運骰，黑到死，係咁輸（我懷疑可能個時已經預告左我AL既成績）。因為阿兔知我唔飲得酒，都幫我頂晒，阿斌又幫佢頂，所以全晚都只是喝了一杯。而阿兔鴨仔同姣男飲得最多，又食煙溝埋所以最尾訓晒。就係呢晚，我才知道原來阿斌同羊丸都會食煙，只係平時唔食，好驚奇，識左佢地兩年都唔知。仲好唔小心咁比鴨仔支煙燙到，即刻起水泡，好痛。

　　玩下玩下，玩到朝早六點半，把聲沙晒，都唔知點解，其實我冇乜嗌過，但都聲沙。本來打算去飲早茶，但冇乜人有胃口，就去左肯得雞，食早餐既沒幾多個，好多人都訓晒，時間過得好慢，好耐都未到九點，有Ｄ緊張。

　　等到九點半齊人，返到學校，係課室出面，我地四個都唔敢入去，聽到連劉松都考得唔好，更加嚇到我地卻步。志雄致電來，說對不起師父，但CA有C，都好。後來係一片混亂中拎到成績，得中化合格，其餘三科都當掉，也不知道該有什麼反應好，笑不出來，連副學士都讀不到，有Ｄ前路茫茫既感覺。不敢致電回家，細妹的電話就到了。有一下好想聽到姥姥把聲，但找不到她，就沒有再搖電話了。

　　之後陪佢地去食早餐，坐了一會，去左搵會長，小寶同姥姥後來都來到。小寶的成績是最令我們意外的，但仍有希望入會長個科，佢比我地想像中平靜，我地都放心Ｄ。忽然收到賢姐的MMS，見到佢咁關心自己，終於都忍不住哭了起來，哭到連睫毛液都溶掉了，比姥姥同會長笑我Ｄ眼耳口鼻都係假。好核突，唔敢哭得太久，好快就控制返自己，記憶中他們好像沒看過我哭的，唉，我都唔想哭。

　　小寶問完副學士既資料，我地就去左肯得雞坐，再搵埋志雄同小麟出黎。同小麟講我今日唔開心，要佢煲綠豆沙我食，佢都應承左，今日唔開心既人大晒。志雄自首，話對唔住師父，姥姥就叫佢跪玻璃，最後佢話請姥姥食暴肥補數（當然佢請得就梗係唔只請一個人啦，千萬別忘了他還有其他屋企人，例如妹妹咁）。

　　回到家，很累很累，沖完澡，頭未乾，在沙發睡著了，醒過一陣，又回房繼續睡，不醒人事。

07月02日(三)頂得順冇？

　　電視機壞了兩天，今天有人上來修理，終於都有電視睇。

　　感冒了，做個好乖的病人都好準時吃藥，喉嚨冇咁痛，但有鼻塞，但明天花花她們話去唱Ｋ是困難些少，現在都不知道約成怎樣。去完一天遊，一個二個都病了：阿兔把聲拆晒、花花又頭痛、我感冒未清，但貝貝又想唱Ｋ，點算點算點算？花花同阿兔計過，明天我們共要玩24小時，天呀，好像剛剛才回氣，再來一個24小時，我頂得順冇？

　　後天就放榜，說不緊張是騙人的，但都預左自己考得不會好，起碼死會計一科，中化又沒甚把握，企業又不知自己答成怎樣。同姥姥說笑我要去尋死，姥姥笑說我肯定不會，因為未嫁有錢佬，哈，咁又係。因為成績唔好去尋死，好傻。蝕本生意，我從來都不做。反而有點擔心小寶，她總是給自己太大壓力，由識佢開始，佢驚會考，驚到依家高考，叫她放寬些少，她又放不下，唯有祝福她到時考得滿意。

07月01日(二)曬死一天遊

　　是日除了是回歸紀念的大日子，更是花花阿兔Ada和我一齊去一天遊的大日子。

　　朝早九點在尖咀集合，據說是在鐘樓附近某個好特別既電話亭等。我地都奇怪有幾特別呀！去到鐘樓，搵黎搵去都搵唔到，嘩，咁又真係幾特別喎，「一個搵唔到既電話亭」！後來好在見到旅行社的人在叫人集合，先搵到個個「鐘樓附近某個好特別既電話亭」，先不說它的位置是離鐘樓有幾遠（佢話附近），它特別既地方－－係冇特別，真係激到又好嬲又好笑，個旅行社職員擺明玩野啦。集合完然後就等，等了一會，就見到我地要坐個架船，架船得船頭個幾個位有冷氣。我地入到去就坐冷氣位，明明見到白煙從冷氣機噴出來，但後面的位置竟然吹唔到。

　　坐了半個鐘船，終於黎到行程第一站－－南丫島。落到船又熱又曬，導遊話去睇什麼防空洞，一見到要走成十幾二十分鐘先會到，我地四個都打退堂鼓，寧願影下相睇下其他野好過。等到11:30，吃午飯的時間。這簡直是一天中最美好的時間之一！統共有「八餸一湯白飯任裝」（據同檯阿姨講），飯我們沒吃，餸的味道不錯，湯看不到我們已經走了。餸菜有蒸魚有豉油雞有白灼蝦有肉粒有炒生菜有鮑魚仔（佢地話最貴係呢樣）有東菇＋瓜（唔知叫乜），當然還有會長話食乜餐都會有的咕嚕肉（呢個最好味）。再在碼頭吹一陣風，就話去下個行程－－蒲苔島。而南丫島的行程宣告完結，而我們就什麼都沒看過。

　　再坐半小時船來到蒲苔島，離遠已經看見它有個天后廟，但是上次GR在淺水灣影過個兩輯相，影到個廟，到最後兩部相機兩筒菲林都晒不到，我覺得好邪，都不敢再影有關廟宇的相。導遊又話個度有石佛手有石龜睇，但見到又要行，我地又話唔去，事關天氣真的好熱好曬。因此，在蒲苔島我們只見識到坤記士多的海帶綠豆沙！其實綠豆沙並不好吃（小麟整的好吃得多），但夠凍，也就沒要求太多了。3:15，導遊話夠鐘走，結果，我們在這個蒲苔島行程入面，又是什麼都沒看過（你們去什麼旅行？）。

　　坐成個半鐘船，終於到陸地，腳踏實地的感覺真好。這兩個星期坐的船，比上年加埋總和更多，幸好沒發生什麼不愉快的事（譬如暈船嘔吐）。個導遊叔叔好搞笑，在船上那麼多時間他都要不停說話搞氣氛，他經常就搞gap，但又唔好笑。到最後，就到陸地的時間，他竟然唱起歌來，笑到我地死。我諗做導遊真不是一件易事。

　　先到城市超級下午茶，然後我地再乘車到又一程的Exp吃晚飯，那裡好多人，阿兔佢地要吸煙區，而吸煙區的人吃飽了又不願走，所以我們等了超過半個鐘才可以入坐。叫了一碟意粉，一個薄餅，三個小食（當然包括雞軟骨，到那裡必吃），吃飽了還加兩個甜品。特別推介甜品：紅豆酥＋雪糕球，賣相不好，但好好味。

　　差不多吃到十點我們才願走。中間阿兔還清了一罐細的鬍鬚佬薯片，皆因有人受騙，買了許多零食，去到卻太熱，大家都沒胃口，所以剩下許多。喉嚨又痛，都不知道幾時才可以碰它們。

　　席間，阿兔被改花名：唔曉停，是為她咁多個花名中最好聽的一個。

Top↑