| 2003年8月 | ||||||
| SUN | MON | TUE | WED | THU | FRI | SAT |
| - | - | - | - | - | 01 | 02 |
| 03 | 04 | 05 | 06 | 07 | 08 | 09 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | - | - | - | - | - | - |
|
08月31日(日)散貨好！ |
|
||
衰兔一朝早打黎問我知唔知觀塘開左倉，我話知，又問：你知唔知你張相上左傳單？答：知。然後就係咁笑－－比佢笑。佢即刻話要打比花花講，唉，人真係唔可以做錯事架。夜晚花花又打黎笑，仲話連Bonnie都睇到，問佢個個係咪我，嗚嗚嗚，我都係受人二分四，人地話要影咪影囉，仲要本來唔係影我，阿芝放假先搵我之嘛，好無辜。 頂唔順個兩個新仔，一朝早就開始通場飛去散貨，到下晏三點要頂一頂阿芝先返入去收錢，唔算收左好耐，又再出返去周圍走，可能因為黎左好多新人，佢地唔知頭唔知路，所以個後場都幾亂，忍唔住手執下呢樣又執下個樣。我最鍾意企既浴室區入面，洗衣機袋之前積奇同阿耀執得好整齊，冇去一陣，竟然亂晒。佢地分日本機歐洲機同前置式三種，放佢地個紙盒都好清楚咁寫住，唔知邊個上的貨，竟然將佢地亂放一通，總之同公仔既就放埋一堆堆，激死；毛巾車好比亂葬崗，以前係遮區就話有人睇住，依家放埋一二邊，亂個鬼，怪唔得呢排冇乜賣到浴巾；文具區又亂，大榮去左幾日觀塘，冇人睇住，見到又順手執下（但執得唔仔細）。不過又執得我幾鬼高興，有時Ｄ客又問下野咁，因為之前散過貨，好多都知到位置，今次都答到Ｄ客（以前唔得架，下下都要叫阿飛阿飛，Ｄ乜乜乜放係邊呀），好開心，總之唔使對住佢地就好。 夜晚同阿飛阿Ta出左旺腳，好耐冇見佢地，即刻講個兩個新仔，佢地又講觀塘Ｄ野，原來有人都咁嘔血，仲要比我辛苦，因為佢地做埋Set場，阿飛做野又落力，有乜辦法唔辛苦丫。冼拿話齌：唔識唔緊要，咪教你囉，不過唔好聽完都唔做先得架。可想而知，佢地個場既新仔係點。連糖糖都熱到頂唔順，間中先返入去睇下，其餘時間都走開左，Ｄ貨又多塵，阿Ta洗完手隻手都仲係黑色，要返屋企洗多次，阿飛笑佢：你敢用個度Ｄ水洗？ 問起上次好積極個個新人點，佢地兩個笑住話比糖糖炒左，好唔應該，但我都好想講個句：抵死。
|
|||
|
08月30日(六)吐血新人 |
|
||
新人依舊叫人吐血，對住佢地特別抆憎，差Ｄ想鬧人，阿芝都頂唔順企出遮區Sale客好過。
放工同六六阿芝出左尖咀，六六話I.T.有Final Sale喎，低至二折，雖然入夜，但都好多人，女人買野果然都係不分時間地域既。貨好亂，真係要好仔細先會搵到鍾意既野，自問沒有這份耐心，最尾買左一件秋天薄長袖衫就結帳走，但無可否認Ｄ野真係好平。
|
|||
|
08月29日(五)傳單 |
|
||
繼日前上完報紙後又再有新搞作，今次仲要係周街派的傳單！要命，假如呢張傳單上面加埋張Coupon仲死，拎既人一定多，會長同姥姥率先過目，已經大笑。唔敢諗比其他熟人見到會點，好核突呀！
夜晚去左又一程食飯，先去Log on，打算比返Ｄ相祖兒，點知同事話佢已經冇做，晏些少佢回電，話去左尖咀做文職喎，佢做Ｄ工又幾多完化個喎。無緣見到，Ｄ相又繼續留係我度，掉又唔係，唔掉又唔係，都唔知點搞。 統籌的新碌嚇了我一跳。小麟幫志雄染髮，染得唔夠啡，但比起之前已經好好。
新來的女仔完全不懂用電腦，教到有少少嘔血，但講返又好好笑。家品由六六替阿飛，依家收錢既人越黎越少，好似好靜咁，初初做個時明明好熱鬧架。
|
|||
|
08月28日(四)新場 |
|
||
大部分倉務過晒觀塘Set新場，後場連華姐都過埋去，阿飛做替工，聽日阿飛過埋去，乜人都冇，完全唔知佢地點搞。 放工同飛去旺腳，皆因佢電話仲未用得，要過去嘈間公司，係冇預算情況下，買左件T，又洗左錢，點解我咁忍唔到手架？
糖糖去左新場，沒回來，耳根清靜之餘，Helen仲比我地叫外賣，（但又洗左錢...）換購阿妹又幫我換左垃圾筒，終於都換到，開心死∼唔知呢個情況可以維持幾耐呢？
|
|||
|
08月27日(三) |
|
||
有班新人來Training，又一批，對上個批係港威，今次到觀塘，公司到底要請幾多人架？有Ｄ大師姐既感覺，但其實大家都唔係做左好耐。不過唔係好慣有人企係側跟做野，話就話幫手，其實做開一個人既時候，反而會覺得多個人會阻住自己。其中一個新人特別積極，糖糖後來比佢地開左兩部收銀機既時候，佢就不斷爭住收錢，係爭到Ｄ客企左埋黎都可以叫Ｄ客過去佢個度，又不斷按鐘，冇客都照按，煩到死，連阿Ta都忍唔住叫佢唔好再按，我又叫佢唔好再搶客，佢都可以唔聽。佢個Partner話唔識收錢，可唔可以比佢試一次收錢禁電腦，佢竟然唔肯話唔得喎（？），簡直為之側目。企我側跟個女仔原來係大榮個妹，都唔似樣既，但睇落佢地感情都幾好。 後場自積奇走了以後，得華姐一個，冇晒舊人，舊人都好似集中晒係前面，去後場Check價時，想搵個人問下都問唔到，都幾唔方便。 有台客話要會員杯，但其實會員杯一早換晒，佢又唔理，話公司冇寫明，糖糖又唔係度，最後由阿妹出面比左隻佢，係做呢份工先見識到野蠻既人原來有咁多。
|
|||
|
08月26日(二)交表 |
|
||
一起床立刻就上網把揀科弄好，幫兔交埋，好在完全不難，整個過程也十分順利，感謝∼
下午再同會長出銅鑼灣，小寶去完中山玩，帶了幾盒手信給我們，是杏仁餅，多謝多謝∼ 然後去了城市超級坐，終於吃到洋蔥圈，卻炸得太硬，吃到口都損。
推了同事們，沒去唱Ｋ，慳返不少，可以買多件衫，仲開心，又可以早些回家看《還珠３》。整體來看，個人覺得今集沒上一集來得好看，狄龍做乾隆沒有那種威嚴又慈愛的感覺；福倫的樣子更似一代大奸臣；紫薇又唔靚；小燕子做得還有點生硬；永琪仲係《情深探眼濛濛》中那個何書桓，你諗下何書桓係永琪，幾奇怪！都係睇返小說好過。
|
|||
|
08月25日(一)揀科好煩惱 |
|
||
是晚再開OT，都幾開心，因為做到十一點，補返之前咁早收工。
積奇做埋聽日就唔做，今日就約定聽晚去唱Ｋ，其實答應個下係真係想去，但再想想又覺得咁多人一齊去都係玩多，點會唱到，同埋真係幾大花費，所以還在考慮好不好聽日推掉他們，知道一定比阿飛媽叉，但係比人媽叉好過用晒Ｄ錢唔知去邊喎，我真心的這樣覺得。
終於都到揀科既日子，之前一路擔心會收不到揀科表（因為佢話23號前會收到，但我到今朝才收到），也有打電話去問，但一直都打不通，我想，比我擔心的人更多，也不太急。 夜晚同兔同花花差不多傾到點半才揀好科，其實揀既科和自己當初想的心水完全不同，因為要揀既科都冇位，有既都係兩年制，我入到既機會真係幾微，所以最後千揀萬揀先揀到五個選擇。依家就要擔心上網交表個度喇，對我呢Ｄ電腦白痴黎講，上網搞Ｄ重大既真係幾驚，容乜易入錯野架，然後又要驚放榜驚唔收驚收左冇錢交學費驚唔收唔知做乜好，驚呢樣驚個樣，九百幾樣野要驚，黎緊，我應該都會幾忙。
|
|||
|
08月24日(日)青春 |
|
||
超早收工，冇地方去，早早返屋企食飯，仲可以好舒服咁攤係屋企睇電視，好開心。
看了《六樓后座》，開首非常的「黃真真」式，還帶著點點《女人那話兒》的影子，讓人一看就知道是她的片子，但，只是開首。片子很多情節沒有交代清楚，例如各人的背景；又成班年青人經常聚集在六樓后座開派對，到底是為了什麼？ 除了六個屋主，另外行行企企的簡直數不清有多少個，「樽牢」尤其是特大大大大配角，可有可無，唔知做乜。好在片中笑料還算多，鄧健泓做得還不錯。 特別喜歡片尾導演周圍問人：「青春是什麼？」的一段，好真，有些人略呆一呆才懂得回答，各人的答案也不同。不妨也問問自己：青春是什麼？有哭有笑有血有淚有汗水有大把時間晒的就叫青春？
|
|||
|
08月23日(六)係你員工？ |
|
||
今日放工時間早到唔信，係六點半（？），可能因為糖糖見少左人，所以叫左我同飛收工，有少少愕然，難以置信地看一看錶，六點半，比Promoter還要早，聽日又返晏，我覺得我離博炒又再近一步，佢遲早唔使要咁多人，唔知幾時真正到我呢？姥姥都笑：你比人炒左打比我啦。 即刻幫阿耀買杯，諗住換埋垃圾筒，點知比糖糖望到，即刻話員工唔可以用呢個優惠，仲話以後買野要得佢批淮。喂，你係邊位呀？要得你批淮？我放左工就唔係你員工啦，你理得我？你都神神地既。 放工時係樓下撞到曲髮祖兒，祖兒比佢講左一大堆好令人憤怒既說話話完，最後仲話理得佢去死，激到祖兒勁嬲，係咁爆粗鬧佢，又學佢講野，笑爆咀，全場扮糖糖最神似非祖兒莫屬（這是公認的）。
下晝做做下野，有人走過黎影相，個客都有些少嚇親。冇幾耐，Carman叫左阿芝出去影相，原來又係報紙黎影宣傳相，之前阿芝已經影過一次，我地都有笑佢係Super model。點知冇耐佢又走埋黎叫我出去影，佢叫我拿住幾本薄同File E起棚牙笑到四萬咁口影相，連六六都有影，拿住圍裙影喎，好硬銷，唔知會出邊張，但都幾搞笑。不過話時話，我一Ｄ都唔覺得做呢間公司好威什麼的，所以比人認到都幾核突。
終於一見傳說的『巴士』，飛果然冇落錯車！佢既選擇係正確既，同啤牌做對手喎，比你都唔好要。
|
|||
|
08月22日(五)開OT，好！ |
|
||
是晚要開OT，初初以為話開到十二點，大家都幾開心，因為可以賺多兩個錢，點知十點半就趕人走（係趕女仔，話太夜唔好），平日去街都唔只呢個鐘數啦，不過算數，總算賺左。而且做既野都幾輕鬆，貼下貼紙咁，要寄野比會員叫佢地黎喎。做做下大家都有講有笑，氣氛好到糖糖都在說笑，心情好到爆，但佢既性情咁飄忽，下一刻可能又會黑面，還是不敢惹她。 積奇話阿賢只當飛係兄弟，我忍唔住話：嘩，佢對兄弟會做Ｄ咁既野架咩？佢做得出咁多野，但又話當人兄弟。冇錯，佢一早已經講左唔會鍾意人，但佢又一路做呢Ｄ野，佢想點呀？
姥姥忽然致電說會長有野講，三個EGG成員就傾起電話上黎，呢件事唔可以係度講（點都算係人地既私事），但真係幾好笑。
|
|||
|
08月21日(四)賺多Ｄ |
|
||
又企左出浴室區，糖糖間中有過來巡視，次數卻不多，Helen又沒來上班，所以一整天都很自由，走來走去，客又不多，而且永遠在糖糖出現時問我野，所以今天都沒有被罵。明明七點放工，之後卻脫了圍裙同阿耀兩個周圍逛，夾硬賺多半個鐘錢，比阿耀話算啦，個十幾蚊！咩算呀，公司不仁我不義，何須同佢慳。 放左工同飛，積奇還有遲來的Mandy看手機，事緣黑仔的飛在和Bensier食飯個晚在旺腳被偷手機，因為要等阿六碌咭，所以明天才會買。
會長同姥姥夜晚來電，說起有人追會長的事，聽到小南的大話，好好笑。講起「條野」導演，一致認為他有問題，我還覺得／相信佢係真的神經有問題。同個精神有問題的人一齊做事，都幾驚。
|
|||
|
08月20日(三)少個人 |
|
||
阿Thy的Last day，說要準備開學的東西所以咁早唔做喎，以後側跟少個人，真怕會不習慣。
個場超靜，好在糖糖不在，如果唔係實周圍噴口水。聽日返晏，唔知會唔會又調出去企，假如糖糖在，調我出去的機會應該都幾大。企返浴室區就話冇所謂，如果去換購就慘喇。希望醜既唔靈好既靈啦。
|
|||
|
08月19日(二)知多Ｄ |
|
||
以為今日返去有得開機（但其實都估到機會不大，因為我返晏），點知真係冇，一返到去就比糖糖叫左出去浴室區，都好，總好過企換購，悶到似死魚。 浴室區果然係人氣多Ｄ，問野既茂利都多Ｄ，雖然我仍係一問全不知，但經過一整日既洗禮，好多唔知既野都知左，包括送貨既資料都知埋，呢Ｄ係收銀個邊係未必咁快知既，仲知邊Ｄ貨有邊Ｄ貨冇忝，之前企收銀真係唔會知，而且個度有積奇陪，也不是太悶，加上Helen今日唔係度，糖糖也不是常常過來，少左佢地把聲，耳根清靜得多，也不用怕被罵唔Sale客。七點鐘早早就收工，開心到丫∼比人話：咁早收工好蝕！都唔理。
打比志雄求救，問佢幾時可以上返網，佢又話原本今日去申請，點知落雨，所以冇去，快Ｄ啦，我米舖等佢救命。
|
|||
|
08月18日(一)情迷五號窗 |
|
||
終於有得返去五號窗，我親愛的五號窗，一整天沒碰過它，好掛住。一返到自己個位，寧舍醒神，點會學尋日咁『黑口黑面』。原來現在因為客少，所以每個收銀員也會輪住調出去企，我還以為是因為尋日就快遲到先返去比佢捉到，所以特丁調我出去忝:P。 同華姐買了一條粉晶，很便宜，不過便野冇好野，所以條鍊唔係靚，都幾濁，但幾十蚊一條係咁多，都係買住條玩玩，有錢才買條靚Ｄ既，我目標係靚既黃晶同紅紋石。
飛約了Bensier食晚飯，本來不想去，但後來比阿飛媽叉，還是出去了。想了許久，大伙才想到去女人街食。叫了兩個二人餐，但份量已經夠三個人食，所以我地就七個人分食兩個二人餐，都夠飽，尤其那個汁燒魷魚筒飯好好食，芝士味夠晒濃，下次真係捉阿兔佢地去食先得。
舊的網址死也不讓我開返，新申請的一個不知怎的又開不到，好像所以免費網址都和我作對似的，係呢個時候特別掛住志雄，永遠呢Ｄ麻煩野掉比佢搞就最好，可惜佢仲未上返網。
|
|||
|
08月17日(日)悶死 |
|
||
未試過咁早收工，全天只做了五個半鐘，六點半就放工，開心死（但其實好蝕）。 一返工糖糖已經叫我唔使開機，要我出去遮區幫手，但朝早流流又沒有客，實在擺不出什麼表情出來，後來比糖糖鬧我黑口黑面，塊面仲黑過佢，聽到佢咁講我真係忍唔住笑左出黎，我黑得過佢？我真的黑得過佢？哈，唔好笑死人。然後佢見冇乜客，就叫我去換購區。是但啦，反正企邊都係冇客，企就企。但真係悶到嘔，得個企字，Ｄ貨執完又執，悶悶悶，悶死人。 今日糖糖心情非常地不好（其實經常都唔好），周圍噴人，又成日吹人食快D，阿飛坐低唔夠三分鐘，就比佢鬧，佢真係發神經。 放左工，同飛積奇匯合旺腳的子豪（實Ｑ哥哥），一齊去左食台灣野，味道一般，等埋阿Ta出黎再食埋野，加埋剛剛放工的阿賢，就去左影貼紙相，好久沒有影過，出左好多新款都沒有玩過。影完相，阿飛打兩舖機，係老麥坐一陣，就先走了，晚晚如是，我怕我會捱不住（精神＆錢都係啦）。
|
|||
|
08月16日(六)水晶 |
|
||
早收工，搵華姐睇水晶，佢比左幾條我睇，其中兩條係黃晶，要成七百八百蚊一條，都幾貴，另外還有一條是粉晶，價錢便宜到我嚇了一跳，個Size我都幾岩，但就是有很大的瑕疵，我接受不到，即使它便宜也還是買不下手，最後她說要找找才可以覆我有沒有第二條。 近來好想買條水晶鍊戴，本來想搵埋紅紋石，可是華姐說它太貴，要成千蚊條，所以還是打消這個念頭比較好，平平地買條玩玩就好。
比阿芝笑我今日有工作狂，唔知係咪係辦公室屈得太耐，成日唔停咁做做做。但比起辦公室打電話，我又真係寧願企返出黎，唔係話唔鍾意做辦公室工作，而係覺得打電話工作太悶了，辛苦Ｄ做勞動野好過。
|
|||
|
08月15日(五)送禮 |
|
||
一放完假返去就聽到要Meet quota的壞消息，話要計我地賣左幾個隔油壺榨汁杯同玻璃杯喎，九百幾十樣野要我地寫低，真係低Ｂ架，當我地好得閒？每收一次錢左寫右寫，佢又係咁減人手，點做得切呀？依家又話買滿幾錢有野送，但一時話送，一時又話唔送，兩個上司一個一樣，都唔知聽邊個講好，血都嘔埋。對Ｄ客又唔公平，一Ｄ人有一Ｄ人冇，到時有人知道的話實有投訴。
|
|||
|
08月14日(四)師奶仔出動 |
|
||
有假放，死都係床典到十一點先起身，好耐冇試過，好滿足。
兩點幾約左姥姥會長志雄去行書局搬倉，起初以為搬倉一定好亂，好多書賣，點知去到才發現完全不是那回事，地方光猛明亮又整齊，分分鐘乾淨過我屋企。不過書就認真少，價錢也不特別便宜，所以最終也只買了一本就走了（但都有Mouse pad送）。見到有《還珠３》的寫真集，但都幾貴，計落不是太抵，又不是有很多古生的照片，多方面考慮下，還是沒有買，會長姥姥仲話拎個筆錢去信和買佢既相多多都有，咁又岩既。
夜晚又約左免免花花貝貝Ada係「又一程」食飯，見到個袋幾靚，同花花心郁郁想買，但未決定唔到。後來到食完飯，再去睇多次，諗多兩諗，就係決定唔買住既情形下，撞見祖兒（以前在柏秀做事的男同事），同花花兩個師奶仔一知道祖兒比到九折我地就即刻決定買，係咁比貝貝笑我地Cheap。永遠係呢D時候，我都覺得識多Ｄ人係好事黎既。 比佢地聽到祖兒有搵過我但搵唔到之後，就不斷話佢得，叫我上，真係比佢地兩個激死。
|
|||
|
08月13日(三)我愛收銀 |
|
||
好開心，終於有機會返去做返收銀，經過這幾天才發現我係幾咁掛住佢地，現在才知道Business所說同事之間有溝通會影響士氣係咁解。先前仲有些少擔心會跟唔返D野，但呢個時候Ｄ職業病出返晒黎，一埋位就知自己要講乜，只係跟返些少細節就可以了，做返熟悉既工作，好開心，真係好開心。即使冇外賣叫，冇得抖，要Sale換購，Ｄ客好煩，我成日都係帶住笑容做，好開心∼∼
放工和飛積奇芝Thy同Bonnie出左尖咀，行左陣街，去左一間叫新記的茶餐廳食野，阿Thy的好介紹，食物都OK，但就冇跟餐飲，就咁叫野食就貴左Ｄ。然後又去左「許留單」飲野，Bonnie原來都是傻婆一名，去到飲野勁講笑，可能比人掉左落舖一日，癲左。但個度真係幾辛苦，做到Bonnie食晏時打比阿芝講，仲喊左出黎，聽到都戥佢慘。總之呢間公司都係刻薄啦。
|
|||
|
08月12日(二)為錢囉 |
|
||
做得好辛苦，Ｄ電話好像都打不完似的，不斷打不斷打，做到八點，糖煻沒叫收工，已經好辛苦，到九點，忍唔住走埋去問佢收得工未，佢望一望錶先話收得，已經疊埋心水佢唔比我走的話我即刻話唔做，所以都豁出去，冇得比我抖喎，點得呀。 點知放工時才知明天阿六同耀都係聽日放假，打電話淨返我一個，Helen知左望住我，我個時都幾唔開心，屈左成日，聽日仲要冇人陪，眼都紅埋，話打電話打到想嘔，唔想打，個時就忍唔住好眼淺咁滴眼淚。Helen見我咁慘，就話聽日可以比我返去做收銀一日，唔使打住。其實個時唔想喊咁核突，但個下真係覺得自己幾慘，可能人地會覺得坐係寫字樓咁舒服，做乜唔鍾意，但我覺得真係好悶，做既野又係自己最唔鍾意既，我要做，一早係柏秀做左啦，使乜做三個月就唔做？ 阿六同耀見到我喊，就安慰我唔使喊，睇錢份上！我都明既，做得咁辛苦為乜？為錢囉。
|
|||
|
08月11日(一)沒完沒了 |
|
||
超眼訓的一天，朝早又攝親，心情勁差，在辦公室也忍不住照講粗口，心情唔靚，你炒我都照講，理你去死。
細榮同阿賢一齊被炒，飛唔係咁開心，話如果公司炒埋積奇佢都會唔做，橫豎都就開學，所以即使佢唔比，個個也外賣照叫，理你去死。其實係呢個場，個個都做到有去意，佢令到員工們好冇安全感，假如有第二份工等緊佢地（包括我），我都唔會繼續做呢度。Bonnie話Helen淨係對收銀員好，我都覺得佢對我地幾好，但原來佢都成日鬧出面既Promoter，忽然發覺我地都幾好彩。 問Helen會唔會做完打電話就炒我同六，佢話唔會，我都唔知信唔信好，佢都炒左阿輝啦，雖則阿輝係倉務，但都係冇做打電話之後就即炒啦，都幾恐怖。 阿輝走埋，打電話的工作無了期做下去，沒完沒了。
|
|||
|
08月10日(日)又少咁個 |
|
||
是日返晏，時間係十一點半，其實已經係平日既早，但比起十點，呢個時間已經係晏！ 因為尋晚IC蕉太夜，玩到凌晨三點，太耐冇上去，玩夜一次不過分，但自食其果，中左成日眼訓。
阿May頂唔順話唔做，佢覺得糖糖針對佢（有Ｄ人都覺），話做得唔開心不如唔做，我地都唔知幾時到自己。舊人個批死淨得七七八八，最整齊都算Cashier了，都幾灰。唉，又少個人，佢仲要逼走幾多人先安落呀？
尋日比佢地知左塞電話事件，今日Bonnie即刻話不只我這一單，原來某人有女朋友之餘，仲要漁翁撒網地派電話，我地都覺得好好笑，最緊要係佢個個都唔得丫嘛。
|
|||
|
08月09日(六)遲到 |
|
||
訓過了頭，遲到成個鐘，好在糖糖未返，冇比人鬧。 吃午飯竟然比糖糖走入黎鬧我同六食得耐，話：唔好做Ｄ令我懷疑你地既事。我地都莫明其妙，連輝同耀都一拼鬧埋，都低能架佢！之後我地都慢慢打，Mike臨收工前再整多二百頁我地做，計埋成萬個電話，對住真係欲哭無淚，打到就快痴線。 放工時和飛、芝、Thy去吃東西，竟然玩互爆，大家感覺好像親近了許多，阿飛不斷說好開心，因為阿芝肯講野佢聽，即係相得過佢咁話喎。我都覺得！有人信自己又真係件幾開心既事黎既。
|
|||
|
08月08日(五)好灰 |
|
||
晨咁早起身，好辛苦。 終於上到網，夜晚回到家裡上去查一查貓，始知我地貓箱已經空空如也，Hotmail公司仲要話恭喜我，佢地幫我保留左我既貓箱，血到嘔埋，黑仔得可以。好多值得保留既貓一下子冇晒，好唔開心... 沒完沒了地打電話，打足一日，後來八點半，阿輝阿耀問糖糖走唔走得，因為佢地個Ｄ電話已經打完（其實個度只係公司十萬個會員中既幾千人），點知糖糖鬧到佢地狗血淋頭，佢地後來就走左冇返黎。唔知糖糖係咪知衰，後尾走過黎同我同阿陸講話九點鐘到可以比我地放工，懶好人咁，聽朝咪又係要我地返十點...根本冇分別。 放工阿飛等埋我地一齊去食飯（個傻婆放假都返黎呢度，比我一定唔會），好掛住佢地∼∼好想返過黎收銀度做，但聽阿Ta講呢幾日好煩，又要Sale換購，又要Sale做會員，我都驚我過返黎之後做唔黎。阿飛阿Ta阿陸Jackie同我就一齊出左旺腳食晚飯，諗到冇野好諗，竟然去食老麥（？），我尋日先食完...但佢地好似好想食，咁是但啦，再豪一次！ 今日終於出糧，但因為出票，所以未過戶，個數字好細，我唔係咁滿意，但佢地返計返我地好似真係得咁多，咁冇計啦，鬼叫仲未夠一個月咩，係少Ｄ，好過冇，但依然冇開心既感覺，反正呢筆錢要儲起黎交學費，都唔會我袋晒既，心情：灰灰灰，一片灰。
|
|||
|
08月07日(四)打電話做問卷 |
|
||
第一日入寫字樓做野，感覺一Ｄ都唔好，雖然冇係柏秀個時咁差，但都不遠矣。 原來打電話既工作除左叫會員黎之外，仲做問卷，問返黎過既人對個場點睇，好在個問卷唔長，大部分人都肯做，咁先好Ｄ。如果下下都做唔到，一定比糖糖鬧死。 打左全日電話，由朝早十點，打到夜晚十點，初初又話九點放我地，然後一問糖糖，又話叫我地打多個鐘先，「咁咪可以賺多個鐘錢囉」（佢係咁講，仲要Ｑ咁），即刻同阿陸兩個個樣變晒，但佢依然笑笑口（我有笑裡藏刀既感覺），無奈地，我地兩個只好死死地氣返埋位繼續做，錢真係唔易賺架！ 到最後我地做到十點，問佢聽日返幾點啦，佢又好理所當然地答：聽日返十點囉！嘩，返十放十既日子，仲要繼續？好唔容易捱到收工，糖糖懶開心咁話我地知有個客因為收到我地電話所以黎買左千幾蚊野，問我地：開唔開心呀？係佢面前就當然開心啦，一轉身，阿程就即刻問有冇鐵通，笑死，即刻話立多支比我。 做左全日既結論係：返去做收銀好過！
|
|||
|
08月06日(三)有冇書讀？ |
|
||
近來真是越來越懶，都沒有寫日記，但又如何呢，反正寫來寫去都是這些，生活實在太沉悶，幾時可以放假呀？？？ 今日放工前Helen叫我同阿陸搵佢，話有野要我地幫手。佢初初問過阿芝話邊個想轉長工，又問邊個成熟Ｄ，阿芝話佢好似想搵我，即刻好驚，因為轉長工既意思可能係調落舖。我個人冇乜大志，真係唔想調落去，係特賣場係辛苦Ｄ，但係調落去仲慘，要Meet quota，自問不是做Top sales既好材料，千祈咪搵我。 但好在，後尾先知原來係幫手聽日打電話比Ｄ客（精品店既會員），叫佢地過黎買野，同埋想知佢地冇黎既原因。又係打電話！呢樣野令我諗起係柏秀個份工，個時做得好唔開心，其實明知唔難做，但都有些少怕今次都會係咁。
今日個場水靜河飛，所以糖糖同Helen就多左野講，成朝係咁鬧人，係夜晚先多返Ｄ人，個時佢地就冇乜聲氣。就係晏晝個時，同阿May同四號窗傾左幾句計，咁岩就比糖糖撞到正，比佢叫左我地三個出去幫手（好多Promoter放榜冇返工），雖然有阿飛陪，但我真係唔係好鍾意出去出面，好悶，又唔知頭唔知路，Ｄ客問乜就唔知乜，Ｄ貨放既位置又唔知，又唔識Sale客，後來糖糖走埋黎叫我過去Sale公仔，佢教完我點Sale，一轉背，我就蔑嘴蔑舌，比阿佳見到，佢即刻笑。我驚我有一日會忍唔住出手打糖糖，佢真係好煩。
城大收左志雄，終於了左件心事（佢既心事），咁咪好囉。 就係今日，我係度諗，到底我應唔應該讀IVE，因為學賮問題，我度左好耐都未度掂，好怕讀得第一年又冇錢讀第二年，就算比我搵到兼職，都冇可能搵到三萬幾學費啦（冇資助個時，有資助都二萬幾），唉，好徬徨。
姥姥問我幾時可以上返網，我冇答佢呢個禮拜應該得，淨係話搞緊架喇，因為想搞掂晒Ｄ野先講。首先要開返米舖先啦，無程程比人Cut左；搞完米舖仲要查晒覆晒貓先得，因為積積埋埋好多舊貓其實係未睇清楚；仲想追返以前睇開既網頁，呢Ｄ野如果開住IC蕉同佢地Chat一定做唔到。
呢幾日都一路有人問我：放榜喎，緊唔緊張之類的話。乜我個樣真係咁細咩？其實我覺得我個樣老個喎。
|
|||
|
08月04日(一)食晏 |
|
||
生意OK的一天，不算多人，但一直保持著有客的狀態，做個不停，卻不算很忙，可能是月頭關係，今日買野既人真係豪左，做左好多張單都係大野，阿Ta後來仲做左單成$3500既，都話依家Ｄ人有錢架啦，收埋唔使之嘛。
猩猩生日，同佢講起尋日阿雙約我去Camp的事，我聽來的版本是猩猩會去，但一問之下才發現佢話遲Ｄ先答，不過都冇所謂啦，反正最後都推左，同教會班人去喎，我唔係咁想，有熟人都係咁話，我唔係咁鍾意聽道。
食晏時忽然覺得自己好慘，點解要日日咁捱麵包同杯麵？ 我完全唔可以理解公司唔淮我地叫外賣既理由係乜，又唔係佢比錢，亦唔使麻煩佢地打電話叫，更加唔會影響我地既工作（都係咁輪住食架啦，影咩響者？），咁到底佢點解唔比？而佢地又好抵死地無提供微波爐我地，咁即係想點呢？更加抵死既係主管竟然日日叫外賣不單子，仲要送到黎我地個邊，當住我地面食，真係想打佢。哦，你就係人，人地唔係人？睇住人地痛苦，你就快樂咁話？不如你試下食兩個星期麵包同杯麵丫，睇下你會唔會癲，好唔好？
|
|||
|
08月03日(日)好消息 |
|
||
兩天沒有寫日記，因為實在沒什麼好寫，日子週而復始，來來去去都是工作睡覺吃東西，不特別如意，不特別不如意，好悶，悶到嘔吐。
昨晚同阿飛阿Ta出左旺腳，去左一間日本野度食野，佢地既拉麵話十蚊碗，料唔算多，款式都唔算多，但見十蚊雞：係咁多啦，仲想點？！不過見到隔離街Ｄ炸野，好似吸引Ｄ，好想食好想食，但近排係公司焗到生左好多粒粒，最後都冇食。
返晏，晨咁早起身，為左去拉記上網睇貓，點知佢開唔到IE，Ｎ字頭又唔比我入（電腦白痴完全唔明點解佢唔比我入），到最後明明預約左一個鐘，半個鐘都冇就忍唔住起身走左，激死，早知訓耐Ｄ好過。好在夜晚細妹同Lulu出左旺腳搞上網，最快星期五可以上網喎，呢個都算係好消息，自做到呢份工後，第一件好事。但希望這間公司質素好些少丫唔該。
終於包好晒豬展買返黎既書，但最大既煩惱始終都係空位問題，唔知點執個書架好，最終左質右質，搞到呢度一本個度一本，好混亂。期待心靈的空間大，擁有的實際空間更大，這是我的理想。 終於，志雄有幫我去排簽名，雖然早了半個鐘（我覺得少囉），但都拎唔到籌，名，簽唔到，有失望過，但唔緊要，總有機會。
斷斷續續，終於把《神鵰俠侶》看完，原不想看《倚天》，因為個人都幾討厭張無忌，點知佢又話《倚天》有交待郭襄覺遠九陽真經等人事，我又想睇郭襄，即係要睇啦。
|
|||