| 2003年9月 | ||||||
| SUN | MON | TUE | WED | THU | FRI | SAT |
| - | 01 | 02 | 03 | 04 | 05 | 06 |
| 07 | 08 | 09 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | - | - | - | - |
|
09月30日(二)人大了 |
|
||
約好和花花她們去吃晚飯，有個感覺是大家生疏左，雖然仍舊好像以前一樣有白痴的對話，但是就沒有中學時代那種氣氛了，好想回到那個穿校服的日子，大家都好開心。人大了，煩惱真的特別多。 買了本新的記事本，新的一年，要有個愉快的開始，就由一本記事本做起。是自己喜愛的，看到就歡喜∼ 希望記下的會是愉快的事比較多就好了。
整晚不斷被串買了那條這麼貴的水晶鍊，是很貴，想想也很肉痛，不過是自己喜歡的，沒辦法。下個目標是晶簇和綠幽靈。
大概十一點才到巴黎匯合飛他們，原來所謂的大伙晚餐，來的人也不是很多，打邊爐去不成，結果在巴黎坐了一晚。佳終於去剪頭髮，清爽左，不過就冇咁靚仔。後來巴黎坐不住，又轉到老麥，最好hae的地方永遠在老麥。
肚子不知何故痛了一整日，好橙好橙．．．
|
|||
|
09月29日(一)難得假期 |
|
||
是日放假，恨左好耐終於有假放。一訓就訓到十二點先起身，然後和細佬吃早餐（抑或晏晝？），吃完就去又一程陪姥姥吃飯，坐在Food court等埋會長黎吃東西，再等埋志雄。好耐沒有和大家坐低傾計，今日終於有時間，真係好∼ 本來還想今日看埋下半隻《Funny Face》和其他積積埋埋的VCD、書和雜誌，被姥姥突如其來的電話破壞了全盤計劃，所以打算明天才做。怎料她們又說明晚去BBQ，但想想後天還要早起上班，還是打退堂鼓。 點知飛突然又來電說積奇做發起人說明晚出去玩，下？又出去？佢地出親都玩通頂喎，即刻話唔去，飛又話佢只係聯絡人，第二日都有人要返工，最多早走，唉，都唔知佢地點。跟住花花又來電說明晚一起吃晚飯，這是一早約好的，但現在才確實，這次不可以拒絕了，所以就答應了。第一次咁搶手喎我，發生咩事呀？！
|
|||
|
09月28日(日)新鞋子 |
|
||
下了班和兔逛Sogo，又碰見楊同學，真係去到邊都撞到佢。係屋企附近撞都唔出奇，大家都係住呢度，但係荔枝角返工又撞過，去街又撞過，到黎銅鑼灣返工都撞到的話，真係覺得好邪下！
好衝動咁冇乜點諗就買左對雞雞鞋，著了幾年都是布鞋覺得有點悶了，所以很想換換新款，說想買鞋很久，現在才買到，好開心∼但計一計，呢排洗左好多錢，要慳Ｄ先得喇。
打比會長告知有煩生消息，最新消息是煩生最近的工作是做私家偵探，大家都覺得好好笑，會長話：都唔知講咩好。係工作時間仲比煩生係黃大仙下村捉到個色魔，有人一路話要做個無名英雄，但又一路周圍話人知呢件事，低Ｂ...
|
|||
|
09月27日(六)記性好訓練 |
|
||
飛和積奇上黎探我，一起吃了個飯，以為佢地會走，點知夜晚收工她們仍在銅鑼灣，還約了六六和Ta，又吃飯又影貼紙相，支出好大呀．．． 場內原來有精品店的舊同事，還要飛上來才認得，因為她是觀塘那邊返工的，所以我不太認得，她只見過我一次，她反而記得我，我的記性再一次被沖擊，真的好差。 今天客人很多，還被考驗普通話和英文，雖然在精品店也經常被考，但今次要說的可是完全不同，所以有冒汗的感覺，我的外語果然很爛！有誰可以給我惡補一下？ 鞋的號碼開始記熟，大熱賣出的那些也認得下，還記得有冇Size，可是想到只放埋明天就搬，還會有其他新貨就頭大了，又要記過。
|
|||
|
09月26日(五)探班 |
|
||
第一日上班，第一次真正做Sales，因為是特賣場，所有收入是不會計佣的，所以連阿兔也說不用太落力（事實上，有佣也不是我們賺，因為我們只是兼職，計時薪）。攤位很小，只有八隻船，但就有成六個人看著，員工比客人還要多。今天也不是很多人，所以就更悠閒了，不過就有好多鞋的號碼要記，到收工也未記得熟。但我信我將會把它背熟，在精品店背Code也是如此這般。 時間好漫長，等了許久才放飯，但它比精品店好，好在它有一個鐘食飯（但光是等員工電梯就足以花掉十多分鐘，因時常有飛車立的情況發生），和兔去左員工飯堂吃飯，第一次光顧，那裡的午餐不算貴，白飯和粥任裝之餘還有免費例湯和糖水，和兔Share了個飯，加多杯紅豆冰例湯和糖水，總共不過是廿六元，確係抵！ 飛無程程來電，說我那條紅紋石好靈，又說了些事我知，我都忍唔住笑，佢話佢笑左好耐，我就當笑話聽，笑完就算。那些人，怎可以當真？ 會長和姥姥出開銅鑼灣，上黎探我，佢地真係好，精品店做野又上黎，依家又上黎，但因為Sale緊客，所以佢地行過我面前幾次也看不見，被取笑我真係盲的。 放左工和兔Ada到「小城知味」吃飯，食物味道不錯，價錢還可以接受，下次吃飯可以多個選擇。然後去行街，買了條牛記，因是特價貨沒得試，回家發現有點緊，死火，係時候要戒零食了！（近來真的吃得太多朱古力，幾乎是一日一排）
|
|||
|
09月25日(四)貨好亂 |
|
||
一返去就散貨先，個場比起荔枝角叫冇咁亂，難怪飛話觀塘既人有品好多，話雖如此，架上貨物依然有點亂，但好在它不會時常轉位，所以人們都可以自己查返code的價錢。 放工Helen問我返完Timberland之後點，我話仲想報野讀，但未找到合心水的，佢話不如返落舖做，我就答遲Ｄ先算，仍然覺得Sales的工作不太適合自己，還是喜歡文職比較多。 明天返工，計一計要成七點多起床，好久沒有試過咁早起身，一諗就知會好痛苦。
|
|||
|
09月24日(三)觀塘特賣場 |
|
||
第一次上觀煻特賣場，環境比想像中更大，是收銀那一邊好像不夠光猛，洗手間雖然真的惡劣，但已經比想像中好，冇Bonnie講到咁核突（當然，比起荔枝角還要差上許多）。 工作不很繁忙，只有吃飯時分比較忙一點，但沒有荔枝角般可以在不忙時把工作交給阿茵阿妹，自己去散貨咁自由，而且客人問起什麼都全不知道，都幾核突。 一直企到放工，吃飯也沒有坐過，好在企慣也沒有什麼。奇怪在成個場總共得四個人（包括埋我和Helen），竟然都可以做生意，乜糖糖唔係話有好多人Replace我地咩？！ 放工陪Helen走，佢驚驚青青咁，話個度一熄燈就令佢好驚喎，笑死我。
|
|||
|
09月23日(二)迷上水晶 |
|
||
起床梳洗發覺頸好痛，頭向不到左轉，心知不妙：幣！「訓厲頸」忝！塗了安美露，直到夜晚才好一點，但仍然很痛，嗚嗚嗚。
和飛冼拿喪Pat姐去唱Ｋ（好耐沒唱過Ｋ∼∼），然後去左深水土步看近來迷上的水晶。 看了三間都沒有收獲，又貴又唔靚，到第四間，終於看到心水的，雖然貴了一點，但很喜歡，所以還是忍痛買下來，希望這條紅紋石真的為我帶來好運氣。再看到綠幽靈和黃晶都好美，碧茜也是，可是都好貴，本來還想送給老豆媽咪，還是等出下期糧先算。
到了夜晚，可能它真的有效，Helen竟然致電來叫我返觀塘特賣場，話唔夠收銀。可是之前已經答應了阿兔星期五開始返兼職，所以淨係返到明天後天，點知佢都照叫我返，叫六六返星期六日，至於星期五佢就仲搵緊人，唔知邊個會返到。
某人再來電，談了幾句，說到後來他話送我返工，我拒絕左。因為覺得唔應該比希望佢，有時呢Ｄ野做得決絕些會比較好，姥姥也這麼說，我覺得我今次做得岩，寧願佢呢刻失望左，唔好有左希望才再失望，咁樣會更傷心。我都希望人地咁對我，寧願一開始拒絕左，唔好拖住，最憎晒時間。
|
|||
|
09月22日(一)會怕 |
|
||
和飛出了旺角，成日都唔知做左Ｄ乜，兩個人周圍逛，本來話去買水晶，可是喪Pat姐臨時唔得閒，放唔到學，所以改了明天，有Ｄ GR感覺，又是成日見。
走到聯合，見到阿兒，談了幾句，她說起她男友很容易看見靈界物體的事，令我嚇一嚇，即刻諗起阿程話實Ｑ哥哥看見後場有一個的事，好驚好驚。雖然話平生不作虧心事，半夜敲門也不驚，但是聽見還是會怕。 即使沒有碰見過，但一直都相信有這麼一回事。天下這麼大，有什麼事是自己一定知？所以我不會說一定有或一定冇，總之我信我不得罪它，它也不會犯我。有時，生人可能比它還可怕。
阿錫班人特丁打來問我會不會返觀塘，我說不會，他們成班立刻笑話阿文謝晒。阿文？唔係卦？！
|
|||
|
09月21日(日)最後 |
|
||
特賣場最後一天營業，亦是我在那裡工作的最後一天，冇特別的不捨得，都是這樣做事，亦冇特別落力什麼的，但收工都有問同事們拿電話，都希望可以保持聯絡。 雖然是最後一天，糖糖都冇返黎，客人也不特別多，我想是因為佢地知聖誕都會開的關係吧。唔知公司會不會再找我地回去呢？下個月特賣場會變次貨場，看看到時有冇時間，都想回去看看，探下「親愛既堂堂」也好。
失業了，但沒有感到好徬徨，因為黎緊的星期五開始，仲有阿兔介紹的兼職可以返，雖然淨係返得個多禮拜，但總好過冇，有收入總是好的。有得休息幾日再返工，實在係好呀！
最後都沒有看到想看的人，或者是放棄的時候，一切都只是自己的一廂情願，我該早知道。
|
|||
|
09月20日(六)心情好 |
|
||
好好心情的一日，因為不再是孤孤獨獨地工作，有阿翠有阿芝陪，仲有時間散下貨，唔知係咪關好心情事，連帶覺得今日Ｄ客都冇平日咁煩，好開心好開心∼ 放左工同飛冼拿Ta積奇阿佳阿勇到巴黎食飯，想不到阿佳積奇也知道巴黎，到那裡食飯還是阿佳的提議。可惜那裡的芝士蛋糕已經冇以前咁好味，好失望。大家都傾得好開心，成晚係咁笑，傾傾下原來已經傾到12點，唔知以後仲有冇機會咁樣傾計呢？我估大家唔做呢份工之後，會齊人既機會真係唔多，一ｄ人做野一ｄ人返學，時間都幾難就。一時間都幾唔捨得佢地，第日做野一定唔會好似依家咁好彩，有一班差唔多年紀既同事，可以咁樣玩。 有時都覺得自己幾好彩，第一年做野就識到GR，份工又冇壓力，又唔使受氣；然後一路做野都係有同年紀既同事，亦係冇乜壓力；最唔開心做觀塘，做三個月已經唔做。但諗返起，其實個時都係冇乜受過氣，係自己唔鍾意做打電話所以先冇做；然後到呢份工，係就係辛苦Ｄ，但習慣左之後覺得還可以，又可以識到呢班同事，所以一路以來自己都真係幾好彩，不禁要說一句：Thanks God！
|
|||
|
09月17日(三)放假未呀？ |
|
||
好想放假，好想抖下，放假放假，幾時有得放呀？（其實明知21號打後有排我抖）
今日某人都仲有打黎，都幾意外，以為唔會再接到佢電話，但佢仲有打黎呢下都令我幾欣賞佢，起碼佢唔係一個冇左企圖心就唔同你做朋友既人，抵讚。
|
|||
|
09月16日(二)十分好脾氣 |
|
||
糖糖全日不在，Yoki媽差不多十時才回來，全日勁Free，大家也好開心，仲成日傾計，佢地常常不在就好了。 是日有班客勁煩，連最好人的阿蘇也不禁說佢地：痴線！可想而知煩成點。好在今日心情好（可能因為糖糖不在吧），所以對住佢地都笑笑口，十分好脾氣。
下了班和冼拿喪Pat姐＋飛出尖咀I.T的特賣場，據飛說那裡就是公司之前做特賣場的地方，地點實在有夠奇怪難找，四人轉了許久才找到，中間還被實Ｑ亂指，激到飛冇佢咁好氣。 那裡的貨比較舊，全部都是夏貨（難道會放新貨在這裡賣嗎？用膝蓋想也知道！）所以以一行四人都沒有收獲。好想洗錢的我們不死心的下了樓周圍逛，飛最後在加連威老道買了一頂冷帽和一對Boot，然後在利時冼拿和我分別買了衫和外套，喪Pat買了條褲，齊齊有收獲，都算係咁啦∼
|
|||
|
09月15日(一)拒絕 |
|
||
成班衰野一出糧就發瘋，又買衫又買袋，放左工去左尖咀手袋開倉，冼拿一人買左六個袋，我買了一個。然後冼拿＋飛再係第二間舖頭買左千二蚊衫，做埋VIP。間舖頭個Sales好搞笑，成日串阿飛（講笑地串），原來佢都係做了Sales不久，好在買得多野，如果又煩了他那麼久又沒有買野，真係幾唔好意思。 祖母聽日起一連七日桂林旅行，又冇人煮飯，再一個人睡，不知道我會否不習慣？
今朝某人送我返工，本來到左樓下想開口，點知被阿妹碰見，沒趕得切開口。到了夜晚他來電才開口，正式拒絕了他。拒絕人真係幾難，但又一定要，總之大家也不好受啦。
|
|||
|
09月13 - 14日海祥BBQ |
|
||
是晚和成班同事入屯門BBQ，本來是明晚的事，但要就返星期一返學的同事門，就決定了今晚舉行。想不到到了開學時間，燒野食的人仍有很多，等到夜晚十二點才有爐可以用，還要搭人爐先可以燒，感謝那一爐好心人∼ 家裡做魚市場的換購阿妹真係超好人，提供免費海鮮給我們，BBQ吃海鮮我還真的第一次。好好味呀∼ 玩到凌晨四點，積奇搭阿錫的車子回家，阿Ta阿耀加埋我就一齊遊車河。低B的我因為應承左佢地會返去，所以阿錫架車經過我樓下的時候我也沒有走，事後才後悔，比阿芝話我傻，我也同意，因為佢地後來已經打左黎叫我走。其實本身是暈車底的，但也胡裏胡塗的跟去，幸好他的車子蠻舒服，今次好叻地我沒有暈車，好抵讚。 因為夜深，不想自己坐車回家，所以阿茵、耀、醉了的飛和我一齊去左阿妹家睡，阿妹一個人住，所以不怕不擾到她的家人，上到去我地仲麻雀耍樂，好搞笑。 沒想到有人竟在我最烏where的時候表白，都幾突然，不太懂反應，只是說沒想過和他在這方面有可能，某人有問他有冇機會，我也說不知道，沒有正式回答他，就去睡了，幸好他也沒有追問下去，我想他是給我時間消化吧。 只睡了個多小時就起來，借阿妹浴室洗澡，就一齊返工，耀連傳單也沒有去派，被Helen話，幸好她也體諒我們玩得太夜。十分沒精神的一天，對客人也沒有耐性，黑口黑面（今次我認！），早早便回家大睡，糖糖叫我打電話約客送貨也拒絕了，我一聽到打電話就好驚，又打電話？搞到糖糖最後找飛打，累到飛，唔好意思∼
|
|||
|
09月12日(五)大話公司 |
|
||
阿芝同Bonnie話唔做，糖糖唔比，叫佢地做埋星期六日，所以佢地兩個聽日先返，今日收銀既就只得我一個，到左三點到人很多，都做唔切，搞到排晒大隊，最尾連糖糖都要開機，仲要企正我隔離，壓力都幾大。但今日都不在狀態，好累，諗多兩諗，又決定都係唔做長工，但係睇黎糖糖一定唔肯放過我，因為已經沒有人收銀，但公司又決定延期，話開到21號喎，明明就貼晒海報話絕不加場，講大話。
|
|||
|
09月11日(四)好地方 |
|
||
中秋節快樂∼ 忙了一整天沒停過，因為返貨關係，個場又唔夠人，做死人，累得要死。
是日中秋夜，一放工就出銅鑼灣，本來同台柱＋小麟打算去維園，但係眼見Ｄ人係咁湧向維園，嚇到我地最後都打退堂鼓話打機算。後來去到世貿，人一樣多，轉移陣地去Time Square，點知原來個度間機舖已經摺ed，唯有去後面的條街搵間Cafe坐。走到霎東街，一抬頭就看一間幾有懷舊Feel的樓上Cafe叫「Oldies」，大大個牌寫住營業至凌晨兩點！兩點喎，岩晒我地Ｄ唔肯返屋企既夜鬼，一見到呢個牌，我同會長即刻兩眼發光，仲使講既，梗係即刻上去啦。 個度既氣氛真係幾好，我地傾計一直傾到差唔多兩點。Cafe的侍應都幾親切，一直有問我地覺得Ｄ野飲點，原來佢地都係開左冇耐，連餐牌都未整好，不過勝在氣氛夠好，我地都幾鍾意個度，臨尾侍應仲請全場人吃月餅，除了巴黎，我地又多個好地方Hae。 凌晨三時才回到家，聽日一定唔夠精神開工，死伙。
正式宣告冇書讀，點算？
|
|||
|
09月10日(三)落舖好唔好？ |
|
||
早知公司未必會開門，所以朝早都打去想問定使唔使返工，點知電話沒人聽，沒辦法，唯有死死地氣落樓搭車，點知去到地鐵站真係收到電話話叫我地返兩點。即刻打比姥姥問佢地唱Ｋ時間，可惜夾唔岩，去左CD舖買左隻終於跌價既《八月照相館》返屋企睇，睇到半路爭幾分左就換Ｂ碟，公司又再打黎叫我即刻返去，真係激死。當我地係咩呀？隨傳隨到？最最緊要係佢未出糧丫嘛，出糧呀，幾時出糧呀？已經山窮水盡．．． 咁好啦，又聽佢講即刻出門口，點知返到去又未開門，等左陣，終於話有人開喇。怛開得極不順利，一早就有人走黎換貨，過左成個星期不單只，件貨擺明就係佢用爛，最後交比糖糖同佢拗（當然結果實會換比佢），都懶得理。 下晝四點幾，阿飛同阿Ta忽然上黎探我地，好耐冇係公司見到佢地，勢估不到糖糖咁都唔放過佢地，叫佢地幫手補貨（？），阿Ta好似冇做架喇喎。 埋數個時糖糖心情幾好，同Grace傾計，我「唔覺意」聽到，佢話我地呢班女仔幾好，記得要留返我地Ｄ資料，聖誕請返我地返黎，然後又問我落舖做收銀好唔好。我答佢同屋企商量下先。阿飛就話可以做住先，邊做邊搵工，唔鍾意咪唔做囉，我覺得咁都可以既，但係唔知點解心入面都仲十五十六，唔知做唔做好。如果真係冇書讀，其實做住先真係可以儲下經驗既。想等埋IVE個度有冇書讀先，聽日最後喇，希望有通知啦。
|
|||
|
09月09日(二)搵學校 |
|
||
似極會考撲學校的一天，因又再冇工返，所以約左Bonnie同兔兔去IVE報第三輪，大家都是希望有書讀。剛到樂富地鐵站，阿兔就哭著打來說沒有帶AL的証書出來，即刻返屋企拎，同時叫我自己先去李惠利看看情況。係大熱天時底下，我揀左搭的士去，點知去到已經話工商管理系所有科目都額滿了，立刻叫阿兔不用來。自己亦要由李惠利去觀塘，Bonnie話觀塘有位喎，去到觀塘交完表，等埋阿兔係葵涌（佢去左個度交表）黎到交表離開。整個過程我地都覺得同中五搵學校係冇分別，中五個時我地都冇乜點搵，今次仲辛苦Ｄ忝。 同兔去左尖咀行街，看中一件遮遮衫，可是沒錢買，到底公司想幾時出糧架？
|
|||
|
09月08日(一)憤怒假期 |
|
||
憤怒的一天，尋晚已經知今日要遲返公司，點知當全部人返到去之後才知道直情唔使開工走得，我都唔算最慘個個，因為住得近，其他人好似冼拿阿芝佢地住成元朗同天水圍，幾十蚊車錢，真係蝕死，所以佢地特別嬲。到夜晚海倫打來說明天返兩點，都幾擔心聽日又會案件重演，打比Bonnie同佢講，佢都驚，點知冇耐之後又再打黎話聽日都係唔開，唔使返工，後日先返。心諗：到底你想點呀？忍唔住問其實係咪想炒我地架？佢又話唔係。喂，如果係的話唔該你快Ｄ出聲呀，唔好咁樣拖住我地喎。 終於見識到咩叫大公司，唔使人返工就唔該打個電話黎先啦，上次八號風球已經係咁，OK，上次可以話特發事件，但今次呢？明知個喎，咁樣玩人都有既。 最後同姥姥出左旺角，後尾匯合埋會長去行街，真心的覺得：呢間公司早走早著。
|
|||
|
09月06日(六)復發 |
|
||
嘔血新仔終於冇做，不知道是什麼原因，總之佢冇做就大家開心。連Kitty都唔鍾意佢，佢都幾得。
今日企返入收銀，站了一整天，忙了一整天，吃完晏，有D腸抽筋返發的感覺，都幾擔心。之前已經知道佢既厲害，近排食無定時，都估到遲早有事，但冇諗過係今日，但做得呢份工又一定會係咁，好在剩下既日子唔多者，唔知之後冇得做幾時先搵到野做呢？
放工知阿妹同阿Ｂ會上黎打牌，乘乘機機走去買左個日式芝士蛋糕，美其名係一齊食，實質最想食個個只係自己，就快出糧，就比我放肆下吧。
|
|||
|
09月04日(四)放假天 |
|
||
是日放假，本來還在考慮今個月好不好不放，賺多日，但後來祖兒約食飯，那麼乘乘機機同糖糖講放日假，訓到十一點幾，好滿足∼
夜晚同佢去左海運的California Pizza Kitchen吃飯，之前未去過，所以佢講起既時候我都話唔知係邊，叫佢帶路就算，點知原來係貴野。兩個人食了一個小食一個薄餅一個意粉同兩杯野飯，就咁就三百蚊。 佢請左食飯，之後話睇戲，咁睇戲冇理由又要佢請咁破費，所以就自動請纓話我請。看了Sean Connery辛康納利 、Tony Curan東尼高雲的「League of Extraordinary Gentlemen奇幻兵團」，都幾好看，特技也做得不錯，尤其喜歡唯一女主角Peta Wilson飾演的女吸血殭屍，造型高貴美麗。 看到差不多12點，本來阿飛仲叫我出旺腳陪佢地派傳單，怕冇車搭都冇去到，祖兒送左我返屋企，由好多小事中睇到佢真係幾有紳士風度，呢個年頭已經唔多見（或者只係我身邊冇0者）。
|
|||
|
09月03日(三)傾出禍 |
|
||
今日個場都幾靜，新請返黎個三個Promoter被糖糖捉到正傾計，立即被炒，都幾慘。但其實諗深一層係佢地問題者，有冇人傾計傾到咁，係正條路度圍埋傾，個位一定被捉到正，冇得走。佢地都算好彩，比著係之前既糖糖，一定鬧到飛起。自從開左新場之後唔知仲乜，糖糖一直都心情幾好，冇乜鬧過人，所以Ｄ新仔都唔知佢既厲害，做過呢份工，先真的體會工作的辛苦處。 同糖糖講聽日放假，佢就問我幾時返學，我話冇學返，佢再問不如係度做Sales好唔好。係佢地度做呀，我覺得太辛苦喇，底薪加佣金呢Ｄ工唔係咁岩我，而且又要Meet quota，又要Sales客，係特賣場客串下就話冇所謂，但真正要做要搵食都係唔好搞，所以拒絕左糖糖，佢都冇乜點留，淨係問：驚我鬧你呀？我話：都係架。就咁，份工就決定左做到14號就完喇。
放工搵埋琪去搵雪雪，又平又靚，要介紹多Ｄ人去先得，之後仲去食松記糖水，吃了個幾有豆味的涼粉豆腐花，好味到震∼
|
|||
|
09月02日(二)假期 |
|
||
掛上3號風球，返到公司冇耐，人都未齊，糖糖就打比阿堂話叫人唔使返，幾驚佢要趕我地走，容乜易蝕埋車錢架，但後來又話我同六六可以留底，因為要人收錢。到左大概兩點四改掛八號風球，即時話收工關門，這個風球來勢洶洶，好似幾勁，公司Ｄ人個個都趕住走，未試過放工係咁多人一齊逼地鐵架。 賺了一日假，逗留在家，好舒服。
今日媽咪同老豆都返黎，婆婆的身後事搞定了，速度都幾快。聽到她死時的情形忍不住眼紅紅，但今次忍徥住沒有哭，唔想比人見到我又喊，太醜。所以除了公司阿妹佢地知這事外，也沒有告訴其他人，告訴了又怎樣？Bonnie話：「生離死別既野，時常有。」其實每個人也要經歷，我知即使話比人知都冇用，盞整到人地都陪你唔開心，咁我寧願乜都唔講，笑住對人總是好的。
|
|||
|
09月01日(一)永別 |
|
||
似乎今天是個黑色星期一，先在半睡半醒間驚聞外婆過世的消息，然後黃昏時分知道冇書讀，心情跌落谷底，超Down。返工時一直都眼紅紅，卻沒有掉眼淚，還想會忍得住，怎料回到公司還是忍不住哭了，嚇親換購阿妹佢地，真係太眼淺，要改。 不是第一次經歷生離死別，但這麼親近的一個人，卻是第一次。原來工作真的能平伏心情，沒有收錢，出左去後場幫手執野，成個場好亂，一直執到放工，沒有停過。都冇乜同新仔講野，我怕我會忍唔住發佢老脾，阿芝都出埋黎，大家都鍾意做出面多Ｄ（唔使Sale客個陣），寧願執下野好過。
|
|||