得閒一記
27 / 12 / 2001 (四)
一早起身番學校補Stat...悶到抽筋~之後放左學過就去金鐘換BNO,多人到死,等左幾個鐘先到我,又再一次悶死我喇!晒左D時間!!
26 / 12 / 2001 (三)
今日又去左我最鍾意去o既太古城了~仲買左我睇中左好耐o個件又貴又靚o既衫添!Yeah!好開心呀!!仲有呀,又買左我想食好耐o個件炸天婦蘿~不過都唔係太好食!
25 / 12 / 2001 (二)
聖誕快樂!今日同阿媽,表妹去將軍澳行左勁耐,本來話去尖沙咀,不過累到我冇力行了~
24 / 12 / 2001 (一)
今日係平安夜,夜晚當然又係同o個幾個最FRIEND既行尖咀~我地本來約6點半,點知六點幾就封左路喇,要由科學館行番去五支旗桿,真係吃力!!最搞到七點幾先齊人.跟住我地就去Pizza
Hut等一個鐘位,等位期間我o地又入左玩具反斗城入面玩,一見到塊畫板時,我同大佬就即刻衝過去畫亞細同亞佳o個張咭片相,哈哈...醜化左亞佳,美化左亞細~真係正!!我地畫完仲要拎住幅畫o黎影番張相~不過原來玩具反斗城唔俾影相架!出到去又等左好耐先有得食~哈...又見到Kwong哥哥!!入到去Pizza
Hut我D意見係俾人Ban晒,最後我地係叫左個北京烤鴨批四人餐....亞細叫杯凍咖啡,但係個職員擋左西班牙咖啡咁落單,我地一見到佢杯野有雪糕就即刻叫佢自己加六元,我地同番D職員講,佢地話算數,擋凍咖啡咁計,我地即刻拎隻匙羹狂食佢D雪糕,食到亞細鬧喇~哈哈哈...不過個批就好難食呀!!好似將一D爛肉加乳豬醬整成咁,都唔好食既~~食飽之後我地就去行海旁,點知封左路,要去新世界中心入去海旁...我地一路行一路避開D玩噴雪噴條o既人,好辛苦先行到去鐘樓o個邊等12點...過左12點後,我地就行出去影相,點知行行下有個印度人搵D噴雪對住我地係咁噴,痴線!!!搞到我地個個塊面都中晒招.Sharon仲話一定唔會嫁印度人,呵....真係好笑~到左一點幾o個時,亞細又話應承左亞佳要二點前番到屋企,我地係咁玩佢拖佢時間,要停晌條街度傾計~~之後佢係咁話要番屋企,我地先一齊走!我地一路行一路話佢個"色"字印左晌個額頭,心口掛個"色"字!
P.S.:多謝你地D聖誕禮物~我好鍾意呀!!多謝~
23 / 12 / 2001 (日)
今日我去皇家太平洋酒店飲我堂阿哥結婚o個餐,個個人都著得好靚,不過明顯我就唔係啦!玩新娘新郎o個Part好好睇,好好笑~D野食都唔錯,好特別!!不過如果可以分多D就更加好喇!!遺憾我見唔到......
22 / 12 / 2001 (六)
今日行左兩次新世紀廣場,兩次關合,兩次旺中~成條街都係人,行到好辛苦...
21 / 12 / 2001 (五)
學校o既歌唱比賽好好睇呀!!氣氛勁正!!Vivian送左份聖誕禮物俾我~好開心!!之後行左一陣又一城,一陣新城市廣場...好悶呀!
20 / 12 / 2001 (四)
今日放左學即刻同Vivian趕去睇二OO二,勁好睇呀!!!雖然唔驚,但係好感動呀!!仲好睇過我的野蠻同學...真係好正!!啟示錄好好聽呀!!!
19 / 12 / 2001 (三)
衰人!!!將我D英文同Econ.
notes當垃圾咁掉~豈有此理!!哼.....
16 / 12 / 2001 (日)
突然收到一張聖誕卡,好鬼開心!!今次單睇字跡,我跟本就認唔出係邊個寄俾我.一打開張卡,哦!!原來係我o既小學同學米堅寄黎o既!入面寫左好多字,全部都係講小學時一些關於聖誕卡o既事~我睇番D內容我先記得原來係有D咁既事發生!!原來我係咁乞人憎,你送張你覺得最靚o既聖誕卡俾我,我竟然....搞到你到而家都仲記得,不過我到而家仲有Keep住架~你可以隨時上我屋企睇架~~Thank
You~
14 / 12 / 2001 (五)
今日放學唔知做咩同Sharon,
Amy咁有雅興留晌課室寫"怯:o既歌詞,仲要寫完之後一齊唱出黎~真係無聊!!之後就去左行街,傾計講笑o既時候,我先知原來Amy係咁串架!!句句都串到我地!真係睇錯左佢~哈哈......
12 / 12 / 2001 (三)
本來今日約好同Vivian,
Sharon一齊去唱免費K,點知Full左~我諗都冇諗過之後會話一齊去自修室做功課.不過陪Vivian陪到6點就算啦~~我地去到自修室又係坐滿晒人,仲要一邊搵位一邊俾人係咁望,之後我地就去左新世紀廣場個美食廣場倏功課.一邊食糖,一邊傾計,一邊做功課,好正呀!!好過去自修室D咁靜o既地方~
P.S.:我出年情人節一定會焗到D野食送俾你~
8 / 12 / 2001 (六)
呵......今日行左成日街,累死人喇~今次又係同Sharon出街,我地補完習就去左銅鑼灣行,唔知點解今日冇心行,一邊行一邊諗o野,完全唔係睇o野.我地經過一間叫"神崎"o既髮型屋,我地已經決定左下次要去哩間剪頭髮.哈~唔話你知點解.不過Sharon好衰,竟然話如果我下次唔陪佢去哩間剪頭髮我就要天打雷劈,邊有人咁話自己個Friend架!!好采我都唔弱,如果佢唔陪我去剪頭髮佢就嫁唔出~哈哈....我地之後去左尖沙咀,見到黃秋生,我地笑住話叫佢開部野獸刑警2俾我地拍,仲話要問下佢我地似唔似野獸.哈哈.....到左9點30分我地去左食巴西燒烤,好多野都好好食,不過一入去見到有幾個巴西人晌隔離桌一邊彈結他一邊唱生日歌有D嚇親.整體上都幾好食,唔錯!!!不過我地食到好夜,好采我岩岩趕到最後一班巴士,唔係就...
7 / 12 / 2001 (五)
咁難得先就到時間約大佬同細亞二出黎玩,今日仲唔玩盡佢!雖然冇咩地方好行,剩係行左荷里活商場,但係都幾開心丫!我地一到左就去左Pizza
Hut食Lunch,三個都係叫左吞拿魚縲絲粉,都幾好食~我地傾計傾左成個鐘先走,有時諗番起已前D野真係好好笑.我同大佬埋單o個時叫細亞二唔好俾Tips,細亞二就緊係唔肯啦!不過,我同大佬即走,一定要佢拎足D錢找番俾我地!!哈哈....最後細亞二都係要屈服,唔俾Tips!之後行行下我地就去左影貼紙相,我都有成半年冇影過喇,今次影我同大佬塊面都肥左呀,但係細亞二就冇變過~~跟住細亞二請我地去左食爆谷雞,哈~次次出街都話佢番工賺錢屈佢請我地食野!真係多謝晒喇喎~我下次番工一定會請番你食野o既!歡樂o既時光過得特別快,我地都係時候番屋企喇~不過今日真係玩得好開心,實在有好多好野笑喇~哈...
5 / 12 / 2001 (三)
終於都考完試喇!放左學就即刻同Vivian,
Sharon,菠蘿,無賴去左Green Box唱K.有2個人勁衰呀~~一個全程都唔唱,但就係咁Cut人D歌,另一個就成日都唔俾人唱楊千嬅,好似黎聽歌咁...成日都唔滿意人地唱佢地唔鍾意既歌手~我都未試過唱K唱得咁辛苦!!今次仲要係唱4個鐘,平時又唔見唱得咁多個鐘~真係難頂!之後就各行各路,我同Sharon就去左行街搵布諗住整衫...點知行左好多條街都搵唔到~真係激死人喇!!
4 / 12 / 2001 (二)
計黎計去都係計機會率~計死人喇!!有冇搞錯!計左幾個鐘先溫完一課...搞到我發晒脾氣,一有同學打電話黎就好惡咁鬧人!!又一次溫唔切書喇~一定全科唔合格啦!!
3 / 12 / 2001 (一)
登登登...登~我今日係唔識做Econ.架!算啦~不過今日有人(Sharon)就慘喇!Lunch之後要番去考通識~好彩我冇讀姐!!不過要陪人去自修窒度坐夠鐘同去面譜食Lunch...最衰係D人啦~食食下野夠鐘放低D錢就走人~不過見你叫埋單先走都算啦...車!!原來係要自己出去埋單,等我成個傻仔咁拎住D錢響度等!!玩我~~算啦!!俾人玩開架啦...
2
/ 12 / 2001 (日)
今日屋企剩番我一個人,咁就緊係放肆架啦!!呵呵...溫咩Econ.丫!傾陣計先啦!今日竟然連我平時唔鍾意睇o既哥斯拉都睇埋,可想而知我係幾咁憎Econ.唉!!到左夜晚就唔夠時間讀,14課書好似讀左5課都唔知有冇,其他都係是但睇.你估我聽日識唔識做?
1 / 12 / 2001 (六)
近幾日我都喉嚨痛,Sharon又出緊智慧齒,搞到我地哩排都成日去好好食粥,有時都幾厭架!
今日唔知做咩,我喉嚨痛到聲都沙晒,Sharon又牙肉痛得好緊要,搞到今日響九龍灣補完習又去好好食粥,真係就黎去晒所有好好分店喇!食完野好唔想番屋企,因為好想逃避唔溫Econ...最後行街行到5點幾先番~唉......苦......
背景音樂:
濱崎步o既SEASONS