書中自有顏如玉                        回自講目錄                        

        香港政府甚多所為都令人驚而不喜。而家講呢一件係小學生升中學派位。

        舊年聽講派得好畸形，好多生咗女既家長喺度嘈，話佢哋個女讀書咁叻，但就被派晒去啲渣學校，男生就著數晒。好嘞，今年政府從善如流 ，點知又矯枉過正，將啲男生嚟蹧躓番。初初我都唔係好清楚呢件事既，仲以為係啲男生家長輸打贏要添，直至有一個近親做咗受害者 ，我至深感真係咁離譜。呢個親戚有個仔，個仔都幾乖，年年做班長，成績點都排喺中上，間小學又唔係差，咁人人最保守都以為呢位小朋友點都會被派到二線以上既中學 。勢估唔到不單唔係降到三線，而且仲係類似職業先修學校添：冇中西史，但多咗服裝設計。點解話類似呢，原因就係仲衰過：經打探之下，原來呢間係特殊學校，專收容啲智障兒童 既！呢勻做父母既咪發晒茅囉。佢哋兩公婆喺大熱天時日日拖住個仔周圍咁騰，搵學校、取報名表，晚晚好難至瞓著，一瞌著又發惡夢扎醒 。好彩，第間學校既校長都好鐘意呢個細路，有幾間都愿收佢。而家搞掂咗嘞。

        我都鄧佢哋抺一把汗。我都曾經為呢個細路求過人，嘗試睇吓幫唔幫到佢，但好可惜亦好不巧，我間接識嗰四位校長雖係名校，卻係女校 嚟，唉，唔通叫呢個男仔乜嘢咩！

        事件雖已告一段落，而我仍憤憤不平，耿耿於懷。點解我哋香港人會有個咁既政府，有啲咁既飯桶官員？唔係莘莘學子低B，而係袞袞諸公白癡。冇理由丫 ，無理由啲做官既咁低能嗰噃，係咪我唔識欣賞，唔明政府既苦衷呢？一定係！於是我再朝佢哋好嗰方面諗 。

        而家俾我諗通咗嘞，估到嘞，佢哋係想推行精英制！拿，今年開始，每間中學咪逐漸出現女多男少既局面既？咁即係將會有大把女仔俾啲男生揀做拖友仔 啦，唔使爭 。要爭都係啲女仔為爭男友而群毆隻揪啫。一班之中得十個八個男生，三四十個女生，你話幾咁好呢！呢嗰幾個男生，挑肥揀瘦又得，時肥時瘦 又得，真係好唔得閒，艷福無邊，梳乎到痺。呢啲咁既享受，好多有錢佬都冇呀。之不過咁，呢幾個男生都抵佢哋嘆既，佢哋唔單止聰穎過人，仲好勤力讀書 ，年年全級三甲之內。若然唔係，佢哋都冇間正常既學校肯收丫，喺咪?好似我個親戚個仔咁，中上成績都尚且要被踢去智障學校，咁差過佢少少既，咪要俾人赶入青山囉，再等而下之既 ，咁就要被送入小欖或壁屋嘞。照咁既形勢發展嚟睇，啲家長喺敦促個仔讀書既時候，梗會加多句：衰仔，仲唔好好讀書 ，書中自有顏如玉呀！而嗰啲早熟少少既男生，亦都已風聞入到中學啲過癮嘢，一於發奮讀書！拿，一個學位既問題，一個 乾坤大挪移既手段，咁就令到好多男仔讀書有目標 ，自強不息，產生咗好多精英學生。政府又唔使攞錢出嚟做獎金既，只係靠啲女同學嚟做魚餌之嘛，呢啲就係商人政府所常提既“資源增值”嘞！

        想到施政者既苦心孤詣，我好慚愧，我好無知，我怪錯過佢哋！我提議董家政府要頒個大恥精勳章俾教育局長！

                                                                                                                      不白