勿濫煲手電                  回自講目錄       

        我每每看見有人用手提電話煲粥，就想勸告佢唔好，就算煲都要用Handsfree。但我同佢哋素不相識，咁唐突，後果如何可想而知。

        有關專家早幾年已提出過手提電話通話時會產生電磁波，危及人既身體健康。乜嘢叫電磁波呢？拿，貴府上咪有個微波爐既？你哋都知啦，隊啲嘢入去叮吓，啲嘢咪好快熟囉。我唔係叫你哋塞個頭入去試下，而係話俾你哋知，手電啲電磁波就係令啲肉會熟、蛋會爆呢類嘢嘞。當然，手電啲電磁波比起微波爐嗰啲係小巫見大巫。但唔好忘記，個爐叮一分鐘，杯水就滾噓熱辣，而你將個手電貼喺隻耳邊六十分鐘，咁功效又接近咗好多囉喎。以前傳聞講某某某都係因煲手電粥而返咗舊時嗰度，我起初都唔係咁信，直至有啲唔妥既嘢發生喺自己身上才警惕起嚟，係咪為時已晚都仲未知嫁。我喺早幾年亦曾濫用手提電話，嗰陣和記有個特惠：六十八元一個月任講！哈，咁咪作啲嘢嚟講囉，冇嗰樣講嗰樣囉。我唔係同某一兩個人講得咁長氣，係一日內同二三十人講呀•連和記都誤會我係未來 既大客。鬼唔係咩，月月都講咗五六千分鐘以上呀！冇幾耐，我就開始感覺到右耳痛，尤其係右側睡時半夜都會劇痛至醒。轉去左側睡，又漸漸唔痛嘞。我開始懷疑係同聽手電有關，於是轉用左耳去聽電話啦，點知輪到左耳都痛埋。最舒服係禮拜日晚，因為嗰日唔使用手電丫嘛。咁我確定咗係手電既影響之後，就決定用免提裝置，寧愿論盡啲，同埋喺公眾場合俾人誤會我係自言自語，當我傻佬扮。真係冇事囉喎。不過有時遇啱個Handsfree壞咗，焗住要用手拎住電話聽，咁舊患又即時發作。好嘞,既然流動電話對人身有害，咁唔將佢擺喺耳仔邊度傾偈，而擺喺第二度，即係插喺褲頭褲袋，又對身體嗰附近有冇壞處呢？相信冇人敢話冇既！

         自從手提電話面世，我就好憎啲人一面開車, 一面拎住個電話迷頭迷腦咁喺度傾。咁樣會害死好多人架！呢啲唔用免提裝置既人係好應受到重罰至啱。開車跟著呢啲人既車尾，真係好鬼火滾，睇呢架車既司機開得架車無故時快時慢，左搖右擺，應去不去，不應行時又行，好似飄忽既遊魂，就知呢件嘢正喺度做緊犯法既事─唔用免提講電話。有次我由錦綉花園往元朗，沿途跟住架貨櫃車靠左行。我知前面條友又係講緊電話。果然，喺一個三岔路口前面，前車喺毫無預警下突抽過右邊線，向右 路既大欖隧道口行駛。我跟住佢尾，唔超佢車，就係早就預咗呢啲盲巫會闖大禍架啦，但係喺中線從後飛行緊埋嚟既另一部貨櫃車，就俾佢嚇餐死咯，STOP到輪胎幾乎著曬火，成天都係白煙，仲打橫咗添！而前車呢，就一於好少理，好似乜都冇發生過咁繼續慢慢行。我喺三岔路既左路望吓已在右路既肇事車駕駛室啦，哈，睇到嗰個司機唔單止仍然縮起膊頭夾住個電話喺耳邊傾，仲一隻手拎住支筆一隻手拎住本簿，伏喺盤呔度，撳住頭咁寫緊嘢添！喂，架車係FUNG  FUNG聲行緊個喎！你哋話，如果因此而發生交通傷亡事故，呢條友抵唔抵被拉上大陸打靶 先？